Me Akkeye ke Pal In Ma Upa
NEWS puspis ke pal inge tia me akkeye na paye nu sin met. Sie met el simusla: “Ma sikyuk puspis arulanu aksupwarye kut paenang pal nu kemwa kut alollo fwin kut loang ku tia ke news ke aur onkosr.” Fwal se inge nenela ke meun, orekma koluk lun terrorist, me keok, orekma silolel, a mas—ma koluk puspis su e fwa akkolukye kut na paye ke pal na futoto fwin kut sonna sun ma inge.
Baibel el palye na paye ke ma sikyuk inge nu kemwa. Ke pal se el sramsram ke pal lasr, Jisus el fwak la e fwa oasr meun lulap, me lokwalok, sral, a kusrusr. (Luk 21:10, 11) In oupanu, met sap Poul el simusla ke “pal in ma upa su upa nu sin met in muteng,” ke pal se inge met puspis elos oanu kosro lemnak, lungse mani, a tia lungse ma mwo. El pangon pal inge “len safla.”—2 Timote 3:1-5.
Ke ma inge, ke pal se kut sramsram ke luman fwal se inge, kut ku in liye la news puspis ke len inge oanu sie ke ma Baibel palye in pal meeta. Tusruktu, pa na inge ma oanu sie inmasloltal. Baibel el akkalemye ma el nunku ke fwal se inge, news el tia. Ke inkanek lun Kas lun God, kut tia ku in etu mukena efu ku oasr ma koluk puspis, a kut ku in etu pa mea e fwa sikyuk ke pal fwasru.
Mea Nunuk lun God ke Ma Koluk
Baibel el aketeye nunuk lun God ke ma koluk puspis in len lasr. Fwinne el etu tari meet ma koluk su e fwa sikyuk in len lasr, tusruktu el tia insese ke ma inge ku el nunku in fulela ma inge nu tok ma patpat. “God el lungse,” pa inge me met sap Jon el simusla. (1 Jon 4:8) Jeova el pakomuta na paye met a el srunga ma koluk nu kemwa. Ke ma inge arulanu mwo nu sesr kemwa in forla nu sin God ke me akkeye, meyen el mwo a pakoten, a oasr ku lal in aksafyela ma koluk fwin fwalu. Met sim lun Sam el simusla: “[Togusra in kosrao su God el sulela] el e fwa molela met enenu ke el wowoyuk, a met sikasrup, su wangin met kasreyel. El e fwa pakomuta met sikasrup a met enenu, a el e fwa molela ngunin met enenu. El e fwa molela ngunalos liki kemkatu a silolel, a e fwa saok sralos ye mutal.”—Sam 72:12-14.
Ya kom pakomuta nu sim met nu kemwa su keok? Aok, saap kom pula ou inge. Pakomuta el sie kain in oiye su Jeova el ase nu sesr, meyen kut nu kemwa orekla in lumal sifwanu. (Genesis 1:26, 27) Ke ma inge kut ku in lalalfongi la, Jeova el tia pilesru met keok. Jisus, su etu na paye Jeova yok liki kutena met, el luti nu sesr la Jeova el pwar na paye sesr a el arulanu pakomuta nu sesr.—Mattu 10:29, 31.
Ma orekla nu kemwa sang me akpayeye la God el pakomuta nu sin met nu kemwa. Jisus el fwak la God “el oru fwat lal in takak fwin met koluk a met mwo, a supamu af nu fwin met sumwos a met sesumwos.” (Mattu 5:45) Nu sin met nu kemwa su muta in siti lun Lystra, met sap Poul el fwak: “[God] el tia sifwanu fililye a wangin ma lo, tu el oru ma mwo a sot nu sumwos af in kosrao me, a pal mut, a sesesla insiomwos ke mongo a insemwomwo.”—Orekma 14:17.
Su Sropon Ma Koluk?
Loang akmwoye meyen Poul el akkalemye pa kas inge nu sin met in an Lystra: “Su in fwil somla lela nu sin mutanfwal e nu kemwa in fwasr inkanek lalos sifwanu.” Ke ma inge, mutanfwal inge nu kemwa—ku met—pa oasr kunokon ke ma upa su sikyuk nu selos ke pal inge. Tia God pa sropon ma koluk nu kemwa ke pal inge.—Orekma 14:16.
Efu Jeova el lela ma koluk in sikyuk? Ya oasr kutena ma el akola in oru nu ke ma inge? Topuk ke kusensiyuk inge ku in konoiyukyuk mukena ke Kas lun God. Meyen topuk ke kusensiyuk inge kapsreni nu ke siepa met su tia ku in liyeyuk a ke sie me sramsram yok su met inge el srukak ke an in muta lun ngun su kut tia ku in liyeyuk.
[Pictures on page 4]
Pakomuta oasr yurin met. Ya God el tia loang nu ke keok lun met?
[Picture Credit Line on page 2]
Tank: UN PHOTO 158181/J. Isaac; earthquake: San Hong R-C Picture Company
[Picture Credit Lines on page 3]
Leyen lese lung, An Croatia: PITSE LUN UN 159208/S. Whitehouse; tulik musrensral se: PITSE LUN UN 146150 BY O. MONSEN