Mea Jeova El Siyuk Sesr In Pal Inge?

“Pusra se in pukunyen me, [su fwak]: ‘El inge Mwen kulu nutik, a Nga insemwomwo kel; komwos longol.’ ”​—MATTU 17:5.

1. Nge Ma Sap el akpayeye nien sun lal?

JEOVA el sang Ma Sap nu sin mutanfwal Israel, wekunang oiye puspis lal. Ke ma inge met sap Poul el simusla: “Tu pa inge ma fwal nu ke ikwe mukena, su filiyuki tari nu ke pal in aksasu.” (Hibru 9:10) Ke pal se Ma Sap el kol met lula sin met Israel in esel Jisus oanu sie Messaia, ku Kraist, nien sun lal akpayeyuk tari. Ke ma inge Poul el fwak: “Tu Kraist el saflaiyen ma sap.”​—Rom 10:4; Galetia 3:19-25; 4:4, 5.

2. Su met inge su muta ye Ma Sap, a Nge elos aksukosokyeyuk liki ma inge?

² Ya ma inge ku in kalmekin la Ma Sap el tia fwal nu sesr ke len inge? In me akpaye, apkurun met nu kemwa elos tia muta ye Ma Sap, oanu met sim lun Sam el aketeye: “El [Jeova] fwakak kas lal nu sel Jekob, ma sap lal a nunnku lal nu sin Israel. El tia oru ou inge nu sin kutena mutanfwal; a oanu ke nununku lal, elos tia etu ma inge.” (Sam 147:19, 20) Ke pal se God el oakiye mwoleung sasu ke inkanek lun me kise lun Kraist, fwinne mutanfwal Israel tia sifwil enenu in akos Ma Sap. (Galetia 3:13; Efesus 2:15; Kolosse 2:13, 14, 16) Ke ma inge, fwin Ma Sap el tia sifwil eneneyuk, na mea Jeova el siyuk selos su lungse in kulansap nu sel ke len inge?

Mea Jeova El Siyuk

3, 4. (a) Mea Jeova el siyuk sesr na paye ke len inge? (b) Efu kut enenu in fwasr tokin Jisus?

³ Ke lusen yiu safla ke orekma lun forfor lal Jisus, met sap lal inge, Piter, Jemes, a Jon elos welul nu fwin soko eol fulat, nu in sie an ke fwin Eol Hermon. In an se inge elos liye ke sie arurumu su akkalemye kas palu ke ekla lun Jisus nu ke sie mwolanu sakuruk a elos long pusren God su fwak: “El inge Mwen kulu nutik, a Nga insemwomwo kel; komwos longol.” (Mattu 17:1-5) Paye, pa inge ma Jeova el siyuk​—in long tulik nutul a fwas tokin me srikasrak lal a me luti lal. (Mattu 16:24) Ke ma inge, met sap Piter el simusla: “Kraist el ouyepa keok keyumwos, a likiye nu sumwos sie srikasrak, tu komwos in fwasr in fwalkel.”​—1 Piter 2:21.

⁴ Efu kut enenu in fwasr tokin me srikasrak lun Jisus? Meyen kut fwin etawel, kut etawi Jeova God. Jisus el etu na paye Papa tumal, meyen el muta yurol in kosrao ke lusen billion puspis yiu meet liki el tuku nu fwin fwalu. (Soakas 8:22-31; Jon 8:23; 17:5; Kolosse 1:15-17) Ke pal se el muta fwin fwalu, Jisus el tia fuleak ke aoliyen sumwos lun Papa tumal. El fwak: “Oanu Papa el luti nu sik, Nga fwak ma inge.” Paye, Jisus el etawi na paye Papa tumal ke inkanek fwal paenang el ku in fwak: “El su nuna liye yu el nu liyel Papa.”​—Jon 8:28; 14:9.

5. Kain in ma sap fuka met Kristian nu kemwa elos enenu in akos, a nge ma sap inge mutamwauk in orekma?

⁵ Mea ku in kapsreang nu ke porongo a etawi Jisus? Ya kalmen ma inge pa kut enenu in muta ye Ma Sap? Poul el simusla: “Nga tia sifwanu ye ma sap.” Ke fus inge el sramsram ke “mwoleaung matu,” Ma Sap lun mwoleaung su orekla nu sin met Israel. Aok, Poul el akilen la el muta ye “ma sap nu sin Kraist.” (1 Korint 9:20, 21; 2 Korint 3:14) Ke saflaiyen Ma Sap matu lun Mwoleung, sie “mwoleaung sasu” mutamwauk in orekma, wikin ma inge pa “ma sap lal Kraist” su met kulansap nu kemwa lun Jeova ke len inge enenu in akos.​—Luk 22:20; Galetia 6:2; Hibru 8:7-13.

6. Fuka “ma sap lal Kraist” ku in aketeye, a fuka kut oru in akos ma inge?

⁶ Jeova el tia oru “ma sap lal Kraist” in oanu sie code, su kitakatelik fwal nu ke kain in luma a oiye puspis, oanu ma el oru meet ke Ma Sap matu lun Mwoleung. Ke ma sap sasu inge nu sin met kulansap lun Kraist tia ku in liyeyuk ma sap srisrik puspis su simusyukla. Tusruktu, ke Kas Lal, Jeova el oru in onnu me sramsram mwo akosr ke moul a ke me luti lun Mwen nutul. Sayen ma inge, God el orekmakin kutu sin met kulansap lal Jisus in pal meeta in simusla kutu kas in luti ke oiye lun met, ke congregation, ke oiye su enenu in akkalemye ke sou, a kutupa. (1 Korint 6:18; 14:26-35; Efesus 5:21-33; Hibru 10:24, 25) Ke pal se kut akfwalye moul lasr ke me srikasrak a ke me luti lun Jisus a ke kut porongo ke kai lun met sim lun Baibel su God el orekmakin ke century se meet, na kut akos “ma sap lal Kraist.” Jeova el siyuk ou inge nu sin met kulansap lal ke len inge.

Ma Saok lun Lungse

7. Fuka Jisus el akkalemye koanon ma sap lal ke Kofwen Alukela safla lal yurin met sap?

⁷ Lungse el yok sripe ke Ma Sap lal Moses, tusruktu ke ma sap lal Kraist, pa inge ma yok emeet, a ma saok emeet. Ma inge akkalemyeyuk sin Jisus ke pal se el osun nu sin met sap lal in akfulatye Kofwen Alukela in yiu 33 C.E. Fwal nu ke aketeye lun met sap Jon ke ma sikyuk ke fong inge, wikin kas lun Jisus su tuku na ke insiel ke me sramsram 28 ke lungse. Ma inge akkalemyela mea koano ku nunin ma sap lal nu sin met sap. Yok na, ke Jon el akkalemye ma el liye sikyuk ke fong saok se inge ke el fwak: “Inge meet liki kofwen alukela ke Jisus el etu tu aur se lal tuku tu el fwa som liki fwal se inge nu sin Papa, ke el nu lungsel met sral su oasr fwalu, el lungsel elos nu ke safla.”​—Jon 13:1.

8. (a) Mea yok ke akukuin su sikyuk inmaslon met sap? (b) Fuka Jisus el luti met sap lal ke inse pusisel?

⁸ Jisus el lungse met sap lal, el fwinne kaifweung a wangin ma sikyuk nu ke kasru lal nu selos in kutongye kena lalos nu ke mwal a ku alukela ma fwal. Malem ekasr meet liki tuku lalos nu Jerusalem, ‘elos amei sie sin sie la su fulat liki nu kemwa.’ a meet liki elos sun siti se inge in akfulatye kofwen alukela, amei la su fulat liki nu kemwa sifwil sikyuk. (Mark 9:33-37; 10:35-45) Amei upa se inge srakna orek tokin met sap nu kemwa elos ilyuk nu ke infwokil lung in wi ke Kofwen Alukela safla se su elos nu kemwa tukeni nu ka. Ke pal se wangin kutena selos eis pal mwo la in oru fasin lun an’u, ke oiye pusisel in ola nien met saye. In luti nu selos ke sie me lutlut, Jisus el tanla nielos.​—Jon 13:2-15; 1 Timote 5:9, 10.

9. Oiye fuka Jisus el akkalemye ke ma sikyuk tokin Kofwen Alukela safla?

⁹ Fwinne oasr tari me lutlut inge, tusruktu tokin elos akfulatye Kofwen Alukela tari, a Jisus el oakiye tari Memorial ke mise lal su apkurun in tuku, tusruk loang akmwoye mea sifwil sikyuk. Gospel lal Luk el fwak: “A sie akukuin sikyuk inmaslolos, la su selos e fwa fulat liki nu kemwa.” Jisus el tia mulat a koskosrok nu selos, a ke oiye kulang Jisus el sang kai nu selos la elos tia enenu in oanu met kol lun fwalu su lungse mwal a ku alukela ma fwal. (Luk 22:24-27) A el sang nu selos sie ma saok emeet in ma sap lun Kraist, el fwak: “Sie ma sap sasu Nga sot nu sumwos, tu komwos in lungsumwos sie sin sie; aok oanu Nga lungsik komwos, tu komwos in ouyepa lungsumwos sie sin sie.”​—Jon 13:34.

10. Kain in ma sap fuka Jisus el sang nu sin met tuma lutlut lal, a mea kapsreyukyang nu ke ma inge?

¹⁰ Ke fong senpanu inge Jisus el akkalemye ke lupan yok lun Kraist. El fwak: “Pa inge ma sap luk tu komwos in lungsumwos sie sin sie, aok oanu Nga lungsik komwos. Wangin lungse yurin met yok liki lungse se inge, tu sie met fwa filiye moul lal ke met kamwuk lal.” (Jon 15:12, 13) Ya Jisus el lungse in akkalemye la met tuma lutlut lal elos enenu in mise ke met lili wielos fwin oasr enenu in oru ou inge? Pa inge kalmeya sel Jon, sie met su liye na paye ma sikyuk ke pal se inge, meyen tok el simusla: “Ke ma inge kut etu lungse, meyen el filiye moul lal [Jisus Kraist] kasr; a fwal nu sesr in filiye moul lasr ke met lili.”​—1 Jon 3:16.

11. (a) Fuka kut akpayeye ma sap lal Kraist? (b) Kain in me srikasrak fuka Jisus el sang?

¹¹ Ke ma inge, kut tia akpayeye ma sap lun Kraist kut fwin luti mukena kel. A kut enenu pa in moul a oru orekma oanu Jisus el oru. Paye, Jisus el orekmakin kas mwo a kato ke sramsram lal. Tusruktu el ouyepa luti ke inkanek lun me srikasrak lal sifwanu. Fwinne Jisus el sie ma orekla lun ngun kulanu in kosrao, el eis pal mwo lal in kulansap a in akkapye lungse lun Papa tumal fwin fwalu a el ouyepa akkalemye la fuka kut ku in moul. El inse pusisel, kulang, a nunku kutu met, a el sang kasru nu selos su orekma a fwunni.” (Mattu 11:28-30; 20:28; Filippai 2:5-8; 1 Jon 3:8) A Jisus el kaifwe nu sin met tumal lutlut lal in lungse sie sin sie, oanu el lungselos.

12. Efu kut ku in fwak la ma sap lun Kraist el tia aksrikye enenu in lungse Jeova?

¹² Lungse Jeova ke Ma Sap matu​—su Ma Sap yok emeet—​piye ke ma sap lun Kraist? (Mattu 22:37, 38; Galetia 6:2) Ya el ma se akluo? Mo, tia ou inge! Lungse Jeova a lungse met lili Kristian wiesr tia ku in pilesreyuk sie sin sie. Sie met el tia ku in lungse Jeova el fwin tia lungse met lili wiel, meyen met sap Jon el fwak: “Kutena met fwin fwak: ‘Nga lungse God,’ a srunga met lel, el sie met kikiap, tu el su tia lungse met lel, su el liye, el koflanu lungse God su el tia liye.”​—1 Jon 4:20; srike liye 1 Jon 3:17, 18.

13. Mea fwokin akos lun met tuma lutlut ke ma sap sasu lun Jisus?

¹³ Ke pal se Jisus el sang nu sin met tuma lutlut lal ma sap sasu in lungse sie sin sie oanu lungse lal nu selos, el akkalemye ke fwokin ma inge. “Ke ma se inge met e nu kemwa fwa etu tu komwos met tumuk lutlut,” el fwak, “komwos fwin lungsumwos sie sin sie.” (Jon 13:35) Fwal nu ke ma Tertullian el fwak, su moul yiu siefok kutu tokin Jisus el mise, la lungse inmaslon met lili ku in akilenyuk na paye. Tertullian el sromon ke kutu kas lun met tia Kristian ke oiyen met tuma lutlut lun Kraist, elos fwak: ‘Liye fuka elos lungse na paye sie sin sie a fuka elos akola in mise ke met lili wielos.’ Saap kut ku in siyuk sesr sifwanu, ‘Ya Nga akkalemye lungse nu sin met lili Kristian wiuk su ma inge akkalemye la Nga met tuma lutlut lun Jisus?’

Fuka Kut Sang Me Akpayeye ke lungse Lasr

14, 15. Mea ma inge su oru in arulanu upa in akos ma sap lun Kraist, tusruktu mea ku in kasru kut in oru ma?

¹⁴ Arulanu yok sripe nu sin met kulansap lun Jeova in akkalemye lungse oanu lungse lun Kraist. Tusruktu, ya kom konaok la arulanu upa in akkalemye lungse nu sin met lili Kristian su akkalemye oiye rapku? Aok, oanu ma kut liye tari, fwinne inmaslon met sap elos akukuin a srike in akkeye ma lungse lalos sifwanu. (Mattu 20:20-24) Met Galetia elos ouyepa akukuin sie sin sie. Tokin el akkalemye la lungse nu sin met tulan el akpayeye tari Ma Sap, Poul el sang kas in sensen nu selos: “A, komwos fwin ngalisye a kangla sie sin sie, komwos karunginkomwosyung tu komwos in tia wanginla sie sin sie.” Tokin el aketeye ke ma tia oanu sie ke orekma lun ikwe a fwako lun ngun mutal lun God, Poul el toeni kutu kas in kaifwe: “Lela kut in tia konkun a akmulatye sie sin sie, a sok nu sin sie sin sie.” Na met sap el sapkin nu selos: “Komwos in wis ma toasr lun sie sin sie, a ou inge komwos fwa akpayeye ma sap lun Kraist.”​—Galetia 5:14–6:2.

¹⁵ Ke pal se el siyuk in akos ma sap lun Kraist, ya Jeova el siyuk sesr alukela ma fwal? Fwinne upa in kulang nu selos su tia mwo nu sesr a nu selos su akkeokye insiesr, tusruktu, oasr kunokon lasr in “met etawi God oanu tulik kulu, a fwafwasyesr in lungse.” (Efesus 5:1, 2) Kut enenu in kaifweung in fwasr tokin me srikasrak lun Jeova, su “fwakak oiyen lung lal nu sesr, in ma inge, tu Kraist el mise kasr, ke kut met koluk.” (Rom 5:8) Ke kut orekmakin lalmetmet in kasru kutu met, wekunang met nu kemwa su oru ma koluk nu sesr, kut ku in pulakin insemwomwo meyen kut etu la kut etawi God a akos ma sap lun Kraist.

16. Fuka kut sang me akpayeye ke lungse lasr nu sin God a Kraist?

¹⁶ Kut enenu in esam la kut sang me akpayeye ke lungse lasr fwal nu ke ma kut oru, a tia ke ma kut fwak mukena. Oasr pal, fwinne Jisus el konaok la arulanu upa in eis ma lungse lun God ke sripen ma nu kemwa su eneneyuk nu ka. “Papa, kom fwin lungsum, eisla kup se inge liki yu,” Jisus el siyuk ke pre. Tusruktu el silaklak in fwak: “Tia ma lungse luk, a ma lungse lom, in orek.” (Luk 22:42) Ke ma upa nu kemwa su Jisus el keok ka, el kaifweung na in oru ma lungse lun God. (Hibru 5:7, 8) Akos el sie me akpayeye lungse lasr a ma inge akkalemye la kut akilen inkanek lun God oanu ma mwo se meet. “Tu pa inge lungse lun God,” Baibel el fwak, “tu kut in liaung ma sap lal.” (1 Jon 5:3) A Jisus el fwak nu sin met sap lal: “Komwos fwin lungsumwos Nga, komwos fwa liaung ma sap luk.”​—Jon 14:15.

17. Ma sap fuka Jisus el sang nu sin met tuma lutlut lal, a fuka kut ku in etu la ma inge fwal pa nu sesr ke len inge?

¹⁷ Sayen ma sap lal nu sin met tuma lutlut lal ke lungse sie sin sie, ma sap saye fuka Kraist el sang nu selos? El sapkin nu selos in oru orekma in luti paenang el sang akpa nu selos ke ma inge meet. Piter el fwak: “A el fulak nu sesr in luti nu sin metu, a in orek ma lo.” (Orekma 10:42) Jisus el sapkin na paye meet: “Ke ma inge komwos som, a oru met in mutanfwal nu kemwa tu elos in met tumuk lutlut, baptaiselosla in en Papa a Mwen, a ngun mutal, luti nu selos in liaung ma nu kemwa Nga sapkin nu sumwos.” (Mattu 28:19, 20; Orekma 1:8) Jisus el akkalemye la ma el sapkin inge fwal pa nu sin met tuma lutlut lal misinge su muta ke “len safla,” meyen el fwak: “A mwosasu inge lun Togusrai fwa sulkakinelik fwin fwalu nu fon tu in ma lo nu sin mutanfwal nu kemwa; a na safla e fwa tuku.” (Daniel 12:4; Mattu 24:14) Aok, lungse lun God pa kut in luti. Tusruktu, kutu met elos nunku mu ke pal se God el siyuk sesr in oru orekma inge, el siyuk alukela ma fwal. Ya paye pa inge?

Efu Upa in Oru Ma Inge

18. Mea ma inge su kut enenu in esam fwin kut sun keok ke sripen akos lasr nu ke ma Jeova el siyuk?

¹⁸ Oanu ma kut liye tari, Jeova el siyuk sin metu in akos kain in ma sap puspis ke lusen sramsram matu lun metu. A in oanu ma su sapkinyuk nu selos tia oanu sie, e oupanu me srifwe nu selos tia oanu sie. Mwen kulu nutin God el sun ma upa yok emeet, su ke saflaiye el mise ke sie inkanek upa ke sripen akos lal nu ke ma God el siyuk sel elan oru. Aok, ke pal se kut sun me keok ke sripen akos lasr nu ke ma Jeova el siyuk sesr in oru, lela kut in esam la tia el pa sropon me srifwe inge. (Jon 15:18-20; Jemes 1:13-15) Orekma in lain lun Setan kol nu ke ma koluk, keok, a mise, a el pa oru luma puspis su orala in arulanu upa nu sin met kulansap lun Jeova in oru ma el siyuk.​—Job 1:6-19; 2:1-8.

19. Efu sie me sang mwomwo in oru ma God el siyuk sesr ke inkanek lun Mwen nutul?

¹⁹ Ke inkanek lun Mwen nutul, Jeova el kol a akkalemye la ke len safla inge, met kulansap Lal fwa sulkakin fwin fwalu nu fon la kolyuk lun Togusrai lal mukena pa inkanek siefwunnu ku in aksumwosye ma upa lun metu. Guferment se lun God inge pa e aksafyela ma upa nu kemwa fwin fwalu​—meun, orekma silolel, sikasrup, matuo, mas, mise. Togusrai se inge fwa ouyepa oakiye pa sie paredais mwolanu fwin fwalu, a met mise nu kemwa fwa sifwil moulyuk nu ka. (Mattu 6:9, 10; Luk 23:43; Orekma 24:15; Fwakyuk 21:3, 4) Sie me sang mwomwo in sulkakin peng mwo ke akmwuk inge! Ke ma inge, arulanu kalem la, wangin kutena ma upa nu ke ma Jeova el siyuk sesr in oru. Kut sun kain in me lain upa, tusruktu Setan su Devil a fwal lal pa sropon ma inge nu kemwa.

20. Fuka kut ku in sun kutena me srifwe su Devil el filiye ye mutusr?

²⁰ Fuka kut ku in kutangla kutena me srifwe su Setan el akkalemye? Kut fwin srukye ke nunuk lasr kas inge: “Mwen nutik, kom in lalmetmet, a akengunye insiuk, tu Nga fwa ku in topkol su angon yu.” (Soakas 27:11) Jisus el sang nu sin Jeova me top nu ke kas in lain lun Setan ke el likiye moul mwomwo lal in kosrao in oru ma lungse lun Papa tumal fwin fwalu. (Isaia 53:12; Hibru 10:7) Oanu sie met, Jisus el muteng ke kain in me srifwe nu kemwa su filiyuki ye mutal, fwinne mise ke sak soko. Kut fwin fwasr tokol in oanu sie Me Srikasrak lasr, kut ku in muteng pa ke me keok a oru ma Jeova el siyuk sesr in oru.​—Hibru 12:1-3.

21. Mea pulakin lom ke lungse su Jeova a Mwen nutul elos akkalemye?

²¹ Mea lungse lun God a lungse lun Mwen nutul akkalemye nu sesr! Ke sripen me kise lun Jisus, met nu kemwa su akos elos ku in fwinsrak nu ke moul ma patpat in sie Paredais. Ke ma inge lela kut in tia sang kutena ma in aklosrye la fwinsrak lasr. A, lela kut in filiye ke insiesr ma Jisus Kraist el oru, oanu Poul el fwak: “Mwen nutin God . . . lungse Nga a esalmu sifwanu keik.” (Galetia 2:20) A lela kut in akkalemye kulo lulap lasr nu sin God kulang lasr, Jeova, su tia siyuk sesr alukela ma fwal ke kutena pal.

Fuka Kom Topuk?

◻ Mea Jeova el siyuk sesr in oru ke len inge?

◻ Ke fong safla lal yurin met sap, fuka Kraist el akkalemye ma saok su tuku ke lungse?

◻ Fuka kut ku in sang me akpayeye la kut lungse God

◻ Efu sie me sang mwomwo in oru ma Jeova el siyuk sesr in oru?

[Picture on page 23]

Kain in me luti fuka Jisus el oru ke el tanla nien met tuma lutlut lal?

[Picture on page 25]

Fwinne oasr me lain, orekma in sulkakin peng mwo sie me sang mwolanu