Eis Kalem Yok ke Kunokon Mwomwo lun Jisus ke Akwuk lun God

“Nga inkanek, a paye, a moul. Wangin met tuku nu yurin Papa, fwin tia ke nga.”​—JON 14:6.

1, 2. Efu ku kut enenu in tuni kunokon lun Jisus su wangin ma oana ke akwuk lun God?

KE LUSEN pal loeloes, oasr met puspus su kafweang yok in akkalemye la elos siena a sumat liki met su raunelosla, tusruktu arulana supus met su akpayeye ma inge. Aok oasr met pu na su ku in fwak mu elos siena a wangin ma oana ke inkanek puspus. Tusruktu, Jisus Kraist, su Mwen nutin God, el siena a wangin ma oana ke inkanek puspus.

² Efu ku kut enenu in nunku yok ke kunokon lun Jisus su wangin ma oana? Meyen fototo lasr nu sin Papa tumasr su oasr in kosrao el kupasr nu ka! Jisus el fwak: “Nga inkanek, a paye, a moul. Wangin met tuku nu yurin Papa, fwin tia ke nga.” (Jon 14:6; 17:3) Lela kut in tuni kutu inkanek la Jisus el siena a wangin ma oana. Orekma lasr inge fwa kasre kut yok in aksaokye kunokon lal nu ke akwuk lun God.

“Mwen Sefwanna”

3, 4. (a) Efu ku kut ku in fwak mu wangin ma oana kunokon lal Jisus su oana Mwen sefwanna? (b) Ke inkanek fuka kunokon lal Jisus in orala ma nukewa el wangin ma oana?

³ Jisus el “mwen nutin God.” Pa inge mwal se su Setan el orekmakin nu sel Jisus ke pal se el srifwel. (Mattu 4:3, 6) Oasr pa mwal saye su orekmakinyuk nu sel, a Jisus el pangpang “Mwen sefwanna isusla nutin God.” (Jon 3:16, 18) Kas Grik su lungasyukla nu ke “mwen sefwanna” el akuteyuki oana “ma sefwanna ke u lal, el mukena,” “met sefwanna ke u lal,” ku “wangin ma oana.” Oasr tulik nutin Jeova in ngun su piselos oasr ke foko foko million. Ke ma inge, oiya fuka Jisus el “ma sefwanna nu ke kutena ma ku kutena kain”?

⁴ Jisus el siena a wangin ma oana meyen el mukena pa orekla sumwos sin Papa tumal sifwana. El pa Mwen se meet. Aok, el pa “mwuonsien ma orekla nukewa.” (Kolosse 1:15) El pa “mutamwauk lun ma orekla lun God.” (Fwakyuk 3:14) Kunokon lun Mwen sefwanna inge nu ke ma orekla nukewa el mwo a oayepa wangin ma oana. Tia el pa Met Orekutla. Tusruktu Jeova el orekmakunul oana inkanek, in orala ma nukewa. (Ridi Jon 1:3.) Met sap Poul el simusla: “Tusruktu nu sesr God sefwanna, Papa tumasr, su sel me ma nukewa a kut nu sel, a sie Leum, Jisus Kraist, kel ma nukewa, a kut kel.”​—1 Korint 8:6.

5. Ke inkanek fuka ma Simusla el akkalemye yok ke inkanek puspus su Jisus el siena a wangin ma oana el?

⁵ Tusruktu, Jisus el siena a wangin ma oana nu ke inkanek puspus saye. Ma Simusla el akuteye ke mwal a kunokon puspus su akkalemyeyuk ke kunokon mwomwo lal nu ke akwuk lun God. Lela kut in tuni ingena mwal a kunokon limekosr oana orekmakinyuk nu sel Jisus ke ma Simusla Mutal su mutamwauk in Mattu nu ke Fwakyuk.

“Kas”

6. Efu ku fwal nu sin Jisus in pangonyuk oana “Kas”?

⁶ Ridi Jon 1:14. Efu ku Jisus el pangpang “Kas”? Mwal se pa inge a el akkalemye ke kunokon se su el oru mutamwauk ke pal lipufan a met puspus elos orekla. Jeova el orekamkin Mwen natul in fwakak me luti a masap lal nu sin lipufan nukewa, a God el orekmakin pa Mwen natul inge in fwakak kas Lal nu sin met fwin fwalu. Me akpayeye la Jisus pa Kas, ku Met Kaskas lun God, el akkalemyeyuk ke ma Kraist el fwak nu sin met Ju puspus su longol: “Me luti luk tia ma luk, a ma lal su supeyume. Kutena met fwin lungsel in oru ma lungse Lal, el fwa etu ke me luti, fwin ma sin God me, ku Nga sifwana kaskas.” (Jon 7:16, 17) Jisus el srakna orekmakin mwal a kunokon inge “Kas lun God” fwinne ke tokin el folokla nu in kosrao in eis mwolanu lal.​—Fwakyuk 19:11, 13, 16.

7. Fuka kut ku in etawi inse pusisel su Jisus el akkalemye ke el oru kunokon lal oana “Kas”?

⁷ Lela kut in nunku ke kalmeyen mwal se inge. Fwinne Jisus el lalmetmet emeet liki ma orekla nukewa lun Jeova, tusruktu el tia fungfung nu ke lalmetmet lal sifwana. El kaskas fwal in oana ke ma Papa tumal el fwakak nu sel. El akfulatye Jeova pal nukewa a el tia akfulatyel sifwana. (Jon 12:50) Sie me srikasrak na mwomwo pa inge nu sesr kut in etawi! Oasr pa kunokon mwomwo su utuku nu sesr in fwakak “mwosasu lun ma mwo.” (Rom 10:15) Orekma lasr in akilen a aksaokye me srikasrak lun Jisus ke inse pusisel el enenu in akkeye kut in tia kaskaskin nunak lasr sifwana. Kut fwin fwakak peng mwo su oasr in ma Simusla su ku in molela moul lun metu, kut tia lungse in “alukela liki ma simusla.”​—1 Korint 4:6.

“El Su Amen”

8, 9. (a) Mea kalmen kas se inge “amen,” a efu ku Jisus el pangpang “El su Amen”? (b) Ke inkanek fuka Jisus el akpayeye kunokon lal oana “Amen”?

⁸ Ridi Fwakyuk 3:14. Efu ku pangonyuk Jisus “El su Amen”? Kas se inge su lungasyukla nu ke “amen” el tuku ke sie kas Hibru su kalme pa “in oinge,” ku “aok.” Kas Hibru saye su kas se inge tuku ka el kalmekin nu ke “in oaru” ku “ku in lulalfongiyuk.” Kas senpana inge el orekmakinyuk in akkalemye ke oiyen oaru a paye lun Jeova. (Duteronomi 7:9; Isaia 49:7) Ke ma inge fuka Jisus el siena a wangin ma oana el ke pal se el akkalemyeyuk oana “El su Amen”? Loang akmwoye nu ke me top su oasr in 2 Korint 1:19, 20: “Tu mwen nutin God, Jisus Kraist, su kut luti nu sumwos . . . , tia Aok a Mo, a in el Aok. Tu mwuleang nu kemwa lun God Aok in el. Ouyepa ke el ‘Amen’ nu ke mwolana lun God.”

⁹ Jisus pa “Amen” nu ke mwulela nukewa lun God. Moul lal fwin fwalu su wangin meta, wekunang mise lal in oana me kise, el sang kasru yok nu ke me akpayeye nu ke mwulela nukewa lun Jeova God. Ke el sruokye oiyen oaru lal, Jisus el akpayeye la sito ma Setan el fwak, su simusyukla in buk lal Job, mu fwin met kulansap lun God elos sun me keok a me srufwe elos fwa som lukel. (Job 1:6-12; 2:2-7) Inmasrlon ma orekla nukewa lun God, Mwen se meet nutin God el ku in sang me top mwomwo nu ke kas kikiap inge. In wekunang, Jisus el sang me akpayeye su mwo emeet in sang kasru sumwos lun Papa tumal in oru kolyuk lal in kosrao a fwalu.

10. Fuka kut ku in etawi Jisus ke kunokon mwomwo lal oana “Amen”?

¹⁰ Fuka kut ku in etawi Jisus ke kunokon lal oana “Amen” su wangin ma oana? Ke kut sruokye oaru lasr nu sin Jeova a sang kasru nu ke kolyuk sumwosmwos lal. In oru oinge, kut akos masap su simusyukla in Soakas 27:11: “Mwen nutik, kom in lalmetmet, a akengunye insiuk, tu nga fwa ku in topkul su angon yu.”

“Met Iumwe lun Sie Mwuleang Sasu”

11, 12. Ke inkanek fuka kunokon lun Jisus inge Met Iumwe el siena a wangin ma oana?

¹¹ Rid 1 Timote 2:5, 6. Jisus el “met iumwe sefwanna inmasrlon God a met.” El pa “met iumwe lun sie mwuleang sasu.” (Hibru 9:15; 12:24) Tusruktu, Moses el sramsramkin pa oana met iumwe, el pa met iumwe nu ke mwuleang lun Masap. (Galetia 3:19) Ke ma inge, ke inkanek fuka kunokon lal Jisus oana Met Iumwe se el siena a wangin ma oana?

¹² Kas Grik su orekmakinyuk in pal meeta su lungayukla oana “met iumwe” el sie kas su orekmakin ke akwuk lun masap. Mwal se inge orekmakinyuk nu sel Jisus oana sie Met Iumwe (ku, ke kalme saye, el sie attorney) nu ke mwuleang sasu su orala inkanek in oasr sie mutanfwal sasu, su pangpang “Israel lun God.” (Galetia 6:16) Mutanfwal se inge el orekla sin met Kristian akmusrala, su oasr kunokon lalos in kosrao oana “met tol.” (1 Piter 2:9; Exodus 19:6) Mwuleang ke Masap, su Moses pa met iumwe, el tia orala sie mutanfwal oana mutanfwal mutal inge.

13. Mea weang nu ke kunokon lal Jisus in oana sie Met Iumwe?

¹³ Mea weang nu ke kunokon lal Jisus in oana sie Met Iumwe? Aok, Jeova el orekmakin sra saoklana lun Jisus nu selos su sulosola nu ke mwuleang sasu. Ke inkanek oinge, Jeova el nunkelos oana met sumwosmwos. (Rom 3:24; Hibru 9:15) God el nunkelos mu elos fwal in ilyuk nu ke mwuleang sasu su oasr fwinsrak lalos nu ke kunokon lun togusra a met tol! In oana Met Iumwe lalos, Jisus el kasrelos in sruokye sie moul nasnas ye mutun God.​—Hibru 2:16.

14. Efu ku met Kristian su oasr fwinsrak lalos in moul in kosrao ku fwin fwalu elos aksaokye kunokon lun Jisus oana Met Iumwe?

¹⁴ Na mea nu selos su tia wi ke mwuleang sasu, nu selos su oasr fwinsrak in moul ma patpat fwin fwalu, a tia in kosrao? Fwinne elos tia wi ke mwuleang sasu, tusruktu elos ku in eis me insemwomwo ka. Elos eis nunak munas ke ma koluk lalos a elos akkalemyeyuk oana met sumwosmwos a met kawuk lun God. (Jemes 2:23; 1 Jon 2:1, 2) Oasr sripe mwomwo lun kais sie sesr in aksaokye kunokon lun Jisus oana Met Iumwe lun mwuleang sasu, fwinne kut fwinsrakkin in moul in kosrao ku fwin fwalu.

“Met Tol Fulat”

15. Ke inkanek fuka kunokon lun Jisus in oana Met Tol Fulat el siena liki mokul puspus su kulansap oana met tol fulat in pal meeta?

¹⁵ Oasr mokul puspus su kulansap oana met tol fulat in pal meeta, tusruktu kunokon lun Jisus in oana Met Tol Fulat el siena a wangin ma oana. Ke inkanek fuka? Poul el akuteye: “Su tia enenu len nukewa, oana met tol fulat ingo, in sang me kise, ke ma koluk lal meet, a na ke ma koluk lun met: (tu el oru ma inge sie pal ke pal e nukewa, ke el sifwana kisekunul;) tu Masap pakiye met tu elos in met tol fulat, su oasr munas yurolos, a kas lun ma fulak, su tokin Masap, pakiye Mwen, su sumwosmwoslana ma patpat.”​—Hibru 7:27, 28.a

16. Efu ku me kise lun Jisus el wangin ma oana?

¹⁶ Jisus el sie met sumwosmwos, su oana sie nu ke oiyen sumwosmwos lal Adam meet liki el oru ma koluk. (1 Korint 15:45) Oana met sumwosmwos, Jisus el met sefwanna su fwal in kisekin me kise sumwosmwos a fwal, sie kain in me kise su tia enenu in orek pal nukewa, a pal sefwanna. Ye Masap su itukyang nu sel Moses, me kise el kisekinyuk len nukewa. Ne oinge, me kise nukewa a orekma lun met tol nukewa el sie me lumala, a el petsaela ke ma Jisus el fwa akpayeye. (Hibru 8:5; 10:1) Ke sripen Jisus el akpayeye ma yok liki kutena met tol fulat a el oru kunokon lal inge ma patpat, paenang kunokon lal inge in oana Met Tol Fulat el wangin ma oana.

17. Efu ku kut enenu in aksaokye kunokon lal Jisus oana Met Tol Fulat, a fuka kut ku in oru ma inge?

¹⁷ Kut enenu kasru lun Jisus oana Met Tol Fulat in kasre kut in oasr oiya mwomwo ye mutun God. Aok Jisus el Met Tol Fulat mwomwo lasr! Poul el simusla: “Tu Met Tol Fulat lasr el tia sie su koflanu kulang ke munas lasr; a el sie su srifweyuk tari in ma nukewa oana kut, a wangin ma koluk lal.” (Hibru 4:15) Aok, nunak mwomwo lasr in aksaokye ma paye inge el fwa akkeye kut in ‘tia sifwil moul nu sesr sifwana, a nu sel su mise kesr.’​—2 Korint 5:14, 15; Luk 9:23.

“Fute” Se Su Palyeyuk Tari

18. Kain in kas palu fuka akkalemyeyuk tokin Adam el oru ma koluk, a tok kutu mea akkalemyeyuk ke kas palu inge?

¹⁸ In Eden, ke pal se metu elos tula liki oiya mwo nukewa, oana oiyen nasnas a mwo ye mutun God, moul ma patpat, moul insemwomwo, a Paredais, Jeova God el akkalemye ke sie kas palu ke sie Met in Molela. Met se inge el akkalemyeyuk oana “fute” se. (Genesis 3:15) Fute se inge su tia akkalemyeyuk el pa sifwen me sramsram yok ke kas palu puspus lun Baibel ke lusen pal loeloes. El enenu in tuku ke sruf lal Ebream, Isaak, a Jekob. Oayepa el enenu in tuku ke sruf lal Togusra Devid.​—Genesis 21:12; 22:16-18; 28:14; 2 Samuel 7:12-16.

19, 20. (a) Su Fute se su God el mwulela ka? (b) Efu ku sayen Jisus, oasr pa met puspus saye su wi ke fute se su akkalemyeyuk ke kas palu?

¹⁹ Su Fute se inge su God el mwulela ka? Me top nu ke kusensiyuk inge ku in liyeyuk in Galetia 3:16. (Ridi.) Tusruktu, ke sapta sepana inge, met sap Poul el fwak pa nu sin met Kristian akmusrala: “A komwos fwin sran Kraist, na komwos futel Ebream, a met usru fwal nu ke mwuleang.” (Galetia 3:29) Fwin Jisus pa Fute se su God el mwulela ka, efu ku oasr pa met puspus su wi ka?

²⁰ Million puspus sin met elos fwak mu elos tulik natul Ebream, a kutu selos orekma oana met palu. Kutu alu elos ekin a fwak mu met palu lalos tuku ke sruf lal Ebream. Tusruktu, ya met palu nukewa inge pa Fute se su God el mwulela ka? Mo. Oana ma Poul el akkalemye, tia tulik nukewa nutal Ebream ku in fwak mu elos pa fute se su God el mwulela ka. Tulik nutin tulik saye nutal Ebream tia orekmakinyuk elos in akinsemwomwoye metu. Fute se su fwa akinsemwomwoye metu el tuku ke inkanek lal Isaak mukena. (Hibru 11:18) Tokin pal loeloes, oasr met sefwanna, el pa Jisus Kraist, su ma simusla ke sruf lal la mutamwauk kel Ebream oana ke akkalemyeyuk in Baibel, la el pa met se meet ke fute se inge su akkalemyeuk ke kas palu.b Met nukewa saye su ke pal tok elos weang u lun met puspus inge oana futel Ebream su akpayeyuk ke sripen elos “ma lun Kraist.” Aok, kunokon lun Jisus in akpayeye kas palu inge el siena a wangin ma oana.

21. Mea akkeye kom nu ke inkanek su Jisus el akpayeye ke kunokon mwomwo lal ke akwuk lun Jeova?

²¹ Mea kut ku in lotela ke me kalweni fototo inge ke oiyen kunokon lal Jisus nu ke akwuk lun Jeova? Mutamwauk ke pal se God el orala ma nukewa nu ke pal inge, Mwen sefwanna nutin God wangin ma oana el, a el siena liki ma nukewa. Tusruktu, Mwen se nutin God inge su wangin ma oana su ke pal tok el isusla nu fwalu oana Jisus el inse pusisel pal nukewa in kulansap fwal nu ke ma lungse lun Papa tumal, a el tia suk mwolanu nu sel sifwana. (Jon 5:41; 8:50) Sie me srikasrak mwomwo pa inge nu sesr ke pal inge! In oana Jisus, lela kut in akpayeye pal nukewa in “oru ma nukewa nu ke mwolanu lun God.”​—1 Korint 10:31.

[Footnotes]

Ya Kom Esam?

• Mea kom lotela ke kunokon puspus lun Jisus su wangin ma oana? (Srike liye pok.)

• Fuka kom ku in etawi me srikasrak mwomwo lun Mwen nutin Jeova?

[Box/​Picture on page 27]

Kutu Mwal Su Akkalemye ke Kunokon lun Jisus nu ke Akwuk lun God

◼ Mwen Sefwanna. (Jon 1:3) Jisus pa ma orekla sefwanna su orekla sin Papa tumal.

◼ Kas. (Jon 1:14) Jeova el orekmakin Mwen natul oana sie Met Kaskas lal in akkalemye etauk a masap nu sin ma orekla puspus saye.

◼ El su Amen. (Fwakyuk 3:14) Moul lal Jisus su wangin kutena ma koluk a meta ka, wekunang mise lal oana sie me kise, el sang kasru yok nu ke akpayeyen mwulela nukewa lun Jeova God.

◼ Met Iumwe Lun Mwuleang Sasu. (1 Timote 2:5, 6) Oana Met Iumwe, Jisus el sang kasru yok nu ke isusla lun sie mutanfwal sasu, su “Israel lun God,” su orekla sin met Kristian puspus su fwa wi ke u lun “met tol” in kosrao.​—Galetia 6:16; 1 Piter 2:9.

◼ Met Tol Fulat. (Hibru 7:27, 28) Jisus pa met sefwanna su ku in kisekin sie me kise sumwosmwos, sie me kise su tia enenu in sifwilpa kisekinyuk. El ku in aknasnasye kut liki ma koluk a aksukosokye kutla liki mise su tuku ka.

◼ Fute Se su God el Mwulela. (Genesis 3:15) Jisus Kraist pa met se meet su wi ke u lun fute se inge su God el mwulela ka. Met nukewa saye su tok elos fwa wi pa ke u lun futel Ebream su “ma lun Kraist.”​—Galetia 3:29.