Jeova El Nien Molela Lasr

“Meyen kom fwak: ‘Jeova el nien moul luk,’ . . .wangin koluk fwa tuku nu fwom.”​—SAM 91:9, 10 NW.

1. Efu ku kut ku in fwak la Jeova el nien mwukla lasr?

JEOVA el sie nien moul nu sin met lal. Kut fwin mwolela na paye moul lasr nu sel, saap kut ‘eoigusyuk apunla, a tia ikulyuk; kut toninfong, a sumwenu wanginla fwinsrak; kolyaiyuk kut, a kut tia fulela; poukyuk kut, a tia kunauskutla.’ Efu? Meyen Jeova el ase nu sesr “yoklanu lun ku.” (2 Korint 4:7-9) Aok, Papa tumasr in kosrao el kasru kut in moulkin moul fwal nu ke lungse lal, a kut ku in filiye ke insiesr kas lun met simusla Sam: “Meyen kom fwak: ‘Jeova el nien moul luk,’ kom orala El Su Fulatlanu tu lan nien muta lom; wangin koluk fwa tuku nu fwom.”​—Sam 91:9, 10, NW.

2. Mea kut ku in fwak ke Sam 91 a mea el mwolela?

² Kas se inge in Sam 91 saap simusyukla sel Moses. Sie superscription el akkalemye la el oanu sie met su orala Sam ak90, a Sam 91 su fwasr tokin ma inge el akkalemye kas sasu a akkalemye met sim sasu. Saap Sam 91 elos on ke inkanek lun antiphonically; kalmen ma inge pa, sie met el on meet (91:1, 2), na sie choir el on topuk (91:3-8). Na sie met on ku in longyuk tok (91:9a) a sie un met elos on fwasr toko (91:9b-13). Na sie met on saap el on ke kas safla (91:14-16). Ke kutena inkanek in on su elos oru ke sam inge, Sam 91 el mwolela ke inse misla a insemwomwo in ngun nu sin met Kristian akmusrala oanu sie u a el sang kas in akkeye siefwunnu nu sin met su mwolela in welulos oanu sie u.a Lela kut in tuni Sam fwal nu ke nunuk lun met kulansap nu kemwa lun Jeova.

Muta Insemwomwo ke ‘An Lukma lun God’

3. (a) Mea se inge “an lukma lun El Su Fulatlanu”? (b) Mea ma inge su kut ku in pulakin ke kut muta ye “me lul lun el Su Ku Liki Ku”?

³ Met simusla Sam el on: “El su muta in an lukma sin El Su Fulatlanu, El fwa muta na ye lulin El Su kulanu. Nga fwa fwak ke Jeova: ‘El me loeyuk luk a seng luk, God luk, su Nga lalalfongi.’ ” (Sam 91:1, 2) “An lukma lun El Su Fulatlanu” e; pitse nu ke sie nien molela lasr, yokna nu sin met akmusrala, su Devil el suk na paye in kunausla. (Fwakyuk 12:15-17) El akola in kunauskutla nu kemwa fwin wangin yurosr nien molela inge su kut engunkin, oanu met nu kemwa su muta in ngun lun God elos oru. Ke kut “muta ye lulin El Su Kulanu,” kut engunkin kurungin lun God, oanu sie me lul. (Sam 15:1, 2; 121:5) Wangin sie nien mwukla fukoko su mwo liki Leum Fulatlanu, Jeova.​—Soakas 18:10.

4. Kain in kofwen orekma fuka “met srumwon,” Setan el orekmakin, a fuka kut ku in kaengla liki?

⁴ Met simusla Sam el fwak: “Tu el [Jeova] fwa eskomla liki me kaisrip lun met srumwon, a liki me lokwalok su wise me keok.” (Sam 91:3, NW) Sie met srumwon in an Israel in pal meeta elos orekmakin me sruf pal nu kemwa in sang sroukye mwon. Kutu pal mwe sruf lun “met srumwon,” Setan, wi u koluk lal a “orekma kutasrik” lal. (Efesus 6:11, footnote) Me sruf su tia ku in liyeyuk el ku in mokle kut in oru ma koluk su ku in kol nu ke tula lasr in ngun. (Sam 142:3) Ke sripen kut auliyuk tari liki ma sesumwos lasr, paenang, moul in ‘ngun lasr el oanu sie mwon su kaengla liki me sruf.’ (Sam 124:7, 8) Kut enneu in sang wi kaksak ke sripen Jeova el molekutla liki “met srumwon” koluk inge!​—Mattu 6:13.

5, 6. Kain in “me lokwalok” fuka orala “me keok,” tusruktu, efu met lun Jeova nu kemwa elos tia sun ma inge?

⁵ Met simusla Sam el sramsramkin “me lokwalok su wise me keok.” Oanu sie mas su sa in fwasrelik, oasr ma puspis su orala “me keok” ke sou lun met a nu sin met nu kemwa su akkeye sumwos lun Jeova in kol. Ke ma inge, met historian su pangpang Arnold Toynbee el simusla: “Tokin Meun Lulap Akluo nationalism ku lungse lun mutanfwal el akyokyelik ke pal luo kena lun sifwanu in kol lun states . . . Lungse in sifwanu kol lun met ke pal inge yokyokelik.”

⁶ Ke lusen century puspis somla, kutu met kol elos akyokye meun ke sripen srisri fwin fwalu nu fon. Elos ouyepa sapkin nu sin met in akfulatyelos ku ma srulela puspis ku me akul puspis. Tusruktu, Jeova el tia lela met kulansap oaru lal in sun kain in “me lokwalok” inge.” (Daniel 3:1, 2, 20-27; 6:7-10, 16-22) Oanu sie un met lili fwin fwalu nu fon, kut alu nu sin Jeova mukefwunnu, kut tia wi ke kutena u su lain sie sin sie meyen kut akos Ma Simusla, a ke sie nunuk su wangin srisri, kut akilen la “in mutanfwal e nu kemwa el su sangeng sel [God], a oru ma sumwosmwos, el akinsemwomwoyel.” (Orekma 10:34, 35; Exodus 20:4-6; Jon 13:34, 35; 17:16; 1 Piter 5:8, 9) Fwinne kut sun “me keok” ke inkanek lun kolyai oanu sie met Kristian, kut arulanu insemwomwo a pulakin inse misla “in an lukma sin El Su Fulatlanu.”

7. Fuka Jeova el kurungin kut ke inkanek lun “po soksok lal.”?

⁷ Meyen Jeova pa nien molela lasr, kut nu kemwa akkeyeyuk ke kas inge: “El fwa afwinkomwi ke unen mwon lal, a ye paul kom fwa konoiyuk misla. Paye lal a fwa me loeyuk lom a me luslus.” (Sam 91:4) God el kurungin kut, oanu sie nine kien mwon su sokot, sokmu in kurunganang mwo mwon nutul. (Isaia 31:5) ‘El fwa kurungin kut ke unen mwon lal.’ Ke unen mwon lal sie mwon el kurunganang mwon nutul, el kurunginelos liki me lokwalok lalos. Ke kas in pupulyuk, oanu mwon srisrik, kut nu kemwa eis me kurungin ye po soksok lun Jeova, meyen kut eis me loeyuk ke u lun met Kristian paye lal.​—Rut 2:12; Sam 5:1, 11.

8. Fuka “ma paye” lun Jeova el sie me loeyuk lulap a me luslus?

⁸ Kut lalalfongi ke “paye lal,” ku oaru lal. El oanu me loeyuk lulap in pal meeta, pal nu kemwa el oanu sie srungal a arulanu yok paenang el ku in afwunye monin met nu fon se. (Sam 5:12) Lalalfongi ke kain in me loeyuk inge aksukosokye kut liki me aksangeng. (Genesis 15:1; Sam 84:11) In oanu lalalfongi lasr, ma paye lun God el oanu sie me loeyuk yok su ku in kunela musra e nu kemwa a orekma koluk nu kemwa lun met lokwalok lom. (Efesus 6:16) El oanu sie me luslus pa, sie an fulat su kut ku in tu ku we.

‘Kut Fwa Tia Sangeng’

9. Efu ku fong el sie me aksangeng na paye, tusruktu efu kut tia sangeng?

⁹ Ke sripen el nunku ke kurungin lun God, paenang met simusla Sam el fwak: “Kom in tia sangeng ke me aksangeng in fong, ku ke mwusra soksok in len, ku ke mise su fwafwasyesr in losr, ku kunausten se su kunausla ke infwulwen len.” (Sam 91:5, 6) Ke sripen orekma koluk puspis orekla ke losr, paenang fong el sie me aksangeng na paye. Ke sripen losr in ngun su afwunye fwalu nu fon ke pal inge, paenang met lokwalok lasr elos pal nu kemwa orekmakin inkanek kutasrik in kunausla ku lasr in ngun a kosroila orekma in luti lasr. Tusruktu, ‘kut tia sangeng ke kutena me aksangeng ke fong’ meyen Jeova el kurungin kut.​—Sam 64:1, 2; 121:4; Isaia 60:2.

10. (a) Mea se inge “mwusra su soksok ke len” lungse in akkalemye, a oiye fuka kut akkalemye ke ma se inge? (b) Mea “me lokwalok su fwafwasyesr in losr,” a efu kut tia sangeng ke ma inge?

¹⁰ “Mwusra soksok ke len” ku in kalmekin nu ke kas in akkoluk. (Sam 64:3-5; 94:20) Ke kut kaifweung in akkalemye kas paye, kain in kas in lain nu ke orekma mutal lasr wangin sripe. Sayen ma inge, kut tia sangeng ke “me lokwalok su fwafwasyesr in losr.” Me lokwalok su pupulyukinyuk inge el yokyokelik ke fwal koluk inge a mas lun alu su oan ye koko lun Setan el yokelik pa. (1 Jon 5:19) Ma inge paenang in oasr kain in nunuk a inse koluk, su orala met puspis in oasr ke moul losr a tia etu Jeova, tia etu akmwuk lal, a me sang mwolanu lal. (1 Timote 6:4) Fwinne yokyokelik moul in losr, lela kut in tia sangeng, meyen kut insemwomwokin me sang lun kalem in ngun su arulanu yokyokelik.​—Sam 43:3.

11. Mea sikyuk nu selos nu kemwa su sun me kunausten ke infwulwen len’?

¹¹ “Kunausten se su kunausla ke infwulwen len” tia me aksangeng nu sesr. Meyen “infwulwen len” el saap ku in kalmekinyuk nu ke kapkapek lun fwalu. Elos nu kemwa su sremla ke nunuk lun fwal se inge elos tula liki moul in ngun. (1 Timote 6:20, 21) Ke kut kaifweung in sulkakin peng mwo lun Togusrai ke pulaik, kut tia sangeng ke kutena me lokwalok su sun kut, meyen Jeova pa Me Loeyuk lasr.​—Sam 64:1; Soakas 3:25, 26.

12. Tausen puspis elos “ikori” sisken su, a ke inkanek fuka elos ou inge?

¹² Met simusla Sam el tafwela: “Sie tausen a fwa ikori siskom, a siengoul tausen ke le poum leyut; a a fwa tia apkurun nu sum. Ke mutom mukena kom fwa liye, a liye molin met koluk.” (Sam 91:7, 8) Ke sripen elos srunga Jeova in pa nien mwukla lalos, paenang met puspis elos “ikori” ke moul in ngun “siskesr.” Ke sripe se inge “siengoul tausen” ikori ke “lepo leyut” lun Israel in ngun ke len inge. (Galetia 6:16) Tusruktu, fwinne kut met Kristian akmusrala ku met mwolela tari su asrouki nu selos, kut muta inse misla ke “an lukma” lun God. Kut tianu arle ‘loang ke ongoiye lun met koluk,’ su kosrani ongoiye ke mani, alu, a kutupa inkanek.​—Galetia 6:7.

‘Wangin Ongoiye Su Fwa Sun Kut’

13. Kain in ongoiye fuka e tia sun kut, a efu?

¹³ Fwinne insemwomwo lun fwal se inge musalla, lela kut in suk meet God a kut lalalfongi yok ke kas lun Sam: “Meyen kom fwak: ‘O Jeova nien moul luk,’ Kom orala El su Fulatlanu tu lan nien muta lom; wangin koluk fwa tuku nu fwom, ouyepa wangin me kunausla fwa apkurun nu ke loom sum.” (Sam 91:9, 10) Aok, Jeova el nien moul lasr. Tusruktu, kut orala El Su God Fulatlanu in ‘nien muta lasr’ pa, an se ma kut ku in koneak inse misla a tia sangeng. Kut kaksakin Jeova oanu El Su Fulatlanu in kosrao a fwalu, el pa “Sropon” me kasru mwolanu lasr, a kut sulkakin peng mwo lun Togusrai lal. (Mattu 24:14) Ke ma inge, ‘wangin me kunausla fwa apkurun nu sesr’​—kutena me lokwalok su akkalemyeyuk ke sam fwa tia tuku nu sesr. Fwine kutupal kut wi kutu met in pulakin ongoiye oanu kusrusrusr, paka, sronot, sral, ma upa su tuku ke meun, ma inge nu kemwa tia kunausla lalalfongi lasr ku nien moul lasr in ngun.

14. Oanu met kulansap lun Jeova, efu kut nu kemwa tia sun me lokwalok?

¹⁴ Met Kristian akmusrala nu kemwa elos oanu met fwafwasyesr su muta ke loom nuknuk a srela liki akmwuk inge. (1 Piter 2:11) ‘Wangin me kunausla fwa apkurun nu ke loom selos.’ Fwinsrak lasr fwinne in kosrao ku fwalu, kut tia ma lun fwalu, a kut tia sun mwe lokwalok in ngun su tuku ke orekma lun kosro, lungse me kasrup lun fwalu, alu kikiap, a alu nu sin “kosro lemnak” a “me srulela” lal su United Nations.​—Fwakyuk 9:20, 21; 13:1-18; Jon 17:16.

15. Ke inkanek fuka kut engunkin me kasru su tuku sin lipufon?

¹⁵ Fwin ke kurungin su kut engunkin, met simusla Sam el simusla: “Tu el [Jeova] fwa sap nu sin lipufon lal keyum, in kurungin kom innek nu kemwa lom. Elos fwa tappukomyuk in paulos, tu kom in tia kanteye niom ke eot.” (Sam 91:11, 12) Etukyung nu sin lipufon in kurungin kut. (2 Togusra 6:17; Sam 34:7-9; 104:4; Mattu 26:53; Luk 1:19) Elos kurungin kut ke ‘inkanek lasr nu kemwa.’ (Mattu 18:10) Kut engunkin kurunginyuk a kolyuk lun lipufon oanu met sulkakin Togusrai a in tia tukulkul in ngun. (Fwakyuk 14:6, 7) Fwinne ‘eot’ puspis su aoliyen ma sap puspis su kutongye orekma lasr tia ku in oru kut in tukulkul a in tula insemwomwo lun God nu sesr.

16. Fuka orekma in lain lun “laion fwusr soko” a “cobra” soko tia oanu sie, a oiye fuka kut akkalemye nu selos?

¹⁶ Met simusla Sam el tafwela: “Kom fwa longye laion a adder, laion fwusr a serpent kom fwa longye ye niom.” (Sam 91:13) Oanu laion fwusr soko su ku in akalemye koskosrok lal a suk in anwuk, a oupanu kutu met lokwalok lasr su akkalemye orekma in lain lalos ke pal se elos orala ma sap su orekla in sang kosroila orekma in luti lasr. Tusruktu, sayen inkanek inge su arulanu kalem ye mutun met su elos lain oasr kutupa inkanek kutasrik su upa in liyeyuk elos orala. Elos suk in mwukla in tia eteyuk mu elos pa orala, met kol lun alu elos lain kut ke inkanek lun met sroasr ma sap, met nununku, a kutupa met. Tusruktu, ke kasru lun Jeova, kut suk inkanek in aksumwosye ma inge ke court puspis, ke ma inge kut ‘aksumwosyeyuk a akkeyeyuk ke orekma lun peng mwo lun mwosasu.’​—Filippai 1:7; Sam 94:14, 20-22.

17. Fuka kut longye “laion fwusr soko”?

¹⁷ Met simusla Sam el sramsramkin ke “laion fwusr a serpent lulap.” Laion fwusr el ku in arulanu silolel, a serpent lulap el ku in soko kosro su arulanu yok. (Isaia 31:4) Fwinne laion fwusr el arulanu silolel ke pal se el lain kut, tusruktu, kut ku in longye ma inge ke kas pupulyuk ke pal se kut akos God yok liki metu ku u puspis lun met su lumeyuk oanu laion. (Orekma 5:29) Ke ma inge “laion” inge su oanu me sensen yok el tia ku in akkolukye kut in ngun.

18. “Serpent lulap soko” akismakinye kut ke mea, a mea kut enenu in oru el fwin lain kut?

¹⁸ In Greek Septuagint, “serpent lulap” el pangpang “dragon.” Ma inge akesmakinye kut ke “dragon lulap . . . , serpent matu, el su pangpang devil a setan.” (Fwakyuk 12:7-9; Genesis 3:15) El oanu wit lulap soko su ku in kunausla a okomye kutena ma su el lungse in kang. (Jeremaia 51:34) Ke pal se Setan el orekmakin pulal in puokutla, in srike in kunauskutla ke ma upa lun fwal se inge, a srike in okomkutla, lela kut in aksukusokye kut sifwanu liki me sruf lal a longye “serpent lulap” inge.” (1 Piter 5:8) Met akmusrala nu kemwa enenu in oru ou inge elos fwin lungse in wi ke me akpayeye lun Rom 16:20.

Jeova​—Sropon Moul Lasr

19. Efu kut ngetuk nu sin Jeova oanu me loeyuk lasr?

¹⁹ Fwin ke met alu paye, met simusla Sam su aoliyen God ke pal se el fwak: “Meyen el likiye lung lal nu fwuk, ke ma inge Nga fwa molella; Nga fwa akfulatyel tu el etu ek.” (Sam 91:14) Kas se inge “Nga fwa molelIa” ku in kalmekin nu ke, “Nga fwa fililye ke an fulat,” sie an fulat su wangin kutena ma ku in sun. Oanu met su alu nu sel, kut oru Jeova oanu nien moul saok lasr yokna meyen ‘kut oru in futoto nu sel.’ (Mark 12:29, 30; 1 Jon 4:19) Ke sripe se inge, God ‘el ase nu sesr inkanek in kaengla’ liki met lokwalok lasr. Kut tia ku in kunausyukla na paye. A, kut fwa moul, meyen kut etu e mutal lun God a kut pangon nu ka in lalalfongi lasr. (Rom 10:11-13) A kut kaifweung in ‘fwasr in en Jeova God ma patpat.’​—Maika 4:5; Isaia 43:10-12.

20. Ke kas safla lun Sam 91, mea Jeova el mwolela nu sin met kulansap oaru lal?

²⁰ Oanu kas safla lun Sam 91, pa inge ma Jeova el fwak ke met kulansap oaru lal: “El fwa pang nu sik a Nga fwa topuk nu sel. Nga fwa muta yurol in ongoiye. Nga fwa molela a akfulatyel. Nga akkupyel ke moul loeloes, a fwakak nu sel molela luk.” (Sam 91:15, 16) Ke pal se kut pang nu sin God ke pre fwal nu ke ma lungse lal, el fwa topuk kut. (1 Jon 5:13-15) Kut sun tari me keok puspis ke sripen orekma silolel su Setan el orala. Tusruktu kas se inge “Nga fwa muta yurol in ongoiye” kasru kut in akoekutla nu ke ongoiye in pal fwasru a ma inge oru kut in lalalfongi la God el e fwa kasru kut ke pal se el kunausla akmwuk koluk inge.

21. Fuka met akmusrala nu kemwa elos eis mwolanu tari?

²¹ Fwinne Setan el lain upa, pisen met akmusrala nu fon e fwa eis mwolanu lalos in kosrao ke pal pakiyuki lun Jeova​—tokin “lusen len puspis” lalos fwin fwalu. Aok, molela sakuruk lun God sun tari mwolanu in ngun nu sin met akmusrala. A fuka lupan akfulat nu selos ke sripen elos kol oanu Met Lo lun Jeova fwin fwalu ke len safla inge! (Isaia 43:10-12) Molela yok lun Jeova nu sin met lal e fwa orek ke lusen pal in meun lulap lun Armageddon ke pal se el fwa akkalemye sumwos lal in kol in kosrao a fwalu a ke pal se el akmutalye e mutal lal.​—Sam 83:18; Ezekiel 38:23; Fwakyuk 16:14, 16.

22. Su ku in ‘liye molela lun Jeova’?

²² Fwinne kut wi asrouki nu sin met Kristian akmusrala ku nu sin met su mwolela tari moul lal a asrouki nu selos, kut nu kemwa ngetuk nu sin God ke molela. Ke lusen “len lulap a me aksangeng lun Jeova,” elos nu kemwa su oaru in kulansap nu sin God elos fwa moliyukla. (Joel 2:30-32) Elos nu kemwa su muta inmaslosr su wi ke “u lulap” su akola in moul ke fwal sasu lun God a sroukye na oaru lal ke lusen me srifwe safla e fwa ‘akkupyel ke lusen moul loeloes’​—wangin saflaiyen moul lal. El akola pa in akmoulyeak met puspis. (Fwakyuk 7:9; 20:7-15) Jeova el insemwomwo yok ‘in kasre kut in liye molela’ ke inkanek lun Jisus Kraist. (Sam 3:8) Ke sripen fwinsrak mwolanu inge su oasr yurosr, lela kut in kaifweung in ngetuk nu sin God ke kasru in oekla len lasr nu ke mwolanu lal. Ke inkanek lun kas a orekma lasr, lela kut in tafwela in akpayeye la Jeova el nien mwukla lasr.

[Footnote]

Fuka Kom Ku In Topuk?

• Mea se inge “an lukma lun El Su Fulatlanu”?

• Efu kut tia sangeng?

• Ke inkanek fuka ‘wangin ongoiye su e fwa sun kut’?

• Efu kut ku in fwak la Jeova el sropon molela lasr?

[Picture on page 15]

Ya kom etu fuka ma paye lun Jeova el sie me loeyuk yok nu sesr?

[Pictures on page 16]

Jeova el kasru met kulansap lal in akpayeye orekma lun forfor lalos elos fwin sun me lain su elos tia nunku a kolyai su ku in liyeyuk

[Credit Line]

Cobra: A. N. Jagannatha Rao, Trustee, Madras Snake Park Trust