Me Akkeok Sun An Nu Kemwa
CHRISTIAN, su muta fwin an Africa, el eisla sin met solse su moklel ke in sroang nu ke army, tusruktu el srunga meyen ella lal su pala tari ke ma sap lun Baibel-tia lela el an oru ou inge. Ke ma inge met solse elos usella nu ke military camp se, fwin an we elos unel ke lusen len akosr, sie sin met solse el likisikelye ke niel. Christian el koneak inkanek fuka el ku in som nu ke loom ono, tusruktu taktu el enenu in supukye niel. Ke siepa mutanfwal fwin an Africa, met meun we su lain guferment elos paki nie ku paon tulik srisrik. In an Cambodia nu ke an Balkans, in an Afghanistan nu ke an Angola, kofwen me meun inge pangpang land mines tafwela in orala kinet lulap a orala met matu a met fwusr in sikapas ku ul.
Arulanu puseni pa met sikapas a met ul, ke sripen ongoiye a mas, oanu diabetes. Fwinne poisen ma tuku ke yen engyengu ku ke ma su raunekutla ku in kol nu ke mas a sikapas. Ke sie me pupulyuk, tulik puspis ke sie siti fwin an Eastern Europe wanginla lepo leyut lalos ke pal in isusla. Oasr na laa futoto tokin kapin po lalos. Me akpayeye puspis akkalemye la oasr ma musalla ke genetic ke manolos ke sripen poisen su akfokfokye an selos. Met puspis srakna oasr paolos tusruktu elos tia ku in orekmakin ke sripen mas inge paralysis ku kutu mas su oasr yurolos. Paye, moul sikapas a me akkeok sun an nu kemwa fwin fwalu.
Ke kutena sripe, moul sikapas a me akkeok sie me asor yok na paye. Junior el tula niel ke el yiu 20 matwe. Tok el fwak: “Nga pulakin ma upa puspis. Nga tung pal nu kemwa meyen Nga etu la tia ku in sulpa oasr niuk. Nga tia etu ma Nga enenu in oru. Nga arulanu fos.” Tusruktu, tokin sie pal, oasr ekla lulap ke oiye lal Junior. El mutamwauk in lutlut Baibel a lotela ma puspis su tia kasrel mukena in mongfwusesr, a ma inge sang pa nu sel fwinsrak mwolanu ke pal fwasru ke fwalu se inge. Kom fwin sie met sikapas ku mas, ya kom lungse pa in sulkakin fwinsrak inge?
Fwin aok, nunuk munas rid me lutlut toko. Kut kaifwe kom in ridi Ma Simusla nu kemwa in Baibel nutum tu kom in liye na paye ma Met Orekutla el akola in oru ke pal fwasru nu selos nu kemwa su lutlut ke akmwuk lal a orekmakin ma inge ke moul lalos.