Mongfwusesr Nu Ke “Sie Otunmu In Ikwe”

“Kulang luk fwalnu nu sum.”​—2 KORINT 12:9.

1, 2. (a) Efu kut in tia lut fwin kut sun me srifwe a ma upa? (b) Efu kut ku in lalalfongi fwinne oasr me srifwe puspis?

“ELOS nu kemwa su lungse in moulkin moul mutal in Kraist Jisus, elos fwa keok ke kolyai.” (2 Timote 3:12) Efu ou inge? Meyen Setan el akukuin a fwak la met nu kemwa elos kulansap nu sin God ke sripen rapku, a el lungse na paye in sang me akpayeye ke ma el fwak inge. Jisus el sang kas in sensen nu sin met sap oaru lal ke sie pal: “Setan el lungsel eis kom, tu el fwa likliki kom oanu wit.” (Luk 22:31) Jisus el etu na paye la God el lela Setan el an srifwe kut ke inkanek lun ma upa puspis. Paye, ma inge tia kalme la ma upa nu kemwa su kut sun ke moul lasr tuku sel Setan ku ke demon lal. (Ekklisiastis 9:11) Tusruktu, Setan el arulanu lungse in orekmakin kutena inkanek ke ku lal in kunausla oaru lasr.

² Baibel el aketeye nu sesr la kut tia enenu in fosrnga ke me srifwe. Kutena ma sikyuk nu sesr, ma inge tia me lut ku in oanu wangin etu lasr ka. (1 Piter 4:12) Paye, “keok sena oreyuk tari in met lili [wiesr] su in fwalu.” (1 Piter 5:9) Ke len inge, Setan el oru ma upa yok nu sin kais sie met kulansap lun God. Devil el arulanu engun in liye la kut arulanu keok ke ma upa puspis su oanu otunmu. In akpayeye ma inge, el orekmakin akmwuk lal ke sie inkanek in orani ku akyokye kutena me keok in oanu ‘otunmu in ikwe’ su oasr yurosr tari. (2 Korint 12:7) Fwinne ou inge, lela orekma in lain lal Setan nu sesr in tia kunausla oaru lasr. Fwin Jeova el “oru inkanek in kaengla” tu kut in ku ke me srifwe, el e oru pa ou inge ke kutena ma upa su kut sun su oanu otunmu in ikwesr.—1 Korint 10:13.

Fuka In Muteng nu ke Sie Otunmu

3. Fuka Jeova el topuk ke pal se Poul el siyuk sel in wanginla lukel otunmu in ikwel?

³ Met sap Poul el siyuk sin God in wanginla lukel otunmu ke ikwel. “Nga siyuk nu sin Leum pal tolu ke ma inge, in wanginla liki yu.” Mea topuk lun Jeova ke me siyuk lal Poul ke inse kemwa? “Kulang luk fwalnu nu sum, tu ku luk akfwalye in munas.” (2 Korint 12:8, 9) Lela kut in loang akmwoye nu ke top lal inge a lela kut in liye la fuka ma inge fwa ku in kasru kut in muteng ke kutena ma upa su oanu otunmu su akkeokye kut.

4. Ke inkanek puspis fuka Poul el eis me insemwowo su tuku ke lungkulang lun Jeova?

⁴ Loang akmwoye meyen God el akkeyel Poul in engunkin kulang lal su el akkalemye tari nu sel ke inkanek lun Jisus Kraist. Paye, Poul el akinsemwomwoyeyuk tari ke inkanek puspis. Jeova el sang nu sel ke kulang pal mwo lal in ekla met tuma lutlut, el fwinne sie met lain upa lun met tuma lutlut lun Jisus. (Orekma 7:58; 8:3; 9:1-4) Tok, Jeova el sang nu sel ke kulang kunokon yok a me sang puspis. Ma kut ku in lotela ke ma inge arulanu kalem. Fwinne ke pal koluk, oasr yurosr me insemwomwo puspis su kut ku in sang kulo ka. Lela me srifwe nu kemwa su sun kut in tia mokle kut in mulkunla orekma mwo puspis nu kemwa lun Jeova nu sesr.—Sam 31:19.

5, 6. (a) Fuka Jeova el lotel Poul la ku mutal lun God “akfwalye in munas”? (b) Fuka me srikasrak lal Poul ku in sang me akpayeye la Setan el kikiap?

⁵ Lungkulang lun Jeova arulanu kalem ke inkanek puspis saye. Ku lun God yok liki ma nu kemwa su fwal in kasru kut ke me srifwe puspis su sun kut. (Efesus 3:20) Jeova el luti nu sel Poul la ku fulat lal ku in “akfwalye munas.” Ke inkanek fuka? El sang nu sel Poul ke kulang ku nu kemwa su el enenu tu lan ku in muteng nu ke me srifwe nu kemwa su sonol. Ke ma inge, mongfwusesr lal Poul a lalalfongi yok lal nu sin Jeova akkalemyeyuk nu sin met Kristian nu kemwa la ku lun God el kutangla me srifwe ke inkanek lun mokul se inge su munas a sesumwos. Mea ma inge akkalemye nu sel Devil, su fwak mu met nu kemwa elos kulansap nu sin God fwin ma nu kemwa lun moul arulanu mwo a wangin ma upa. Oaru lal Poul oanu el poukye mutun met kikiap inge!

⁶ Paul, su met kamwuk lal Setan meet ke orekma in lain lal nu sin God, sie met kolyai lun met Kristian, sie met Farisi moniyuk, su wangin alollo ka, la sie pal el engunkin me insemwomwo puspis lun moul meyen el isusla ke sie sou kasrup. Poul el kulansap nu sin Jeova a Jisus ke pal inge oanu “srik liki met sap nu kemwa.” (1 Korint 15:9) Ke sripe se inge, el akpusisilyel sifwanu ke kolyuk lun governing body lun met Kristian ke century se meet. A el arulanu oaru in muteng ke me keok oanu otunmu in ikwel. Yok asor lal Setan, meyen ma upa lun moul tia akmunasye moniyuk lal Poul. Poul el tia mulkunla fwinsrak lal in welul Kraist ke Togusrai lal in kosrao. (2 Timote 2:12; 4:18) Wangin me keok oanu otunmu, fwinne arulanu ngal, su ku in akmunasye moniyuk lal. Lela moniyuk lasr in oupanu, in tafwela na in ku pal nu kemwa! Ke kasru lal nu sesr ke pal in me srifwe, Jeova el akfulatye kut ke sie me sang nu sesr in akpayeye la Setan el kikiap.—Soakas 27:11.

Me Sang lun Jeova Arulanu yok Sripe

7, 8. (a) Ke inkanek puspis fuka Jeova el sang ku nu sin met kulansap lal ke len inge? (b) Efu ku rid Baibel len nu kemwa a lutlut arulanu yok sripe nu ke muteng lun otunmu in ikwe?

⁷ Ke len inge, Jeova el sang ku nu sin met Kristian oaru ke inkanek lun ngun mutal lal, Kas Lal, a un met lili wiesr. Oanu met sap Poul, kut ku in filiye me utuk lasr nu sin Jeova ke inkanek lun pre. (Sam 55:22) Fwinne God el tia eisla liki kut me srifwe, tusruktu el ku in ase nu sesr lalmetmet in muteng ka, fwinne ke me srifwe su arulanu upa in muteng. Jeova el ku in ase nu sesr pa me akkeye—el ase nu sesr “ku su yok liki ku lasr sifwanu”—in kasru kut in muteng.—2 Korint 4:7 NW.

⁸ Kut eis fuka kasru inge? Kut enenu in moniyuk ke lutlut lasr ke Kas lun God, meyen ke ma inge kut ku in koneak me akkeye paye. (Sam 94:19) In Baibel, kut ku in rid kas mwomwo lun met kulansap lun God ke pal se elos siyuk ke kasru lun God. Top lun Jeova pal nu kemwa, oasr ke kas in akkeye puspis, a ma inge nu kemwa fwal nu sesr in nunku ka. Lutlut ke Kas lun God ku in akkeye kut “tu yoklanu lun ku fwa ma sin God me, a tia ma sesr sifwanu.” Oanu me mongo su kut enenu len nu kemwa in akkeye manosr, Kut enenu pa Kas lun God oanu me mongo in ngun ke len nu kemwa. Ya kut oru ou inge? Fwin aok, na kut ku in liye la “ku su kut eis yok liki ku lasr sifwanu” ku in kasru kut in muteng ke kutena me keok su oanu otunmu in akkeokye kut in pal inge.

9. Fuka met elder elos ku in kasrelos su muteng ke ma upa puspis?

⁹ Met elder nu kemwa su sangeng sin God elos ku in “nien mwukla liki engu” lun me fosrnga, “a sie me loeyuk liki paka” lun ma upa. Met elder nu kemwa su fwal nu ke kas inge, elos siyuk sin Jeova ke inse pusisel a oaru in kasrelos in oasr “loan met su lutlut tari” in etu in topuk fuka nu sin met keok ke inkanek lun kas mwo. Kas lun met elder ku in lumeyuk oanu af tultul su akkeye a akpwarye ngunasr ke lusen pal in ma upa lun moul. Ke inkanek in kas su “akpulaikyelos su munas inse,” met elder elos akkeye met lili mokul a mutan wielos su fosrnga a asor ke sripen me keok su oanu otunmu in ikwelos.—Isaia 32:2; 50:4; 1 Tesalonika 5:14.

10, 11. Fuka met kulansap lun God elos akkeye kutu met su sun me srifwe upa?

¹⁰ Met kulansap nu kemwa lun Jeova elos ipen sou lun met Kristian inge su oasr inse siefwunnu. Aok, kut nu kemwa “laan sie sin sie,” a “fwal nu sesr tu kut in ouyepa lungse sie sin sie.” (Rom 12:5; 1 Jon 4:11) Kut akpayeye fuka kunokon inge? Fwal nu ke 1 Piter 3:8, kut oru ou inge ke kut akkalemye “pakoten sie sin sie, lungse oanu met lili, fwusesr inse” nu sin met nu kemwa su sou lun lalalfongi. Nu selos nu kemwa su mongfwusesr ke me keok su oanu otunmu in ikwe su arulanu ngal, elos fwinne met fwusr ku met matu, lela kut nu kemwa in sang nu selos pakoten yok. Ke inkanek fuka?

¹¹ Kut enenu in nunku ke keok lalos. Kut fwin tia nunku ke ma elos pula, ku tia pulakin ma elos pula, ku tia loang nu selos, saap kut tia akilen la kut mutamwauk in akyokye keok lalos. Kut fwin nunku ke me srifwe su sunolos ma inge ku in mokle kut in orekmakin lalmetmet ke ma kut fwak, la fuka kut fwak, a ke ma kut oru. Nunuk sumwos lasr a kas in akkeye lasr ku in kasru yok in akfwusesrye kutu me keok su tuku ke kutena otunmu su akkeokyelos. Kut fwa ekla me akengun nu selos.—Kolosse 4:11.

Fuka Kutu Met Elos Kutangla ke Mongfwusesr Lalos

12-14. (a) Mea sie met Kristian el oru tu el an ku in muteng ke mas in cancer lal? (b) Fuka met lili mokul a mutan in ngun wien mutan se inge kasrel a akkeyel?

¹² Ke kut futotoeni nu ke saflaiyen len safla inge, “me asor” yokyokelik ke len nu kemwa. (Mattu 24:8) Ke ma inge, me srifwe el ku in sun met nu kemwa fwin fwalu, yokna nu sin met kulansap oaru lun Jeova, su kaifweung in oru ma lungse lal. Ke sie me pupulyuk, srike loang akmwoye nu ke sie met Kristian su oru orekma lun forfor pal nu kemwa. Elos koneak la oasr cancer lal a enenu in etukla lukel salivary a lymphatic glands lal ke inkanek in laslas. Ke pal se el a mokul tumal koneak la oasr kain in mas inge lal, elos silaklak in siyuk nu sin Jeova ke sie pre loeloes. Tok el fwak la oasr sie inse misla lulap su alukela ma elos nunku ka tuku nu selos. Fwinne ou inge, el srakna enenu in mongfwusesr nu ke sie pal mwo a sie pal koluk, yokna ke pal se el pulakin kutu me keok su tuku ke ono lal.

¹³ In oasr etu lal ke ma sikyuk nu sel, sister se inge el srike in lutlut yok ke cancer. El sramsram nu sin taktu lal. Ke Tauer In San, Awake!, a ke kutupa me rid su tuku sin met Kristian el koneak me sramsram puspis lun met la fuka kais sie selos muteng nu ke kain in mas inge. El rid pa fus puspis in Baibel su akkalemye ku lun Jeova in akkeye met lal ke lusen pal in ma upa, a ke kutupa me lutlut su ku in kasrel.

¹⁴ Sie me lutlut su aketeyel in kutangla me asor inge akkalemyeyuk ke kas lalmetmet inge: “El su sifwanu srella, el suk ma lungse lal.” (Soakas 18:1) Ke ma inge, me lutlut inge el kai: “Fwasr Liki in Mukena Muta.”a Sister se inge el fwak: “Met puspis elos fwak la elos pre keik; kutu selos pangon yu ke telefon. Met elder luo elos pangon yu ke telefon ke len nu kemwa in siyuk mea pulakin luk. Elos supwela ros a card puspis. Kutu selos orek mongo. Pus selos kisekin moul lalos sifwanu in wisyula nu yurin taktu.”

15-17. (a) Fuka sie met Kristian el muteng ke ma upa puspis su sikyuk ke accident? (b) Kain in kasru fuka met nu kemwa in congregation elos oru nu sel?

¹⁵ Sie met kulansap lun Jeova ke lusen pal loeloes in an New Mexico, U.S.A., el sun ongoiye ke sitosa pal luo. Inkewel a fwinpisel musalla, a ma inge akyokye ngal lun arthritis lal su el muteng ka ke lusen yiu 25. El fwak: “Arulanu upa nu sik in ngetuk nu lung a wis kutena ma su alukela pound limekosr. Tusruktu pre luk nu sin Jeova ke inse kemwa arulanu akkeye yu. Oupanu me lutlut puspis ke Tauer In San su kut lotela tari. Sie met el sang comment lal ke Maika 6:8, a akkalemye la in fwasr inse fwokpap yurin God ku in kalmekin la kut enenu in akilen ma kut tia ku in oru. Ma inge kasre yu in akilen la fwinne Nga muta in luma upa, Nga tia enenu in asor, fwinne aur luk ke orekma lun forfor supus liki ma Nga lungse in oru. Kulansap nu sel ke inse kemwa pa ma yok emeet.”

¹⁶ El ouyepa fwak: Met elder nu kemwa elos kaksakin yu pal nu kemwa ke kaifweung luk in wi meeting pal nu kemwa a ke orekma lun forfor. Met fwusr elos kafwis yu wi ke inkanek in paing. Met orekma su pioneer elos arulanu mongfwusesr nu sik a pal nu kemwa elos ekulla plan lalos in akfwalye nu sik ke pal Nga mas na upa. Fwin pulanpal el arulanu koluk, elos arulanu kulang in wisyula nu ke return visit ku elos suli yu in wi ke Baibel study lalos. Meyen Nga tia ku in wis sie bag, paenang kutu sin met orekma elos filiye me rid luk ke bag nutulos ke pal se Nga wi ke orekma lun forfor in luti.”

¹⁷ Loang akmwoye la fuka met elder nu kemwa lun congregation a met lili in lalalfongi elos kasru sister luo inge in muteng ke mas lalos su oanu otunmu nu in ikwelos. Elos sang me kasru kulang su orekla fwal nu ke ma enenu ke mano, ngun, a pulakin lun sie met. Ya ma inge tia akkeye kom in sang kasru nu sin kutu brother ku sister su sun ma upa? Komwos nu kemwa su srakna fwusr, komwos ku in ekla me kasru nu selos nu kemwa su muta in congregation lom su muteng nu ke otunmu in ikwelos.—Soakas 20:29.

18. Kain in me akkeye fuka kut ku in koneak ke me sramsram ke moul lun met su akkalemyeyuk ke magasin inge Tauer In San a Awake!?

¹⁸ Magasin inge Tauer In San a Awake! akkalemye me sramsram puspis ke moul lun met a experience lun Met Lo puspis su muteng meet, a kaifweung in muteng ke ma upa lalos in moul. Ke kom ridi me sramsram inge pal nu kemwa, kom ku in liye la pus sin met lili mokul a mutan wiom fwin fwalu nu fon elos muteng nu ke ma upa lalos ke mani, mise lun met su elos lungse ke pal in ongoiye, a muteng lalos ke pal in meun su arulanu sensen. Met puspis tia ku in oru orekma fwusesr su met tia mas elos tianu liksreni in loang nu ka fwinne elos ku in oru. Munas lalos ke mano arulanu srifwelos na paye, yok na fwin elos tia ku in oru orekma lun met Kristian yok liki ma elos lungse in oru na paye. Elos arulanu sang kulo wi kaksak ke kasru a me akkeye su brother a sister wielos, met fwusr a met matu elos oru nu selos!

Muteng Wise Me Insemwomwo

19. Efu Poul el ku in pulakin insemwomwo fwinne el sun ma upa su tuku ke me srifwe puspis oanu utunmu a munas lal sifwanu?

¹⁹ Poul el arulanu engun ke inkanek lun God in akkeyel. El fwak: “Ke ma inge . . . Nga fwa arulanu engun in konkun in munas luk, tu ku lun Kraist fwa on fwuk. Ke ma inge Nga engun in munas in lal, in enenu, in kolyai, in keok ke Kraist. Tu ke Nga munas, na Nga ku.” (2 Korint 12:9, 10) Ke sripen experience lal sifwanu, Poul el ku in pulaik in fwak: “Tia tu Nga kaskas ke enenu, tu Nga lutlut tari, tu, in kutena ma su sikyuk nu yuruk, Ngan inse misla a tia torkaskas. Nga etu fuka in akpusisilyeyuk, a Nga etu fuka in puselik. In kutena ma a in ma nu kemwa Nga lutlutkin ma lukma tu Ngan kup a tu Ngan musrinsral, tu Ngan kasrup a tu Nga sikasrup. Nga ku in oru ma nu kemwa in El su akkeyeyu.”—Filippai 4:11-13.

20, 21. (a) Efu kut ku in koneak insemwomwo kut fwin nunku ke “ma su tia sikme”? (b) Mea kutu “ma su tia sikme” su kut fwinsrak nu ka in liye na paye ke Paredais fwin fwalu?

²⁰ Ke ma inge, ke inkanek in muteng ke kutena ma upa su oanu otunmu in ikwesr, kut ku in koneak insemwomwo yok ke kut akkalemye nu sin met nu kemwa la ku lun Jeova akkeye munas lasr. Poul el simusla: “Ke ma inge kut tia mulalla . . . Insiesr aksasuyeyuk len nu kemwa. Tu keok lasr mulala, su on kitin pal na, orek kasr yokna mwolanu a kamwil; tu ma su kut liye . . . ma su tia sikme. Tu ma su kut tia liye . . . ma kamwil.”—2 Korint 4:16-18.

²¹ Apkurun met lun Jeova nu kemwa ke len inge elos fwinsrak in moul ma patpat ke sie Paredais fwin fwalu a in engunkin me insemwomwo puspis su el mwolela ka. Kain in me insemwomwo puspis inge ku in “tia sikme” nu sesr ke len inge. Tusruktu, pal se arulanu futotoeni, pa inge pal se su ma me insemwomwo inge nu kemwa fwa ku in liyeyuk ke mutasr na paye, aok, a in engunkin ma inge ma patpat. Sie me insemwomwo inge pa in sukosokla liki kutena ma upa su oanu otunmu ma patpat! Mwen nutin God el e fwa “kunausla orekma lun Devil” a “in kunausla el su ku lun mise ma lal.”—1 Jon 3:8; Hibru 2:14.

22. Kain in pulaik a kaifweung fuka enenu in oasr yurosr?

²² Ke ma inge, kutena otunmu in ikwe su akkeokye kut ke len inge, lela kut in tafwela in muteng nu ka. Oanu Poul, oasr yurosr ku in oru ou inge ke kasru lun Jeova, su arulanu kulang in ase nu sesr ku. Ke pal se su kut fwa muta in Paredais fwin fwalu, kut fwa akinsemwomwoye Jeova su God lasr ke len nu kemwa ke sripen orekma mwolanu lal nu kemwa kasr.—Sam 103:2.

[Footnote]

Kom Topuk Fuka?

• Efu a fuka Devil el srike in kunausla oaru lun met Kristian paye?

• Fuka ku lun Jeova “akfwalye in munas”?

• Fuka met elder nu kemwa a kutupa met elos ku in akkeyelos nu kemwa su keok ke sripen ma upa?

[Picture on page 10]

Pal tolu Poul el pre nu sin God in eisla lukel otunmu in ikwel