Lungse lun Kraist Akkeye Kut in Akkalemye Pa Lungse
“Jisus, . . . ke el nu lungsel met sral su oasr fwalu, el lungsel elos nu ke safla.”—JON 13:1.
1, 2. (a) Mea ma mwomwo ke lungse lun Jisus? (b) Oiya fuka puspus lun lungse kut fwa lutlutkin ke me lutlut se inge?
JISUS el akkalemye me srikasrak mwomwo ke lungse. Ma nukewa ke moul lal, ke kaskas lal, oiya lal, me luti lal, mise lal, akkalemye ke lungse lal. Ke pal safla ke moul lal fwin fwalu, Jisus el akkalemye lungse nu selos su el osun nu se a yokna nu sin met tuma lutlut nukewa lal.
2 Me srikasrak mwomwo lun Jisus ke lungse el akkalemye ke akwuk fulat su met tuma lutlut nukewa lal elos enenu pa in orekmakin ke moul lalos. Me srikasrak lal el akkeye kut pa in akkalemye lungse inge nu sin met lili wiyesr nukewa, a nu sin met nukewa saye. Ke me lutlut se inge, kut fwa lutlutkin la mea met elder ke congregation elos ku in lotela kel Jisus ke me srikasrak mwomwo in akkalemye lungse nu selos su orala ma koluk, fwinne arlana upa. Kut fwa akuteye pa la fuka lungse lun Jisus el akkeye met Kristian in sang kasru nu sin met lili wiyelos ke pal in ma upa, ke ongoiye, a sun mas upa.
3. Ke Piter el orala ma tafongla upa inge, oiya fuka Jisus el akkalemye nu sel?
3 Ke fong se meet liki Jisus el mise, met sap Piter el lafwekunul ke pal tolu. (Mark 14:66-72) Ne ouinge, ke pal se Piter el folokla, oana ke ma Jisus el fwak tari la el fwa oru, Jisus el sang nunak munas nu sel. Jisus el srusrngilye Piter in oru kunokon yok sripe puspus. (Luk 22:32; Orekma 2:14; 8:14-17; 10:44, 45) Mea kut ku in lotela ke oiya lun Jisus nu sin met puspus su oru ma koluk upa?
Akkalemye Nunak lun Kraist nu sin Met su Orala Ma Koluk
4. Ke oiya fuka met Kristian elos enenu in akkalemye lungse oana ke ma Kraist el akkalemye?
4 Oasr oiya puspus su kut enenu in akkalemye ke nunak mwomwo lun Kraist, ku sie ma su ku in oru kut in arlana asor pa ke ma koluk upa lun sie met in sou lasr ku lun sie met lili ke congregation. Sie me asor meyen ke saflaiyen akwuk lun Setan el arlana apkuran paenang, ngun koluk lun fwalu el akkolukye met pusus elos in moulkin moul fokfok. Oiya koluk lun met puspus lun fwalu ku in kufuskutla, met matou a met fwusr, a akmunasye sulela lasr in oru ma mwo. In century se meet, oasr kutu met Kristian su enenu in sisila liki congregation, a oasr met lili puspus su aksumwosyeyuk. Oiya inge sikyuk pa ke pal inge. (1 Korint 5:11-13; 1 Timote 5:20) Ne ouinge, fwin met elder su oru me aksumwos inge elos akkalemye lungse oana ma Kraist el oru, ma inge ku in sang me akkeye yok nu sin met su oru ma koluk.
5. Fuka met elder elos ku in etawi nunak lun Kraist nu sin met su oru ma koluk?
5 In oana Jisus, met elder elos enenu in sruokye akwuk sumwosmwos lun Jeova pal nukewa. In oru ouinge, elos etawi oiya mwomwo lun Jeova ke fwokpap, kulang, a lungse. Fwin sie met el auliyuk na paye, el “inse musalla” a “toasr in ngun” ke sripen ma koluk lal, tia upa nu sin met elder in ‘aksumwosye sie met su ouinge in ngun lun fwokpap.’ (Sam 34:18; Galetia 6:1) Tusruktu oiya fuka elos fwa akkalemye nu sin sie met su lungse in lain kas in kai a akkalemye la elos tia auliyuk?
6. Mea met elder elos tia enenu in oru fwin elos aksumwosye met orala ma koluk, a efu?
6 Fwin sie met orekma koluk el srunga in long ke kas in kai su tuku ke ma Simusla, ku el sis ma koluk lal nu sin met saye, saap met elder a kutu pa met lili ke congregation elos ku in pulakin toasr ka. Ke sripen elos etu tari ke me akkoluk su met se inge el orala, elos ku in sifwana akkalemye pulakin lalos ke orekma a nunak lun met se inge. Tusruktu, pulakin toasr ku mulat el tia mwo, a tia akkalemye ke “nunak lun Kraist.” (1 Korint 2:16; ridi Jemes 1:19, 20.) Jisus el akkalemye kas in sensen nu sin kutu met in len lal, tusruktu el tia fwak kutena ma ke pusran mulat, ku in aktoasryelos. (1 Piter 2:23) A, ke kas a ke orekma lal, el akkalemye kalem nu sin met orekma koluk la elos ku in auliyuk a sifwil forla nu sin Jeova. Aok, sie sripe yok emeet ke tuku lun Jisus nu fwalu pa in “molela met koluk.”—1 Timote 1:15.
7, 8. Mea ku in kasru met elder fwin elos aksumwosye sie met orala ma koluk?
7 Fuka me srikasrak lun Jisus ka el sang kasru nunak lasr nu selos su fwal in kaiyuk sin congregation? Esam la akwuk lun Baibel nu sin met elder in sang me aksumwos el karungin congregation a ku in mokle sie met orekma koluk in auliyuk. (2 Korint 2:6-8) Sie me asor in liye la kutu met lili elos srunga in auliyuk a oasr ma eneneyuk in siselosla liki congregation. Ne ouinge sie me insemwomwo in etu la oasr met puspus su sisila a tok elos folokla nu sin Jeova a nu ke congregation lal. Fwin met elder elos akkalemye nunak lun Kraist, elos oru nu sin met inge in fusrasr in ekulla inkanek koluk lal a in foloko. Ke pal fwasru, kutu sin met inge su oru ma koluk in pal meeta elos tia ku in esam kas in kai su tuku ke Baibel su met elder elos orekmakin nu selos. Tusruktu elos ku in esam la met elder akkalemye sunak nu selos, a lungse oana Kraist el akkalemye.
8 Ke ma inge, met elder enenu in akkalemye “fwako lun ngun,” yokna ke lungse oana ke Kraist el akkalemye, fwinne met lili el srunga in eis kas in kai su tuku ke ma Simusla. (Galetia 5:22, 23) Elos tia enenu in sa in sisila sie met lili liki congregation. Elos enenu in akkalemye la elos lungse met orala ma koluk in folokla nu sin Jeova. Ke ma inge, fwin sie met orala ma koluk el auliyuk tok, oana met puspus oru, el ku in sang kulo yok nu sin Jeova a nu sin met elder oana “me sang nu sin metu” su oru in fusrasr nu sel in foloko nu ke congregation.—Efesus 4:8, 11, 12.
Akkalemye Lungse oana ke Lungse lun Kraist ke Len Safla Inge
9. Sang me pupulyuk ke Jisus el akkalemye lungse nu sin met tuma lutlut lal su ku in kasrelos.
9 Luk el simusla ke me srikasrak ke lungse lun Jisus. Ke sripen el etu la, ke pal fwal, met meun lun an Rom fwa sang me kalkal in raunela siti lun Jerusalem, in wangin met ku in kaengla liki. Meet liki ma inge sikyak, Jisus el akkalemye lungse nu sin met tuma lutlut lal ke el sang kas in sensen nu selos: “A ke komwos liye un met meun apneni Jerusalem, na komwos in etu tu sikela lal apkuran me.” Mea elos enenu in oru? Jisus el akkalemye nu selos masap su arlana kalem. “Na lela elos su muta in an Judea in kaengla nu fwin eolu, a lela elos su muta in maslo in fwala liki, a elos su muta likin siti in tia utyuk nu lu; tu len inge len in foloksak, tu ma nu kemwa ma simusla fwa akpayeyuk.” (Luk 21:20-22) Tokin met meun lun an Rom elos raunela Jerusalem in 66 C.E., met Kristian su akosten elos porongo masap inge.
10, 11. (a) Fuka in nunku yok ke met Kristian in pal meeta ke elos kaengla liki an Jerusalem ku in kasre kut in akola nu ke “ongoiye lulap”?
10 Ke pal se elos kakaeng liki an Jerusalem, met Kristian elos enenu in akkalemye lungse nu sin sie sin sie oana ke lungse lun Kraist nu selos. Paye la elos enenu in sang kutena ma oasr yurolos nu sin sie sin sie. Tusruktu kas palu lun Jisus inge e fwa oasr me akpayeye su yok liki kunanela lun siti se inge. El palye: “Tu in pal sa a fwa ongoiye lulap, oana tia liyeyuk ke mutamweyen fwalu nu inge, mo, a fwa tia nu tok.” (Mattu 24:17, 18, 21) Meet liki ke pal in “ongoiye lulap” inge su apkuran in sikyak, kut e fwa sun pa ma upa puspus a moul lasr ku in arlana upa. Orekmakin nunak mwomwo lun Kraist fwa kasre kut in muteng ke ongoiye lulap inge.
11 Meet liki a tokin ongoiye lulap, kut enenu in etawi me srikasrak lun Jisus, aok kut enenu in akkalemye lungse paye. Ke sripe se inge, Poul el akkalemye kas in kasru inge: “Lela kut nu kemwa in akinsemwomwoye met tulan in ma mwo in musailosyuk. Tu Kraist oayepa el tia akinsemwomwoyel sifwana . . . Inge God lun mongfusrasr a parak lan sot nu sumwos tu komwos fwa nunak siefwanna nu sin sie sin sie in Kraist Jisus.”—Rom 15:2, 3, 5.
12. Kain in lungse fuka kut enenu in akkeye ke pal inge, a efu?
12 Piter, su liye pa ke lungse lun Jisus, el kaifwe met Kristian in akkeye “lungse paye nu sin met lili” a in akkalemye ‘akosten lalos nu ke ma paye.’ Elos enenu in akkalemye ‘lungse yok sie sin sie ke insielos kewa.’ (1 Piter 1:22) Ke pal inge, kut enenu in akkeye oiya mwomwo inge oana oasr yurin Kraist yok liki pal meeta. Aok oasr tari ma upa puspus nu sin met kulansap nukewa lun God a ma inge yokyokelik. Wangin met Kristian enenu in filiye lulalfongi lal ke kutena akwuk lun fwalu, oana ke ma upa yok su tufwana sikyak ke akwuk lun fwalu ke business a mani el akkalemye. (Ridi 1 Jon 2:15-17.) A, ke saflaiyen akwuk nukewa lun fwalu el apkuran me, kut enenu in akfototoye kut nu sin Jeova a nu sin sie sin sie. A kut enenu pa in akkeye fototo mwomwo lasr nu sin met kawuk lasr ke congregation. Poul el akkalemye kas in kasru inge: “Ke lungse met lili komwos in lung nu sin sie sin sie. Ke sunakin, komwos in akfulatye sie sin sie.” (Rom 12:10) A met sap Piter el akkalemye pa ouinge: “A yok liki ma nu kemwa komwos in lungse sie sin sie, tu lungse afwunye ma koluk puspus.”—1 Piter 4:8.
13-15. Fuka kutu met lili elos akkalemye lungse oana ke lungse lun Kraist tokin sie paka upa sikyak?
13 Fwin fwalu nufon, Met Lo lun Jeova elos eteyuk ke sripen elos akkalemye lungse paye oana ma Kraist el oru. Nunku akmwoye ke Met Lo nukewa su inse mulala in som nu ke sie an fwin an Merika tokin sie paka na fokoko su kunausla loom puspus fwin an we in yea 2005. Ke sripen elos eis me akkeye yok ke lungse lun Jisus, oasr met lili su pus liki 20,000 elos som nu we in kasru. Pus selos som liki loom mwomwo selos a filiye orekma mwo lalos in kasru met lili wiyelos su sun ongoiye.
14 Ke sie an, paka se inge el oru along a sun an metu muta we oasr ke mael 50, a oasr sronot sikyak su arlana loal oasr ke feet 30. Ke pal se sronota srikeni, sie tolu tafwu ke loom nukewa sin metu a kutupa loom lulap musalla na paye. Met Lo puspus su tuku ke an puspus elos us tuku kain in kofwen me musa lalos nu ke an se inge a elos lungse na paye in oru kutena orekma su eneneyuk in orek. Oasr tumulel luo, kewana elos mutan katinmas, elos filiye ma lalos nu ke sitosa soko okwelos a elos kasrusr ke lusen mael 2,000 in sang kasru. Sie selos oru sulela lal in muta na ke an se inge, el srakna wi oru orekma in sang kasru a wi ke u lun regular pioneer we.
15 Pus liki loom 5,600 sin Met Lo a sin kutupa met in an se inge sifwil musaela ku akmwoyeyukla. Mea pulakin lun Met Lo ke lungse yok su akkalemyeyuk nu selos? Sie sin sister wiyesr su loom sel musalla, el orekmakin trailer ku sitosa srisrik okwel elan muta we tusruktu roof ka a stove su oasr ka musalla pa. Met lili elos musaela sie loom sel su mwo a fwal. Ke el tu likin loom sasu sel, el tung meyen el lungse in sang kulo nu sin Jeova a nu sin met lili nukewa. Ke kutupa ma sikyak, oasr Met Lo su musalla loom selos, elos mutana ke loom srisrik su elos orekmakin ke lusen yea se kutu a elos lungse in sano fwinne loom sasu selos sifwil akmwoyeyukla a musaela tari. Efu? Tu met lili nukewa su wi ke orekma in musa ku in orekmakin loom sasu selos. Sie me srikasrak na mwomwo in akkalemye lungse oana ke lungse lun Kraist!
Akkalemye Nunak lun Kraist nu sin Met Mas
16, 17. Ke inkanek fuka kut etawi nunak lun Kraist nu sin met mas nukewa?
16 Tia arla pukanten inmasrlos sun tari ma upa ke sripen paka, kusrusr a noa lulap. Tusruktu kais sie met ku in sun ma upa ke sripen mas, saap mas lal sifwana ku mas lun met in sou lal. Nunak mwomwo lun Jisus nu sin met mas el sie me srikasrak mwomwo nu sesr. Lungse lal oru elan pakomutalos. Ke pal se un met puspus elos wise mas lalos nu yurol, “el akkeyelosla nukewa su mas.”—Mattu 8:16; 14:14.
17 Ke pal inge, wangin yurin met Kristian ke kain in ku lun Jisus inge in akkeyela mas ke inkanek lun mwenmwen. Tusruktu in oana Jisus elos pulakin pa pakomuta nu sin met mas. Elos akkalemye fuka oiya inge? Sie me akpayeye ka, pa met elder elos akkalemye la oasr yurolos nunak mwomwo lun Kraist fwin elos orala akwuk mwomwo a in akpayeye ma inge in kasru met mas nukewa ke congregation. A kafweang in akos akwuk mwomwo su akkalemyeyuk ke ma simusla in Mattu 25:39, 40.a (Ridi.)
18. Sister luo elos akkalemye fuka lungse paye lalos nu sin siepa sister? A mea fwako mwomwo lun orekma lalos inge?
18 Aok, met lili nukewa ku in oru ma mwo nu sin met lili puspus a tia met elder mukena. Nunku kel Charlene, su yea 44 matwe, el sun cancer a taktu el fwak nu selos la oasr len sengoul lula ke moul lal tokin ma inge el fwa mise. Ke sripen Sharon a Nicollete elos etu la el enenu kasru a me karungin su mokul tumal el oru nu sel pal nukewa, paenang sister luo inge elos orekmakin pal lalos in kasrel ke len safla nukewa ke moul lal. Sharon a Nicollete elos akkalemye lungse lalos nu sel Charlene nu ke saflaiyen moul lal. “Arlana upa fwin kom etu la sie met el apkuran na in mise a tia ku in kela ke mas lal,” Sharon el fwak. “Ne ouinge Jeova el oru kut in ku. Experience se inge el oru kut in fototo nu sel a nu sin sie sin sie.” Mokul tumal Charlene el fwak: “Nga a fwa tia mulkunla kulang a me kasru yok lun sister luo inge pal nukewa. Inse paye a nunak mwomwo lalos inge sang me akkeye yok nu sel Charlene in muteng ke me keok safla lal inge, a ase pa me kasru yok nu sik. Nga fwa sang kulo nu selos pal nukewa. Orekma lalos in kisekin pal a ku lalos akkeye lulalfongi luk nu sin Jeova a akkeye pa lungse luk nu ke u lun met lili nukewa.”
19, 20. (a) Oiya fuka limekosr ke nunak mwomwo lun Kraist kut lutlutkin tari? (b) Sulela fuka kom lungse na paye in oru?
19 Ke me lutlut tolu inge, kut lutlutkin tari oiya limekosr ke lungse paye lun Jisus a ke inkanek mwomwo su kut ku in etawi me srikasrak mwo lal ke nunak a orekma lal. Lela kut in akkalemye oiyen “fwokpap a inse pusisel,” oana Jisus el oru. (Mattu 11:29) Lela kut in kafweang pa in akkalemye kulang a oiya mwomwo nu sin met puspus, fwinne kut ku in liye ke oiyen sesumwos lalos a me munas lalos. Lela kut in pulaik in akos masap nukewa lun Jeova, fwinne ke pal se su oasr ma upa a me kalyai puspus.
20 Ma se safla, lela kut in akkalemye lungse oana ke lungse lun Kraist nu sin met lili wiyesr nukewa, oana ke ma Kraist el oru, “nu ke safla.” Kain in lungse paye inge akkalemye la kut met kulansap paye lun Jisus. (Jon 13:1, 34, 35) Aok, “lela lungse [lom] nu sin met lili in onnu.” (Hibru 13:1) Aok akkalemye lungse lom pal nukewa a nikmet fuleak in oru! Akpayeye sulela mwo lom in orekmakin moul lom in kaksakin Jeova a in kasru met puspus! Jeova el fwa akinsemwomwoye orekma mwomwo nukewa lom.
[Footnote]
a Srike liye me lutlut se inge “Oru Orekma Yok Liki Na In Fwak: ‘Kom in Fusrfusr a Kup’” ke October 15, 1986, issue lun Tauer in San ke kas English.
Ya Kom Ku In Akuteye?
• Fuka met elder elos ku in akkalemye nunak lun Kraist nu sin met lili su orala ma koluk?
• Efu ku arlana yok sripe in etawi lungse lun Kraist ke len safla inge?
• Fuka kut ku in akkalemye lungse lun Kraist nu sin met lili su sun mas upa?
[Picture on page 20]
Met elder elos lungse met lili su orala ma koluk in foloko nu sin Jeova
[Picture on page 21]
Ke inkanek fuka met Kristian su kaengla liki an Jerusalem elos etawi nunak mwomwo lun Kraist?
[Picture on page 22]
Met Lo lun Jeova elos eteyuk ke orekma mwo lalos in etawi lungse lun Kraist in kasru met puspus