Met Kol Mwomwo Kut Ku In Koneak Oiye?

“LOOM nu kemwa musaiyuk sin kutena met,” Baibel el akkalemye, “a el su musai ma nu kemwa el God.” (Hibru 3:4; Fwakyuk 4:11) Ke sripen God paye, Jeova, pa met orekutla, paenang el “etu lumasr.” (Sam 103:14) El etu na paye lumasr a me enenu nu kemwa lasr. A meyen el sie God lungse, paenang el engunkin in kasre kut pal nu kemwa ke me enenu lasr. (Sam 145:16; 1 Jon 4:8) Wikin ma inge pa enenu lasr nu ke met kol mwomwo.

Oanu met palu Isaia el akkalemye, Jeova el fwak: “Liye! Nga esalang tu el an sie met lo nu sin mutanfwalu, sie met kol a leum nu sin mutanfwalu.” (Isaia 55:4) In kasru oakiye met kol mwomwo su eneneyuk yok in pal inge lela in sukok kain in met su oasr fwako mwo inge yuro in pa suleyuk nu ke Met Kol​—su srusrngiyuki sin El Su Ku Liki Ku—​a in sumwos akos paye nu ke kolyuk lal. Fwin ou inge, su Met Kol a Leum se su kas palu fwakak inge? Mea me akpayeye ke fwako lun moul lal mu el fwal nu ke sie met kol? Piye an el fwa kol kut nu we? Mea kut enenu in oru tu kut fwa ku in eis me insemwomwo ke kolyuk lal?

Sikyuk lun Met Kol Su Oasr Mwoleaung Ka

Ke kutu yiu 2,500 somla, oasr sie lipufon pangpang Gabriel el sikyung nu sel Daniel met palu a fwak nu sel: “Ke ma inge etu a akilenye, tu liki pal se ke ma sap illa in sifwil oru a musai Jerusalem nu ke tuku lun Messaia, su Leum, fwa wik itkosr, a wik ongouluo. A fwa sifwil musaiyuk, wi inkanek a infwal, aok, in pal in ongoiye.”​—Daniel 9:25.

Arulanu kalem, la oasr lipufon akkalemye nu sel Daniel ke pal se su ma tuku lun Met Kol su Jeova el e fwa sulela. Su “Messaia Met Kol” fwa sikyuk ke saflaiyen wik ak69, ku ke yiu 483 fwin mutamwauk oaoa fwasru ke 455 B.C.E., ke pal se kas se sapkinyuk in sifwil musaiyukyuk an Jerusalem.a (Niemaia 2:1-8) Mea sikyuk ke saflaiyen pulanpal inge? Luk sie met su simusla Gospel el akkalemye: “A yiu se aksingoul limekosr in togusra lal Taibirius Sisar, ke Pontius Pailet el leum fwin an Juda, a Herod el titrak in Galili (29 C.E), . . . kas lun God tuku nu yurol Jon mwen nutul Zekaraia yen mwesis. A el tuku nu yen nu kemwa apkurun nu Jordan, a luti baptais lun auliyuk nu ke nunuk munas ke ma koluk.” In pal sa, “met elos tawina” tuku lun Messaia Met Kol. (Luk 3:1-3, 15) Metu ne tuku sokol Jon, tusruktu tia el pa Met Kol.

Apkurun nu ke October in yiu 29 C.E., Jisus lun Nazareth el tuku nu yurol Jon in eis baptaisla lal. A Jon el fwakak kas paye nu sel a fwak: “Nga liye ngun oatui in kosrao me oanu sie mwuleoa; a on fwel. A Nga tia etal, a El su supeyume in baptais ke kof, el fwak nu sik, ‘El su kom liye ngun oatui, a on fwel, el inge el su baptais ke ngun mutal.’ A Nga nu liye, a orek ma lo’ tu el inge Mwen nutin God.” (Jon 1:32-34) Ke pal in baptais lal. Jisus el eis akmusra lal nu ke Met Kol​—Messaia, ku Kraist.

Aok, akpayeyen kas in mwolela ke “sie met kol a leum nu sin mutanfwalu” akpayeyuk sin Jisus Kraist. A kut fwin srike in tuni ke qualification lal nu ke sie met kol, kut ku in koneak la kolyuk lal arulanu mwo liki na kolyuk lun met kol in pal inge.

Messaia​—Sie Met Kol Mwo

Sie met kol mwomwo el sang me kasru mwomwo su kalem a me inse mwomwo nu sin met nu kemwa a in akkeyelos su muta ye kurungin lal tu elos fwa ku in kutangla me keok lalos. ‘Pa inge me enenu yok ke century ak21 nu sin sie met kol tu el fwa ku in oru kolyuk lal mwo,’ fwal nu ke buk inge 21st Century Leadership: Dialogues With 100 Top Leaders. Fuka mwoiyen me kasru su Jisus el oakiye nu sin met su longol in orekmakin nu ke oiyen moul lalos pengana len! Nunku pa ke me luti pengpeng lal​—Me Sramsram Lal Fwin Eolu. Yoklanu me inse mwomwo su tuku ke kas in kasru lal su simusyukla in Mattu sapter 5 nu ke 7.

Loang akmwoye, nu ke me pupulyuk, ke kas in kasru lun Jisus nu ke oiye lun metu ke nunuk tia oanu sie lalos. El fwak: “Ke ma inge, kom fwin kisekin me kise lom fwin loangu, a ingo esamak tu oasr ma sito lom nu sin met lim, filiye me kise lom we mutun loangu, a som inkanek lom; meet kom iwela nu sin met lim, na tuku a kisekin me kise lom.” (Mattu 5:23, 24) In suk in oakiye misla nu sin kutena met enenu in orek meet​—yok liki kunokon ke alu, in oru me kise nu ke tempel in an Jerusalem su eneneyuk ke Ma Sap lal Moses. Fwin tia ou inge, akmwuk lun alu el me srungeyuk ye mutun God. Kas in kasru lun Jisus arulanu fwal nu ke len lasr inge oanu ke century puspis somla.

Jisus el ouyepa kasru met nu kemwa su porongel in kutangla kutena me sruf lun mano. El akkeyelos a fwak: “Komwos long tu fwak tari, ‘Nik komwos kosro.’ A Nga fwak nu sumwos, tu kutena met su ngetung nu sin mutan se in lungse fwasr nu yurol, el tufwanu orek kosro yurol insiel.” (Mattu 5:27, 28) Fuka mwoiyen kas in kasru inge! Me mea kut in eskutyung nu ke kain in inkanek ou inge su e ku in kol kut la nu ke kena lun orek kosro? Ma su tuku liki inse ke nunuk in kosro lun met tia payuk ouyepa met payuk, akkolukye metu, Jisus el fwak. (Mattu 15:18, 19) Kut fwin kurunganang nunuk lasr in mwo kut sie met su lalmetmet.​—Soakas 4:23.

Ke Me Luti Fwin Eol oasr pa kas in kasru na mwomwo ke oiyen lungse ke met lokwalok lom, in kulang pakoten pal nu kemwa, in sulela akmwoye nunuk ke ma lun ngun a ma lun fwalu, a kutupanu kain in luma ou inge. (Mattu 5:43-47; 6:1-4, 19-21, 24-34) Jisus el kasrelos pa su porongel ke inkanek in eis kasru sin God ke pre. (Mattu 6:9-13) Messaia a Met Kol inge el akkeye a akola met su porongel in kutangla kutena kain in me keok lun metu.

Pal onkosr ke Me Luti pengpenmg Fwin Eola, Jisus el sramteak kas in luti lal in fwak “komwos long ma fwak nu selos su muta omeeta” ku “komwos long tu fwak tari,” tusruk nu sel el akkalemye ke siena luma, su fwak “a Nga fwak nu sumwos.” (Mattu 5:21, 22, 27, 28, 31-34, 38, 39, 43, 44) Ma inge akkalemye la met su long luti lal elos pula tari ke me luti a me sramsram matu lun met Farisi. Tusruktu, in pal inge Jisus el akkalemye nu selos ke siena inkanek​—su sang kalem paye nu ke Ma Sap lun Moses. Ou inge Jisus el oakiye sie akmwuk, a el oru ou inge in akfwusesrye nu sin met su lalalfongi ke inkanek in luti lal. Aok, Jisus el sang me kasru mwomwo in sang aksumwosye moul lalos, in ngun a in paye. Pa inge sie akul lun sie met kol paye.

Oasr sie buk in kasru su akkalemye ke luma upa su oasr ke inkanek eneneyuk in sang aolla kain in akmwuk inge. Su fwak: “Akmwuk nu ke kurunginyen ayaol inge enenu in oasr kalem mwomwo lun met san, oasr in el kain in lalmetmet lun sie psychologist, akkeye moul lal in fas in ma nu kemwa oanu sie met su akpayel nu ke sritel lun kasrusr loeloes, pulaik in lalalfongi oanu kosro soko mokul inge bulldog su tia sangeng, oasr nunuk sukosok lal oanu sie hermit, a in mongfwusesr oanu sie saint. Tusruktu, fwinne oasr ma inge nu kemwa, fwinsrak paye nu ke akmwuk mwomwo tia ku in akmwuki.”

“Met kol u enenu in fwasr ke inkanek sumwos su el lungse pa tu met nu kemwa lal in fwasr ka,” pa inge sie me kasru su akkalemyeyuk ke sifwen sie me sramsram lun “Leadership: Do Traits Matter?” Payela, sie met kol mwomwo enenu in orekma sumwos fwal nu ke kas lal. Luma inge akpayeyuk arulanu kalem sin Jisus Kraist! Aok, el luti nu selos su welul in pusisel, a el akkeye pa sie srikasrak nu selos ke pal se el tanla nielos a. (Jon 13:5-15) El tia sapkin nu selos in som luti ke peng mwo lun Togusrai mukena, a el akkalemyel sifwanu ke orekma in moniyuk lal nu ka. (Mattu 4:18-25; Luk 8:1-3; 9:1-6; 10:1-24; Jon 10:40-42) A in fwal pa nu ke me top nu sin met kol, Jisus el oakiye sie me srikasrak. “Mwen el koflanu sifwanu oru kutena ma,” su el fwakak kel sifwanu, “a ma el liye Papa oru, Mwen el ouyepa oru oanu.”​—Jon 5:19.

In loang nu ke ma nu kemwa Jisus el fwak a oru ku in akpayeye la el fwal in eis akmwuk lun sie Met Kol. Arulanu paye, el fwal alukela kutena kain in me enenu nu sin sie met kol mwomwo. Jisus el sumwosmwos. Ke sripen moul sumwosmwos nu ke mise a sifwil moulyuk lal, paenang el eis moul ma patpat. (1 Piter 3:18; Fwakyuk 1:13-18) Ya oasr kutena met kol lun fwalu ku in lumeyuk nu ke kolyuk nu kemwa lal?

Mea Kut Enenu in Oru?

In oanu sie Togusra in kol Togusrai lun God, “Messaia, su Leum” fwa sang me insemwomwo puspis nu sin met nu kemwa su akos paye in moul lalos nu kemwa. Ke sripe inge Baibel el mwolela ka la: “Fwalu fwa sesesla ke etu Jeova, oanu kof afwunla mwea.” (Isaia 11:9) “A met fwokpap elos fwa usru fwalu, a fwa sifwanu akengunyelos in misla puspis.” (Sam 37:11) “A elos fwa muta, kais sie met ye fain lal a ye sak fig lal, a wangin sie fwa aksangengyelos.” (Maika 4:4) “A God el fwa muta yurolos. A el fwa ela sronin mutalos nu kemwa, a efwa wangin pa mise, a elos fwa tia sifwil asor, ku tung, ku ngal, tu ma meeta wanginla.”​—Fwakyuk 21:3, 4.

Misenge fwalu pulakin me keok upa ke sripen orekma lun met kol. Tusruktu, Kraist el kol met inse pusisel nu kemwa nu ke sie fwal sasu wangin me keok a fosrnga we a yen se su met oaru paye mukefwunnu elos tukeni nu we in alu nu sin Jeova God a in moniyuk nu ke ma nu kemwa su eneneyuk in sang kasru moul sumwos lun metu. Fuka yokiyen oa lun ma inge tu kut fwa ku in suk pal yok lasr in eis etauk paye ke God paye a el su fwa srisrngiyuki nu ke Met Kol a in orekma fwal nu ke etauk inge!​—Jon 17:3.

Sie me kaksak mwo kut ku in sang nu sin sie met pa kut in etawi me srikasrak nu kemwa lal. Ke ma inge ya tia fwal kut in etawi Met Kol mwomwo su arulanu pengpeng fwin fwalu nu fon​—su Jisus Kraist? Fwin ou inge kut fwa ku in oru fuka? Fuka kolyuk lal ku in akilenyuk ke moul lasr? Kain in me siyuk ou inge kemwa fwa sramsramkinyuk ke me lutlut luo toku.

[Footnote]

[Picture on page 4]

Daniel el palye ke Met Kol su God el fwa sulela

[Picture on page 7]

Me luti lun Jisus kasru metu in akola nu ke me keok nu kemwa lun moul

[Picture on page 7]

Jisus el fwa kurungin met mwo nu kemwa nu ke sie fwal sasu su misla paye oasr we