Ya Jisus pa God Kulana se?

Me top lun met puspus nu ka:

▪ “Aok, Jisus el God Kulana.”

▪ “Jisus el eteyuk oana God se su ekla nu ke ikwe.”

Mea Jisus el fwak?

▪ “Komwos fwin lungsumwos Nga, komwos fwa engan, meyen Nga som nu yurin Papa, tu Papa el yok liki yu.” (Jon 14:28) Jisus el fwakak kalem la el a Papa tumal tia oana sie.

▪ “Nga somwak nu yurin Papa tumuk, a Papa tumomwos, a God luk a God lomwos.” (Jon 20:17) Jisus el tia fwakul sifwana la el God tusruktu el fwakak kalem la God el siena lukel.

▪ “Nga tia sifwana kaskas keik, a Papa su supeyume el ase nu sik ma sap, ma Nga fwa fwak, a ma Nga fwa kaskas ka.” (Jon 12:49) Me luti lun Jisus tia tuku sel sifwana; a tuku sin Papa me.

JISUS el sifwana fwakulak la el Wen nutin God, a tia God Kulana se. Meyen fwin el pa God, su el pre nu se ke pal se el muta fwin fwalu? (Mattu 14:23; 26:26-29) Kalem la Jisus el tia oru mu el sramsram nu sin kutena met saye!

Ke pal se met tuma lutlut luo lal siyuk sel in sang an selos ke Togusrai lal, el topuk a fwak nu selos: “In muta lepouk leyut, a lepouk lese, tia ma luk in sot, a ma lalos su Papa tumuk el akou nu selos.” (Mattu 20:23) Ya Jisus el kikiap in fwak nu selos la tia ma lal in sang nu selos ma elos siyuk sel? Tia ouinge! Tusruktu, el akuteye nu selos ke inkanek pusisel la God mukena pa ku a sumwos oasr yuru in oru sulela nu ke akwuk ouinge. Jisus el akuteye kalem la oasr kutu ma su el a lipufan nukewa tia ku in etu sayen Papa tumal mukena.​—Mark 13:32.

Ya Jisus el pusisel liki God ke pal se el muta fwin fwalu mukena oana sie met? Mo. Meyen tokin mise a moulyak lal, Jisus el akkalemyeyuk in Baibel la God el yok lukel. Met sap Poul el akesmakinye kut la “God el fulat liki Kraist.” (1 Korint 11:3, Today’s English Version) Baibel el akkalemye la pal fwasru “ke akpusiselyeyuk ma nukewa nu sin Kraist, na Wen el fwa ouyepa sifwana akpusiselyeyuk nu sel, su akpusiselye ma nukewa nu sel; tu God el fwa ma nukewa in ma nukewa.”​—1 Korint 15:28, TEV.

Arlana kalem, la Jisus el tia God Kulana se. Paenang el sramsramkin Papa tumal oana “God luk.”​—Fwakyuk 3:2, 12; 2 Korint 1:3, 4.a

[Footnote]

[Blurb on page 7]

Jisus el fwak la oasr kutu ma su el a lipufan nukewa tia ku in etu sayen Papa tumal mukena