“Suk Jeova A Ku Lal”

“Tu mutun Jeova kasrot, kasrmu alukela fwalu nu fon, in fwakulak sifwanu ku kalos su insielos sumwosna nu sel.”—2 KRONIKEL 16:9.

1. Mea se inge ku, a fuka metu elos akkalemye ma inge?

KU EL ku in kalmekinyuk nu ke ma pukanten, oanu ku lom nu ke ma se, ke mwal, ku nu sin kutu met, usrnguk in oru orekma a orala fwako ka; ku ke mano; ku ke nunuk a ku in srukye oiyen moul nasnas. Wangin record mwo lun met ke inkanek in orekmakinyen ku. Historian se inge Lord Acton, ke pal se el sramsram ke ku su oasr yurin met politic, el fwak: “Ku el sie me akkoluk a ku inge su wangin kutena ma su ku in kutongye me akkoluk na paye.” Me sramsram lun fwalu in pal inge akpayeye ma puspis ke kas lal Lord Acton. Ke lusen century ak20, “oasr ku yurin sie met fwin siepa met nu ke ongoiye lal” yok liki meet. (Ekklisiastis 8:9) Met kol koluk puspis elos orekmakin ku lalos ke inkanek sesumwos a uniye million puspis sin met. Ku su wangin ma ku in kutongye, tia ke lungse, lalmetmet, a nununku sumwos, e me sensen.

2. Aketeye fuka kutu oiye fulat mutal elos orekma ke inkanek lun Jeova in akkalemye ku lal

² Tia oanu met puspis, God el orekmakin ku lal pal nu kemwa ke ma mwo. “Tu mutun Jeova kasrot, kasrmu alukela fwalu nu fon, in fwakulak sifwanu ku kalos su insielos sumwosna.” (2 Kronikel 16:9) Jeova el orekmakin ku lal ke sie inkanek sumwos. Mongfwusesr srukye pal in nununku lun God lain met koluk sang pal mwo nu selos in auliyuk. Lungse moklel in lela fwat in takak nu sin kain in met nu kemwa​—met sumwos a met sesumwos. Nununku sumwos e fwa moklel in orekmakin ku lulap lal in kunausla el su sropon mise, Setan su Devil.​—Mattu 5:44, 45; Hibru 2:14; 2 Piter 3:9.

3. Efu Ku Liki Ku lun God sie sripe nu sesr in lalalfongel?

³ Ku sakuruk lun Papa tumasr in kosrao pa sie sripe yok lun lalalfongi a fwinsrak​—kemwanu ke mwolela lal a ke kurunginyuk lal. Sie tulik srisrik el pulakin inse misla a wangin sangeng el fwin srukye poun papa tumal, meyen el etu la papa tumal tia lela kutena ma koluk in sikyuk nu sel. Oupanu Papa tumasr in kosrao, el su “yok lun ku lal,” akola in kurungin kut liki kutena me akkoluk upa kut fwin fwafwasyesr yurol. (Isaia 63:1; Maika 6:8) A sie Papa mwo, Jeova el akpayeye mwolela lal pal nu kemwa. Ku lulap lal orala me akpayeye la kas lal ‘e fwa tia foloko nu yurol a wangin sripe, a a fwa kapkapek in ma el supwela nu ka.’​—Isaia 55:11; Taitus 1:2.

4, 5. (a) Mea sikyuk ke pal se Togusra Esa el akkalemye lalalfongi yok nu sin Jeova? (b) Mea ma inge su ku in sikyuk kut fwin filiye lalalfongi ke ku lun met in aksumwosye ma upa lasr?

⁴ Efu ku arulanu yok sripe nu sesr in kaifweung in tia mulkunla kurunginyuk lun Papa tumasr in kosrao? Arulanu fwusesr in sremla ke ma puspis a mulkunla sropon me loeyuk lasr na paye. Ma inge ku in liyeyuk ke me srikasrak lal Togusra Esa, sie mokul su pal nu kemwa el lalalfongi Jeova. Ke lusen pal in kolyuk lal Esa, un met meun lun an Itiopia su piselos oasr ke sie million elos tuku in meun lain an Juda. Meyen el akilen la ku ke un met meun oasr yurin met lokwalok lal, paenang Esa el pre: “Jeova, wangin sie sayom in kasru, in maslon met ku a el su wangin ku lal. Kasre kut, O Jeova God lasr, tu kut lalalfongi kom, a in em kut tuku in lain u lulap se inge. O Jeova, kom God lasr, lela met in tia kutangkomla.” (2 Kronikel 14:11) Jeova el porongo me siyuk lal Esa a el sang nu sel kutangla lulap.

⁵ Tusruktu, tokin yiu puspis ke orekma oaru lal, lalalfongi lal Esa ke ku lun Jeova in molela munasla. In kosroela togusrai lun Israel fwin an Eir ke utyuk lal in lainul, el forla nu ke an Syria ke kasru. (2 Kronikel 16:1-3) Fwinne me eyeinse lal nu sel Togusra Ben-hadad lun an Syria kosroela utyuk lun Israel lain Juda, tusruktu mwoleuang lal Esa yurin an Syria akkalemye silalalfongi nu sin Jeova. Hanani, sie sin met palu siyuk sel: “Ya met Itiopia a met Libya elos tia sie un met meun lulap, wi sariot a met kasrusr fwin ors arulanu pus; tusruktu, meyen kom lalalfongi Jeova el eselosyung in poum?” (2 Kronikel 16:7, 8) Fwinne ou inge, Esa el tia pwar ke kas in kai nu sel inge. (2 Kronikel 16:9-12) Kut fwin sun ma upa, lela kut in tia filiye lalalfongi lasr nu ke ku lun met in akmsumwosye ma upa. A, lela kut in akkalemye lalalfongi nu sin God, meyen lalalfongi ke ku lun met ku in kolla na paye nu ke me asor.​—Sam 146:3-5.

Suk Ku Su Jeova El Wise

6. Efu kut enenu in “suk Jeova a ku lal”?

⁶ Jeova el ku in sang ku nu sin met kulansap lal a el ku pa in kurunginelos. Baibel el kaifwe kut in “suk Jeova a ku lal.” (Sam 105:4) Efu? meyen kut fwin oru ma nu kemwa ke ku lun God, ku lasr fwa me insemwomwo nu sin kutu met a tia me ongoiye nu selos. Wangin kutena me srikasrak mwo liki ma inge a Jisus Kraist mukena, su orala menmen puspis ke “ku lun Jeova.” (Luk 5:17) Jisus el ku in oru el an sie met kasrup, pengpeng, ku sie tokosra fukoko. (Luk 4:5-7) Tusruktu, el orekmakin ku su God el sang nu sel in sang akpa a luti a in akkeye mas. (Mark 7:37; Jon 7:46) Sie me srikasrak mwomwo pa inge nu sesr!

7. Kain in oiye mwo fuka kut ku in akkapye kut fwin oru ma puspis ke ku lun God a tia ke ku lasr sifwanu?

⁷ Sayen ma inge, kut fwin oru ma nu kemwa ke “ku su God el sang,” nu sin met ma inge ku in kasru kut in akkalemye inse fwokpap. (1 Piter 4:11) Met nu kemwa su suk ku tu in ma lalos sifwanu elos ekla inse fulat. Sie me srikasrak ke ma inge pa Togusra Esar-haddon lun an Assyria, sie insefulat in fwak la: “Nga arulanu ku, Nga sie met pengpeng ke meun, Nga sie met lulap, Nga arulanu yok.” Tusruk, nu sin Jeova “el sulela met munas lun fwalu, tu lan akmwekinye ma ku.” Ke ma inge, fwin sie met Kristian el kunkon, el kunkon in Jeova, meyen el etu la ma elos oru tia tuku ke ku lalos sifwanu. Kut fwin ‘akfulpapye kut ye po ku lun God” ma inge ku in wise me kaksak paye.​—1 Korint 1:26-31; 1 Piter 5:6.

8. Mea kut enenu in oru meet in eis ku lun Jeova?

⁸ Fuka kut ku in eis ku lun God? Ma se meet, kut enenu in siyuk ma inge ke inkanek lun pre. Jisus el akkalemye nu sin met tuma lutlut lal la Papa tumal el akola in sang ngun mutal nu selos nu kemwa su siyuk ma inge. (Luk 11:10-13) Nunku met tuma lutlut lun Kraist ke elos tingtingi ke ku in pal se elos akos God yok liki met kol lun alu su sapkin nu selos in tui ke orekma lo lalos kel Jisus. Ke pal se elos pre siyuk kasru lun Jeova, ou inge pre lalos su tuku ke inse paye oasr top ka, a ngun mutal akkeyelos in tafwela in luti ke peng mwo wi pulaik.​—Orekma 4:19, 20, 29-31, 33.

9. Mea sropon akluo lun ku in ngun, a srukak sie me pupulyuk in akkalemye ku lal in oswela fwako.

⁹ Ma se akluo, kut ku in eis ku lun ngun su tuku ke Baibel. (Hibru 4:12) Ku lun Kas lun God arulanu kalem ke lusen len lal Togusra Josaia. Fwinne Togusra se inge kunausla tari me srulela lun met Pegan in an Juda, tusruktu ke pal se Ma Sap lun Jeova konoiyukyuk in tempel su ma inge moklel na paye in akyokye akmwuk in aknasnas lal.a Tokin Josaia el ridi Ma Sap ye mutun metu, met nu kemwa elos orala mwolela lalos nu sin Jeova, a ma se akluo, ke orekma su yok eneneye, in aknasnasye an’u liki me srulela, el mutamwauk. Fwako mwo ke orekma lal Josaia arulanu kalem meyen ke lusen “len lal nu kemwa elos tia kufla liki fwasr tokin Jeova.”​—2 Kronikel 34:33.

10. Mea inkanek aktolu in eis ku su tuku sin Jeova, a efu ma inge arulanu yok sripe?

¹⁰ Ma se aktolu, kut ku in eis ku sin Jeova ke inkanek lun asrouki lasr nu sin met Kristian. Poul el kaifwe nu sin met Kristian in wi meeting pal nu kemwa in “akkeye kut nu ke lungse a orekma mwo” a in akkeye sie sin sie. (Hibru 10:24, 25) Ke pal se Piter el aksukosokyeyukla liki nien kapur ke inkanek lun menmen, el lungse osun nu sin met lili wiel, ke ma inge el som sumwosmwos nu in loom sin nine kiel Jon Mark, an se su “met puspis tukeni nu we a pre.” (Orekma 12:12) Paye, kais sie selos ku in muta na in loom selos a pre. Tusruktu, elos sulela in tukeni nu sie in pre a in akkeye sie sin sie ke lusen pal in ma upa inge. Apkurun nu ke saflaiyen fwafwasyesr lal Poul nu Rom su arulanu sensen, el osun nu sin kutu met lili fwin an Puteoli a tok nu sin kutupa met lili su fwafwasyesr in sunol. Mea el pula? “Ke Poul el liye met lili inge, el sang kulo nu sin God a pulaikelik.” (Orekma 28:13-15) El akkeyeyuk ke pal se el sifwil osun nu sin met lili Kristian wiel. Kut ku in eis pa ku su tuku ke asrouki lasr nu sin met lili Kristian wiesr. Ke kut srakna sukosok a srakna ku in asrouki nu sin sie sin sie, lela kut in tia suk in mukena fwafwasyesr ke inkanek ousriksrik su kol nu ke moul.​—Soakas 18:1; Mattu 7:14.

11. Akkalemye kutu ma sikyuk su “ku yoklanu” arulanu enenu.

¹¹ Ke inkanek lun pre pal nu kemwa, lutlut ke Kas lun God, a asrouki nu sin met lili in lalalfongi, kut “tafwela in eis ku lun Leum a in ku lun ku lal.” (Ephesians 6:10 NW) Wangin alollo la kut nu kemwa enenu “ku lun Leum.” Kutu selos keok ke mas, kutu ke moul matou, kutu ke mise lun met su elos lungse. (Sam 41:3) Kutu elos muteng ke me lain su tuku sin mokul ku mutan kielos su tia lalalfongi. Papa a nine, yokna nu sin papa ku nine su mukena muta in kurunganang sou, saap elos ku in konaok la in oru orekma pal nu kemwa in suk mani a in pal se na kurunganang sou su ma inge sie kunokon na yok su orelos in totola. Met Kristian fwusr enenu in tu ku in lain ma upa su tuku sin kutupa met fwusr su matwelos a in tia suk in orekmakin ono koluk a orekma lun kosro. Lela kutena met in tia alollo in siyuk sin Jeova tu “yoklanu lun ku” ma sin God in kutangla me srifwe inge.​—2 Korint 4:7.

“El Sang Ku Nu Selos Su Mulalla”

12. Fuka Jeova el ase nu sesr ku ke orekma lun forfor lun met Kristian?

¹² Sayen ma inge, Jeova el sang ku nu sin met kulansap lal ke pal se elos oru orekma lun forfor. Kut ku in rid ke kas palu lal Isaia: “El sang ku nu selos su mulalla; a nu sel su wangin ku lal el akyokye ku. . . . Elos su sano Jeova fwa aksasuye ku lalos; elos fwa sokak ke po soksok oanu igul; elos fwa kasrusr a tia totola; elos fwa fwafwasyesr a tia mulalla.” (Isaia 40:29-31) Met sap Poul el eis ku in akpayeye orekma lun forfor lal. Ke sripe se inge, orekma lun forfor lal arulanu kapkapek. Nu sin met Kristian fwin an Tessalonika, el simusla: “Mwosasu lasr tia tuku nu yuromwos in kas mukena, a ouyepa in ku a in ngun mutal.” (1 Tessalonika 1:5) Orekma in fwakak a luti lal oasr ku in ekulla moul lun met nu kemwa su porongo ma inge.

13. Mea ma inge su akkeye Jeremaia in kaifweung fwinne oasr me srifwe?

¹³ Ke pal se kut pulakin nunuk in srungela orekma ke territory lasr​—ke sripen territory se inge su kut oru orekma in luti pal nu kemwa ke lusen yiu puspis tusruktu arulanu srikla kapek we—​saap kut mutamwauk in munasla. Jeremaia el pulakin pa munasla lal ke sripen me lain, me akkoluk, a srunga su el enenu in mongfwusesr nu ka. “Nga fwa tia fwakulak [God], ku sifwil kaskas in El,” el fwak sel sifwanu. Tusruktu el tia ku in inse misla ka. Kas lal “oanu sie e furur kaliye in sri [lal].” (Jeremaia 20:9) Mea ma inge su aksasuye ku lal ye ma upa inge? “Tu Jeova el wi yu oanu sie met ku a me aksangeng,” Jeremaia el fwak. (Jeremaia 20:11) Insemwomwo lal Jeremaia ke peng mwo su arulanu saok a ke kunokon lal su tuku sin God oru el an pusisel ke kas in akkeye lun Jeova.

Ku In Akngalye a Ku in Akkeye

14. (a) Fuka lupan ku lun loa fwin orekmakinyuk? (b) Sang me pupulyuk in akkalemye ma musalla su loa el ku in oru.

¹⁴ Tia ku nu kemwa su oasr yurosr tuku sumwosmwos sin God me. Sie me pupulyuk pa loa, oasr ku lal in akngalye a in akkeye. “Mise a moul on in ku lun loa,” pa inge kas in sensen lal Solomon. (Soakas 18:21) Fwokin sramsram futoto lal Setan nu sel If akkalemye lupan ma upa su tuku ke kas. (Genesis 3:1-5; Jemes 3:5) Kut ku in orekmakin pa loa in kunausla ma puspis. Kas in akkoluk ke toasryen lun sie mutan fwusr ku in moklel in sroang nu ke inkanek lun anorexia. Kalweni pal nu kemwa ke kas kikiap lain sie met ku in kunausla inmaslon sie kamwuk ke lusen pal loeloes. Aok, enenu in liaung orekmakinyen ku lun loa.

15. Fuka kut ku in orekmakin loasr in musaiyuk a in akkeye?

¹⁵ Tusruktu, loa el ku in musaiyuk a ku pa in me kunausla. Soakas in Baibel el fwak: “Oasr kutu su kaskas mongkeke oanu fwakfok lun sie kutlas; a loan met lalmetmet, moul mwo.” (Soakas 12:18) Met Kristian lalmetmet elos orekmakin ku lun loa in akkeye met mas a met asor. Kas kulang ku in akkeye met fwusr su lainyuk ke me purakak kulok lun kutupa met fwusr. Sie loa kulang ku in sang me kasru yok nu sin brother a sister su matuo in pulakin la elos srakna eneneyuk a oasr kurunginyelos. Kas kulang ku in akmwoyela len in keok lun met mas. Yok liki nu kemwa, kut ku in orekmakin loasr in sulkakin peng mwolanu lun Togusrai nu sin met nu kemwa su lungse in long. In sulkakin Kas lun God oasr ke ku lasr fwin insiesr oasr lungse na paye ka. Baibel el fwak: “Nik kom srukye ma mwo lukelos su fwal nu se, ke oasr ku in poum in oru.”​—Soakas 3:27.

Inkanek Sumwos in Orekmakin Ku

16, 17. Ke pal se orekmakinyen ku lalos su tuku sin God, fuka met elder, papa a nine, mokul tuma a mutan kie elos ku in etawi Jeova?

¹⁶ El fwinne ku liki ku, Jeova el kol congregation ke inkanek lun lungse. (1 Jon 4:8) In etawel, met liaung lun met Kristian nu kemwa enenu in kurunganang u lun God ke lungse​—elos in orekmakin ku lalos ke inkanek sumwos. Paye, kutupal met liaung elos enenu in sang “kai, kaiyuk, kaifwe,” tusruktu ma inge nu kemwa elos oru ke inkanek lun “mongfwusesr nu kemwa a luti.” (2 Timote 4:2) Ke ma inge, met elder elos enenu in nunku pal nu kemwa ke kas su met sap Piter el simusla nu selos nu kemwa su oasr kunokon lalos in liaung in congregation: “Komwos in kiteung u lun God in maslomwos, a kurungnulosyung in tia srangesr, a ke lungse lomwos, fwal nu ke lungse lun God; a tia pa insien mani in moli, a ke insiomwos kena oru; a tia pa akfulatye komwos in leum in ma likiye nu sumwos, a komwos in sifwanu ore komwos me srikasrak nu sin u.”​—1 Piter 5:2, 3; 1 Tessalonika 2:7, 8.

¹⁷ Papa a nine a mokul tuma nu kemwa elos eis pa ku sin Jeova, a ku se inge enenu in orekmakin in kasru, oakoak, a me aksaok. (Efesus 5:22, 28-30; 6:4) Me srikasrak lun Jisus akkalemye la orekmakinyen ku ke inkanek lun lungse pa mwo emeet. Fwin kai el orek pal nu kemwa ke inkanek fwal, tulik nu kemwa elos fwa tia tasek. (Kolosse 3:21) Moul in payuk ku in akkeyeyuk fwin mokul Kristian payuk nu kemwa elos orekmakin kolyuk lalos ke inkanek lun lungse a mutan nu kemwa elos akkalemye akfulat yok nu sin mokul tuma su sifwelos a tia srike in alukela kunokon su God el sang nu selos, in tia ekla oanu sifwen sou ku oru ma lungse lalos mu pa enenu in longyuk pal nu kemwa.​—Efesus 5:28, 33; 1 Piter 3:7.

18. (a) Fuka kut ku in etawi me srikasrak lun Jeova ke inkanek in kutongye mulat lasr? (b) Mea met nu kemwa su oasr ku elos enenu in sang oanu me purakak nu selos su muta ye liaung lal?

¹⁸ Elos nu kemwa su oasr ku ke sou a ke congregation enenu in taran oiyen mulat lalos, meyen mulat el purakak in oasr sangeng a tia lungse. Met palu Nehum el fwak: “Jeova el pat in mulat, a pengpeng in ku.” (Nehum 1:3; Kolosse 3:19) Sifwanu kurungin in kutangla mulat pa sie akul lun ku, a in fulela ma inge sie me akpayeye nu ke akul lun munas. (Soakas 16:32) Ke sou a ke congregation, nien sun lasr pa in purakak lungse​—lungse nu sin Jeova, lungse sie sin sie, a lungse nu ke ma sumwos. Lungse el me kapur lun sumwosna a purakak yok in oru ma sumwos.​—1 Korint 13:8, 13; Kolosse 3:14.

19. Kain in me akkeye fuka Jeova el sang, a oiye fuka kut akkalemye nu ke ma inge?

¹⁹ Kalmen etu Jeova pa akilen ku lal. Ke inkanek lal Isaia, Jeova el fwak: “Ya kom tia etu? Ya kom tia long? God ma patpat Jeova, Met Orala tafwunyen fwalu. El tia mulalla, ku totola.” (Isaia 40:28) Ku lun Jeova tia ku in wanginla. Kut fwin filiye lalalfongi lasr nu sel a tia nu sesr sifwanu, el e tia ku in siskutla. El fwakak nu sesr: “Nik kom sangeng, tu Nga wi kom. Nik kom toninfong, tu Nga God lom. Nga fwa akkeye kom; aok Nga fwa kasre kom. Aok, Nga fwa sauk kom ke lepo leyut in sumwosmwos luk.” (Isaia 41:10) Oiye fuka kut akkalemye ke kurunginyuk lal? Oanu Jisus, lela kut in orekmakin kutena ku su Jeova el ase nu sesr in sang kasru a in musaiyuk kutu met. Lela kut in liaung ku lun loasr in me akkeye a tia akngalye. A lela kut in tia mutol in ngun pal nu kemwa, tu ku in lalalfongi, a in kapkapek ke ku lun Met Orekutla, Jeova God.​—1 Korint 16:13.

[Footnote]

Ya Kom Ku in Aketeye?

• Fuka Jeova el orekmakin ku lal?

• Ke inkanek puspis fuka kut ku in eis ku lun Jeova?

• Fuka ku lun loa ku in orekmakin?

• Fuka ku su etuku sin God sie me insemwomwo?

[Picture on page 12]

Jisus el orekmakin ku lun Jeova in kasru kutu met

[Pictures on page 14]

Sulkakin Kas lun God oasr ke ku lasr fwin insiesr oasr na paye ka