Saokiyen Me Luti Nukewa lun God

“Paye, nga oekla ma nu kemwa oana ma tula ke mwoiyen etu luk ke Jisus Kraist.”​—FILIPPAI 3:8.

1, 2. Sulela fuka kutu sin met Kristian elos oru, a efu?

KE PAL se Robert el mutawauk in sroang nu ke lutlut a, el arlana sumat a lalmetmet ke lutlut lal. Ke pal se el yea oalkosr matwe, sie sin met luti lal, sie mutan, el tuku nu ke loom sel a fwak nu sel la el ku in akpayeye ma mwomwo puspus ke moul lal. Met luti lal el fwinsrakkin la el fwa kafweang ke lutlut lal a elan ekla sie taktu. Teng mwomwo lal ke el lutlut ke high school oralla in arlana fwal elan ku in sroang nu ke loom lutlut mwo se meet ke mutanfwal sel inge. Met puspus elos nunku ka mu arlana mwo, tusruktu Robert el oru sulela lal in tia sroang nu ke lutlut lulap meyen el lungse in akpayeye niyen sun lal in kulansap oana sie regular pioneer.

² In oana Robert, oasr met Kristian puspus, met matou a met fwusr, oasr pa pal mwomwo lalos in eis ma lane yok ke akwuk puspus lun fwal se inge. Kutu selos oru sulela lalos in tia orekmakin akwuk puspus inge tu elos in ku in akpayeye niyen sun lalos ke orekma in alu nu sin God. (1 Korint 7:29-31) Mea akkeye met Kristian puspus in oana Robert in kafweang yok in oru orekma in sulkakin peng mwo? Elos kafweang yok in sulkakin peng mwo ke sripen elos lungse Jeova God, a elos oru pa ma inge meyen elos kalem pa ka la arlana yok sripe in lutiyuk sel. Ya oasr pal kom muta nunku la mea sikyak ke moul lom fwin kom tia eis etauk ke ma paye? Kut fwin nunku ke me insemwomwo puspus su kut engankin ke pal inge ke sripen Jeova el luti kut ku in kasre kut in aksaokye peng mwo pal nukewa. A ma inge ku in oru kut in arlana moniyuk in akkalemye pa ma inge nu sin met puspus.

Sie Me Insemwomwo Yok in Lutiyuk sin God

3. Efu ku kut ku in lulalfongi la Jeova el lungse in luti metu su sesumwos?

³ Ke sripen el kulang, paenang Jeova el lungse in luti metu. Isaia 54:13 el akkalemye kas palu inge ke met Kristian akmusrala: “A tulik nutum nu kemwa fwa lutiyuk sin Jeova, a misla lun tulik nutum fwa yok.” Kas inge el arlana fwal pa nu sin “sip ngie” nukewa lun Kraist. (Jon 10:16) Ma inge akkalemyeyuk kalem ke sie kas palu su akpayeyuk ke pal lasr inge. Isaia el liye ke sie aruruma met puspus su tuku liki mutanfwal nukewa nu ke alu paye. El palye la elos fwakak nu sin sie sin sie kas inge: “Lela kut in utyuk nu ke eol lun Jeova, nu ke loom sin God lal Jekob; a el fwa luti nu sesr ke inkanek lal, a kut fwa fwasr inkanek lal.” (Isaia 2:1-3) Aok sie me insemwomwo yok in lutiyuk sin God!

4. Mea Jeova el siyuk selos nukewa su el luti?

⁴ Mea kut enenu in oru tu kut ku in eis me luti mwomwo lun Jeova? Sie ma enenu yok pa sie met el enenu in fwokpap a fusrasr in lutiyuk. Devid, met sim lun sam el simusla: “Jeova el mwo a sumwos. . . . El a fwa . . . luti inkanek lal nu sin met fwokpap.” (Sam 25:8, 9) A Jisus el fwak: “Nga sot kulo nu sum, O Papa, Leum lun kosrao a fwalu, tu kom mwukunla ma inge liki met lalmetmet a met lalkung, a fwakak nu sin tulik fwusr.” (Luk 10:21) Ya kom tia kafweang in akfototoye kom nu sin God su “sang lungkulang nu sin met fulpap”?​—1 Piter 5:5.

5. Mea kasre kut in eis etauk ke God?

⁵ Oana met kulansap lun Jeova, ya kut kaksakin kut meyen kut eis etauk ke ma paye ke lalmetmet a ku lasr sifwana? Mo. Meyen kut etu la fwin ke ku lasr a lalmetmet lasr sifwana, kut tia ku in eis etauk ke God. Jisus el fwak: “Wangin sie met ku in fwasru nu yuruk, Papa su supeyume el fwin tia amakunul.” (Jon 6:44) Ke inkanek lun orekma in sulkakin peng mwo a ke ngun mutal, Jeova el amakin a esani met puspus su oana sip u, a akkalemyeyuk oana “ma saok lun mutanfwal nukewa.” (Haggeai 2:7) Ya kom tia sang kulo meyen Jeova el orala inkanek mwo in akfototoye kom nu sin Mwen nutul?​—Ridi Jeremaia 9:23, 24.

Me Luti sin God el Akmwoye Moul lun Met Puspus

6. Mea fwako mwomwo lun orekma lun metu in eis “etauk lun Jeova”?

⁶ Ke kas palu lal Isaia su orekmakin kas in pupulyuk mwomwo su akkalemye ke ekla lun oiyen met puspus su sikyak ke pal lasr inge. Met koluk a sulallel in pal somla elos ekla met mwo su lungse in orek misla. (Ridi Isaia 11:6-9.) Met puspus su srunga sie sin sie in pal meeta ke sripen tia oana sie tun lalos, mutanfwal selos, sruf lalos, elos lotela in tukeni muta ke misla a inse sefwanna ke pal inge. Ke kas in pupulyuk, elos ‘tukye kutlas natulos nu ke plau.’ (Isaia 2:4) Mea sripe paenang oasr ma ekla yok su sikyak kelos inge? Metu elos eis “etauk lun Jeova” a orekmakin ma inge nu ke moul lalos. Fwinne met kulansap lun God elos tia met sumwosmwos, elos orala sie u fwin fwalu nufon oana met lili. Met puspus su lungse in porongo ke peng mwo a ke fwako mwomwo su ma inge orala el me akpayeye na mwomwo a me luti su tuku sin God el arlana yok sripe.​—Mattu 11:19.

7, 8. (a) Mea kutu “ma puspus su oakiyuki ku” su me luti lun God el kasru met puspus in ekulla oiya koluk lalos? (b) Mea akkalemye la me luti paye el ku in sang kaksak nu sin Jeova?

⁷ Met sap Poul el pupulyukkin orekma in luti lun met kulansap lun God nu ke sie meun. El simusla: “Kufwen me meun ma kut orekmakin in meun lasr tia kufwen meun lun fwalu, a kufwen me meun kulana lun God, ma kut orekmakin in kunausla ma puspus su oakiyuki ku. Kut kunausla nunak a kas fulat nukewa su orekmakinyuk in lain etauk lun God.” (2 Korint 10:4, 5, NW) Mea “ma puspus su oakiyuki ku” su me luti lun God el aksukosokyela met puspus ka? Kutu ke ma puspus inge pa me aktoasr lun me luti kikiap puspus, kain in ali alu, a lalmetmet lun met. (Kolosse 2:8) Me luti lun God el kasru metu in sisla orekma koluk puspus a in akkeye oiya mwomwo puspus su ku in akinsemwomwoye God. (1 Korint 6:9-11) Ma inge ku in akmwoye moul in sou. A me luti lun God ku in akkeye fwinsrak mwomwo nu sin met puspus su wangin fwinsrak ke moul lalos. Pa inge kain in etauk a me luti su arlana eneneyuk ke pal inge.

⁸ Sie ke oiya mwomwo su Jeova el kasru met puspus in akkeye pa oaru a paye, oana ke experience toko el akkalemye. (Hibru 13:18) Oasr sie mutan fwin an India el insese in lutlutkin Baibel a tia pat el fwal tari in oru orekma lun met fwakak su soenna baptais. Sie len ke el orekma tari wi un met su musai Kingdom, ke el folokla nu in loom sel, el koneak aa in mwalmwal soko inge su orek ke gold su molin ma inge oasr ke tala oalfoko. Fwinne el sekasrup, el us aa in mwalmwal soko inge nu police station in folokonang nu sin met la ma inge. Met kol lun police el arlana lut ka! Tok kutu, siepa policeman el siyuk sel, “Efu ku kom folokonla aa in mwalmwal soko inge?” El akuteye, “Me luti lun Baibel el kasre yu in ekulla moul luk, paenang ke pal inge nga srike in paye a oaru nu ka.” Policeman se inge el arlana kaksakunul, a el fwak nu sin met elder su wi sister se inge nu ke police station: “Oasr million 38 kutu met ke siti se inge. Fwin kom ku in kasru met sengoul in ekulla moul lalos in oana mutan se inge, ma inge el me kasru na yok.” Kut fwin nunku ke million puspus sin met su akmwoyela tari moul lalos ke kasru lun me luti lun God, paye la oasr sripe mwomwo lasr in sang kaksak nu sin Jeova.

9. Mea ku in kasru metu in ekulla moul lalos?

⁹ Ku yok su tuku ke Kas lun God, wekunang me kasru lun Jeova ke inkanek lun ngun mutal, sang kasru yok nu sin met elos in akkalemye ekla lulap ke moul lalos. (Rom 12:2; Galetia 5:22, 23) Kolosse 3:10 el akkalemye: “A nukomang met sasu su aksasuyeyuk nu ke etauk, oana luman El su orala” ma inge. Kas mwomwo su oasr in Baibel, el ku in akkalemye ma oan na paye ke insien met, a ma inge ku in ekulla inkanek su met el nunku a ke pulakin lal ke ma puspus. (Ridi Hibru 4:12.) Fwin sie met el eis etauk sumwos ke ma Simusla a ke el akfwalye moul lal nu ke akwuk sumwosmwos lun Jeova, el ku in ekla met kawuk lun God a el ku in fwinsrak in moul ma patpat.

Jeova el Akoekutla nu ke Pal Fwasru

10. (a) Efu ku Jeova mukefwanna ku in akoekutla nu ke pal fwasru? (b) Ma ekla lulap fuka fwa sikyak fwin fwalu nufon?

¹⁰ Jeova mukefwanna ku in kasre kut in akola nu ke pal fwasru meyen el etu ke ma su fwa sikyak ke pal na fototo fwasru. El etu ke ma fwa sikyak sin metu ke pal fwasru. (Isaia 46:9, 10) Kas palu lun Baibel el akkalemye la “len lulap lun Jeova el apkuran.” (Zefenaia 1:14) Ke len se inge, kas in Soakas 11:4 fwa akpayeye: “Wangin sripen me kasrup in len in mulat, a sumwosmwos molela liki mise.” Fwin pal fwal el summu tari in orala nununku lun Jeova nu ke akwuk nukewa lal Setan fwin fwalu, ma yok sripe emeet pa fototo mwomwo lasr nu sin God. Mani e fwa wanginla sripe. Aok, Ezikiel 7:19 el akkalemye: “Elos fwa sisla silfer lalos inkaneku, a gold lalos fwa oana sie ma fokfok.” Etauk lasr inge ke ma fwa sikyak ke pal fwasru ku in kasre kut in orala sulela mwomwo ke moul lasr.

11. Mea sie inkanek su me luti lun God el kasre kut in ako nu ke pal fwasru?

¹¹ Sie ke inkanek mwomwo su me luti lun God el akoekutla nu ke tuku lun len lun Jeova pa ke el kasre kut in oakiye ma yok sripe puspus ke moul lasr. Met sap Poul el simusla nu sel Timote: “Kom in sap nu selos su kasrup in fwal se inge, tu elos in tia inse fulat, ku filiye fwinsrak lalos nu fwin ma ekyek oana me kasrup, a in God.” Fwinne kut tia met kasrup, kut ku in eis ma lane yok ke kas in kasru inge lun Baibel. Kut ku in orekmakin ma inge fuka? Kut in tia elosak me kasrup lun fwalu, a kut enenu in kafweang in “oru mwo” a “in kasrup in orekma mwo.” Kut fwin oru meet orekma in kulansap nu sin God ke moul lasr, kut ‘elosak nu sesr sifwana sie pelung mwo nu ke pal se su a fwa tuku.’ (1 Timote 6:17-19) Kain in orekma inge in lafwekun kut sifwana el akkalemye ke nunak mwomwo, meyen Jisus el fwak, “tu ma mwo su nu sin sie met fwin el eis fwalu nufon tu in ma lal, a ngunal tula?” (Mattu 16:26, 27) Ke sripen arlana kalem la len lun Jeova el apkuran na paye, paenang kais sie sesr enenu in siyuk kusensiyuk inge: ‘Oya nga elosak ma saok luk? Ya nga kulansap nu sin God ku nu ke me Kasrup?’​—Mattu 6:19, 20, 24.

12. Efu ku kut tia enenu in akmunasyeyuk fwin oasr kutu met su pulesru orekma lasr in luti peng mwo?

¹² Ma yok sripe se meet ke “orekma mwo” su akkalemyeyuk in Kas lun God nu sin met Kristian pa orekma in luti peng mwo lun Togusrai a in oru met tuma lutlut su ku in molella moul. (Mattu 24:14; 28:19, 20) In oana ke ma sikyak in century se meet, oasr kutu met su pulesru orekma lasr in sulkakin peng mwo. (Ridi 1 Korint 1:18-21.) Tusruktu oiya inge tia ku in akmunasye saokiyen peng mwo su kut sulkakin. A oiya inge lun met puspus tia ku in aksrikyela saokiyen pal mwomwo nu sin met nukewa in filiye lulalfongi ke peng mwo ke srakna oasr pal. (Rom 10:13, 14) Pal nukewa kut kasru met puspus in eis ma lane yok ke me luti lun God, kut fwa eis me insemwomwo puspus.

Jeova el Akinsemwomwoye Met Kulansap Lal Ke Elos Kisekin Moul Lalos

13. Ma fuka Poul el sisla ke pal se el eis peng mwo?

¹³ Meet liki el ekla met Kristian, met sap Poul el eis me akpa a lutlut yok ke akwuk nukewa lun met Ju. Ke pal se el yea 13 kutu, el som liki siti lun an Tarsus nu Jerusalem in lutiyuk sel Gamaliel, sie met luti pengpeng ke Masap. (Orekma 22:3) Tok, Poul el eteyuk la el mwo a sumat liki met nukewa su welul, a fwin el tia som liki alu se inge, el ku in arlana pengpeng ke akwuk lun Judaism. (Galetia 1:13, 14) Ke pal se el eis peng mwo a oru orekma in sulkakin peng mwo, el sisla ma nukewa inge. Ya Poul el auli ke sulela su el oru? Mo. Pa inge ma el simusla: “Paye, nga oekla ma nu kemwa oana ma tula ke mwoiyen etu luk ke Jisus Kraist Leum luk. Ke su ma luk nu kemwa tula liki yu, a nga oekla ma inge oana kutkut, tu nga in eis Kraist.”​—Filippai 3:8.

14, 15. Kut pulakin me insemwomwo puspus fuka oana “met orekma yurin God”?

¹⁴ In oana Poul, met Kristian puspus ke pal inge elos fuleak pa ma puspus ke moul lalos tu elos in sang kasru yok nu ke peng mwo. (Mark 10:29, 30) Ya ma inge oru kut in arlana sekasrup a in oasr ma enenu yok ke moul lasr? Robert, mokul se ma akkalemyeyuk ke mutaweyen me lutlut se inge, el pulakin pa oana ke met puspus elos pula, el fwak: “Nga tia auli ke kutena ma. Orekma luk oana sie pioneer el oru yu in arlana engan a insemwomwo. A ma inge kasre yu in etu a ‘pulakin a liye tu Jeova el mwo.’ Pal nukewa nga kisekin ma saok puspus luk tu nga ku in akpayeye niyen sun luk ke orekma in kulansap nu sin Jeova, el akinsemwomwoye yu ke ma puspus yok liki ma nga kisekinyuk tari. Ke ma inge nga nunku mu wangin kutena ma su nga kisekin ku fuleak, meyen oasr me insemwomwo puspus su nga eis pal nukewa!”​—Sam 34:8; Soakas 10:22.

¹⁵ Kom fwin wi tari ke orekma in sulkakin a luti peng mwo ke kutu pal, wangin alolo ka la oasr pa pal mwomwo lom in pula a liye la Jeova el mwo. Ya oasr pal kom pula kasru lun ngun mutal ke kom akkalemye peng mwo? Ya kom liye tari insemwomwo lun met puspus ke Jeova el ikasla nunak a insielos in loang akmwoye nu ke peng mwo? (Orekma 16:14) Ya Jeova el kasre kom in kutangla liki kutena me kutong, saap el ikasla inkanek in akyokye orekma lom in luti peng mwo? Ya el kasre kom ke pal puspus su oasr ma upa, paenang oru kom in tafwela in kulansap nu sel ke pal se kom pulakin mu wanginla ku lom? (Filippai 4:13) Kut fwin pulakin kasru lun Jeova ke kut akpayeye orekma lasr in sulkakin peng mwo, kut lulalfongi yok nu sel a kut pulakin la kut fototo yok nu sel liki meeta. (Isaia 41:10) Paye la sie me insemwomwo yok kut in “met orekma yurin God” ke kut oru orekma saoklanu in akkalemye me luti lun God nu sin met nukewa.​—1 Korint 3:9.

16. Mea pulakin lom ke kafweang lom a ma nukewa su kom fuleak in sang kasru in luti met puspus ke God?

¹⁶ Oasr met puspus su lungse a fwinsrakkin in akpayeye orekma saok ke lusen moul lalos. Kut liye a akilen la ma puspus su metu akpayeye fwin fwalu ke pal inge arlana sa in mwulkinyukla. Tusruktu, orekma nukewa su met kulansap nukewa lun Jeova oru ke pal inge su sang kasru yok in akmutalye inel fwa oasr pal nukewa ke me sramsram lun met kulansap nukewa lal a tia ku in mwulkinyukla. Orekma nukewa inge fwa esamyuk nu tok ma patpat. (Soakas 10:7; Hibru 6:10) Lela kut in aksaokye kunokon lasr in luti met puspus kel Jeova God, orekma su tia ku in mwulkinyukla.

Kom E Topuk Fuka?

• Mea Jeova el siyuk sin met nukewa su el luti?

• Fuka me luti lun God el akmwoye moul lun met puspus?

• Ke inkanek puspus fuka orekma lasr in luti met puspus ke God ase me insemwomwo yok nu sesr?

[Picture on page 25]

Met nukewa su lutiyuk sin Jeova elos orala sie un met lili fwin fwalu nufon

[Picture on page 26]

Ya tia sie me insemwomwo yok kom in sie sin “met orekma yurin God”?