Karungin Komwosyung In Lungse Lun God!
“A komwos met kulu, . . . karungin komwosyung in lungse lun God, . . . nu ke moul ma patpat.”—JUD 20, 21.
1, 2. Fuka kom ku in sruokya pal nukewa lungse lun God?
JEOVA el arlana lungse met nukewa paenang el ase Mwen sefwanna natul tu elos nukewa su akkalemye lulalfongi nu sel ku in eis moul ma patpat. (Jon 3:16) Arlana mwo in liye a pula kain in lungse inge! Kom fwin sie met kulansap lun Jeova, aok kom lungse na paye in pulakin lungse inge nu tok ma patpat.
2 Met tuma lutlut Jud el akkalemye ke inkanek mwo la fuka kom ku in sruokyena lungse lun God. “Komwos sifwana musai komwos fwin lalalfongi lomwos, su mutallanu, a pre in ngun mutal,” Jud el simusla, “a karungin komwosyung in lungse lun God, a tupan pakomuta lun Leum lasr, Jisus Kraist, nu ke moul ma patpat.” (Jud 20, 21) In lutlutkin kas lun God a in sulkakin peng mwo el sang kasru in sifwana musai kom ke “lulalfongi su mutallanu”—pa meeting ku tukeni nukewa lun met Kristian. In sruokya lungse lun God pal nukewa, kom enenu in pre siyuk “ke ngun mutal,” in kasre kom. Tu kom in ku in eis me insemwomwo lun moul ma patpat, kom enenu in akkalemye pa lulalfongi paye ke me kise lun lango lun Jisus Kraist.—1 Jon 4:10.
3. Efu ku oasr kutu met su tila Met Lo lun Jeova?
3 Kutu met su oasr lulalfongi lalos in pal somla elos tia sruokya pal nukewa lungse lun God. Meyen elos oru sulela lalos in oru oiya koluk, paenang elos tila Met Lo lun Jeova. Fuka kom ku in karungin kom in tia sun kain in oiya inge? In sifwilpa muta nunku ke me lutlut puspus tok inge ku in kasre kom in tia oru ma koluk a in karungin komyung sifwana in lungse lun God.
Akkalemye Lungse Lom nu sin God
4. Efu ku akosten nu sin God arlana yok sripe?
4 Akkalemye lungse lom nu sin God ke kom aksol. (Mattu 22:37) “Tu pa inge lungse lun God,” met sap Jon el simusla “tu kut in liaung masap Lal; a masap Lal tia toasr.” (1 Jon 5:3) Oiya mwomwo in akkalemye pal nukewa pa in akos nu sin God ku in akkeye kom in lain me srife a e ku pa in oru me akinsemwomwo nu sum. Met sim lun sam el fwak: “Insemwomwo met se su tia fwafwasryesr in papu lun met koluk, . . . a el engunak in masap lun Jeova.”—Sam 1:1, 2.
5. Mea lungse nu sin Jeova el fwa mokle kom in oru?
5 Lungse lom nu sin Jeova fwa mokle kom in tia oru ma koluk upa su ku in sang me akkoluk nu ke inel. Mokul se inge su pangpang Agur el pre oinge, “Nikmet ase nu sik sekasrup ku kasrup; kite yu me mongo fwal nu sik. Saap nga kup, a lafwekin kom, a fwak: ‘Su Jeova?’ ku saap nga sekasrup, a pusr, a aksruksruke en God luk.” (Soakas 30:1, 8, 9) Kom oru sulela lom in tia ‘aksruksruke inen God’ ke inkanek in orala me akkoluk nu sel. A, kom in kafweang yok in oru ma puspus su sumwosmwos su ku in sang mwolena nu sel.—Sam 86:12.
6. Mea ku in sikyak fwin kom lungse na paye in oru ma koluk?
6 Pre pal nukewa nu sin Papa kulang tumom in kosrao siyuk ke me kasru in lain me srife in oru ma koluk. (Mattu 6:13; Rom 12:12) Akos kas in kai nukewa lun God pal nukewa tu in wangin me kutong nu ke pre lom. (1 Piter 3:7) Kom fwin lungse in oru ma koluk ke inse mulala lom, ma inge ku in sropon fwako koluk puspus, meyen Jeova el kosrala pre lun met koluk in oana fwin oasr pukunyeng matoltol se su kosrala tu pre lalos in tia ku in somwak nu yurol. (Eoksra 3:42-44) Ke ma inge enenu in akkalemyeyuk oiyen inse pusisel, a pre in kasre kom in tia oru kutena ma in kutongkomi liki in sramsram nu sin God ke pre.—2 Korint 13:7.
Akkalemye Lungse nu sin Mwen Nutin God
7, 8. Fuka oiya mwo in porongo kas in kai lun Jisus el ku in kasru sie met in tia oru ma koluk?
7 Akkalemye lungse nu sin Jisus Kraist ke inkanek in akos masap nukewa lal, meyen ma inge fwa kasre kom in sisla sie oiya koluk. “Komwos fwin liaung ma sap Luk,” Jisus el fwak, “komwos fwa mutanu in lungse luk, aok oana Nga liaung ma sap lun Papa tumuk, a mutanu in lungse lal.” (Jon 15:10) Fuka in moulkin moul fwal nu ke kas lun Jisus el ku in kasre kom in sruokye ku lungse lun God?
8 In loang akmwoye nu ke kas lun Jisus el ku in kasre kom in karungin moul nasnas a sumwos. Masap lun God el sapkin nu sin met Israel: “Nik kom kosro.” (Exodus 20:14) Tusruktu Jisus el akkalemye akwuk mwomwo lun masap inge ke el fwak: “Kutena met su ngetang nu sin mutan se in lungse fwasr nu yurol, el tufwana orek kosro yurol insiel.” (Mattu 5:27, 28) Met sap Piter el fwak mu kutu sin met Kristian ke congregation in century se meet oasr “mutalos su sesesla ke kosro,” a ‘srifwe ngun su tia tu ku.’ (2 Piter 2:14) Tusruktu, tia oana elos, kom ku in fwasr liki in oru orekma lun kosro kom fwin lungse a akos God a Kraist a akkalemye lungse paye lom in karungin a sruokye fototo lom nu selos.
Lela Ngunin Jeova in Kol Kom
9. Fwin ke ngun mutal, mea ku in sikyak fwin sie met el tafwela na in oru ma koluk?
9 Pre ke ngun mutal a lela ma inge in kol kom. (Luk 11:13; Galetia 5:19-25) Kom fwin e tafwela in oru ma koluk, God el fwa eisla ngun mutal lal liki kom. Tokin Devid el orala ma koluk yurol Bat-siba, el siyuk sin God: “Nik kom sisyula liki ye mutom; a kom tia eisla ngun mutal lom liki yu.” (Sam 51:11) Ke sripen Togusra Soul el sie met orek ma koluk su srunga in auliyuk, paenang ngun mutal lun God tula lukel. Soul el orala ma koluk ke el kisekin me kise furur a ke el tia kunausla un sipu, a un kao puspus, a tia uniye togusra lun met Amalek. Ke sripe inge Jeova el eisla ngun mutal lal lukel Soul.—1 Samuel 13:1-14; 15:1-35; 16:14-23.
10. Efu ku kom enenu in sisla nunak in lungse in oru ma koluk?
10 Fwasr liki nunak inge su lungse in oru ma koluk. “Kut fwin oru ma koluk ke lungse lasr tokin kut eis tari etauk lun ma paye,” met sap Poul el simusla, “wanginla sie me kise lula ke ma koluk.” (Hibru 10:26-31, New World Translation) Sie me asor yok pa inge kom fwin arlana lungse in oru ma koluk!
Akkalemye Lungse Paye nu sin Met Puspus
11, 12. Ke inkanek puspus fuka lungse a sunak e fwa oru sie met in tia akkalemye oiya koluk nu ke orekma lun kosro?
11 Lungse nu sin met nukewa fwa kasre kom in tia wi oru orekma lun kosro. (Mattu 22:39) Kain in lungse inge fwa mokle kom in karungin insiom in tia srife kom la in oru mutan ku mokul tuman sie met in akkolukye. Kain in oiya inge efwa ku in kolla nu ke kutena kain in orekma koluk lun kosro. (Soakas 4:23; Jeremaia 4:14; 17:9, 10) Etawi Job met sumwos se, su tia lela elan sifwana loang nu sin kutena mutan sayen mutan kiyel sifwana.—Job 31:1.
12 Oiyen sunak lom nu ke mutaliyen akwuk lun payuk ku in kasre kom in tia oru ma koluk upa. God el orala akwuk lun payuk mwomwo a fototo mwomwo lun mokul a mutan a osun lalos ke mano pa inkanek in isus tulik tu metu in puseni. (Genesis 1:26-28) Esam la an se ke monin met in orek tulik el orekla nu ke akwuk in akpusyelik moul, su arlana mutal. Met kosro nukewa elos seakos God, tia akfulatye akwuk mwo in orek tulik, wangin sunak nu ke mutaliyen akwuk lun payuk, a elos oru ma koluk lain manolos sifwana. (1 Korint 6:18) Tusruktu lungse nu sin God a nu sin met tulan wekunang in akos nu sin God e fwa karungin sie met in tia wi oru kain in oiya su ku in paenang elos in sisila liki congregation lun met Kristian.
13. Sie met kosro el “sinuntei me kasrup lal” ku kunausla ma saok lal ke inkanek fuka?
13 Kut enenu in kutongye nunak koluk in tia oru met su kut lungse in asor ku keok. “El su wi mutan koluk sinuntei me kasrup lal,” Soakas 29:3 [NW] el akkalemye. Sie met kosro su srunga in auliyuk el kunausla fototo lal nu sin God a el kunausla fototo lun sou. Oasr sripe lun mutan kiyen met kosro in sisella. (Mattu 19:9) Fwin mokul ku mutan payuk pa orala ma koluk, ma na paye se la ma inge fwa kunausla moul lun payuk a ku in akngalye mutan ku mokul tumalos, tulik natulos, a kutupa met. Ya kom insese ka la in etu ke oiya koluk ke orekma lun kosro el ku in kunausla moul lun payuk e fwa akkeye kut in lain me srife inge a kasre kut in tia oru orekma koluk inge?
14. Me lutlut fuka ke orekma koluk ku in loteyukla ke Soakas 6:30-35?
14 Aok paye la wangin kutena inkanek su ku in orekmakinyuk in sang akmwoye orekma lun kosro a ma inge arlana akkeye sie met in tia oru orekma koluk inge. Soakas 6:30-35 el akkalemye la metu elos ku in akkalemye pakoten nu sin sie met pusrapasr meyen el musrinsral, tusruktu elos srunga met kosro meyen oasr nunak koluk yurol. El “lungse in kunausla ngunal [ku, moul lal] sifwana.” Ye masap lal Moses, el e fwa anwuki. (Livitikus 20:10) Sie met su oru orekma lun kosro el akngalye met puspus saye in akinsemwomwoye kena koluk lal, a sie met kosro su srunga in auliyuk el tia sruokye ku lungse lun God a el fwal in sisila liki congregation lun met Kristian su nasnas.
Sruokye Nunak ku Pulakin Nasnas Pal Nukewa
15. Mea ma sikyak ke sie nunak ku pulakin su markiyuki “ke soko mwusra fwol”?
15 In sruokya na lungse lun God, kut tia ku in lela pulakin lasr in upala tila pulakin ma koluk. Kalem la, kut tia enenu in eis akwuk lun fwalu ke oiyen moul fokfok lalos, a kut enenu in arlana taran ke oiya puspus su oana ke oreyen sulela lasr nu ke asrouki, me rid puspus, a ke me akengan. Poul el sang kas in sensen: “Tu in pal toka kutu fwa putatla liki lulalfongi, a porongo ngun kikiap a me luti lun dimonu, ke kutasrik lun met su kaskas kikiap, akilenyuki in ella [pulakin ku nunak, NW] lalos sifwana oana ke soko mwusra fwol.” (1 Timote 4:1, 2) Sie nunak ku pulakin su markiyuki “ke soko mwusra fol” el oana sie mano su folla a ke mala kinet oasr polkoasr ka a wanginla pulakin ka. Kain in pulakin ku nunak inge el tila aksensenye kut in fwasr liki met puspus su som liki alu paye a ke oiya puspus su ku in oru kut in putatla liki lulalfongi.
16. Efu ku arlana yok sripe in oasr sie conscience nasnas?
16 Molela lasr el fungfung nu ke oiyen nasnas lun conscience lasr ku pulakin lasr. (1 Piter 3:21) Ke inkanek lun lulalfongi lasr ke sran Jisus su aksuroryeyukla, pulakin lasr ku ella lasr el aknasnasyeyukla liki orekma lun mise, “tu kut ku in orekma nu sin God moul.” (Hibru 9:13, 14) Kut fwin lungse in oru ma koluk, conscience ku pulakin lasr fwa akkolukyeyuk ku akfokfokyeyuk a kut fwa tila met nasnas su fwal nu ke orekma lun God. (Taitus 1:15) Tusruktu ke kasru lun Jeova, kut ku in engankin sie pulakin ku concscience nasnas.
Inkanek Puspus Saye in Fwasr Liki Ella ku Oiya Koluk
17. Mea ma lane su tuku ke orekma in ‘akos Jeova ke inkanek nukewa’?
17 ‘Akos Jeova ke inkanek nukewa,’ oana Keleb el oru in pal meeta in an Israel. (Duteronomi 1:34-36) Oru ma God el siyuk sum in oru, a nikmet nunku ke kutena pal in wi mongo ke “tebu lun dimon.” (1 Korint 10:21) Nik kom long me luti kikiap, sisla ma inge. Kom ku in insemwomwokin in eis a kang me mongo lun ngun su oasr ke tebu lun Jeova mukena, a kom fwa tia kiapeyukla sin met luti kikiap puspus ku sin u lun ngun fokfok puspus. (Efesus 6:12; Jud 3, 4) Loang akmwoye nu ke ma puspus lun ngun, oana ke lutlut lun Baibel, wi ke meeting nukewa, a ke orekma in luti peng mwo. Paye la kom ku in pulakin me insemwomwo kom fwin akos Jeova ke inkanek nukewa a in akkafofoye kom in orekma nu sin Leum pal nukewa.—1 Korint 15:58.
18. Fuka sangeng sin Jeova e fwa sang kasru nu ke oiya lom?
18 Oru sulela paye lom in “orekma nu sin God in akinsemwomwoyel ke sunak mutal a sangeng.” (Hibru 12:28) Sangeng paye nu sin Jeova fwa mokle kom in tia oru kutena inkanek su tia mwo. Ma inge fwa kasre kom in akkalemye oiya mwo lom fwal nu ke kas in kai lal Piter nu sin met lili akmusrala: “A komwos fwin pang nu sel oana Papa, su tia srela met tu el nununku met nu kemwa oana orekma lalos, komwos in sangeng in len nu kemwa lomwos inge.”—1 Piter 1:17.
19. Efu ku kom enenu in orekmakin pal nukewa ma kom lotela ke Kas lun God?
19 Orekmakin pal nukewa ma kom lotela ke Kas lun God. Ma inge fwa kasre kom in fwasr liki ma koluk upa meyen kom fwa akpayeye la kom sie “selos su pala ka, a ku in akilen ma mwo a ma koluk.” (Hibru 5:14) Kom enenu in fwasr oana met lalmetmet a tia oana met su tia karungin kas a ella lal, a kom in “molela pal” in len koluk inge. “Kom in etu mea lungse lun Leum,” a oru ma inge pal nukewa.—Efesus 5:15-17; 2 Piter 3:17.
20. Efu ku kut enenu in fwasr liki oiyen rapku?
20 Fwasr liki oiyen rapku ke inkanek nukewa—kena koluk in rapkue ma lun met saye. Sie sin Masap Sengoul akkalemye kas inge: “Nik kom rapkue loom sin met tulan. Nik kom rapkue mutan kien met tulan lom, ku met mokul kulansap lal, ku met mutan kulansap lal, ku kao natul, ku ass natul, ku kutena ma lun met tulan lom.” (Exodus 20:17) Masap inge el sang karungin loom sin sie met, ku mutan kiyel, ku met kulansap nukewa lal, ku kosro natul, a ma puspus lal. Tusruktu ma yok sripe emeet u pa kas lun Jisus su akkalemye la oiyen rapku el akfokfokye sie met.—Mark 7:20-23.
21, 22. Me aksumwos puspus fuka sie met Kristian el ku in oru in kasrel in tia oru ma koluk?
21 Fwin oasr kain in oiya koluk inge yurum oru me aksumwos in tia kol nu ke ma koluk. Met tuma lutlut Jemes el simusla: “Tu met nu kemwa elos srifweyuk, ke kena lalos kolang insielos nu ke lungse koluk lalos a elos tafongla. Na lungse koluk ke kapak, oswela orekma koluk; a ma koluk ke matula, oswela mise.” (Jemes 1:14, 15) Ke sie me pupulyuk, fwin sie met el orekmakin wain alukela ma fwal in pal meeta, el ku in oru sulela in wangin wain in loom sel. In kasru sie met Kristian in fwasr liki me sruf su ku in sun sie mokul ku mutan, el enenu in ekulla niyen orekma lal ku sisla orekma lal a suk orekma sasu.—Soakas 6:23-28.
22 Nik kom srike in oru fwinne step se meet nu ke ma koluk. Oana orekma in akkalemye lungse ku oiya koluk nu sin met saye a in oasr nunak koluk ku in kol nu ke orekma lun kosro. In sramsramkin kas kikiap srisrik ku in oru sie met in srumon kas kikiap yok a ku in oru sie met in kaskaskin ma kikiap pal nukewa. Orekma in pusrapasr ke inkanek srisrik el ku in akkolukye conscience lun sie met su ku in paenang el an mutamwauk in orek pusrapasr ke inkanek yok. Aok fwin sie met el lela nunak lal in nunku ke me luti kikiap fwinne ke inkanek srisrik ma inge ku in paenang el an ekla sie met su som liki alu paye.—Soakas 11:9; Fwakyuk 21:8.
Fuka Kom Fwin Oru Ma Koluk?
23, 24. Me akkeye fuka ku in orekmakinyuk in 2 Kronikel 6:29, 30 a Soakas 28:13?
23 Met nukewa sesumwos. (Ekklisiastis 7:20) Tusruktu kom fwin oru ma koluk upa, kom ku in eis me akkeye ke pre lal Togusra Solomon ke pal in kise lun temple lun Jeova. Solomon el pre nu sin God: “Kutena pre a kaifwe su kutena met oru, ku met Sram Israel nu kemwa, a kais sie selos fwa etu me lokwalok lal sifwana a asor lal sifwana, a asroela paul nu ke loom se inge, na kom long in kosrao nien muta lom me, a nunak munas, a oru nu sin kais sie met fwal nu ke inkanek lal nu kemwa, su kom etu insie (tu kom, aok kom mukena, etu insien tulik nutin metu).”—2 Kronikel 6:29, 30.
24 Aok, God el etu inse a el lungse in sang nunak munas. Soakas 28:13 el akkalemye: “El su afwunye ma koluk lal fwa tia kapkapek; a el su fwakak a fwasr liki fwa eis kulang.” Ke inkanek in fwakak a fwasr liki ma koluk, sie met el ku in eis pakoten lun God. Tusruktu, kom fwin pulakin la kom arlana munas ke ma lun ngun, mea pa ku in kasre kom in sruokya na lungse lun God?
Kom E Topuk Fuka?
• Fuka kut ku in karungin kut sifwana in sruokye pal nukewa lungse lun God?
• Fuka lungse lasr nu sin God a nu sin Kraist kasre kut in tia oru orekma koluk?
• Efu ku lungse paye lasr nu sin met puspus oru kut in srunga in oru orekma lun kosro?
• Mea kutu inkanek in fwasr liki oiya koluk?
[Picture on page 7]
Met tuma lutlut Jud el akkalemye nu sesr la fuka in karungin kut in sruokya pal nukewa lungse lun God
[Picture on page 9]
Kunausla lun moul in payuk ku in akngalye mutan ku mokul su tia oru ma koluk a tulik puspus ke inkanek yok
[Picture on page 10]
Oana Keleb, ya kom lungse na paye in ‘akos Jeova ke inkanek nukewa’?
[Picture on page 11]
Pre pal nukewa ke kasru in lain me srife