“Nga Sot Nu Sumwos Sie Me Srikasrak”

“Tu ke pal sa fwal komwos in met luti.”​—HIBRU 5:12.

1. Efu ku kas in Hibru 5:12 ku in kasru sie met Kristian in pulakin kutu me enenu yok su fwal in orekmakinyuk?

KE PAL se kom ridi koanon text se lasr inge, ya oasr ma kom pulakin keim sifwanu? Fwin oasr, esam la tia kom mukena pulakin ou inge. In oanu sie met etawi Kraist, kut etu la enenu kut in met luti. (Mattu 28:19, 20) Kut etu tari la in pal lasr misenge arulanu yok eneneye kut in oru orekma lun sie met luti ke kas lun God. A kut etu pa la inkanek in luti lasr ku in sang me molela-ku-me mise nu selos su kut lutlut nu se! (1 Timote 4:16) A ke ma inge, lela kut in siyuk sesr sifwanu: ‘Ya paye Nga sie met luti mwo su fwal? Fuka tu Ngan ku in orala sie met luti mwo?’

2, 3. (a) Fuka sie met luti el aketeye ke ma mwo su eneneyuk nu sin sie met luti? (b) Kain in me srikasrak fuka Jisus el oakiye nu sesr in oru oanu sie met luti?

² Lela kain in nunuk ou inge in tia akkolukye kut. Meyen kut fwin nunku ke inkanek in luti oanu sie ma upa in suk ke inkanek in lutlut ku kutena kain in oiye usrnguk in orek nu ka, na kut e ku in nunku mu kut sufwal nu ke orekma in luti. Tusruktu, lela in kalem la in orala sie met luti mwomwo, tia enenu in eis lutlut lulap in eis kutena kain in technique ku inkanek usrnguk in luti a oasr ma se ma yok sripe emeet. Oasr sie experience lun sie met luti el akkalemye a simusla in sie buk su el orala: “Sie met luti mwomwo tia enenu in eis lutlut lulap in eis kutena kain in technique ku style sakuruk in orekmakin, in orek plan puspis ku in lumala kutena kain in fungfung nu ka . . . . Tusruktu ma se ma yok emeet nu ke sie met luti mwomwo pa lungse.” Aok, payela experience el akkalemye inge ma nu ke met luti lun fwal se inge. Tusruktu, me sramsram lal inge arulanu fwal yok sripe nu ke akmwuk lun met Kristian ke inkanek in luti lalos. Pia me akpayeye nu ka?

³ Srikasrak lun sie met luti tia ekla liki akmwuk lun Jisus Kraist, su el akkalemye nu sin met tumal lutlut lal: “Nga sot nu sumwos sie me srikasrak.” (Jon 13:15) Ke el fwakak ou inge el akkalemye ke me srikasrak lal ke oiye su el sifwanu oru, tusruktu me srikasrak se ma Jisus el oakiye nu sesr inge el oru ke pal se el srakna muta fwin fwalu​—forfor a luti ke pweng mwo ke Togusrai lun God nu sin met nu kemwa su lungse in long. (Luk 4:43) Ke ma inge, kom fwin lungse in sulela sie kas su kom nunku mu fwal in sang akkalemye orekma lal Jisus, saap kom e fwa sulela kas se inge “lungse,” ya kom tia nunku ou inge? (Kolosse 1:15; 1 Jon 4:8) Lungse lun Jisus’ nu sin Jeova, Papa tumal su in kosrao, arulanu fulat a pengpeng lanu. (Jon 14:31) Ke ma inge, in oanu sie met luti, Jisus el akkalemye oiyen lungse ke inkanek luo. El lungse na paye me luti lal, a el ouyepa lungse na paye met su el lutlut nu se. Lela kut in tuni akmwoye ke me srikasrak luo su el ase nu sesr inge.

Sie Lungse Paye nu ke Ma Paye lun God

4. Fuka Jisus el oakiye inkanek in lungse a engunkin me luti lun Jeova?

⁴ Oiye lun sie met luti fwakulak sifwanu nu sin met su el lutlut nu se ke oiyen fwako lun lutlut lal. Fwin oasr kutu luma su tia sumwos el orala met su lutlut el ku pa in akilen. Wangin nunuk in allolo lal Jisus ke ma nu kemwa su el luti kel Jeova a Togusrai Lal. Lungse lun Jisus’ nu ke orekma se inge arulanu yok su wangin kutena ma ku in lumeyuk nu ka. El orekmakin lungse oanu sie tulik lutlut. Ke lusen moul lal fwin fwalu, Mwen kulu-siefwunnu inge akkalemye engun yok lal in lutlut. Isaia 50:4, 5 el akpayeye: “Leum Jeova el ase nu sik loan met su lutlut tari, tu Nga fwa etu fuka in kasru met totola ke kasu. El ngetalik penganu lutu, el okasek srek in long oanu elos su lutlut tari. Leum Jeova el ekesla srek, a Nga tia likkeke, ku totulukla.”

5, 6. (a) Mea ma sikyuk ke baptais lal Jisus su arulanu kalem, a mea pulakin lal? (b) Mea ma siena liki kut ku in konaok sel Jisus a Setan fwin ke orekmakinyen Kas lun God?

⁵ Ke Jisus el kapkapek fwin fwalu, el tafwela in akkalemye lungse ke lalmetmet mutal. (Luk 2:52) Ke ma inge, in pal in baptais lal, oasr kain in luma sakuruk sikyuk. “An in kosrao ikakla,” in oanu ma Luk 3:21 akkalemye. Ou inge, Jisus el esamak ma nu kemwa meet liki el tuku nu fwalu. Tokin ma inge el som nu yen mesis in lalo ke len 40. In pal se inge el ku in esamak ma nu kemwa ma Jeova el sapkin nu sel in oru ke el muta in kosrao. Tusruktu, tia pat toko, lungse lal ke ma paye lun God srifweyuk.

⁶ Ke pal se Jisus el totola a pulakin musrinsral, Setan el mutamwauk in srifwel. Oasr ma sakuruk yok sikyuk inmaslon tulik luo nutin God inge! Tulik luo inge kemwa orekmakin ma simusla in kas Hibru​—tusruktu ke inkanek lun ngun su tia oanu sie. Setan el ekulla kas lun God, ke inkanek sesumwos, fwal nu ke lungse lal sifwanu. Paye, la orekma in lain lal inge nu kemwa tia paye tusruktu me na sang lain ma paye lun God. In fwal nu ke ma Jisus el oru, pal nu kemwa el orekmakin ma simusla ke kas lun God in pa me top lal. Jisus el oasr tari meet liki kas inge nu kemwa simusyukla, tusruktu el arulanu akfulatyeyuk yok kas se inge. Kas inge nu kemwa kas saok mukefwunnu sin Papa tumal su oasr in kosrao! El fwakak nu sel Setan la kas inge nu kemwa su tuku sin Jeova yok sripe liki kutena me mongo yuyu. (Mattu 4:1-11) Aok, Jisus el lungse kas paye nu kemwa lun Jeova su lutiyuk nu sel. Ke ma inge, fuka akkalemyeye sel la el lungse ma inge nu kemwa in oru oanu sie met luti?

El Luti in Lungse Ma Paye

7. Efu ku Jisus el tia lungse in orekmakin nunuk lal sifwanu nu ke me luti lal?

⁷ Lungse lun Jisus ke ma paye su el luti arulanu kalem pal nu kemwa. Aok, fwusesr nu sel in orekmakin nunuk lal sifwanu. Oasr yurol etauk a lalmetmet paye. (Kolosse 2:3) Tusruktu, el kalweni in fwak pal puspis nu sin met su longol la ma nu kemwa el luti, tia ma tuku sel sifwanu, a tuku sin Papa tumal su oasr in kosrao. (Jon 7:16; 8:28; 12:49; 14:10) El lungse yok ma paye lun God su e paenang el tia ku in ekulla nu ke etauk lal sifwanu.

8. Ke mutamweyen luti lal, fuka Jisus el oakiye sie me srikasrak mwo in filiye lalalfongi nu ke Kas lun God?

⁸ Ke Jisus el mutamwauk in oru orekma in luti lal, el silaklak in oakiye me srikasrak. Lela kut in tuni me luti lal nu sin met lun God ke mutamwauk in akkalemye la el pa Messaia su kas palu fwakak ka. Ya el som nu inmasrlon met puspis, in fwakulak sifwanu la el pa Kraist, a lan oru kain in menmen sakuruk tu metu in lalalfongel? Mo, tia ou inge. A el som nu in imwen alu ku synagogue, nu yen su met lun God elos tukeni we pal nu kemwa in rid ke Kas lun God. El rid ke pusra lulap in imwen alu kas in palu in Isaia 61:1, 2 a aketeye la kas palu inge akpayeyuk nu sel sifwanu. (Luk 4:16-22) Menmen lal nu kemwa akpayeye la ngun lun Jeova kasrel. Sayen ma inge, el orekmakin Kas lun God pal nu kemwa ke luti lal.

9. Ke pal se el oru akmwuk lal nu sin met Farisi, fuka Jisus el akpayeye lungse paye lal nu ke Kas lun God?

⁹ Ke pal se met kol lun alu elos suk in lainul, el tia alein nu selos, fwinne el etu la el ku in lainelos a eis kutangla in ma nu kemwa. A, pal nu kemwa el orekmakin Kas lun God in sang lainelos. Srike nunku, ke sie pal, met Farisi elos akkolukye met tumal lutlut lun Jisus mu elos kunausla ma sap ke len Sabat ke elos olela korn a in mongo in pal elos fwasr sasla in imae in korn. Na Jisus el topuk: “Ya komwos tia rid ma Devid el oru, ke el musrinsral, a elos su oelul?” (Mattu 12:1-5) Paye, saap met mwusounkas inge elos rid pa ma simusla in 1 Samuel 21:1-6. Fwin paye, elos inge tafongla tia loang akmwoye nu ke ip yok sripe se su ma orekmakinyuk inge. Fwinne ou inge, Jisus, el orekma yok liki in rid mukena me lutlut inge. El lutlut tari ke ma inge a filiye ma inge ke insiel su ma ku in orekmakin pal nu kemwa. El lungse akmwuk nu kemwa su Jeova el luti ke inkanek lun Ma Simusla. Ou inge el suk in orekmakin pal nu kemwa, wekunang me srikasrak nu kemwa ke Ma Sap lal Moses, in akkalemye inkanek sumwos in orek nu ke akmwuk lun Ma Sap lun God. In oapanu, lungse paye lun Jisus’ nu ke Kas lun God , ku in liyeyuk, su paenang elan suk in aksumwosye Kas lun God su met kol lun alu elos ekulla in fwal nu ke lungse lalos ku in afwunye nu ke fasin lalos.

10. Fuka Jisus el akpayeye kas in palu ke fwako mwomwo su tuku ke me luti lal?

¹⁰ Lungse yok lun Jisus’ nu ke ma paye tia moklel in luti ke kutena pal ke inkanek in kalwen pal nu kemwa, a me totola nu sin met. In fwal nu ke kas palu su fwakak ka la Messaia el fwa orekmakin ‘kulang in ngoasrol,’ a orekmakin “kas mwo.” (Sam 45:2; Genesis 49:21) Jisus el akpayeye kas palu inge ke el orekmakin pal nu kemwa kas mwomwo a arle kalem, orekmakinyen “kas fwusesr” in luti lal ke ma paye su el lungse yok. (Luk 4:22) Wangin me allolo ka la engun lal akkalemyeyuk ke lumal, a arulanu kalem ke mutal me insemwomwo ke sramsram lal. Fuka yokiyen me insemwomwo nu selos nu kemwa su long ke me luti lal, a ouyepa nu sesr kut fwin etawi akmwuk in luti lal in pal kut lutlut nu sin met su engun in lutlutkin ma su kut lotela tari!

11. Efu ku fwako mwomwo lun Jisus ke me luti lal tia paenang elan inse fulat ka?

¹¹ Ya lalmetmet yok lun Jisus ke ma paye a ke etauk yok lal paenang elan insefulat ku in kaksakunul sifwanu? Meyen pa inge ma sikyuk pal nu kemwa nu sin met luti lun fwalu. Tusruktu, esam, la Jisus el eis lalmetmet yok lal ke inkanek lun God. Kain in lalmetmet inge tia lela kutena kain in nunuk insefulat in orek, meyen “lalmetmet oasr yurin met fwokpap.” (Soakas 11:2) Oasr pa kutena luma pa paenang Jisus elan tia insefulat ku in sifwanu kaksakin.

Jisus El Lungse Met nu Kemwa Su El Lutlut Nu Se

12. Fuka Jisus el akkalemye la el tia lungse met tumal lutlut lal in pulakin sangeng sel?

¹² Lungse yok lun Jisus’ nu sin metu akkalemyeyuk ke luti lal. Luti lun Jisus tia me aktoasr nu sin metu, in oanu ma met luti lun fwalu elos oru pal nu kemwa. (Ekklisiastis 8:9) Tokin Jisus el orala sie menmen lal, Piter el lut ma lulap ke el liye, a putati nu intel Jisus. Tusruktu Jisus el tia lungse met tumal lutlut lal in sangeng sel. Ou inge el fwak, “Nikmet sangeng” a el tafwela in fwak nu sel Piter ke sie orekma yok su eneneyuk in orek met tuma-lutlut su Piter el fwa esalang nu ka. (Luk 5:8-10) Jisus el lungse met tumal lutlut lal elos in sifwanu oru sulela lalos nu ke ma paye ke God, a tia ke sangeng nu sin met luti lalos.

13, 14. Ke inkanek fuka Jisus el akkalemye pakomuta lal nu sin metu?

¹³ Lungse lun Jisus’ nu sin met su el lutlut nu se akilenyuk ke pakoten yok lal nu selos. “Ke el liye un met puspis, el pakomutalos, tu elos ongoiye, a fwasrelik, oanu sip su wangin met sropu.” (Mattu 9:36) El pakomutalos yok ke el liyelos a srike in sang me kasru yok nu selos.

¹⁴ Liye pakoten lun Jisus’ su el akkalemye ke sie pal. Oasr sie mutan su maskin musen sra ke pal loeloes el tuku nu yurol inmasrlon met puspis a kalye sisken pulun nuknuk lal, a in kitin pal a el kela liki mas lal. Oasr pulakin lun Jisus ke ku lal srikeni, tusruktu el tia etu la su akkeyeyukla in pal sa. Paenang el kaifweung in suk la su mutan sa. Efu el suk? El sokol tia in akkolukyel ke sripen el kunausla pusren Ma Sap ku ke sripen akmwuk lun met sim a met Farisi, su saap paenang elan sangeng wukwuk inmasrlon met puspis. Tusruktu el sokol, in fwak nu sel: “An, lalalfongi lom orekom in kela. Som in misla, a kela liki me lokwalok lom.” (Mark 5:25-34) Srike loang akmwoye nu ke pusren kas lal inge. El tia orekmakin kutena kain in kaskas pulasr in fwak, “Akkeye kom.” Tusruktu, el fwak: “Som in misla, a kela liki mas lom su aklokwalokye kom.” Mark el orekmakin kain in kas su ku in kalmeya “me akkeok,” sie kain in me sringsring su pal nu kemwa orekmakinyuk in oanu me akkeokye. Ke ma inge, Jisus el akpayeye la mas lal akkeokyel, saap ke manol a ke nunuk lal. Jisus el pakomutal arulanu yok.

15, 16. Mea ma sikyuk ke orekma in luti lun Jisus akkalemye la el suk ma mwo mukefwunnu ke metu?

¹⁵ Jisus el akkalemye pa lungse a pakomuta lal nu ke ma mwomwo su on yurin metu. Loang akmwoye nu ke ma su sikyuk nu sel Nathaniel ke el sonol, su tok ekla sie met tumal lutlut. “Jisus el liyel Nathaniel tuku nu yurol a fwak kel: ‘Liye, sie met Israel paye, su wangin kutasrik in el.’ ” Ke ku lun menmen, Jisus el liye insiel Nathaniel, a lotela ma puspis kel. Aok, Nathaniel el tia sumwosmwos in moul lal. Oasr ma sesumwos lal Nathaniel, oanu kut nu kemwa. Ke ma paye, ke pal se el longak kel Jisus, el fwak ke kas in aksruksruk: “Ya kutena ma mwo ku in tuku Nasaret me?” (Jon 1:45-51) Tusruktu, ma nu kemwa su ku in fwakyuk kel Nathaniel, oasr ma mwomwo su Jisus el etu kel, la el sie met oaru in moul lal.

¹⁶ Oasr pa sie luma sikyuk oapanu ma se inge, ke pal se officer se​—saap el met Gentile, sie met Rom—​el tuku a siyuk sin Jisus in akkeyela sie met kulansap, Jisus el etu la oasr ma tafongla met solse se inge orala. Sie officer lun met meun in len ingo el moulkin sie moul su nenela ke orekma silolel, aksurorye sra, a alu kikiap. Tusruktu, Jisus el tuni a liye ma mwo​—pa inge lalalfongi ku lun met se inge. (Mattu 8:5-13) Tok kutu, ke pal se Jisus el sramsram nu sin met koluk se su ma welul srupsrupyak fwin sak in akkeok lalos, Jisus el tia fulukunak in akkolukye met koluk sa a el sang kas in akkeyel nu ke fwinsrak lun pal fwasru. (Luk 23:43) Jisus el arulanu etu la in tuni mukena ma tafongla lun kutu met, a sramsramkin arulanu koluk a e fwa purakak me asor lulap nu selos. Wangin allolo la kaifweung lal in suk ma mwo nu sin kutu met el inge akkeye met puspis in kaifweung in oru pa ma mwo.

Engun in Oru Kulansap nu sin Met

17, 18. Ke sripen oasr insese la in tuku nu fwalu, fuka Jisus el akkalemye engun lal in kulansap nu sin kutu met?

¹⁷ Siepa inkanek mwomwo su Jisus el akkalemye lungse nu sin met nu kemwa su el lutlut nu se pa ke insemwomwo lal in oru kulansap lal nu selos. Meet liki tuku lal nu fwalu, Mwen nutin God el arulanu engun yurin mwen nutin met. (Soakas 8:30, 31) In oanu “Kas” lun Jeova ku met utuk kas lal, saap oasr ma puspis su el pulakin a insemwomwo ka ke pal el fwakak kas nu sin metu. (Jon 1:1) Tusruktu, kunokon yok nu ke ipen orekma lal pa in luti sumwosmwos nu sin metu paenang, “el sifwanu akpusiselyel, a nukomang luman sie met kulansap,” in tuku nu fwalu a pilesrela ma mwomwo nu kemwa lal in kosrao. (Filippai 2:7; 2 Korint 8:9) Ke pal se Jisus el muta fwalu, el tia sano metu in tuku kulansap nu sel. A, el fwak ou inge: “Oanu Mwen nutin met el tia tuku tu met in kulansap nu sel, a tu elan kulansap nu selos, a sang moul lal in moli met puspis.” (Mattu 20:28) Jisus el akpayeye ke moul lal nu fon kas inge nu kemwa.

¹⁸ Jisus el kulansap ke pusisel nu sin met nu kemwa su el lutlut nu se, a akola in sang kasru lal sifwanu nu selos. El oru fwufwasr lal ke niel sifwanu nu yen nu kemwa ke Fwal Mwolela, som ke lusen foko miles in oru forfor in luti nu sin kain in met puspis. El tia oanu met Farisi a met sim su arulanu insefulat, a el inse pusisel a kulang nu sin met nu kemwa. Oanu sie kain in met nu kemwa​—met fulat a pengpeng, met meun, lawyers, mutan, tulik, met sikasrup, met mas, ku kain in un met su pilesreyuk sin metu—​elos sukosok a tia sangeng in tuku osun nu sel. El fwinne sumwosmwos, Jisus el oapanu kut metu, el pulakin ulle a musrinsral. Tusruktu, el fwinne pulakin totola a enenu in eis mongle ku in som nu in an misla in pre, el srike in akfwalye meet me enenu lun kutu met yok liki me enenu lal.​—Mark 1:35-39.

19. Fuka Jisus el oakiye me srikasrak mwomwo nu ke inse pusisel, muteng, a kulang nu sin met tuma lutlut lal?

¹⁹ Jisus el insemwomwo in oru oanu sie in kulansap nu sin met tumal lutlut lal. El akpayeye akmwuk se inge ke inkanek kulang lal in lotelos a in mongfwusesr nu selos. Fwin oasr pal elos patla in lotela kutena me lutlut yok sripe, el tia silaklak in fuleak, mulat, a sa in koskusruk selos. El tia fuleak in suk inkanek mwo in sang akkalemye me kasru lal nu selos. Nu ke me pupulyuk, pal ekasr met tumal lutlut lal elos akukuin ke akmwuk lun met kol la su ku inmaslolos fwa met kol lalos. Oasr pal puspis, elos akukuin fwafwale na nu ke na sun fong se meet liki mise lal, Jisus el konaok inkanek sasu in sang lotelos in etu in orekmakin inse pusisel nu sin sie sin sie. Ke sripen inkanek in akmwuk lun inse pusisel inge, a ke kutepanu inkanek, Jisus el ku in fwak sumwos: “Nga sot nu sumwos sie srikasrak.”​—Jon 13:5-15; Mattu 20:25; Mark 9:34-37.

20. Me luti fuka paenang Jisus el ku in srella liki met Farisi, a efu ku me srikasrak inge mwo?

²⁰ Kom ku in akilen la Jisus el tia fwak mukena nu sin met tumal lutlut lal ke me srikasrak; a el srike in “oakiye sie me srikasrak.” El luti nu selos pa ke oiyen inkanek in oru me srikasrak inge. El tia kaskas nu selos ke nunuk inse fulat, in pangon mu el fulat lukelos paenang enenu in akosyuk ma el sapkin in orek. Meyen pa inge inkanek lun met Farisi su elos lungse in oru. “Tu elos fwak, a tia oru,” pa inge ma Jisus el fwakak kelos. (Mattu 23:3) Jisus el sifwanu akpusiselyel nu sin met el lutlut nu se ke inkanek su el oru fwal nu ke ma el luti, a moulkin. Paenang ke pal se el sapkin met tumal lutlut lal in tia munkela yok ke me kasrup, elos nu kemwa arulanu kalmekin ma el fwak. Elos ku in akilen na paye kalmen kas lal inge: “Oasr luf lun kosro foks, a oasr ang lun mwon yen engyengu; a Mwen nutin met wangin an sifwel in on we.” (Mattu 8:20) Jisus el oru kulansap lal nu sin met tumal lutlut lal ke inkanek pusisel fwal nu ke me srikasrak su el sang nu selos.

21. Mea fwa lutiyuk ke me lutlut se toku?

²¹ Wangin kutena me siyuk, la paye Jisus el sie Met Luti pengpeng emeet su moul fwin fwalu! Lungse yok lal nu ke me luti lal a lungse yok lal nu sin met nu kemwa su el lutlut nu se arulanu kalem nu sin met nu kemwa su paye insie nu ke ma elos liye a long sel. E fwa oapanu misenge nu selos su lutlutkin me srikasrak su el oakiye. Tusruktu, ke inkanek fuka, kut ku in etawi me srikasrak sumwosmwos lun Kraist? Me lutlut toku fwa sang me top nu ke kusensiyuk inge.

Fuka Me Top Lom?

• Mea sropon sie me luti mwomwo, in oanu ke lumeyukla sin su?

• Ke inkanek fuka Jisus el akkalemye inkanek in lungse nu ke ma paye su el luti?

• Jisus el akkalemye fuka lungse lal nu sin met su el lutlut nu se?

• Mea me srikasrak su akkalemye la Jisus el inse pusisel a akola in sang kasru nu selos nu kemwa su el lutlut nu se?

[Picture on page 8]

Fuka Jisus el akkalemye la el lungse akmwuk mwolanu su tuku ke Kas lun God?