MWE LUTLUT 05
Bible Uh Pa Kahs luhn God Nuh Sesr
Jeova el acse nuh sesr Bible, sie mwe sang na wowo. Oasr puk 66 kac uh. Tuhsruhktuh sahp kom nuhnkuh: ‘Bible uh oreklac fuhkah? Ma inge tuhkuh sin suc?’ In tohpohklah kihsen siyuck inge, lwelah kuht in ahkuhtweyac lah kahs luhn God ma oasr in Bible tuhkuh fuhkah nuh yohrohsr.
1. Mwet pa suhmuhslah Bible, efuh kuht fahk muh ma inge tuhkuh sin God me?
Bible uh sihmihsyucklac sin mwet 40 kuhtuh. Puk se meet sihmihsyucklac ke yac 3,500 somlah ac puk sahflah ke yac 1,900 kuhtuh somlah ah. Mwet sihm inge tuhkuh ke kain in ohiyac pucspucs. Elos finne tiac oacna sie, ma elos suhmuhslah uh insese nuh sie. Ma inge orek fuhkah? Mweyen kahs ma oasr in Bible ma tuhkuh sin God me. (Riti 1 Thessalonica 2:13.) Mwet sihm inge tiac suhmuhslah nuhnak lalos sifacna. A, elos “kolyuck ke kuh luhn nguhn muhtahl elos fahkwack kahs suc tuhkuh sin God me.”a (2 Peter 1:21) God el orekmakihn nguhn muhtahl lal in ahkkweye ac kololos in suhmuhslah nuhnak lal uh.—2 Timothy 3:16.
2. Suc kuh in eis ma wo ke Bible uh?
“Sruf nuhkewa ac kain in kahs nuhkewa, muhtuhnfacl nuhkewa” kuh in eis ma wo ke pweng wo ma oasr in Bible. (Riti Fwackyuk 14:6.) Ke pacl inge Bible uh oasr ke kahs puhs liki kuhtwena puk sahyac uh. Pwacnacng, apkuhran in mwet nuhkewa kuh in rit Bible, finne tiac oacna sie acn ma elos muhta we ac kahs ma elos kahskahskihn.
3. Jeova el oruh fuhkah tuh Bible uh oasr nuh mihsenge?
Bible uh sihmihsyucklac ke ma pucspucs ma tiac kuh in oan nwe tok, oacna ke kulun kosro ac sahk papyrus. Tuhsruhktuh, mwet suc luhngse Bible uh oraclah copy kac ma arlacna suwohs. Finne oasr mwet kol fuhlwact luhn acn uh ac mwet kol ke alu suc srihke in ahkwacngihnyelah Bible, tuhsruhktuh, oasr kuhtuh mwet suc fihliyac moul lalos nuhke mwe sensen in karihngihn Bible uh. Jeova el tiac lwelah kuhtwena mwet kuh kuhtwena ma in tulokihnilyac in ahkkahlwemye nuhnak lal nuh sesr uh. Bible uh fahk: “Kahs luhn God lasr oan ma pahtpaht.”—Isaiah 40:8.
AHKYOHKYE LUTLUT LOM
Lotwelah lah God el kahsruh fuhkah mukul pucspucs in suhmuhslah Bible, lah fuhkah el karihngihn ma inge, ac lah meac el oruh tuh mwet uh kuh in rit ac lutlutkihn ma inge.
4. Bible uh ahkkahlwemye lah suc Oraclah ma inge
Liye VIDEO se. Tohkohyang riti 2 Timothy 3:16, ac sramsramkihn kihsen siyuck ten inge.
Fin mwet pa suhmuhslah Bible, efuh kuh ma inge pahngohnyuck Kahs luhn God?
Yac kom nuhnkuh muh fal in luhlahlfongiyuck muh God el kuh in ahkkahlwemye nuhnak lal nuh sin mwet sihm uh?
Sie mwet sihm el suhmuhslah lwacta, tuhsruhktuh kahs kac uh tuhkuh sin mwet suc fahk ma inge. Ke ohiyac sepacna inge, mwet uh suhmuhslah Bible tuhsruhktuh kahs kac uh ma tuhkuh sin God me
5. Bible uh karihngihnyuck liki mwet suc luhngse in kuhnahoslah
Ke srihpen Bible uh ma sin God me, el oruh tuh ma inge in oasr nwe ke pacl inge. Muhtwacwacack in pacl meet ah nwe mihsenge, mwet na kuh srihke in kuhnahoslah Bible. Mwet kol luhn alu sruhnga mwet uh in riti. Finne oasr mwe lain ac mwe sensen in misac, oasr mwet pucspucs suc fihliyac moul lalos ke sensen tuh in karihngihn Bible. In lotwelah ke sie mwet inge, liye VIDEO se, ac tohkohyang, sramsramkihn kihsen siyuck inge.
Ke kom etuh ingena ke mwet suc fihliyac moul lalos ke mwe sensen in karihngihn Bible, yac kom luhngse in riti liki na meet ah? Efuh?
Riti Psalm 119:97. Tohkohyang, sramsramkihn kihsen siyuck se inge:
Meac mokle mwet pucspucs inge in fihliyac moul lalos ke mwe sensen in luhngaslah ac kihtaclah Bible?
6. Sie puk nuh sin mwet nuhkewa
Pihsen Bible ma luhngasyucklac ac kihtakatlah puhs liki puk sahyac nuhkewa. Riti Orekma 10:34, 35. Tohkohyang, sramsramkihn kihsen siyuck inge:
Efuh God el luhngse Kahs lal uh in luhngasyucklac ac kihtakatlah nuh sin mwet nuhkewa?
Meac kom luhngse ke Bible uh?
Apkuhran
mwet nuhkewa
fin facluh nohfohn
oasr tari Bible nahtuhlos sifacna ke kahs ma elos kahlwem kac
Oasr tari ke kahs
3,000
kuhtuh
Bible nohfohn kuh ip kac uh
5,000,000,000
Pihsac se ma motkoeyuck muh oreklac,
puhs liki kuhtwena puk sahyac
KUHTUH MWET UH FAHK: “Bible uh sie puk mahtuh muhkwena ma sihmihsyucklac sin mwet uh.”
Meac kom nuhnkuh?
Mwe ahkpwacyeye fuhkah ahkkahlwemye lah Bible uh Kahs luhn God?
MA KUHT LOTWELAH
Bible uh Kahs luhn God, ac El ahkpwacyeye lah mwet nuhkewa kuh in riti ma inge.
Kalweni
Meac kalmac ke kuht fahk muh God el kahsruh mwet uh in suhmuhslah Bible uh?
Meac ahkkweye kom ke oasr na luhn Bible nwe mihsenge, ke kihtakatlah, ac luhngasyucklac?
Meac nuhnak lom ke God ingena ke kom etwaclah lah el oraclah kwacfeacng yok inge in sramsram nuh sum?
LIYE PAC MA INGE
Rit ke mwe sramsram in Bible—ke manuscripts in pacl meet ah nuhke lweng ke pacl inge.
Liye lah fuhkah Bible uh karihngihnyuck liki mwe sensen tolu.
“The Bible—A Story of Survival” (The Watchtower No. 4 2016)
Liye lah fuhkah mwet sahyac uh ahksensenye moul lalos in luhngaslah Bible.
Bible uh oreklac kuh sulpac sihmlac copy ac luhngasyucklac ke pacl pucspucs. Kom kuh in etuh fuhkah lah pweng luhn God uh tiac ikihlyucklac?
“Has the Bible Been Changed or Tampered With?” (Web article)
a In oacna ke ma kuht ac fah lutlutkihn ke Mwe lutlut 07, nguhn muhtahl pa kuh luhn God.