Akfototoye Kom Nu Sin God

Lungse Nununku Sumwos

Hibru 10:26-31

YA OASR sie met su oru ma sesumwos nu sum ku el akkalemye oiya koluk nu sum, a el tia eis me kai ka a el akkalemye la el tia asor ke ma el oru inge? Arulanu upa in muteng ke orekma sesumwos inge, yokna fwin me aktoasr inge orek sin sie met su kom nunku mu el lungse kom a nunku keim. Saap kom nunku la, ‘Efu ku God el lela oiya inge in sikyak?’a Paye la Jeova God el srunga orekma sesumwos nukewa. Baibel el akkalemye nu sesr la God el fwa sang nununku a kai nu sin met nukewa su likkeke a srunga in oru ma sumwos. Lela kut in lutlutkin kas lun met sap Poul su simusyukla in Hibru 10:26-31.

Poul el simusla: “Tu kut fwin oru ma koluk ke lungse lasr tokin kut eis tari etauk lun ma paye, wangin pa sie me kise ke ma koluk.” (Fus 26) Met nukewa su lungse na paye in oru ma koluk elos tia fwal a arulanu yok meta lalos. Efu? Ma se meet, elos tia oru ma koluk ke sripen me munas lalos ke kitin pal, su pa inge kain in ma koluk su kut nukewa oru kutupal ke sripen kut sesumwos. Elos oru ma koluk pal nukewa. Ma se akluo, elos oru ma koluk ke sripen elos lungse na paye in oru. Oana ke leng inge The Bible in Basic English el akkalemye, elos “orala akwuk ku me lemlem in oru ma koluk.” Ma koluk el on na ke insielos ke sripen elos oru ma inge pal nukewa. Ma se aktolu, ma koluk lalos el orek tia ke sripen ninukin lalos. Oasr “etauk sumwos lalos ke ma paye” ke ma lungse lun God a ke masap nukewa lal.

Mea nunak lun God nu sin met orekma koluk su srunga in auliyuk? “Wangin pa me kise ke ma koluk,” Poul el fwak. Me kise lun Kraist, su me sang lun God nu sin metu, el afwunla ma koluk lasr ke sripen oiyen sesumwos lasr. (1 Jon 2:1, 2) Tusruktu nu selos su orek ma koluk a tia auliyuk elos akkalemye la elos tia aksaokye me sang saok se inge. Ye mutun God, elos “longye Mwen Nutin God ye niel, a oekla sran [Jisus] . . . ma su tia mutal.” (Fus 29) Ke inkanek lalos, elos tia akkalemye sunak nu sin Jisus a tia aksaokye sral oana “ma su tia mutal,” su oana tia saok liki kutena met sesumwos. (Today’s English Version) Met koluk nukewa inge su tia lungse in sang kulo elos tia ku in eis me insemwomwo ke me kise lun Kraist.

Mea fwa sikyak nu sin met koluk? God lun nununku sumwos el mwulela ke kas inge: “Foloksak ma luk; Nga fwa moli.” (Fus 30) Lela met nukewa su lungse in oru ma koluk pal nukewa in aktukulkulye met saye elos in arulanu taran. Orekma in kunausla masap lun God ke lungse lalos sifwana fwa eis me kai. Pal nukewa elos eis fwako koluk lun orekma koluk lalos. (Galetia 6:7) Fwinne elos tia eis fwako koluk ka ke pal inge, elos fwa tu ye mutun Jeova ke pal na fototo fwasru ke pal se el fwa akwanginyela ma sesumwos nukewa fwin fwalu. (Soakas 2:21, 22) Poul el sang kas in sensen: “Pa inge ma aklangung lulap, in putatla nu in poun God moul.”​—Fus 31.

Etauk lasr ka la Jeova God el fwa sang nununku nu sin met nukewa su lungse in orek ma koluk el sie me akkeye a oana kas in mwulela, yokna nu selos su aktoasryeyuk sin sie met su srunga in auliyuk. Kut ku in lulalfongi God la el fwa sang foloksak nu ke ma koluk nukewa, paenang lela kut in filiye ma nukewa nu in poun God su srunga orekma sesumwos nukewa.

[Footnote]