Kofwo Pengpeng Ke Me Sramsram Lun Israel

“Pal tulo in yiu se met mokul lom nu kemwa elos fwa sikyuk ye mutun Jeova God lom in an se su el e fwa sulela . . . a elos fwa tia sikyuk ye mutun Jeova pusinpo.”​—DUTERONOMI 16:16.

Mea ma inge su sikyuk ke nunuk lom kom fwin nunku ke kofwo? Kofwo puspis in pal meeta ku in akilenyuk ke kutu orekma su alukela ma fwal a ke orekma lun kosro. Ma inge sikyuk pa ke kofwo puspis ke len inge. Tusruktu, siena liki ma sikyuk ke kofwo nu kemwa su God el pakiye in oru nu sin met Israel. Fwinne sie pal in engun pa inge, tusruktu elos inge ouyepa pangonyuk “tukeni mutal.”​—Livitikus 23:2.

² Mokul Israel oaru nu kemwa​—sou lalos welultal pal nu kemwa​—elos konaok insemwomwo ke fwafwasyesr lalos nu Jerusalem, ‘an su Jeova el sulela,’ a elos kulang in sang kasru ke kofwo lulap tulo. (Duteronomi 16:16) Buk inge Old Testament Word Studies el aketeye la kalmen kas Hibru inge su langasyukla “kofwo” in Duteronomi 16:16 oanu, “sie pal in engun lulap . . . ma inge sang akul nu ke insemwomwo lun God su elos akfulatye ke inkanek lun me kise a kofwo.”a

Ma Saok lun Kofwo Lulap

³ Ke sripen elos muta ke sie an su apkurun elos nu kemwa orek imae, paenang met Israel elos lalalfongi yok ke akinsemwomwoye lun God ke inkanek lun af. Kofwo tulo lulap ke Ma Sap lal Moses elos orek ke pal in kosrani lun barley ke mutamweyen pulanpal lun spring, kosrani lun wheat ke saflaiyen pal lun spring a pal in kosrani lun ma nu kemwa ke saflaiyen pal lun summer. Ma inge nu kemwa sie pal in insemwomwo a sang kulo nu sin Met Sang af a Met su Orala an in arulanu mwo. Tusruktu oasr pa ma saye ke kofwo lalos inge.​—Duteronomi 11:11-​14.

⁴ Kofwo se meet elos oru ke malem se meet ke calendar lun Baibel in pal meeta, mutamwauk Nisan 15-21, ke pal lasr, pal inge oasr ke saflaiyen malem lun March ku mutamweyen malem lun April. Kofwo se inge elos pangon Kofwo lun Bred tia Pulol, a ke sripen pal inge el mutamwauk tukun Kofwen Alukela ke Nisan 14, paenang el inge pangpang pa “Kofwo lun Kofwen Alukela.” (Luk 2:​41; Livitikus 23:​5, 6) Kofwo inge el akismakinye met Israel ke molela lalos liki keok fwin an Ijipt, kofwo ke bred tia pulol inge pangpang pa “bred in keok. (Duteronomi 16:3) Ma inge akismakinyelos ke som lalos liki Ijipt su arulanu silaklak paenang wangin pal lalos in sang me pulol ke bred a sano ma inge in pulolak. (Exodus 12:34) Ke lusen pal in kofwo inge wangin kutena bred pulol su ku in konoiyukyuk in loom sin met Israel. Kutena met su wi ke kofwo se inge, wekunang met saye, elos fwin mongo bred pulol, elos fwa anwuki.​—Exodus 12:19.

⁵ Kofwo akluo elos oru wik itkosr (len 49) tukun Nisan 16 su len ak6 ke malem aktulo pangpang Sivan, su oasr ke saflaiyen malem lun May ke len lasr. (Livitikus 23:15, 16) Ma inge pangonyuk Kofwo lun Wik (in len lal Jisus, ma inge ouyepa pangpang, Pentecost, kalmen ma inge pa “Lumngoul” ke kas Grik), a ma inge elos oru futoto nu ke sie pal ke yiu nu kemwa, ke pal se ma met Israel elos ilyuk nu ke mwoleung lun Ma Sap fwin an Sainai. (Exodus 19:​1, 2) Ke lusen pal in kofwo inge met Israel oaru elos kalweni ke nunuk lalos me insemwomwo nu selos in ekla sie mutanfwal mutal sulosola sin God. Meyen elos met sulosola sin God paenang elos enenu in akos Ma Sap lun God, oanu ma sap lal nu selos in akkalemye lungse kulang nu sin met keok tu elos in ku in ouyepa engunkin kofwo.​—Livitikus 23:22; Duteronomi 16:10-​12.

⁶ Ma se safla ke kofwo tulo lulap su elos oru ke yiu nu kemwa elos pangpang Kofwo in Esani nu Sie, ku Kofwo lun Imwen Aktuktuk. Kofwo se inge elos oru ke malem se akitkosr, pangpang Tishri, ku Ethanim, mutamwauk ke len ak15 nu ke len ak 21, mutamweyen malem lun October ke len lasr. (Livitikus 23:34) Ke lusen pal inge, met lun God elos muta likin loom selos ku elos muta ke imwen aktuktuk oanu nien muta lalos ke lusen pal futoto a nien muta inge orek ke laa a sran sak soko. Ma inge akismakinyelos ke fwasfwasyesr lalos ke lusen yiu 40 an Ijipt me nu ke Fwal Mwolela, ke pal se ma mutanfwal lalos enenu in filiye lalalfongi lalos nu sin God ke ma enenu lalos ke len nu kemwa.​—Livitikus 23:42, 43; Duteronomi 8:​15, 16.

⁷ Lela kut in kalweni kutu nu ke kofwo inge su arulanu yok sripe ke me sramsram lun met lun God in pal meeta. Ma inge me akkeye nu sesr ke len inge, meyen kut nu kemwa sapkinyuk pa in tukeni nu sie pal nu kemwa ke kais sie wik a pal tulo ke yiu se ke toeni lulap.​—Hibru 10:24, 25.

Ke Pal lun Togusra Puspis Su Tuku Sel Devid

⁸ Sie me akfulat yok sikyuk ke pal in Kofwo lun Imwen Aktuktuk ke lusen pal in kolyuk kasrup lal Togusra Solomon, mwen nutul Devid. “Sie mwalil arulanu yok” tuku ke an nu kemwa lun Fwal Mwolela, elos tuku ke akfulat lun “Kofwo lun Imwen Aktuktuk” a ke kise lun tempel. (2 Kronikel 7:8) Ke saflaiyen kofwo se inge, Togusra Solomon el supwela metu, elos inge nu kemwa “akinsemwomwoye togusra, a som nu in loom nuknuk selos engun a insemwomwo insielos ke kulang nu kemwa su Jeova el fwakak nu sel Devid met kulansap lal, a nu sin met Israel met sram. (1 Togusra 8:​66) Sie kofwo na lulap pa inge. Ke len inge, met kulansap lun God elos ngetuk nu ke saflaiyen akfulat lun Kofwo lun Imwen Aktuktuk oanu me pupulyuk ke saflaiyen Tausen Yiu Kolyuk lun Solomon Lulap, Jisus Kraist. (Fwakyuk 20:​3, 7-​10, 14, 15) Ke pal ingo, met nu kemwa su muta ke yen srumwasrik nu kemwa lun fwalu, wekunang elos su sifwil moulyuk a elos su sasla liki Armagedun, elos fwa insemwomwo a inse siefwunnu ke alu lalos nu sin Jeova God.​—Zekaraia 14:16.

⁹ Kofwo lulap akluo su Baibel el reporti el sikyuk tokin kolyuk lal Togusra koluk inge pangpang Ahaz, su kaliye tempel a kolla togusrai lun Juda nu ke god kikiap. Togusra Hezekiah su aulol Togusra Ahaz el arulanu mwo. Ke yiu se meet lun kolyuk lal, ke el yiu 25 matwe, Hezekiah el mutamwauk ke program in sifwil akmwoye lun ma nu kemwa. El silaklak in ikasla tempel a orala ma nu kemwa ma musalla ka. Na, togusra el supwela leta nu sin met Israel su muta ke sruf siengoul lun Israel fwin an Eir su lainul, a suleltal in tuku a in akfulatye Kofwen Alukela a Kofwo lun Bred su Tia Pulol. Pukanten selos tuku, fwinne elos inge akkolukyeyuk sin met lili wielos.​—2 Kronikel 30:​1, 10, 11, 18.

¹⁰ Ya kofwo lalos inge sie me insemwomwo na paye? Report lun Baibel el fwak: “A tulik nutul Israel su muta in Jerusalem elos liaung kofwo lun bred tia pulol len itkosr wi engun lulap; a met Livai a met tol elos kaksakin Jeova len nu len, wi me on su yok pusra nu sin Jeova.” (2 Kronikel 30:21) Fuka yokiyen me srikasrak mwo su met Israel in pal meeta elos sang nu sin met lun God ke len inge, pus selos enenu in muteng ke me lain a fwafwasyesr ke an loeloes in tu elos in ku wi ke toeni!

¹¹ Ke sie me pupulyuk, tuni toeni lulap tulo pangpang “Orekma Mutal” fwin an Poland ke 1989. Inmaslon 166,518 met su wi ke toeni inge pa, sie u lulap su tuku ke an se inge su pangonyuk meet Soviet Union a an puspis lun Eastern Europe su tia sukosok orekma lun Met Lo lun Jeova in pal meeta. “Nu sin met puspis su wi ke toeni lulap puspis inge,” buk inge Jehovah’s Witnesses​—Proclaimers of God’s Kingdom el reporti,b “pa inge pal se meet elos wi ke sie toeni lulap su pisen Met Lo ma wi ka pus liki 15 ku 20. Insielos arulanu sesesla ke insemwomwo ke pal se ma elos liye siengoul tausen puspis ke nien toeni, su welulos ke pre, a inse siefwunnu in on in sang kaksak nu sin Jeova.”​—Sra 279.

¹² Tukun mise lal Hezekiah, met Juda elos sifwel putatla nu ke alu kikiap ye koko lal Togusra Manasseh a Amon. Na, siepa togusra mwomwo mutamwauk in kol, met fwusr pangpang Josiah, su oru orekma ke pulaik in sifwil folokonang alu paye. Ke yiu 25 matwe, Josiah, el sapkin tu elos in sifwil orala tempel. (2 Kronikel 34:8) Ke pal se ma elos oru orekma, elos konaok ke tampel Ma Sap su Moses el simusla. Togusra Josiah el arulanu mokleyuk ke ma el ridi ke Ma Sap lun God a el orala akwuk in ridi ma inge ye mutun met nu kemwa. (2 Kronikel 34:14, 30) Na, fwal nu ke ma simusla, el oakiye sie me akfulat ke Kofwen Alukela. Togusra el ouyepa sang me srikasrak mwo ke pal se ma el sang me kasru lulap ke mani tu in orekmakinyuk nu ke akfulat. Fwokin ma inge, Baibel el reporti: “A wangin sie kofwo alukela oanu karunginyukyung in Israel liki len lal Samuel met palu.”​—2 Kronikel 35:​7, 17, 18.

¹³ Orekma in sifwil akmwoye lal Hezekiah a Josiah el oanu sie ke sifwil folokonak lun alu paye su sikyuk inmaslon met Kristian mutamwauk ke yiu 1914 ke pal se ma Jisus Kraist el mutamwauk in liaung. Ma inge arulanu paye, yokna ke orekma lal Josiah ke sifwil akmwoye, aok orekma in sifwil akmwoye ke len lasr ma inge tuku ke Kas lun God. Meyen el oanu sie ke ma sikyuk in len lal Hezekiah a Josiah, paenang sifwil akmwoye ke len lasr ku in akilenyuk ke toeni lulap puspis su aketeye mwo kas palu a ma sap su tuku ke Baibel su fwal nu ke pal akkalemyeyuk. Weang nu ke me insemwomwo lulap ke pal inge pa baptais lun met puspis. Oanu met Israel su auliyuk in len lal Hezekiah a Josiah, met sasu inge su tufwanu baptais elos forla liki orekma fokfok lun Kristendom a fwalu lal Setan. Ke yiu 1997 pus liki 375,000 met baptaisla in sang akul nu ke mwolela lalos nu sin God mutal, Jeova​—sie average su akkalemye la pus liki 1,000 met ke kais sie len baptaisla.

Tukun Elos Sukosokla

¹⁴ Tukun mise lal Josiah, mutanfwal lun Israel el sifwil putatla nu ke alu kikiap. Ke saflaiye, ke yiu 607 B.C.E. Jeova el sang kai nu sin met lal ke pal se ma el orekmakin met solse lun Babulon lain Jerusalem. Siti a tempel laltal musalla, a an lalos el ekla oanu yen mwesis. Na, sruo lun met Ju ke lusen yiu 70 fwin an Babulon el mutamwauk. Tokin ma inge, God el sifwil kasru ma lula sin met Ju su auliyuk, su sifwil foloko nu ke Fwal Mwolela in sifwil oakiye alu paye. Elos tuku ke siti musalla lun Jerusalem ke malem akitkosr in yiu 537 B.C.E. Ma se meet su elos orala pa in musai sie loang tu elos in ku in orek kise ke len nu kemwa oanu Ma Sap lun mwoleung sapkinyuk nu selos in oru. Arulanu fwal pal inge ke siepa me akfulat yok. “A elos liaung kofwen loom aktuktuk, oanu ma simusla.”​—Ezra 3:​1-4.

¹⁵ Sie orekma lulap sano met inge su sifwil foloko​—orekma in sifwil musaiyuk ke tempel lun God, Jerusalem a pot lal. Oasr me lain yok su tuku sin met tulan lalos su sok. Ke pal se ma orekma ke tempel inge aksafyeyukla, ma inge oanu “len lun ma srisrik.” (Zekaraia 4:​10) Ma sikyuk inge oanu luman ma sikyuk nu sin met Kristian akmusrala oaru ke 1919. Ke yiu se ingo, elos aksukosokyeyuk liki sruo lalos ke Babulon Lulap, alu kikiap nu kemwa fwin fwalu nu fon. Piselos oasr ke tausen na ekasr a fwalu arulanu srungalosla. Ya met lokwalok lun God elos ku in kutangla in kutongye kapkapek lun alu paye? Topuk ke kusensiyuk inge akismakinye kut ke me akfulat luo safla su oasr ke Ma Simusla lun Hibru.

¹⁶ Tempel el sifwil musaiyuk ke malem lun Adar 515 B.C.E., fwalyung ke kofwo ke pulanpal lun spring. Baibel el reporti: “A elos liaung kofwen bred tia pulol len itkosr wi engun; tu Jeova el akengunyelos, a furokla insien togusra assyria nu selos, in akkeye paulos in orekma nu ke loom sin God, God lun Israel.”​—Ezra 6:​22.

¹⁷ Tukun yiu ongoul, in yiu 455 B.C.E., siepa me sramsram yok orekla. Kofwo lun Imwen Aktuktuk ke yiu se inge oanu sie akul ke saflaiyen orekma ke pot lun Jerusalem. Baibel el reporti: “A un met e nu kemwa su sifwil tuku liki sruo elos orek imwen aktuktuk, a muta in imwen aktuktuk; tu ke len lal Jeshua mwen nutul Nun me nu ke len sa su tulik nutul Israel tia oru ou inge, a oasr engun lulap.”​—Niemaia 8:​17.

¹⁸ Fuka sie me esmakin na paye ke sifwil foloko lun alu paye lun God fwinne oasr me lain yok! Ma sikyuk ke len lasr oanu sie. Ye kolyai a me lain, orekma yok in luti ke peng mwo lun Togusrai lun God el sun an nu kemwa fwin fwalu, a kas in nununku lun God sulkakinelik fwin fwalu nu fon. (Mattu 24:14) Orekma in sang akul safla ke ma lula ke 144,000 met akmusrala apkurun in tari. Pus liki million limekosr ke “sip ngie” met asrouki lalos elos inge su tuku ke mutanfwal nu kemwa esani nu sie tu elos in ekla “u siefwunnu” wikin met akmusrala lula. (Jon 10:16; Fwakyuk 7:​3, 9, 10) Fuka sie me akpayeye yok lun kas palu se inge su Kofwo lun Imwen Aktuktuk el pitse.​—Zekaraia 14:16-​19.

Ke Century Se meet C.E.

¹⁹ Sie nu ke kofwo lulap inmaslon kofwo nu kemwa su simusyukla in Baibel pa kofwo se su Mwen nutin God, Jisus Kraist el wi. Ke sie me pupulyuk, tuni fuka Jisus el wi ke kofwo lun imwen aktuktuk [ku loom sin God] in yiu 32 C.E. El orekmakin pal inge in luti ke ma paye su arulanu yok sripe a el sang me akpayeye ke ma el luti ke pal se ma el orekmakin Ma Simusla lun Hibru. (Jon 7:​2, 14, 37-​39) Sie orekma yok ke kofwo se su elos oru pal nu kemwa pa in akosek lam lulap akosr ke likin tempel. Ma inge el akyokye insemwomwo su tuku ke kofwo se inge su elos akfulatye nu ke eku. Arulanu kalem la, Jisus el sramsram ke kalem lulap inge ke pal se ma el fwak: “Nga kalem lun fwalu. El su fwasr tukok fwa tia fwasr in losu, a kalem lun moul fwa oan yurol.”​—Jon 8:​12.

²⁰ Tokin ma inge, Kofwen Alukela a Kofwo lun Bred Tia Pulol ke yiu 33 C.E. arulanu yok. Ke len in Kofwen Alukela se inge, Jisus el anwuki sin met lokwalok lal, a el ekla oanu Lam su kisekinyuk ke pal in kofwen alukela, mise lal wisla “ma koluk lun fwalu.” Tokin len tulo, in Nisan 16, God el akmoulyeyuk Jisus ke sie mano in ngun su tia ku in sifwil kulamwi. Ma inge fwalyung nu ke pal in orek kise lun fwako se meet lun barley ke pal in kosrani oanu Ma Sap el siyuk. Ke ma inge Leum Jisus Kraist su sifwil moulyuk el ekla “fwako se meet lalos su mutol in mise.””​—1 Korint 15:20.

²¹ Sie kofwo lulap su mwo emeet elos orala ke Pentecost 33 C.E. Ke len inge met Ju a met proselyte puspis elos tukeni nu sie fwin an Jerusalem wekunang met tumal lutlut 120 lal Jisus. Ke lusen pal in kofwo, Jisus Kraist su sifwil moulyuk, el okoila ngun mutal lun God nu sin met 120. (Orekma 1:​15; 2:​1-4, 33) Ke ma inge elos ekla met akmusrala a mutanfwal sasu su sulosola sin God ke inkanek lun mwoleung sasu su Jisus Kraist pa met iumwe ka. Ke lusen pal in kofwo inge, met tol fulat lun met Ju el kisekin loaf luo ke bred su orek ke fwako se meet lun wheat. (Livitikus 23:15-​17) Bred inge su oasr me pulol el lumeyuk nu ke 144,000 met su srakna sesumwos oanu met, su Jisus el ‘moli nu sin God’ in kulansap oanu “sie togusra a met tol . . . a kol oanu togusra fwin fwalu.” (Fwakyuk 5:​9, 10; 14:​1, 3) Meyen met kol inge in kosrao elos tuku ke u luo lun met sesumwos, met Ju a met Pegan, paenang elos inge ouyepa aoliyen loaf luo ku bred.

²² Ke pal se ma mwoleung sasu el mutamwauk in orekma ke Pentecost 33 C.E., kalmen ma inge pa mwoleung matu ke Ma Sap el wanginla sripe ye mutun God. (2 Korint 3:​14; Hibru 9:​15; 10:16) Ma inge tia kalme la wangin ma sap su etukyung nu sin met Kristian akmusrala. Elos muta ye ma sap mutal su Jisus Kraist el luti nu selos, a ma inge simusyukla nu ke insielos. Ke ma inge, kofwo tulo su elos oru ke yiu nu kemwa, meyen kofwo inge ipen mwoleung matu, paenang met Kristian elos tia akfulatye ma inge. (Kolosse 2:​16, 17) Fwinne ou inge, oasr ma kut ku in lotela nu sin met kulansap lun God meet liki pal lun met Kristian ke oiye su elos akkalemye ke kofwo a kutu toeni lalos ke alu. Ke me lutlut lasr toko, kut fwa tuni me srikasrak su wangin alollo la ma inge ku in purakak met nu kemwa in engunkin ma enenu in wi meeting pal nu kemwa.

[Footnotes]

Kusensiyuk ke Kalweni

◻ Mea nien sun lun kofwo tulo lulap lun Israel?

◻ Mea ma inge su akilenyuk ke kofwo lulap in len lal Hezekiah a Josiah?

◻ Kain in kofwo pengpeng fuka akfulatyeyuk in yiu 455 B.C.E., a efu ma inge sie me akkeye nu sesr?

◻ Mea ma yok ke akfulat ke Kofwen Alukela a Pentecost in yiu 33 C.E.?

[Study Questions]

1. Mea kut ku in fwak ke akfulat ke kofwo in pal meeta?

2. (a) Mea met Israel mokul elos enenu in oru pal tulo ke yiu se? (b) Oanu kas se inge orekmakinyuk in Duteronomi 16:​16, mea kalmen “kofwo”?

3. Kain in me insemwomwo puspis fuka kofwo tulo inge ke yiu se el oru sie met in esam?

4. Kain in ma sikyuk yok fuka akfulatyeyuk ke kofwo se meet?

5. Kain in me insemwomwo fuka ku in esamyuk ke kofwo akluo, a su met inge su ku in wi ke pal in engun?

6. Kain in experience fuka kofwo aktulo el akismakinye met lun God?

7. Fuka kut ku in eis ma lane ke kalweni lasr ke akfulat ke kofwo fwin an Israel in pal meeta?

8. (a) Kain in me akfulat yok fuka sikyuk in len lun Togusra Solomon? (b) Kain in safla fuka su arulanu yok ke Kofwo lun Imwen Aktuktuk el aoliyen kut ku in ngetuk nu ke pal fwasru?

9-11. (a) Mea ma inge su kol nu ke kofwo pengpeng in len lal Togusra Hezekiah? (b) Kain in me srikasrak fuka orekla sin met puspis su tuku ke sruf siengoul lun an Eir, a mea ma inge el akismakinye kut in len inge?

12. Mea ma inge su kol nu ke kofwo pengpeng ke pal in kol lal Togosra Josiah?

13. Kofwo lulap in len lal Hezekiah a Josiah el akismakinye kut ke mea in len lasr?

14. Mea ma inge su kol nu ke kofwo pengpeng in yiu 537 B.C.E.?

15. Kain in orekma fuka tawinu met lula nu kemwa su sifwil foloko ke yiu 537 B.C.E., a luma siefwunnu fuka sikyuk ke 1919?

16. Mea ma yok ke sie kofwo in yiu 515 B.C.E?

17, 18. (a) Kain in kofwo lulap fuka sikyuk ke yiu 455 B.C.E.? (b) Fuka kut ku in fwak la kut oasr ke sie luma ke pal inge su oanu sie in pal meeta?

19. Mea orala Kofwo lun Inmwen Aktuktuk in yiu 32 C.E. in arulanu mwo?

20. Efu akfulat ke Kofwen Alukela in yiu 33 C.E. arulanu mwo?

21. Mea sikyuk ke Pentecost 33 C.E.?

22. (a) Efu met Kristian nu kemwa elos tia akfulatye kofwo nu kemwa su oasr ke Mwoleung lun Ma Sap? (b) Mea kut akola in tuni ke me lutlut lasr toko?

[Box on page 12]

ME LUTLUT KE KOFWO SU FWAL NU SESR MISINGE

Met nu kemwa su akola in eis me insemwomwo ma patpat su tuku ke me kise lal Kraist in molela ma koluk, enenu in moulkin sie moul fwal nu ke ma kofwo lun bred tia pulol el aoliyen. Kofwo se inge su oasr kalme pa sie me insemwomwo yok nu sin met Kristian akmusrala ke molela lalos liki fwal koluk se inge a sukosok lalos liki selnga lun ma koluk ke inkanek lun lango lal Jisus. (Galetia 1:4; Kolosse 1:​13, 14) Kofwo na paye meet su elos akfulatye, elos oru ou inge ke lusen len itkosr​—sie numbu su orekmakinyuk in Baibel in akkalemye sumwos in ngun. Kofwo su aoliyen ma inge el onnu nu ke saflaiyen muta lun met Kristian akmusrala fwin fwalu a enenu in akfulatye ke “oaru a paye.” Kalmen ma inge pa elos enenu in moniyuk a taran pal nu kemwa ke me pulol su oasr kalme in Baibel, aok Baibel el orekmakin me pulol oanu me pupulyuk ke, luti kikiap, mwosounkas, a ma koluk. Met nu kemwa su alu nu sin Jeova enenu in akkalemye srunga ke kain in me pulol inge, e elos tia enenu in lela ma inge in akkolukye moul lalos a nasnas lun congregation lun met Kristian.​—1 Korint 5:​6-8; Mattu 16:​6, 12.

[Picture on page 9]

Sie ipen barley sasu su tufwanu kosrani kapriyuki a kisekinyuk ke kais sie yiu ke Nisan 16, ke len se ma Jisus el sifwil moulyuk

[Picture on page 10]

Saap Jisus el sramsram ke kofwo lun lam ke pal se ma el pangnol sifwanu “kalem lun fwalu”