Toeni Orekma Mutal Nu Ke Mongfwusesr Lom
“Toeni nu ke lalalfongi lomwos . . . mongfwusesr, nu ke mongfwusesr lomwos orekma mutal.”—2 PITER 1:5, 6.
1, 2. (a) Kain in kapkapek fuka kut sano tulik in oru? (b) Fuka lupan ma saok su tuku ke kapkapek in ngun?
KAPKAPEK arulanu yok sripe nu sin tulik srisrik, tusruktu tia kapkapek mukena ke mano pa kut lungse. Kut sano pa in oasr kapek lal ke nunuk a ke ma el pula. Tokin sie pal, tulik srisrik el sisla orekma lun tulik srisrik a el kapek nu ke sie mokul ku mutan su fwal matwe. Met sap Poul el sramsram ke ma inge ke pal se el simusla: “Ke Nga tulik, Nga kaskas oanu tulik, Nga etu oanu tulik, Nga nunku oanu tulik; a inge Nga met matu, a Nga sisla ma lun tulik.”—1 Korint 13:11.
2 Kas inge lal Poul el aketeye yok ke kapkapek ke ma lun ngun. Met Kristian nu kemwa enenu in kapkapek mutamwauk ke tulik srisrik nu ke na elos “elan met matu in nunuk.” (1 Korint 14:20) Elos enenu in kaifweung a srike in srukye “met mwo matwe, nu ke srikasrak in lupan ma seseslanu in Kraist.” Ke ma inge elos tia sifwil “tulik, ikik ke nua a mokuikui ke eng in lutlut nu kemwa.”—Efesus 4:13, 14.
3, 4. (a) Mea kut enenu in oru in kapkapek fwal in ngun? (b) Kain in oiye mwo puspis fuka su tuku sin God kut enenu in akkalemye, a efu arulanu yok sripe ma inge?
3 Fuka kut ku in kapek nu ke matwe fwal in ngun? Fwinne kapek ke mano ku in sikyuk ke sie luma fwal a mwo, tusruktu enenu kaifweung ke kapkapek lun met ke ma lun ngun. Ma inge mutamwauk ke lutlut in eis etauk sumwos ke Kas lun God a in orekma fwal nu ke ma kut lotela tari. (Hibru 5:14; 2 Piter 1:3) Tia pat toko, ma inge ku in kasre kut in akkalemye oiye mwo su akinsemwomwoye God. Oanu kapek lun mano a laan mano nu kemwa, kapek ke ma lun ngun a kain in oiye mwo nu kemwa ku in sikyuk ke pal siefwunnu. Met sap Piter el simusla: “Aok, a meyen ma inge, akkeye komwos in alken, a toeni mwona nu ke lalalfongi lomwos, a etauk nu ke mwona lomwos, a sifwanu liaung nu ke etauk lomwos, a mongfwusesr nu ke sifwanu liaung lomwos, a mutal nu ke mongfwusesr lomwos, a lungse lun met lili nu ke mutal lomwos, a lungse nu ke lungse lun met lili lomwos.”—2 Piter 1:5-7.
4 Kais sie oiye su Piter el simusla arulanu yok sripe, a wangin ne sie enenu in eisla liki. El tafwela: “Tu ma inge fwin ma lomwos a tingtinginu, na ma inge fwa oru tu komwos in tia alsrungesr a tia talap nu ke lalmetmet lun Leum lasr Jisus Kraist.
Me Enenu ke Mongfwusesr
5. Efu kut enenu mongfwusesr?
5 Piter a Poul elos toeni orekma mutal nu ke mongfwosesr. (1 Timote 6:11) Kalmen mongfwusesr pa tia in muteng mukena fwin oasr ma upa ku in tu ku ye me srifwe. A, enenu mongfwusesr, pulaik, a oaru, tia in wanginla fwinsrak fwin sun me srifwe, me kutong, ma upa, ku kolyai. Ke sripen kut moulkin “moul mutal in Kraist Jisus,” paenang kut ku in lalalfongi na paye la oasr kolyai su e fwa tuku nu sesr. (2 Timote 3:12) Kut enenu in muteng kut fwin lungse in sang me akpayeye ke lungse lasr nu sin Jeova a kut fwin lungse in akkapye kutu oiye mwo su eneneyuk nu ke molela lasr. (Rom 5:3-5; 2 Timote 4:7, 8; Jemes 1:3, 4, 12) Fwin wangin mongfwusesr lasr, kut tia ku in eis moul ma patpat.—Rom 2:6, 7; Hibru 10:36.
6. Muteng nu ke safla ku in kalmekin mea?
6 Fwinne mutamwauk lasr arulanu mwo, tusruktu ma yok emeet pa mongfwusesr lasr a muteng. Jisus el fwak: “A el su muteng nu ke safla, el nu fwa moul.” (Mattu 24:13) Aok, kut enenu in muteng nu ke safla, fwinne ma inge ku in kalmekin saflaiyen moul lasr ke pal inge ku saflaiyen akmwuk koluk inge. Ke kutena ma sikyuk inge, kut enenu in srukye oaru lasr nu sin God. Aok, kut fwin tia toeni orekma mutal nu ke mongfwusesr lasr, kut tia ku in akinsemwomwoye Jeova, a kut tia ku in eis moul ma patpat. Tusruktu, mea se inge orekma mutal?
Mea Kalmen Orekma Mutal
7. Mea se inge orekma mutal, a mea ma inge mokle kut in oru?
7 Orekma mutal pa, akfulat, alu, a kulansap lasr nu sin Jeova God ke sripen oaru lasr ke sumwos lal in kol in kosrao a fwalu. In akkalemye orekma mutal nu sin Jeova, kut enenu etauk sumwos kel a ke inkanek nu kemwa lal. Kut enenu in etu na paye God ke ma el lungse a ma el srunga a oiye mwo lal nu kemwa. Ma inge nu kemwa ku in mokle kut in akkapye sie kain in moul su futoto nu sel, a ma inge akkalemyeyuk ke orekma a inkanek in moul lasr. Kut enenu in akkalemye ke ku lasr kemwa sie kena in etawi Jeova—in etawi inkanek lal a in akkalemye orekma a oiye mwo nu kemwa lal. (Efesus 5:1) Paye, orekma mutal mokle kut in akinsemwomwoye God ke ma nu kemwa kut oru.—1 Korint 10:31.
8. Fuka orekma mutal kapasr nu ke alu nu sin Jeova mukefwunnu?
8 In akkalemye orekma mutal paye, kut enenu in alu nu sin Jeova mukefwunnu, el mukena pa oasr ke insiesr. Oanu Met Orekutla, oasr sumwos lal in siyuk sesr ke lungse a in kulansap nu sel mukefwunnu. (Duteronomi 4:24; Isaia 42:8) Fwinne ou inge, Jeova el tia liksreni in patok nu sesr in alu nu sel. El lungse kut in alu nu sel ke insemwomwo. Lungse lasr nu sin God, su tuku ke etauk sumwos lasr kel, pa mokle kut in aknasnasye moul lasr in ngun a ikwe a in oru mwolela nu sel a in moul fwal nu ke mwolela lasr.
Akkapye Futoto Nu Sin God
9, 10. Fuka kut ku in musaiyuk a srukye na moul futoto nu sin God?
9 Tokin kut sang akul ke mwolela lasr nu sin God ke inkanek lun baptais, kut srakna enenu in akkapye futoto lasr nu sel. Ke ma inge kena lasr in oru ou inge a in kulansap nu sin Jeova ke oaru, mokle kut in tafwela in oru lutlut lasr ke Kas Lal a in nunku ma inge pal e nu kemwa. Ke kut lela ngun mutal lun God in orekma nu ke nunuk lasr a insiesr, lungse lasr nu sin Jeova yokyokelik. Futoto lasr nu sel fwa tafwela in yok emeet ke moul lasr. Kut nunkel Jeova oanu Kamwuk futoto lasr a kut lungse in akinsemwomwoyel pal nu kemwa. (1 Jon 5:3) Insemwomwo lasr a futoto lasr nu sin God pa kapkapek, a kut ku in sang kulo meyen el luti kut ke kulang a el aksumwosye kut ke pal enenu.—Duteronomi 8:5.
10 Kut fwin tia kaifweung in akkeye futoto saok lasr nu sin Jeova ma inge ku in munasla. Fwin ma inge sikyuk, wangin ma koluk lun God, meyen “el tia loes liki kutena sesr.” (Orekma 17:27) Kut arulanu insemwomwo meyen Jeova el tia oru in upa nu sesr in sunol! (1 Jon 5:14, 15) Paye, kut enenu in kaifweung kut fwin lungse in futoto nu sin Jeova pal e nu kemwa. Aok, el kasre kut in futoto nu sel ke el ase nu sesr me kasru nu kemwa in musaiyuk a in srukye orekma mutal lasr. (Jemes 4:8) Fuka kut ku in orekmakin na paye me kasru inge nu kemwa lal ke kulang?
Kaifweung in Fukoko in Ngun
11. Mea kutu nu ke orekma mutal lasr?
11 Lungse yok lasr nu sin God fwa mokle kut in akkalemye lupan orekma mutal lasr, fwal nu ke kas in kai lal Poul: “Kom in akkeye kom tu God lan liye kom mwo, sie met orekma su tia enenu in mwekin, su orekmakin sumwosna kas lun God.” (2 Timote 2:15) In oru ou inge, kut enenu in srukye sie schedule mwomwo ke lutlut Baibel pal nu kemwa, wi meeting pal nu kemwa, a in wi forfor pal nu kemwa. Kut ku in ouyepa futoto nu sin Jeova pal nu kemwa ke kut ‘pre a tia sisla.’ (1 Tessalonika 5:17) Ma inge nu kemwa sie inkanek yok in akkalemye orekma mutal lasr. Kut fwin mulkunla fwinne sie ke me enenu inge, kut ku in mutamwauk in mas in ngun a kut filiye moul lasr ke me sensen in sremla nu ke orekma kutasrik lun Setan.—1 Piter 5:8.
12. Fuka kut ku in mongfwusesr a kutangla ke me srifwe puspis?
12 In fukoko pal nu kemwa ke ma lun ngun a in kafofo ka ku in ouyepa kasre kut in sun ke pulaik ma upa nu kemwa. Me srifwe puspis ku in tuku ke ma puspis su ku in arulanu akngalye kut. Srunga, me lain, a kolyai ku in oru kut in arulanu muteng yokna fwin ma inge tuku ke sou futoto lasr, ke sou lasr ku ke met tulan lasr. Ma upa yok su kut tianu akilen lain ma sap lun met Kristian ku in sikyuk ke nien orekma ku loom lutlut. Me akmunas, mas, a me asor yok ku in akmunasye kut a oru in arulanu upa sesr in mongfwusesr ke me srifwe ke lalalfongi lasr. Tusruktu, kut ku in muteng ke me srifwe inge nu kemwa kut fwin kaifweung “in muta in moul mutal a sumwosmwos, in sano a tawi ke tuku lun len lun Jeova.” (2 Piter 3:11, 12) Kut ku in srukye insemwomwo lasr in oru ou inge, a lalalfongi ke me insemwomwo lun Jeova.—Soakas 10:22.
13. Mea kut enenu in oru kut fwin lungse in akkalemye orekma mutal pal e nu kemwa?
13 Fwinne Setan el lain na paye met nu kemwa su muta in moul mutal, tusruktu, kut tia enenu in sangeng. Efu? Meyen “Jeova el etu fuka in eisla met mwo liki me srifwe.” (2 Piter 2:9) In muteng ke me srifwe a in eis molela, kut enenu in “lafwekin ma koluk a lung lun fwalu a . . . in moul sumwos, a sumwosmwos, a mutal in fwal se inge.” (Taitus 2:12) Oanu met Kristian, kut enenu in sano pal nu kemwa in tia lela kutena munas in ikwe a orekma in akmunasye orekma mutal lasr a in kunausla ma inge. Lela kut in tuni ke pal inge kutu nu ke me sensen inge ke orekma mutal lasr.
Taran ke Me Sensen ke Orekma Mutal Lasr
14. Mea ma inge su kut enenu in esam fwin me srifwe ke ma lun fwalu sun kut?
14 Lungse ke ma lun fwalu pa me sruf nu sin met puspis. Saap kut ku in sifwanu keapela in “nunku mu moul mutal sie inkanek nu ke laesla [ke ma lun fwalu].” Ke ma inge, kut ku in mutamwauk in pulaik in orekmakin lalalfongi lun met lili wiesr nu sesr ke inkanek sufwal a ke insemwomwo lasr sifwanu. (1 Timote 6:5) Saap kut ku in nunku mu arulanu sumwos in patokye ke ku sie met Kristian kasrup in orala sie loan lasr su kut sifwanu tia ku in moli. (Sam 37:21) Tusruktu, orekma mutal, a tia me kasrup lun fwalu se inge su kut ku in eis pa “oasr mwoleaung ka ke moul se inge a ke moul se su e fwa tuku.” (1 Timote 4:8) Ke sripen ‘kut tia wise kutena ma nu ke fwal se inge, a ouyepa kut koflanu wisla kutena ma liki,’ paenang lela kut in kaifweung yok ke “moul mutal wi inse misla” a fulela moul lasr in ‘insemwomwo ke me mongo a nuknuk.’—1 Timote 6:6-11.
15. Mea kut enenu in oru fwin lungse in suk me akengun sang me sensen nu ke orekma mutal lasr?
15 In sukok pal nu kemwa ke me akengun ku in akmunasye orekma mutal lasr. Ya oasr enenu nu sesr in aksumwosye moul lasr ke ma se inge? Aok, oasr ma lane puspis su tuku ke orekma in akkeye manosr a ke me akengun. Tusruktu, kain in me insemwomwo inge arulanu srik kut fwin srikeye nu ke moul ma patpat. (1 Jon 2:25) Ke len inge, met puspis elos “lungse me akengun yok liki lungse God, met srukye luman sumwosmwos, a lafwekin ku lun sumwosmwos insielos,” kut enenu in kufla liki met su ou inge. (2 Timote 3:4, 5) Elos nu kemwa su nunku yok ke orekma mutal elos “elosak nu selos sifwanu sie pelung mwo nu ke pal se su a fwa tuku, tu elos fwa ku in srukye moul ma patpat su moul paye.”—1 Timote 6:19.
16. Kain in kena koluk fuka kosroila kutu met in tia moulkin moul fwal nu ke ma sap lun God, a fuka kut ku in kutangla liki kena koluk inge?
16 Orekmakinyen me nimnim alukela ma fwal, ono koluk, kosro, a kena koluk ku in kunausla orekma mutal lasr. In sremla nu ke kain in ma koluk inge ku in oru kut in tia moul fwal nu ke akmwuk sumwosmwos lun God. (1 Korint 6:9, 10; 2 Korint 7:1) Fwinne Poul el enenu in mongfwusesr ke meun lal lain lung kulok lun ikwe. (Rom 7:21-25) Kaifweung na paye eneneyuk in kutangla liki kena koluk. Meyen ke sripe se, paenang kut enenu in kaifweung in srukye oiyen moul nasnas pal e nu kemwa. Poul el fwak: “Uniye . . . laamwos su on fwalu, kosro, fokfok, lung lun ikwe, lungse koluk, a rapku, su alu nu ke me srulela.” (Kolosse 3:5) In uniye laan manosr ke kain in ma koluk nu kemwa enenu kaifweung tu kut in ku in sisila ma inge nu kemwa. In pre pal e nu kemwa ke kasru lun God fwa ku in kasre kut in sisla kena koluk a fwasr tokin sumwosmwos a orekma mutal fwinne kut muta ke fwal koluk inge.
17. Nunuk fuka kut enenu in akkalemye ke kai?
17 Me asor lulap ku in akmunasye mongfwusesr lasr a ma inge ku in akkolukye orekma mutal lasr. Pus sin met kulansap lun Jeova elos pulakin me asor yok. (Oekyuk 11:11-15; Ezra 4:4; Jona 4:3) Me asor lulap ku in akkolukye kut na paye yokna fwin oiye supwar el kapsreni nu ke ma inge ke sripen kut pulakin mulat ke ma kutu met oru ku fwin kut eis kai upa. Tusruktu, me aksumwos a kai nu kemwa me akpayeye ke lungkulang lun Jeova nu sesr. (Hibru 12:5-7, 10, 11) Kut tia enenu in nunku kai oanu sie me akkeok, a el sie inkanek in akpa nu sesr in kasre kut in fwasr ke inkanek sumwos. Kut fwin inse pusisel, kut engunkin a eis kai, meyen kut akilen la “kas in kai lun me lutlut inkanek in moul.” (Soakas 6:23) Ma inge ku in kasre kut in kapkapek in ngun a in srukye orekma mutal.
18. Kain in kunokon fuka oasr yurosr fwin kut sramsram ke ma upa inmaslon met lili?
18 Me fos a ma upa inmaslon met lili ku in sang me srifwe ke orekma mutal lasr. Ma inge ku in kol nu ke me asor yok a purakak kutu met in oru sulela lalfon ke pal se elos sifwanu srella liki met lili wielos in ngun. (Soakas 18:1) Tusruktu, kut enenu in esam la kut fwin srukye na mulat ku kut fwin tia mulkunla ma koluk lun met lili wiesr su elos oru nu sesr ma inge ku in kol nu ke musalla lun futoto lasr nu sin Jeova. (Livitikus 19:18) Aok, “tu el su tia lungse met lel, su el liye, el koflanu lungse God su el tia liye.” (1 Jon 4:20) Ke Me Sramsram lal Fwin Eol, Jisus el akkalemye me enenu nu sin met in sa aksumwosye kutena ma upa inmaslolos. El fwak nu sin met su longol: “Ke ma inge, kom fwin kisekin me kise lom fwin loangu, a ingo esamak tu oasr ma sito lom nu sin met lim, filiye me kise lom we mutun loangu, a som inkanek lom; meet kom iumwela nu sin met lim, na tuku a kisekin me kise lom.” (Mattu 5:23, 24) In siyuk nunuk munas ku in sang kasru in unwela kinit su kas koluk ku orekma koluk el orekla. Ma koluk su sikyuk inmaslon met luo ku in aksumwosyeyuk a misla ku in sifwil oakiyuki kut fwin siyuk nunuk munas a akkalemye la kut tafongla a tia sumwos ma kut oru. Jisus el sang pa sie inkanek in aksumwosye ma upa. (Mattu 18:15-17) Kut arulanu engun na paye fwin kaifweung lasr in aksumwosyela ma upa kol nu ke kutangla!—Rom 12:18; Efesus 4:26, 27.
Fwasr Tokin Me Srikasrak Lun Jisus
19. Efu arulanu yok sripe nu sesr in etawi me srikasrak lun Jisus?
19 Me srifwe nu kemwa ku in akfosrye kut, tusruktu lela kut in tia fulela ma inge in kosroela kasrusr lasr nu ke moul ma patpat. Esam la Jeova el ku in molekutla liki me srifwe. Ke kut “sisla ma toasr nu kemwa” a “mongfwusesr in kasrusr nu ke akutun, su filiyuki tari ye mutusr,” lela kut in “ngetuk nu sin Jisus, Met Kol a Met Aksumwosye lalalfongi lasr.” (Hibru 12:1-3) Kut fwin loang mwo ke me srikasrak lun Jisus a kaifweung in etawi kas a orekma lal ma inge ku in kasre kut in akkapye orekma mutal a in akkalemye ma inge ke inkanek yok.
20. Kain in me insemwomwo fuka ku in tuku nu sesr kut fwin kaifweung in mongfwusesr a akkalemye orekma mutal?
20 Mongfwusesr a orekma mutal tukeni orekma in akpayeye molela lasr. Ke kut akkalemye oiye saok inge, kut ku in tafwela ke kulansap mutal lasr nu sin God. Fwinne kut muta ye me srifwe, kut ku in insemwomwo ke kut pulakin me insemwomwo a futoto lun Jeova nu sesr meyen kut mongfwusesr a akkalemye orekma mutal. (Jemes 5:11) Sayen ma inge, in akkeye kut Jisus el fwak: “Ke mongfwusesr lomwos komwos fwa sun moul lomwos.”—Luk 21:19.
Fuka Kom Ku In Topuk?
• Efu mongfwusesr arulanu yok sripe?
• Mea se inge orekma mutal, a fuka in akkalemye ma inge?
• Fuka kut ku in musaiyuk a srukye na moul futoto nu sin God?
• Mea kutu nu ke me sensen ke orekma mutal lasr, a fuka kut ku in fwasr liki ma inge?
[Pictures on page 6, 7]
Orekma mutal ku in akkalemyeyuk ke inkanek puspis
[Pictures on page 8]
Taran ke me sensen ke orekma mutal lom