Insemwomwo in Kulansap Fwinne el Sekapas

KE PAL se meet kom liyel Leonardo, saap kom nunku mu el tia ku in wi orekma in musa loom. Meyen pau luo lal wanginla ke sripen musalla ke sie accident su sikyak ke yen in orekma lal. Tusruktu, fwinne el sekapasla Leonardo el wi orekma in musa loom in an Acajutla, El Salvador, oana ke ma kom liye ke petsa.

Leonardo el orala kofwen orekma lal sifwana, elan ku in wi oru orekma in musa loom. El isongye paul nu ke sie wusra in ring su orekla nu ke shovel a lafusak fok nu ke wheelbarrow su orala me lut yok in liye. Oasr sie pa me sru orekla, a el orala ring nu ke me sru lun wheelbarrow inge tu el fwa ku in sifwana patok. Mea moklel na paye in sroang nu ke orekma in musa inge?

Leonardo el lungse in wi orekma in musa Kingdon Hall, ku in orala an in alu lun Met Lo lun Jeova in an selos. Oasr sripe mwomwo lal su ku in paenang elan tia wi orekma in musa inge. Meyen oasr orekma lal pal nukewa su sang kasru in akfwalye ma enenu lal, el sie pa met sekapas, a el kulansap ke congregation oana sie ministerial servant. Fwinne ouinge, el srakna lungse in oru ma el ku in oru nu ke kulansap lal nu sin God a ke orekma lun musa in fwasr na tia tui.

Ya oasr kain in nunak ouinge yurum ke oiyen akwuk in oru kulansap nu sin God? El tia fwak mu el tia ku in wi oru orekma meyen el sekapasla, tusruktu Leonardo el orekmakin nunak mwomwo a lalmetmet lal in sang orala kofwen me orekma lal sifwana tu el fwa ku in oru orekma su upa nu sel in oru. El oru kulansap lal nu sin God ke ‘nunkel kewa.’ (Mattu 22:37) Fwinne kom met sekapas ku tia, kain in met nukewa su wi ke orekma in musai Kingdon Hall puspus lun Met Lo lun Jeova fwin fwalu nufon elos met su oasr nunak paye lalos in kisakunulos yang nu ke orekma in musa inge. Tukeni nu ke meeting nukewa lalos ikakla nu sin met nukewa, a kom sukosok in tuku wi.