Met Kristian In Pal Meeta A Ma Sap Lun Moses

“Ou inge Ma Sap sie met liaung lasr in kol kut nu sin Kraist.”​—GALETIA 3:24.

1, 2. Mea kutu ma lane su tuku nu sin met Israel su akos na paye Ma Sap lal Moses?

IN yiu 1513 B.C.E., Jeova el sang nu sin met Israel ma sap puspis. El fwak nu sin met la elos fwin akos pusrel, el e fwa akinsemwomwoyelos, a elos fwa engunkin sie moul insemwomwo a misla.​—Exodus 19:5, 6.

² Akmwuk lun Ma Sap inge, su pangpang “Ma Sap lal Moses, ku ke kas fwusesr “Ma Sap,” el “mutal sumwosmwos a mwo.” (Rom 7:12) El akkeye oiye mwo puspis oanu kulang, oaru, oiyen moul nasnas, a orekma mwo nu sin met atalani. (Exodus 23:4, 5; Livitikus 19:14; Duteronomi 15:13-15; 22:10, 22) Ma Sap inge el purakak met Ju in lungse sie sin sie. (Livitikus 19:18) Sayen ma inge, elos tia enenu in asrouki ku eis mutan kielos nu sin met Pegan su sonna akpusisilyelos sifwanu ye Ma Sap. (Duteronomi 7:3, 4) Oanu sie “kalkal” su oasr inmalon met Ju a met Pegan, Ma Sap lal Moses el kurunganang met lun God in tia akkolukyeyuk ke nunuk a orekma lun met Pegan.​—Efesus 2:14, 15; Jon 18:28.

3. Meyen wangin kutena met su ku in akos Ma Sap ke inkanek sumwosmwos, paenang mea ma inge el oru nu sin met?

³ Tusruktu, fwinne sie met Ju su arulanu moniyuk in akos Ma Sap el tia ku in akos na paye ma inge ke inkanek sumwosmwos. Ya Jeova el siyuk selos in oru ma se alukela ma fwal? Mo. Sie sripe efu Ma Sap inge etukyung nu in Met Israel pa “ma su oeung meyen ma koluk.” (Galetia 3:19) Ma Sap inge el orala met Ju oaru in akilen enenu yok lalos ke sie Met Molela. Ke pal se Met Molela inge el tuku, met Ju su oaru elos fwa insemwomwo. Molela lalos liki selnga lun ma koluk a mise arulanu apkurun!​—Jon 1:29.

4. Ke inkanek fuka Ma Sap el oanu sie “met liaung su kol kut nu sel Kraist”?

⁴ Ma Sap lal Moses inge tia orekla in on nu tok ma patpat. Ke pal se el sim nu sin met lili Kristian wiel, met sap Poul el akkalemye ma inge oanu sie “met liaung lasr in kol kut nu sin Kraist.” (Galetia 3:24) Sie met liaung in pal meeta el wis tulik lutlut nu ke loom lutlut a loom lutlut me nu loom selos. Pal nu kemwa tia el pa met luti. In oupanu, Ma Sap lal Moses orekla in kol met Ju su sangeng sin God nu sin Kraist. Jisus el mwolela la el e fwa muta yurin met tuma lutlut lal “nu ke saflaiyen akmwuk koluk inge.” (Mattu 28:20) Ke ma inge, ke pal se congregation lun met Kristian oakiyuki tari, “met liaung” inge​—ku Ma Sap—​el aksafyela tari orekma lal. (Rom 10:4; Galetia 3:25) Aok, kutu sin met Ju Kristian elos tia sa in akilen ma paye saok inge. Ke sripe se inge, elos tafwela in liaung kutu nu ke Ma Sap tokin Jisus el sifwil moulyuk. Tusruktu, kutu sin met elos aksumwosye tari nunuk lalos a akilen la elos tia sifwil enenu in akos Ma Sap lal Moses. Ke pal se elos oru ou inge, elos ase nu sesr me srikasrak mwo ke len inge. Lela kut in liye la fuka.

Kalem Sasu ke Me Luti lun Met Kristian

5. Kain in kas in luti fuka Piter el eis ke arurumu, a efu el arulanu lut?

⁵ In yiu 36 C.E., met sap Piter su sie sin met Kristian el liye sie arurumu sakuruk. Ke pal inge el long sie pusra tuku kosrao me sapkinyuk nu sel in uniye a kangla mwon a kosro nu kemwa su tia nasnas ke Ma Sap lal Moses. Piter el arulanu lut! El sonna “mongo ma oul a tia nasnas.” Tusruktu, pusra se inge el fwakak nu sel: “Ma God el aknasnasye, nik kom oru ma tia nasnas.” (Orekma 10:9-15) Piter el tia akos Ma Sap lal Moses, a el aksumwosye nunuk lal. Ma inge kasrel in koneak ma sakuruk ke akmwuk lun God.

6, 7. Mea ma inge su kasrel Piter in lalalfongi la el ku in mutamwauk in luti nu sin met Pegan, a kain in orekma saye fuka el oru?

⁶ Pa inge ma sikyuk. Mokul tolu elos tuku nu ke loom su Piter el muta we a siyuk sel in welulos in som nu ke loom sin sie met Pegan su tia kosroila, pangpang Kornilius sie met su sangeng sin God. Piter el soloilosyuk a liyelosyung in loom se el muta we. Meyen el akilen ma saok su tuku ke arurumu se inge, paenang ke lutu Piter el tuyuk a oelulos som nu ke loom sel Kornilius. Ke an se inge Piter el sang ma lo lulap kel Jisus Kraist. Ke pal inge, Piter el fwak: “Paye Nga liye tu God el tia sulosol met, a in mutanfwal e nu kemwa el su sangeng sel, a oru ma sumwosmwos el akinsemwomwoyel.” Tia Kornilius mukena, a sou lal nu fon a kamwuk futoto lal elos akkalemye lalalfongi nu sel Jisus, a “ngun mutal putati nu fwelos nu kemwa su long kas inge.” Meyen el akilen la ma inge sikyuk ke kolyuk lun Jeova, paenang Peter el “sap tu elos in baptaisla in en Jisus Kraist.”​—Orekma 10:17-48.

⁷ Mea kasrel Piter in akilen la met Pegan nu kemwa su tia muta ye Ma Sap lal Moses elos ku in ekla met kulansap lun Jisus Kraist ke pal inge? El akilen ma inge fwal nu ke ma lun ngun. Ke sripen God el akkalemye tari insese lal nu sin met Pegan su sonna kosroila, ke pal se el oru ngun mutal lal in putati nu fwelos, paenang Piter el akilen la elos fwal in eis baptais. In pal se na, Piter el akilen la God el tia siyuk meet sin met Pegan inge su ekla met Kristian in akos Ma Sap lal Moses meet liki elos ku in eis baptais. Kom fwin moul in pal meeta, ya kom insemwomwo pa in aksumwosye nunuk lom oanu Piter el oru?

Kutu Met Elos Srakna Fwasr Tokin “Met Liaung”

8. Kain in nunuk fuka ke kosroila su siena liki ma Piter el nunku akkeyeyuk sin kutu met Kristian su muta in an Jerusalem, a efu?

⁸ Tokin el som liki loom sel Kornilius, Piter el som nu Jerusalem. News ke met Pegan su tia kosroila su “eis kas lun God” sun congregation in an we, a kutu sin met tuma lutlut Ju elos mulat ke ma sikyuk inge. (Orekma 11:1-3) Fwinne elos akilen la met Pegan inge nu kemwa elos ku in ekla met tuma lutlut lun Jisus, tusruktu “met su akkeye kosroila” elos liksreni in fwak la met inge nu kemwa ke mutanfwal saye elos enenu in akos Ma Sap lal Moses elos fwin lungse in moul. Ke inkanek saye, in an puspis su pus met Pegan we, a supus met Ju Kristian, kosroila el tia me sramsram yok. Kain in nunuk luo inge on na ke lusen yiu 13. (1 Korint 1:10) Ma inge sie me srifwe na paye ke lalalfongi lun met Kristian in pal meeta​—yokna nu sin met Pegan su ekla met Kristian su muta ke an su oasr met Ju puspis!

9. Efu ku me siyuk ke kosroila enenu in aksumwosyeyuk?

⁹ Me sramsram yok inge aksafyeyukla in yiu 49 C.E. ke pal se met Kristian fwin an Jerusalem elos tuku nu Syrian Antioch, an se ma Poul el oru orekma lal in luti. Elos mutamwauk in luti la met Pegan nu kemwa su ekla met Kristian elos enenu in kosroila oanu Ma Sap lun Moses. A oasr akukuin a asiyuki lulap inmaslol Poul a Barnabas a met inge! Fwin tia aksumwosyeyuk me sramsram yok inge, kutu sin met Kristian, el fwinnw met Ju ku met Pegan elos e fwa tukulkul. Ke ma inge, elos pakiye tu Poul a kutupa met fwa som nu Jerusalem a siyuk sin governing body lun met Kristian in aksumwosye me siyuk se inge ke pal siefwunnu.​—Orekma 15:1, 2, 24.

Tokin Nunuk Kitakatelik ​—Inse Siefwunnu!

10. Mea kutu me lutlut su governing body elos luti meet liki elos oru sulela lalos ke luma a ma sikyuk nu sin met Pegan?

¹⁰ Wangin alollo, ke meeting inge su elos oru kutu sin met elos akukuin ke sripen elos insese ke kosroila, a kutu sin met tia insese. Tusruktu, pulakin na lun kais sie met tia kutangla ke len inge. Tokin akukuin a asiyuki lulap, met sap Piter a Poul elos akkalemye akul puspis su Jeova el oru nu sin met lalalfongi su tia kosroila. Elos aketeye la God el okoila ngun mutal lal nu sin met Pegan su tia kosroila. Ke ma inge, elos siyuk, ‘Ya oasr sumwos lun congregation lun met Kristian in tia eis met nu kemwa su God el eis?’ Na, met tuma lutlut Jemes el rid sie Ma Simusla su kasrelos nu kemwa su wi ke toeni inge in akilen ma lungse lun Jeova ke ma se inge.​—Orekma 15:4-17.

11. Mea ma inge su tia me purakak se ke sulela su elos enenu in oru ke kosroila, a mea ma inge su akkalemye la me insemwomwo lun Jeova oasr ke sulela lalos inge?

¹¹ Ke pal inge elos nu kemwa sano ke sulela lun governing body. Ya elos akola in oru sulela sufwal a insese ke kosroila ke sripen elos met Ju? Mo. Mokul oaru inge nu kemwa elos kaifweung in fwasr tokin Ma Simusla a ke kolyuk lun ngun mutal lun God. Tokin elos long me sramsram yok nu kemwa, governing body elos oru sulela ke inse siefwunnu a akkalemye la tia enenu nu sin met Pegan su ekla met Kristian in eis kosroila a muta ye Ma Sap lal Moses. Ke pal se met lili nu kemwa elos long sulela lalos, elos arulanu engun, a congregation nu kemwa mutamwauk in “puselik len nu kemwa.” Met Kristian inge nu kemwa su akpusisilyelos sifwanu ke kolyuk mutal elos akinsemwomwoyeyuk ke topuk fukoko su tuku ke Ma Simusla. (Orekma 15:19-23, 28, 29; 16:1-5) Aok, oasr siepa kusensiyuk su enenu in eis topuk.

A Fuka Met Ju Kristian?

12. Kain in kusensiyuk fuka srakna enenu topuk?

¹² Governing body el akkalemye tari la met Pegan nu kemwa su ekla met Kristian elos tia enenu kosroila. Tusruktu, a fuka met Ju Kristian ya elos srakna enenu in kosroila? Sulela lun governing body tia sang topuk nu ke kusensiyuk inge.

13. Efu ku arulanu sito in nunku la akos ke Ma Sap lal Moses arulanu yok sripe ke molela?

¹³ Kutu sin met Ju Kristian su ‘moniyuk nu ke Ma Sap” elos tafwela in kosroila tulik nutulos a akfulatye kutu ipen Ma Sap. (Orekma 21:20) Kutu selos oru orekma alukela ma fwal, elos liksreni in akkalemye la met Ju Kristian nu kemwa elos enenu in akos Ma Sap elos fwin lungse in moul. Elos tafongla na paye ke ma se inge. Ke sie me pupulyuk, fuka met Kristian elos ku in kisekin kosro in molela ma koluk lalos? Me kise lun Kraist el oru tari in wanginla sripen kain in me kise inge. A fuka Ma Sap su akkalemye la met Ju nu kemwa elos tia enenu in futoto nu sin met Pegan? Arulanu upa nu sin met Kristian su moniyuk in luti in akos ma sap inge meyen elos enenu in akpayeye kunokon su Jisus el sang nu selos, in luti met Pegan ke ma nu kemwa el sapkin nu selos. (Mattu 28:19, 20; Orekma 1:8; 10:28)a Wangin me akpayeye la me siyuk inge aksumwosyeyuk ke meeting lun governing body. Tusruktu, tia kalme la wanginla me kasru su orekla nu ke congregation.

14. Kain in me kasru fuka ke Ma Sap Poul el akkalemye ke leta lal su etuku ke ngun lun God?

¹⁴ Me kasru el tuku, tia ke inkanek lun leta su tuku sin governing body, a ke leta puspis lun met sap su etuku ke ngun lun God. Ke sie me pupulyuk, met sap Poul el supwela sie leta fukoko nu sin met Ju a met Pegan su muta in an Rom. Ke leta inge lal nu selos, el aketeye la sie met Ju na paye pa “in insiel, a kosroila ma su lun inse, in ngun.” (Rom 2:28, 29) Ke leta senpanu inge, Poul el orekmakin sie me pupulyuk in akpayeye la met Kristian nu kemwa elos tia muta ye Ma Sap. El akukuin a fwak la sie mutan el tia ku in payuk nu sin mokul luo in pal siefwunnu. Tusruktu, fwin mokul tumal el mise, el sukosok in sifwil payuk. Poul el orekmakin me pupulyuk inge, in akkalemye la met Kristian akmusrala nu kemwa elos tia ku in muta ye Ma Sap a in pal se na elos ma lun Kraist. Ke ma inge elos “mise tari nu ke Ma Sap” tu elos in ku in inse siefwunnu nu sel Kraist.​—Rom 7:1-5.

Elos Patla in Kalem ka

15, 16. Efu ku arulanu upa nu sin kutu sin me Ju Kristian in akilen la elos tia muta ke Ma Sap, a mea ma inge lungse in akkalemye ke me enenu in akola pal nu kemwa in ngun?

¹⁵ Elos tia ku in lain me sramsram inge lal Poul ke Ma Sap. Ke ma inge, efu ku kutu sin met Ju Kristian elos patla in kalem ka? Sie sripe pa, wangin liyaten lalos in ngun. Ke sie me pupulyuk elos pilesru in eis me mongo keke in ngun. (Hibru 5:11-14) Elos tia wi ke meeting lun met Kristian pal nu kemwa. (Hibru 10:23-25) Siepa sripe efu kutu selos tia kalem ka pa ma ke akmwuk lun Ma Sap sifwanu. Ma Sap el luti yok ke ma su ku in liyeyuk a pula, oanu tempel a akmwuk lun met tol. Arulanu fwusesr nu sin kutu met su munas in ngun in akos Ma Sap liki na in akos ma sap lun met Kristian, su luti yok ke ma paye su tia ku in liyeyuk.​—2 Korint 4:18.

¹⁶ Siepa sripe efu kutu sin met su ekin Kristian elos moniyuk in akos Ma Sap pa akkalemyeyuk sel Poul ke leta lal nu sin met Galetia. El aketeye la kutu sin met inge elos lungse in akfulatyeyuk oanu sie met su wi ipen alu pengpeng su met puspis elos akos a insemwomwokin. Elos srunga in srelosla liki un met, a elos engun in fuleak ke ma paye meyen elos lungse in asrouki nu sin met puspis. Elos insemwomwo in eis insese lun met liki insese lun God.​—Galetia 6:12.

17. Pal su arulanu kalem la tia enenu in sifwil akfulatye Ma Sap?

¹⁷ Met Kristian lalmetmet su lutlut akmwoye ke ma simusla puspis su etuku ke ngun lun God ke inkanek lal Poul a kutupa met elos akilen ma paye su elos enenu in oru ke Ma Sap. Tusruktu, in yiu 70 C.E. saflaiyen Ma Sap lun Moses arulanu kalem nu sin met Ju Kristian. Ma inge sikyuk ke pal se God el lela Jerusalem, tempel lal, a record nu kemwa ke akmwuk lun met tol in musalla. Ma inge oru in arulanu upa nu sin kutena met in akfulatye akmwuk nu kemwa lun Ma Sap.

Orekmakinyen Me Lutut Ke Pal Inge

18, 19. (a) Kain in oiye fuka kut enenu in srukye a kain in orekma fuka kut enenu in fwasr liki kut fwin lungse in mutanu fukoko in ngun? (b) Mea me srikasrak lal Poul luti nu sesr ke akos ke kolyuk lun met lili wiesr su oasr kunokon in oru ou inge? (Srike liye box ke sra 16.)

¹⁸ Tokin kut sramsram ke ma sikyuk puspis in pal meeta, saap kom mutamwauk in nunku: ‘Fwin Nga moul in pal ingo, mea Nga enenu in oru ke pal se Nga liye la ma lungse lun God akkalemyeyuk ke inkanek takla? Ya Nga moniyuk na in akos Ma Sap? Ku Nga mongfwusesr na nu ke pal Nga kalem na paye ke ma Nga enenu in oru ke Ma Sap? A fwin Nga kalem tari, ya Nga akola in insese ke ma inge ke insiuk kemwa?’

¹⁹ Paye, kut tia ku in etu na paye ma kut enenu in oru kut fwin moul in pal meeta. Tusruktu, kut ku in siyuk sesr sifwanu: ‘Oiye fuka Nga akkalemye fwin oasr aketeye sasu ke Baibel su akkalemyeyuk ke pal inge? (Mattu 24:45) Fwin me kasru ke Baibel akkalemyeyuk nu sik, ya Nga kaifweung in orekmakin ma inge, a Nga tia loang mukena ke ma simusla, a ke ma lun ngun su el lungse in akkalemye? (1 Korint 14:20) Ya Nga mongfwusesr in sano Jeova fwin topuk nu ke kusensiyuk puspis su Nga tia kalem ka luman patla na?’ Arulanu yok sripe kut in orekmakin mwo me mongo in ngun su kut ku in eis ke pal inge, tu kut in “tia patla lukelos.” (Hibru 2:1) Ke pal se Jeova el kol kut ke inkanek lun Kas lal, ngun mutal lal, a u lal fwin fwalu, lela kut in porongo. Kut fwin oru ou inge, Jeova el e fwa akinsemwomwoye kut ke moul ma patpat, sie me insemwomwo na paye pa inge.

[Footnote]

Fuka Kom Topuk?

• Ke inkanek fuka Ma Sap lal Moses el oanu sie “met liaung in kol metu nu sin Kraist”?

• Fuka kom ku in aketeye ma tia oanu sie ke inkanek in topuk lal Piter a ke inkanek in topuk lun “met su akkeye kosroila” ke me aksumwos in akilen ma paye?

• Mea kom lotela ke inkanek lun Jeova in akkalemye ma paye ke len inge?

[Box/Picture on page 16]

Poul El Inse Pusisel in Sun Me Srifwe ke Oaru Lal

Tokin orekma lun missionary lal su arulanu kapkapek, Poul el sun Jerusalem in yiu 56 C.E. Fwin an we sie me srifwe soanel. News kel su akkalemye la el luti nu sin met in tia akos Ma Sap sun tari congregation fwin an we. Met matu elos sangeng la Met Ju Kristian sasu su tufwanu ekla elos e fwa tokulkul ke kas pulaik lal Poul ke me sramsram ke Ma Sap a saap met Ju Kristian sasu inge elos e fwak la met Kristian nu kemwa elos pilesru akmwuk lun Jeova. In congregation we, oasr met Ju Kristian akosr su oru sie mwoleaung, saap sie mwoleaung lun Nazirite. Elos enenu in som nu ke tempel in akpayeye me enenu nu kemwa ke sie mwoleaung.

Met matu elos siyuk sel Poul in wi ke met akosr inge nu tempel a in forngakin me enenu lalos ke mani. Poul el simusla leta luo su etuku ke ngun lun God a ke leta se inge el akkalemye la molela tia tuku ke akos Ma Sap. Tusruktu, el nunku ke ella lun kutu met. Meet liki pal inge, el simusla: “Nu selos su ye ma sap, Nga oanu ye ma sap . . . tu Nga in sunelos su ye ma sap.” (1 Korint 9:20-23) Meyen wangin ma sap ke Ma Simusla su el kunausla, paenang Poul el pulakin la el ku in insese nu ke ma met matu elos sapkin nu sel in oru. (Orekma 21:15-26) Tia koluk nu sel in oru ou inge. Wangin kutena ma koluk su lain ma simusla ke akmwuk lun mwolela, a tempel in pal meeta elos orekmakin ke alu nasnas, a tia ke me srulela. Ke ma inge, meyen el srunga in aktukulkulye kutu met, paenang Poul el oru ma sapkinyuk nu sel el an oru. (1 Korint 8:13) Wangin alollo ma inge siyuk sel Poul in akkalemye inse pusisel yok, sie orekma na mwomwo pa inge su arulanu akyokye akfulat lasr nu sel.

[Picture on page 14, 15]

Ke lusen yiu puspis, kain in nunuk puspis su tia oanu sie ke Ma Sap lal Moses arulanu kalem inmaslon met Kristian