Kaksakin Jeova Ke Orekma Sakuruk Lal!
“Ngunik kaksakin Jeova . . . tu El su ku el oru ma lulap nu sik.”—Luk 1:46-49.
1. Ke kain in orekma yok fuka kut arulanu fwal in kaksakin Jeova?
JEOVA el arulanu fwal in eis kaksak ke orekma sakuruk nu kemwa lal. Ke pal se met palu Moses el esam sukosok lun Israel liki Ijipt, el fwak: “A mutomwos liye tari orekma lulap nu kemwa lun Jeova su el orala.” (Duteronomi 11:1-7) In oupanu, ke pal se lipufon Gabriel el sulkakin tuku a isusla lal Jisus sin mutan virgin se pangpang Mary, Mary el fwak: “Ngunik kaksakin Jeova . . . tu El su ku el oru ma lulap nu sik.” (Luk 1:46-49) Oanu sie Met Lo lun Jeova, kut kaksakunul ke orekma lulap inge nu kemwa oanu sukosok lun Israel liki sruo lalos in an Ijipt a muta ke inse a isusla lun Mwen nutul.
2. (a) Mea kalmen “papu ma patpat” lun God nu sin met nu kemwa su akos? (b) Mea experience lal Jon ke tuka lun Patmos?
2 Orekma lulap puspis lun Jeova kapsreni nu ke “papu omeet” in akinsemwomwoye met nu kemwa su akos ke inkanek lun Messaia a ke kolyuk lal ke Togusrai. (Efesus 3:8-13) Papu se inge arulanu kapkapek ke pal se met sap Jon su matou el eis pal mwo in liye srungal lun kosrao ikakla ke sie arurumu. El long sie pusra oanu pusren me ukuk su fwak: “Fwanyuk nu inge, a Nga fwa luti nu sum ma su a fwa tuku tok.” (Fwakyuk 4:1) Fwinne guferment lun Rom el supwella nu ke tuka lun Patmos ke sripen el “orek ma lo ke kas lun God, a ke ma lo lun Jisus Kraist, Jon el eis “fwakyuk lun Jisus Kraist.” Ma met sap el liye a long akkalemye papu omeet lun God, ke ma inge el sang kalem in ngun a me akkeye nu sin met Kristian paye nu kemwa.—Fwakyuk 1:1, 9, 10.
3. Met elder 24 su Jon el liye ke arurumu lal elos aoliyen su?
3 Ke inkanek lun srungal inge in kosrao su ikakla, Jon el liye elder 24, elos muta ke tron oanu togusra. Elos epasr nu sin God a fwak: “Fwal nu sum, Jeova, God lasr, tu kom in eis mwolanu a kaksak a ku tu kom orala ma nu kemwa, a ke lungse lom elos on, a orekla tari.” (Fwakyuk 4:11) Met elder inge nu kemwa aoliyen met akmusrala nu kemwa su sifwil moulyuk a eis mwolanu fwal nu ke ma God el mwolela nu selos. Elos mokleyuk in sang kaksak nu sin Jeova ke sripen orekma lulap lal su kapsreni nu ke ma orekla. Kut arulanu lut pa ke me akpayeye lal “oanu sie God a ku ma patpat” lun Jeova. (Rom 1:20) A kut fwin akyokye lutlut lasr kel Jeova, sripe lasr yokelik in kaksakunul ke orekma lulap lal.
Sulkakin Orekma Nu Kemwa lun Jeova su Fwal in Eis kaksak ka!
4, 5. Sang me srikasrak puspis la fuka Devid el kaksakin Jeova.
4 Met on Devid el sang kaksak nu sin God ke orekma lulap Lal. Ke sie me puulyuk, Devid el on: “On a kaksakin Jeova, su muta in Saion; fwakak orekma lal in maslon metu. O Jeova, pakomutuk; liye ongoiye luk su elos su srunge yu akkeokyeyu ka, Kom su srukyuyuk liki mutunpot mise, tu Nga fwa ku in fwakak kaksak lom nu kemwa, in mutunpot lun an nutin Saion Nga fwa engun in molela lom.” (Sam 9:11, 13, 14) Tokin el sang nu sin mwen nutul inge Solomon plan lun tempel, Devid el akinsemwomwoye a sang kaksak nu sin God, a fwak: “Ma lom O Jeova, pengpeng, a ku, a mwolanu, a kutangla, a fulat . . . Togusrai ma lom, O Jeova, a kom akfulatyeyuk oanu sifwe fwin ma nu kemwa. . . . Ke ma inge, God lasr, kut sot kulo nu sum, a kaksakin em mwolanu.”—1 Kronikel 29:10-13.
5 Ma simusla el kalweni pal puspis in suli—aok, el kaifwe—kut in kaksakin God, oanu David el oru. Buk lun Sam el nenela ke kas in kaksak nu sin God, a tafwu sin on inge tuku sel Devid. El kaksakin a sang kulo pal nu kemwa nu sin Jeova. (Sam 69:30) Aok, ke mutamwauk me, on mutal nu kemwa lun God su Devid el orekmakinyuk wi kutupa sin on orekla in kaksakin Jeova.
6. Fuka ma simusla lun Sam su etuku ke ngun lun God sie me kasru yok na paye nu sesr?
6 Sam el arulanu yok sripe na paye nu sin met nu kemwa su alu nu sin Jeova! Kut fwin lungse in sang kulo nu sin God ke orekma mwolanu nu kemwa lal in kasru kut, nunuk lasr fwal in esamak kas mwomwo nu kemwa su ku in konoiyuk in Sam. Ke sie me pupulyuk, tokin kut ngetalik ke sie len sasu, saap kut ku in esamak in fwak oanu kas inge: “Ma mwo in sang kulo nu sin Jeova, a in on in sang kaksak nu ke em, O kom su fulatlanu; in fwakak lungkulang lom ke lututeng, a oaru lom fong nu kemwa, . . . tu kom Jeova, kom akengunye yu ke orekma lom; Nga fwa arulanu engunak in orekma lun poum.” (Sam 92:1-4) Ke pal se kut kutangla me lain nu ke kapkapek lasr in ngun, kut koflanu in tia akkalemye insemwomwo a kulo lasr ke pre, oanu met sim lun Sam el oru ke pal se el on: “O fwasru, lela kut in on nu sin Jeova! Lela kut in fwakak pusren engun nu ke Eot Ku lun lango lasr. Lela kut in tuku ye mutal wi kulo; a lela kut in engun ke pusra lulap nu sel wi samu.”—Sam 95:1, 2.
7. (a) Mea ma yok su kut ku in liye ke on puspis su met Kristian elos yuk? (b) Mea sie sripe ke sa in tuku nu ke meeting nu kemwa a in muta na ke meeting nu ke safla?
7 Pal nu kemwa kut srukak pusrasr ke on in kaksak nu sin Jeova ke meeting lun congregation, toeni lulap, a convention puspis. Sie me purakak in etu la pus ke on inge tuku ke buk lun Sam. Sie me insemwomwo na paye in oasr yurosr kain in on puspis su orekmakinyuk in sang kaksak nu sin Jeova! On in kaksak nu sin God pa sie sripe mwo in tuku sa nu ke meeting nu kemwa lasr a in muta na ke meeting nu ke safla, a ke ma inge kut ku in akesrui nu sin met lili wiesr in lalalfongi in sang kaksak nu sin Jeova ke on a pre.
“Kaksakin Jah, Komwos nu Kemwa Metu!”
8. Mea ma inge su akkalemyeyuk ke kas se inge “Hallelujah,” a fuka ma inge orekmakinyuk pal nu kemwa?
8 Kaksakin Jeova pa oasr ke kas inge “Hallelujah,” sie leng lun kas Hibru su pal nu kemwa orekmakin “Komwos in kaksakin Jah.” Ke sie me pupulyuk in Sam 135:1-3, kut ku in konaok me solsol mwo inge: “Komwos in kaksakin Jeova! Komwos in kaksakin en Jeova, kaksakunul, O komwos met kulansap lun Jeova, komwos su tu in loom sin Jeova, in kalkal lun loom sin God lasr. Komwos in kaksakin Jeova, tu Jeova el mwo. Komwos in on a kaksakin el, tu ma inge me insemwomwo.”
9. Mea ma inge su purakak insiesr in kaksakin Jeova?
9 Ke kut nunku yok ke orekma sakuruk lun God ke ma orekla a ke ma nu kemwa el oru kasr, insemwomwo paye lasr mokle kut in kaksakunul. Ke pal se kut nunku ke orekma sakuruk su Jeova el oru nu sin met lal in pal meeta, insiesr mokle kut in kaksakunul. A ke kut nunku ke mwolela puspis su Jeova el e oru ke pal fwasru, kut suk inkanek puspis in akkalemye kaksak a kulo lasr nu sel.
10, 11. Fuka moul lasr a muta lasr ase nu sesr sripe in kaksakin God?
10 Moul a muta lasr fwin fwal se inge ase nu sesr sie sripe yok in kaksakin Jeova. Devid el on: “Nga fwa sot kolu nu sum [Jeova] tu kom orala luman in sie me aksangeng a me lut. Orekma lom ma sakuruk, a ma inge ngunik etulanu.” (Sam 139:14) Aok, kut nu kemwa “orekla in sie me aksangeng a me lut” a oasr me sang nu sesr in liye, long, a ku in nunuk. Ke ma inge, ya kut tia moulkin sie kain in moul su sang kaksak nu sin Met Orekutla? Poul el akkalemye pa kain in nunuk inge ke pal se el simusla: “Ke ma inge, komwos fwin mongo, ku nim, ku oru kutena ma, komwos oru ma nu kemwa nu ke mwolanu lun God.”—1 Korint 10:31.
11 Kut akola in oru ma nu kemwa ke mwolanu lun God kut fwin lungse na paye el. Jisus el fwak la ma sap se meet pa: “A kom fwa lungsum Jeova God lom ke insiom kemwa, a ke ngunom kemwa, a ke nunkom kemwa, a ke ku lom kemwa.” (Mark 12:30; Duteronomi 6:5) Kut enenu in lungse Jeova a kaksakunul oanu Met Orekutla a Met Sang lun “me kite mwo nu kemwa a kite fwal.” (Jemes 1:17; Isaia 51:13; Orekma 17:28) Arulanu yok sripe in oru ou inge meyen, ku lasr in nunuk, ku lasr in ngun, a ku lasr na paye—oiye nu kemwa lasr a ku—tuku sin Jeova. Oanu sie Met Orala, el arulanu fwal nu ke lungse a kaksak lasr.
12. Mea pulakin lom ke orekma yok lun Jeova ke kas lun Sam 40:5?
12 Orekma puspis lun Jeova ase nu sesr sripe puspis in lungse a kaksakunul! “O Jeova God luk, pukanten orekma sakuruk lom su kom orala, a nunuk lom nu simem,” Devid el on. “Ma inge koflanu takunyukla nu sum. Nga fwin lungse fwakak a kaskas ka, elos pus liki ku in oekyukla.” (Sam 40:5) Devid el tia ku in takunla nu fon orekma nu kemwa lun Jeova, a kut ou inge pa. Tusruktu, lela kut in kaksakin God pal nu kemwa ke pal se kut akilen kutena orekma yok lasr.
Orekma Puspis Kapsreni nu ke Papu Ma Patpat lun God
13. Fuka fwinsrak lasr sripsrip nu ke orekma yok lun God?
13 Fwinsrak lasr ke pal fwasru kol nu ke kaksak a orekma yok su wekunang akmwuk ke papu ma patpat lun God. Tokin orekma in seakos sikyuk in Eden, Jeova el sang kas palu se meet su tingtingi ke fwinsrak yok. Ke pal se el akkalemye nununku lal in lain serpent sokoa, God el fwak: “A Nga fwa filiye srunga in maslom a mutan se inge, a in maslom fute lom a fute lal. El fwa kunausla sifwom, a kom fwa kunausla kapiniel.” (Genesis 3:15) Fwinsrak ke Fute lun mutan su wulwul ka oan na ke insien met oaru nu kemwa tokin Jeova el oru orekma yok lal ke pal se el molela Noa a sou lal ke Sronot lulap se fwin fwalu meet su kunausla sie fwal koluk. (2 Piter 2:5) Mwolela ke inkanek lun kas palu nu sin met lalalfongi inge nu kemwa oanu Ebream a Devid sang kalem nu ke ma Jeova el akola in oru ke inkanek lun Fute se inge.—Genesis 22:15-18; 2 Samuel 7:12.
14. Mea me srikasrak yok emeet ke orekma yok lun Jeova nu sin metu?
14 Ma yok emeet su Jeova el oru oanu sie met su oru ma sakuruk lulap puspis in kasru met sikyuk ke pal se el sang Mwen kulu nutul—Fute su mwoleyukla, Jisus Kraist—oanu sie me kise lango. (Jon 3:16; Orekma 2:29-36) Lango se inge orala inkanek nu sin met in sifwil futoto nu sin God. (Mattu 20:28; Rom 5:11) Jeova el wisla met nu kemwa su sifwil forla in futoto nu sel ke congregation lun met Kristian, su oakiyuki ke Pentecost 33 C.E. Ke kasru lun ngun mutal, elos luti ke peng mwo in an loeslanu fwalu, elos akkalemye la fuka mise lun Jisus a sifwil moulyuk lal ikasla nu sin met fwokpap nu kemwa in pulakin me insemwomwo ma patpat ye koko lun Togusrai lun God in kosrao.
15. Fuka Jeova el oru sie inkanek sakuruk in len lasr?
15 In len lasr misinge, Jeova el orekmakin sie inkanek sakuruk in orani met lula sin met Kristian akmusrala. Eng in kunausten lun ma koluk srakna tulokinyuki sano orekma in siliyuki lun met lula sin 144,000, su akola in welul Kraist in kol in kosrao. (Fwakyuk 7:1-4; 20:6) God el srakna tuni in liye la met Kristian akmusrala elos aksukosokyeyukla liki sruo lalos in ngun ke “Babulon Lulap,” un alu kikiap nu kemwa fwin fwalu. (Fwakyuk 17:1-5) Molela se in 1919 a kurungin mwolanu su elos pulakin mutamwauk ke pal ingo sang pal mwo fuka nu sin met akmusrala su lula in oru mea? In tolak a in sang ma lo safla meet liki Jeova el aksafyela akmwuk koluk lal Setan inge ke “ongoiye lulap” su arulanu apkurun in tuku.—Mattu 24:21; Daniel 12:3; Fwakyuk 7:14.
16. Mea ma inge su orek ke sripen orekma in luti ke Togusrai fwin fwalu nu fon ke len inge?
16 Met Lo akmusrala lun Jeova elos moniyuk in akyokye orekma in luti ke Togusrai fwin fwalu nu fon. Ke sripe se inge, pisen “sip ngie” su yokyokelik elos ekla met su alu nu sin Jeova. (Jon 10:16) Kut arulanu insemwomwo meyen pal mwo inge srakna ikakla nu sin met fwokpap lun fwalu in wi kut in kaksakin Jeova. Elos nu kemwa su topuk ke me solsol in “fwasru” elos akola in moleyukla liki ongoiye lulap, wikin fwinsrak in kaksakin Jeova ma patpat.—Fwakyuk 22:17.
Tausen Puspis Elos Som nu ke Alu Paye
17. (a) Fuka Jeova el oru orekma sakuruk puspis su wekunang orekma in luti lasr? (b) Fuka Zekaraia 8:23 akpayeyuk?
17 Ke pal inge Jeova el oru orekma yok a orekma su fwal in kaksakinyuk su wekunang orekma in luti lasr. (Mark 13:10) Ke yiu ekasr somla, el “ikasla srungal lulap kol nu ke orekma.’ (1 Korint 16:9) Ma inge orala peng mwo in sulkakinyukelik in an lulap puspis su met lokwalok lun ma paye elos muta we meet in lain orekma lasr. Met puspis su muta meet ke losr lun ngun elos mutamwauk in porongo in pal inge ke me solsol in alu nu sin Jeova. Elos akpayeye kas palu inge: “Ou inge Jeova lun un met meun el fwak, ‘In len ingo e fwa te oru, met siengoul fwa srukye, liki kas nu kemwa lun mutanfwalu, elos fwa srukye nuknuk lun sie met Ju, fwakang: “Kut fwa wi kom som, tu kut long tu God el oasr yuromwos.” ’ ” (Zekaraia 8:23) “Yuromwos” pa Israel in ngun, met Kristian akmusrala su lula in pal inge. Ke sripen numbu se inge siengoul ku in lumeyuk nu ke pise sumwosmwos se ke kain in ma oasr fwin fwalu, paenang “met siengoul” inge pa aoliyen “u lulap,” su tukeni nu sie in akesrui nu sin “Israel lun God,” a elos orala “u siefwunnu.” (Fwakyuk 7:9, 10; Galetia 6:16) Sie me insemwomwo na paye in liye met puspis ke pal inge elos in tukeni nu sie oru kulansap mutal oanu met su alu nu sin Jeova God!
18, 19. Mea me akpayeye su akkalemye la Jeova el akinsemwomwoye orekma in luti?
18 Kut arulanu insemwomwo meyen siengoul tausen puspis—aok, siefok tausen puspis—elos srukye alu paye in an puspis su arulanu fukoko alu kikiap we su ke sie pal met puspis we elos tia ku in porongo peng mwo ke kutena pal. Loang akmwoye ke Yearbook of Jehovah’s Witnesses sasu, a liye an puspis ke pal inge su piselos meet oasr 100,000 met orekma, ke pal inge elos apkurun nu ke 1,000,000 met orekma lun Togusrai. Ma inge me akpayeye na fukoko la Jeova el akinsemwomwoye orekma in luti ke Togusrai.—Soakas 10:22.
19 Oanu met lun God, kut sang kaksak a sang kulo nu sin Papa tumasr in kosrao meyen el ase nu sesr sripen moul lasr, orekma mwo in kulansap nu sel, a sie fwinsrak mwomwo ke pal fwasru. Kut moul misinge ke sie fwinsrak mwomwo a sano ke akpayeyen mwolela mutal nu kemwa a kut kaifweung in ‘kurunginkutyung in lungse lun God, nu ke moul ma patpat.’ (Jud 20, 21) Sie me insemwomwo na paye meyen kut ku in liye la pisen u lulap su sang kaksak nu sin God ke pal inge sun tari 6,000,000 kutu! Ke me insemwomwo na kalem lun Jeova, met akmusrala su lula wikin sip ngie su welulos orekma ke inkanek fwal a takla ke 91,000 kutu congregation in an 235. Kut nu kemwa tia musrensral in ngun ke sripen kaifweung lun “met kulansap oaru a lalmetmet.” (Mattu 24:45) Sie u ye koko lun God su arulanu kapkapek ye liaung lun lungse el kol ke orekma lun Togusrai ke inkanek lun branch ofus lun Met Lo lun Jeova su piselos oasr ke 110. Kut arulanu sang kulo meyen Jeova el purakak insien met inge nu kemwa in ‘akfulatye Jeova ke ma lalos.’ (Soakas 3:9, 10) Ke sripe se inge, orekma in luti lasr fwin fwalu nu fon fwa tafweyukla, wikin nien orek buk, Bethel a missionary homes, a Kingdom Hall puspis su musaiyuk fwal nu ke enenu.
20. Fuka nunuk lasr ke orekma sakuruk a orekma lun Jeova su fwal in eis kaksak ka purakak insiesr?
20 Kut tia ku in aketeye nu fon orekma lulap a orekma su eis kaksak nu kemwa sin Papa tumasr in kosrao. Tusruktu, ya kutena met su sumwos inse enenu in tulokinilye sifwanu liki in akesrui nu sin u lulap su alu nu sin Jeova? Mo! Ke ma inge, lela met nu kemwa su lungse Jeova in fwakak ke engun; “Komwos in kaksakin Jeova. Komwos in kaksakin Jeova in kosrao me, kaksakunal yen fulat. Komwos in kaksakunul, komwos lipufon lal . . . , mokul fwusr a mutan virgin, met matu a tulik. Lela elos in kaksakin en Jeova, tu el mukena akfulatyeyuk. Mwolanu lal on yetun fwalu a kosrao.” (Sam 148:1, 2, 12, 13) Aok, ke pal inge nu tok, lela kut in kaksakin Jeova ke orekma mwolanu nu kemwa lal!
Fuka Kom Topuk?
• Mea kutu nu ke orekma lun Jeova su fwal in eis kaksak?
• Efu kom mokleyuk in kaksakin Jeova?
• Fuka fwinsrak lasr kapsreni nu ke orekma lulap lun God?
• Fuka Jeova el oru orekma su fwal in eis kaksak kapsreni nu ke orekma in luti ke Togusrai?
[Picture on page 6]
Ya kom akesrui ke insiom kemwa ke on in sang kaksak nu sin Jeova?
[Pictures on page 9]
Kut arulanu insemwomwo meyen pal mwo in wi kut in sang kaksak nu sin Jeova srakna ikak nu sin met fwokpap