Suk Ma Sap Mutal Sang Mwolanu Nu Sin Jeova

“Nga fwa akfulatyel ke sang kulo.”​—SAM 69:30.

1. (a) Efu ku fwal in akfulatyeyuk Jeova? (b) Fuka kut akfulatyel wi sang kulo?

JEOVA el God Ku Liki Ku, in kosrao a fwalu, a el pa Met Orekutla. Ou inge fwal in akfulatyeyuk in el a akmwuk nu kemwa lal. In akfulatye Jeova kalmekin in akpengpengyel in ma nu kemwa, in kaksakunul ke kas a orekma. Ke ma inge “in sang kulo” kut enenu in akkalemye pal nu kemwa ke sripen ma mwolanu puspis su el oru nu sesr in pal inge a ke pal fwasru. Akmwuk mwomwo su fwal nu sesr in orekmakin oasr in Fwakyuk 4:11, su akkalemye la ma orekla in ngun in kosrao su oaru elos fwak: “Fwal nu sum, Jeova, God lasr, tu kom in eis mwolanu a kaksak a ku, tu kom orala ma nu kemwa, a ke lungse lom elos on, a orekla tari.” Fuka akfulat lasr nu sin Jeova? Pa ke lutlut lasr in eis etauk paye kel a in oru ma lungse lal nu kemwa. Kut enenu pa in pulakin ma met sim lun Sam el pula ke pal se ma el fwak: “Luti yu in oru ma lungse lom, tu kom God luk.”​—Sam 143:10.

2. Mea Jeova el ako nu selos nu kemwa su akfulatyel a nu selos su tia akfulatyel?

² Jeova el insemwomwo nu selos nu kemwa su akfulatyel. A sang moul nu selos meyen “el met sang moul nu selos su sukol.” (Hibru 11:6) Mea me sang inge? Jisus el fwakak in pre lal nu sin Papa tumal in kosrao: “Pa inge moul ma patpat, tu elos fwa ete kom God paye mukefwunnu, a Jisus Kraist su kom supalmu.” (Jon 17:3) Aok, nu selos nu kemwa su “akfulatye [Jeova] ke sang kulo” elos fwa “usru fwalu, a muta we ma patpat.” (Sam 37:29) A nu sin met saye, “e fwa wangin me moul nu sin met koluk.” (Soakas 24:20) Paenang in len safla inge, arulanu yok sripe in akfulatye Jeova meyen e fwa tia pat el fwa kunausla met koluk nu kemwa a molela met sumwosmwos nu kemwa. “Fwalu wanginla, a lung kulok la, a el su oru ma lungse lun God fwa muta ma patpat.”​—1 Jon 2:17; Soakas 2:21, 22.

3. Efu ku mwo kut in loang akmwoye nu ke buk lun Malakai?

³ Lungse lun Jeova oasr in Baibel, paenang “Baibel nu kemwa etuku ke ngun lun God.” (2 Timote 3:16) Koanon Kas lun God pa me sramsram puspis fuka Jeova el akinsemwomwoyelos nu kemwa su akfulatyel a ke ma su sikyuk nu selos nu kemwa su tia akfulatyel. Sie sin ma sramsramkinyuk inge fwakak ke ma sikyuk nu sin met Israel in pal lal Malakai met palu. Saap ke yiu 443 B.C.E., in pal se Niemaia el kafuna fwin an Juda, Malakai el simusla buk se inge su oasr in el ka. Buk mwolanu se inge oasr me kasru yok a kas in palu puspis su “simusyukla ma inge in kai kut, su pal safla summu nu fwesr.” (1 Korint 10:11) In loang akmwoye nu ke kas lal Malakai ku in kasre kut in akoekutla nu ke “len lulap a me aksangeng lun Jeova,” ke el fwa kunausla akmwuk koluk se inge.​—Malakai 4:5.

4. Piye ip yok sripe onkosr su akkalemyeyuk nu sesr in Malakai sapter 1?

⁴ Fuka buk lal Malakai, su simla ke yiu pus liki 2,400 somla, ku in kasre kut ke century ak21 in akoela nu ke len lulap a me aksangeng lun Jeova? Sapter se meet ke buk se inge oasr akkalemyeye nu sesr me lutlut yok onkosr ke oreyen akfulat lasr nu sin Jeova wi sang kulo in eis insemwomwo lal a in eis moul ma patpat: (1) Jeova el lungse met lal. (2) Kut enenu in engunkin ma mutal nu kemwa. (3) Jeova el tupan kut in sang nu sel ma saok lasr nu kemwa. (4) Alu paye el orekmakin lungse paye, tia suk ma lungse lal sifwanu. (5) Orekma in kulansap nu sin God tia ma toasr. (6) Kais sie met fwa sifwanu fwakulak nu sin God. Ke ma inge, oasr ip se meet in me sramsram tolu su kut e fwa liye ke kut fwin loang akmwoye nu ke Malakai sapter 1.

Jeova El Lungse Met Lal

5, 6. (a) Efu ku Jeova el lungsel Jekob? (b) Fwin kut moul in lalalfongi oanu Jekob, mea kut e fwa fwinsrak nu ka?

⁵ Lungse lun Jeova akkalemyeyuk arulanu kalem ke kutu fus meet in Malakai. Buk se inge el mutamwauk ke kas inge: “Kas in palu: Kas lun Jeova nu sin met Israel.” God el tafwela fwak: “Nga lungse komwos.” In akkalemye pa ke me pupulyuk, ke fus se panu inge, Jeova el fwak: “Nga lungsik Jekob.” Meyen Jekob el lalalfongi Jeova. Ke kutu pal tok, Jeova el ekulla in el Jekob nu ke Israel, a el ekla papa matu lun mutanfwal Israel. Ke sripen Jekob el eteyuk ke lalalfongi paye lal paenang Jeova el lungse el. E fwa oupanu nu sin met nu kemwa su oru moul lalos oupanu Jekob nu sin Jeova a El efwa lungse pa met inge nu kemwa.​—Malakai 1:1, 2.

⁶ Kut fwin lunge Jeova a fulyung nu sin met lal, kut fwa ku in pulakin me insemwomwo su akkalemyeyuk in 1 Samuel 12:22: “Jeova el fwa tia som liki met sral meyen el fulat.” Jeova el lungse paye met lal a sang me usru lalos, ke moul ma patpat. Ou inge, kut ridi: “Lalalfongi Jeova a oru ma mwo; muta fwin fwalu a engunkin oaru. Kom in ouyepa engunak in Jeova, a el fwa sot nu sum ma lungse lun insiom.” (Sam 37:3, 4) Lungse lasr nu sin Jeova paenang kut in loang pa nu ke ip se akluo su akkalemyeyuk nu sesr in Malakai sapter 1.

Akkalemye Engun nu ke Ma Mutal

7. Efu ku Jeova el tia lungse Iso?

⁷ Kut fwin ridi Malakai 1:2, 3, Ke Jeova el fwak, “Nga lungsik Jekob,” el tafwela in fwak, “Nga srungel Iso” Efu ku el fwak tia oanu sie? Meyen Jekob el akfulatyel Jeova, tusruktu Iso fak mokul se wiel, el tianu akfulatyel. Iso el ouyepa pangpang Edom. In Malakai 1:4, Edom el akkalemyeyuk oanu an lun met koluk, a met muta we elos orekmakin moul koluk fokfok. Edom el (kalmekin nu ke “srusra”) su etukyung nu kel Iso tokin el kitela me usru saok lun mwuonse lal nu sel Jekob ke sie me mongo. “Iso el pilesru me usru lun mwuonse lal,” Genesis 25:34 el fwak. Met sap Poul el sapkin nu sin met Kristian wiel in taran “saap oasr met kosro, ku met su pilesru ma mutal, oanu Iso su kukakunla mwuonse lal ke sie me mongo.”​—Hibru 12:14-16, NW.

8. Ke inkanek fuka Poul el lumal Iso nu ke sie met kosro?

⁸ Efu ku Poul el orekmakin oiye lal Iso nu ke met kosro? Meyen kain in nunuk su Iso el oru ku in paenang sie met in pilesru pa orekma mutal nu kemwa. Saflaiye ku in kolla sie met nu ke orekma koluk upa, su oanu orekma lun kosro. Ke ma inge, lela kais sie sesr in sifwanu siyuk: ‘Ya oasr kutupal Nga srifweyuk in pilesreyuk me usru lun moul in Kristian luk​—moul ma patpat—​ke sripen oasr ma lungse yok luk nu ke sie ma su ku in lumeyuk oanu bowl in soup lun lentil? Saap Nga tia akilen, Ya Nga pilesru ma mutal?’ Iso el munas in kutongye lungse lun ikwe lal. Paenang el fwak nu sel Jekob: “Silaklak, Nga siyuk sum, kiteyu ke me mongo srusra ingan.” (Genesis 25:30) Luma na koluk se pa inge, meyen saap oasr kutupa met kulansap lun God, ku pa in oru ou inge, in fwak: “Silaklak! Me mea in nunkeyuk ke oiyen moul in payuk nasnas?” Meyen lungse lun orekma koluk nu ke orek kosro arulanu yok in pal se inge paenang kain in ma nu kemwa pilesreyuk in lumeyuk oanu ke bowl in me mongo srusra se su Iso el siyuk.

9. Kut e oru fuka in sroukye na sangeng wi akfulat lasr nu sin Jeova?

⁹ Lela kut in tia pilesru ma mutal ke kutena pal ke kut tia loang nu ke ma nasnas, oaru, a me usru lasr in ngun. Lela kut in tia oanu Iso, a kut in oanu Jekob su oaru a in sangeng sin God ke kut akkalemye insemwomwo yok ke ma mutal. Kut ku in akkalemye fuka ma inge? Fwin kut suk ke paye in akos ma nu kemwa su Jeova el sapkin in orek. Ke sripe inge, paenang kut e fwa loang nu ke ip se aktolu su akkalemyeyuk in Malakai sapter 1. Mea se inge?

Sang Ma Mwo Emeet Lasr Nu Sin Jeova

10. Ke inkanek fuka met tol elos pilesru tebu lun Jeova?

¹⁰ Met tol lun an Juda elos tianu oru kulansap paye lalos ke tempel lun an Jerusalem in len lal Malakai, elos tia kisekin nu sin Jeova me kise mwo emeet. Malakai 1:6-8 akkalemye: “ ‘Sie mwen el sunakin papa tumal; a sie met kulansap met kato lal. A Nga fwin sie met kato, piye sangeng luk?’ Jeova lun un met meun el fwak nu sumwos, O met tol su pilesru ek.” Met tol elos siyuk. “Ke mea kut pilesru em?” “Komwos kisekin bred tia nasnas fwin loang luk,” Jeova el fwak. “Mea kut akkolukye kom ka?” met tol elos siyuk. Jeova el fwak nu selos: “Tu komwos fwak: ‘Tu tebu lun Jeova me srungeyuk.’ ” Met tol inge tia oru kaksak paye lalos nu sin Jeova ke sripen elos kisekin kosro kun, mas, a ul pal nu kemwa, a fwak: “Paye wangin ma koluk ka.”

11. (a) Mea Jeova el akkalemye ke oreyen me kise su el tia insemwomwo ka? (b) Ke inkanek fuka met nu kemwa elos eis meten ma koluk?

¹¹ Ke ma inge Jeova el aksumwosyelos ke nunuk lalos ke me kise tia nasnas lalos: “Inge sang ma inge nu sin kafuna leum lomwos. Ya el fwa insemwomwo keiwos, ku kurunginkomwosyung?” Mo, kafuna met leum lalos fwa tia insemwomwo ke me sang lalos inge. El su Kulanu a Fulatlanu Liki Ma nu Kemwa fwa tia insemwomwokin kain in me sang koluk ou inge! Aok, tia met tol mukena pa koluk. Paye, elos pa pilesru Jeova ke pal se elos kisekin me kise inge. Tusruktu, ya met nu kemwa sayen met tol wangin ma koluk lalos? Mo! Meyen elos pa sulela in orekmakin ke me kise lalos kain in kosro kun, ul, a mas a elos pa wis ma inge nu sin met tol in kisekinyukla. Sie ma koluk na paye pa inge!

12. Fuka kut eis kasru in akkalemye nu sin Jeova la kut sang nu sel ma se ma saok emeet lasr?

¹² In sang ke paye nu sin Jeova ke ma saok lasr ku in akkalemye la lungse lasr nu sel ma tuku ke paye lun insiesr nu fon. (Mattu 22:37, 38) Tia oanu kain nunuk kikiap tia sumwos lun met tol in len lal Malakai, misenge u lun Jeova elos arulanu moniyuk in sang me kasru lun Baibel ke inkanek in lutlut nu sin met nu kemwa in ku in eis etu paye ke inkanek in akfulatye Jeova wi sang kulo a kaksakin me kasru nu kemwa tuku sin God. In kapsreung nu ke me lutlut inge pa ke ip saok akakosr su tuku ke Malakai sapter 1.

Alu Paye El Orekmakin Lungse, Tia Rapku

13. Mea met tol in pal meeta elos oru paenang akkalemyeyuk elos ke orekma lalos oanu orekma lun met rapku?

¹³ Met tol in len lal Malakai lungse orekmakin inkanek in suk ma mwomwo nu selos sifwanu, wanginla lungse, a rapkui me kasru lun mani. Kut etu fuka? Malakai 1:10 el fwak: “ ‘O ke oasr sie in maslomwos su fwa kaliye srungulu. Tu komwos in tia tanak e fwin loang luk​—ke wangin sripe. Wangin insemwomwo luk in komwos,’ Jeova lun un met meun el fwak, ‘a Nga fwa tia eis sie me sang ke poumwos.”.’ ” Aok, met tol su rapku in pal se elos oakiye in oasr kutena kain in moul orek nu selos ke orekma in kulansap lalos in tempel, in oasr molin met kurungin srungal a lamp ke loom in alu! Ou inge Jeova el tia insemwomwo in eis me kise lun paolos!

14. Efu ku kut ku in fwak mu Met Lo lun Jeova elos orekmakin lungse?

¹⁴ Inkanek in rapku a in suk ma lungse lalos sifwanu su met tol sesumwos lun an Jerusalem in pal meeta arulanu mwo in akismakinye kut, la in oanu Kas lun God, met rapku nu kemwa fwa tia eis usru lalos in Togusrai lun God. (1 Korint 6:9, 10) Kut fwin nunku ke inkanek rapku lun met tol puspis in pal meeta ma inge mokle kut in akkalemye insemwomwo yok ke orekma in luti lun Met Lo lun Jeova su orek fwin fwalu nu fon. Orekma se inge sukosok; wangin molin orekma lun forfor lasr in luti. Mo, “kut tia oanu met puspis su kureuk kas lun God.” (2 Korint 2:17) In oanu Poul, kais sie sesr sifwanu fwakak ke pulaik lun insie: “Nga luti mwosasu lun God nu sumwos wangin molo.” (2 Korint 11:7) Kom kalem mwo ke orekma lal Poul la el arulanu “engun in luti mwosasu.” Ke ma inge oasr pa sie ip yok sripe su arulanu mwo kut in loang nu ka in Malakai sapter 1.

Kulansap nu Sin God Tia Toasr ku in Me Na Luma

15, 16. (a) Fuka orekma lun met tol nu ke orekma lun me kise? (b) Fuka oreyen me kise lun Met Lo lun Jeova?

¹⁵ Met tol sesumwos in pal meeta fwin an Jerusalem elos nunku a oru orekma in kulansap lalos ke inkanek tia paye in me na luma a me aktotoye. Elos oru oanu in orekma na upa nu selos. In oanu ke akkalemyeyuk in Malakai 1:13, su God el fwak, ‘Liye! Ma se inge me aktotoye!’ a komwos aklosrongtenye.” Met tol sesumwos inge aklusrongtenye, ku aktotoye akmwuk mutal lun God. Lela kut in kaifweung in pre siyuk tu kut fwa tia oanu orekma lalos. A, lela kut in akkalemye pal nu kemwa kain in ngun su akkalemyeyuk in 1 Jon 5:3: “Tu pa inge lungse lun God, tu kut in liaung ma sap lal; a ma sap lal tia toasr.”

¹⁶ Lela kut in akkalemye insemwomwo ke me kise lasr in ngun nu sin God, a tia pilesru in aklosrongtenye. Lela kut in loang akmwoye nu ke kas palu inge: “Fwak nu sel [Jeova], komwos nu kemwa, ‘Wisla ma koluk nu kemwa; a eis ke kulang ma mwo, ou inge kut fwa sang oanu kao mokulu me kise lun ngoasrosr.’ ” (Hosia 14:2) Kas se inge “kao mokul me kise lun ngoasrosr” kalmekin nu ke orekma in kulansap lun ngun, ke kut orekmakin ngoasrosr in kaksakin Jeova a akmwuk nu kemwa lal. Hibru 13:15 fwak: “Ke [Jisus Kraist] lela kut in kise nu sin God ke kaksak pal e nu kemwa kel, ou inge fwako lun ngoasro, su fwakak el.” Fuka yokiyen me kaksak lasr ke kut oru orekma in kulansap lasr in ngun, tia in me luma na, a ke paye lun insiesr kut akkalemye lungse lasr nu sin God! Ke ma inge lela kut in akola in liye ip yok sripe se akonkosr su akkalemyeyuk in Malakai sapter 1.

Kais Sie Met Fwa Sifwanu Fwakulak

17, 18. (a) Efu ku Jeova el selngawi “met kutasrik”? (b) Mea met lungse in orek kutasrik elos mulkunla in nunku ka?

¹⁷ Kais sie met in len lal Malakai sifwanu fwakak oiyen orekma lalos, a efwa oupanu nu sesr in len lasr. (Rom 14:12; Galetia 6:5) In oupanu, ke Malakai 1:14 el akkalemye: “A selngaweyuk met kutasrik se su oasr sie mokul in un sip nutul, a el mwolela, a kisekin nu sin Jeova ma tia sumwos.” Kain in met su oasr un kosro nutul tia ku in fwak la oasr kosro sokofwunnu nutul​—oanu sip sokofwunnu—​paenang el tia ku in oru sulela lal. Ke pal in sulela lal ke kosro su el akola in kisekin nu sin God, el tia enenu in sulela kosro su kun muta, ul, ku oasr kutena kain in mas in kosro soko an. El fwin sulela in oru kise lal ke kain in kosro ouinge, efwa liyeyuk mu el tia akfulatye Jeova ke akmwuk lun kise lal, meyen nu sin kain in met su oasr kosro puspis natu tia ku in orekmakin kutena kain in kosro mas fokfok ke kise lal!

¹⁸ Ou inge ke sie sripe fwal, Jeova el selngawi met nu kemwa su lungse orekma kutasrik, nu sin su oasr un kosro mokul puspis natu tusruktu srike in srukak​—saap kutena kain in kosro su kun muta, ul, ku oasr kutena kain in mas ka nu sin met tol in orekmakin nu ke me kise. Ou inge, ke met tol elos insese ka in orekmakin nu ke me kise su tia fwal nu ke ma sap lun God ke kain in kosro mas inge paenang wangin akilenyeye. (Livitikus 22:17-20) Ma na kalem se nu sin met nu kemwa la ma inge arulanu koluk fwin orek in oanu me sang pa nu sin kafuna. Tusruktu, payeyen me kise elos oru inge elos kisekin nu sin Jeova, su pengpeng, a fulat liki nu kemwa kafuna lun metu. Malakai 1:14 el aketeye ou inge: “ ‘Nga sie Togusra pengpeng,’ Jeova lun un met meun el fwak, ‘a ek me aksangeng in maslon met pegan.’ ”

19. Mea kut fwinsrak nu ka, a mea kut enenu in oru?

¹⁹ In oanu sie met kulansap oaru lun God, kut fwinsrak ma lulap nu ke len su Togusra pengpeng, Jeova, el efwa aksumwosyela ma nu kemwa nu sin metu. In pal se inge, “fwalu fwa sesesla ke etu Jeova oanu kofu afunla mwea.” (Isaia 11:9) Ke ma inge, lela kut nu kemwa in kaifweung moul in kulansap lasr in akfulatye Jeova wikin akmwuk nu kemwa lal su akkalemyeyuk in Sam ou inge: “Nga fwa akfulatyel ke sang kulo.” (Sam 69:30) In oru ou inge, Malakai el sifwil fwakak kutu kas in kasru mwomwo su ku in ase me insemwomwo puspis. Lela kut in sifwilpa loang nu ke kutu me kasru mwomwo su tuku ke buk lal Malakai su fwa akkalemyeyuk ke me lutlut luo su efwa orekmakinyuk toku.

Ya Kom Esam?

• Efu kut enenu in akfulatye Jeova?

• Efu ku me kise lun met tol in len lal Malakai tia me insemwomwo nu sin Jeova?

• Fuka kut ku in akkalemye nu sin Jeova ke me kise lun kaksak?

• Mea me purakak lun alu paye?

[Picture on page 5]

Kas in palu lal Malakai akpayeyuk in len lasr

[Picture on page 6]

Iso el tia insemwomwokin ma mutal

[Picture on page 7]

Met tol a met nu kemwa elos kisekin me kise koluk

[Picture on page 8]

Fwin fwalu nu fon Met Lo lun Jeova elos tia fuleak in fwakak ke me kise lun kaksak ke inkanek sukosok