Fuka Orekma Lom in Eis Etauk Paye ke Hell el Ku In Kasre Kom?

MET nukewa su luti la hell el sie an in me akkeok elos akkeye na paye kain in me luti sito kel Jeova God a ke oiya mwomwo lal. Aok, Baibel el luti la God el fwa kunausla met koluk. (2 Tessalonika 1:6-9) Tusruktu kasrkusrak sumwosmwos lun God el tia sie oiya mwomwo yok emeet lal.

God el tia lungse in akngalye ku akkeokye metu. El siyuk ke kusensiyuk inge: “Ya oasr kutena insemwomwo luk ke mise lun met koluk?” (Ezikiel 18:23) Fwin God el tia insemwomwo ke mise lun met koluk, na fuka el ku in insemwomwo in liye met oinge elos in akkeokyeyuk ma patpat?

Oiya mwomwo se emeet lun God pa lungse. (1 Jon 4:8) Paye la, “LEUM el mwo nu sin met nukewa; a me kulang lal on fwin orekma lal nukewa.” (Sam 145:9, The Holy Bible​—New International Version) Ke ma inge, God el lungse kut in akkeye lungse paye lasr nu sel.​—Mattu 22:35-38.

Mea Ku In Akkeye Kom, in Sangeng ke Hell ku in Lungse ke God?

Me luti ke ngun puspus la elos keok in hell el oru metu in oasr sangeng tia mwo nu sin God. Ke oiya saye, sie met su lotela ke ma paye ke God a akkeye lungse lal nu sel ku in kasrel in akkeye kain in sangeng mwo lal nu sin God. “Sangeng sin LEUM mutamweyen lalmetmet, mwo etauk yurolos nukewa su oru oinge,” Sam 111:10 el akkalemye. (The New American Bible) Sangeng sin God, el tia oana kain in sangeng su toninfongla, a rarrar, tusruktu el sie oiya mwomwo in akkalemye sunak yok nu sin Met Orekutla. El kasre kut in akkalemye sangeng mwomwo in tia aktoasryel.

Nunku akmwoye kel Kathleen, su yea 32, a el orekmakin ono koluk in pal meeta. Ke pal se el lotela ke ma paye, oasr me kasru yok el eis ka. El suk me akengan ke lusen moul lal, el lungse pa in oru orekma koluk, el tia aksaokye moul lal a el pulesral sifwana, a el lungse moul fokfok a orek kosro. El fwak: “Nga ngetla liye tulik mutan se nutik su yea se matwe a nga nunku, ‘Liye ma nga oru nu sel. Nga fwa isisyak in e ke sripen orekma luk inge.’” Kathleen el srike in tui liki orekmakinyen ono koluk, tusruktu el tia ku. El fwak: “Nga lungse in ekla sie mutan mwo, tusruktu ma nukewa ke moul luk a ke fwalu el srakna oru me akasor yok a tia ku in oru me kasru. Wangin sripe nga kafweang in ekla sie met mwo.”

Oasr sie pal Kathleen el sun sie Met Lo lun Jeova. “Nga lotela la wangin isis ke hell. Me akpayeye ke ma Simusla el kasre yu na paye,” Kathleen el fwak. “Ke oasr etauk yok nga lotela ka la Nga fwa tia isisyuk in hell, ma inge akkeye yu na paye.” Tusruktu el lotela pa la ke mwulela lun God metu ku in eis moul ma patpat fwin fwalu su fwa wanginla kutena kain in ma koluk. (Sam 37:10, 11, 29; Luk 23:43) El fwak: “Oasr fwinsrak paye luk ingena, in moul ma patpat in Paredais!”

Ya Kathleen el ku in tui liki orekmakinyen ono koluk fwinne wangin me aksangeng ke isis in hell? El fwak: “Ke pal se nga ke na paye in orekmakin ono koluk, Nga pre, siyuk sin Jeova God in kasre yu in kutangla ma inge. Nga srike in nunku la fuka nunak lal nu ke kain in orekma koluk inge, a nga srunga in aktoasryel ku akasoryel. Ke ma inge el topuk pre luk.” (2 Korint 7:1) Kain in sangeng inge in tia akinsemwomwoye God el kasrel Kathleen in aksukosokyella liki oiya koluk lal in orekmakin ono koluk.

Aok, orekma in akkeye lungse nu sin God a in akkeye sangeng mwomwo nu sel, a tia ke sangeng in isis in hell, ku in akkeye kut in oru ma lungse lun God tu kut in engankin me insemwomwo ma patpat. Met sim lun sam el simusla: “Insemwomwo elos nukewa su sangeng sin Jeova, su fwasr inkanek lal.”​—Sam 128:1.