Kasru Kutu Met In Etu Ma Lungse Lun God

“Tu Nga tia ku in fwakak. Tu we nu sik Nga fwin tia fwakak mwosasu!”​—1 KORINT 9:​16.

OASR peng mwo lun Jeova nu sin met nu kemwa. Oasr sie Togusrai lal, a el lungse met nu kemwa in long ma inge! Tukun kut lotela tari peng mwo se inge, God el siyuk nu sesr in fwakak ma inge nu sin kutu met. Orekma luo pa inge. Ma se meet, kut enenu in sulkakin peng mwo lun Togusrai lun God. Ke kas palu lal ke “saflaiyen akmwuk inge,” Jisus el fwak: “A mwosasu inge lun togusrai fwa sulkakinelik fwin fwalu nu fon tu in ma lo nu sin mutanfwal nu kemwa; a na safla e fwa tuku.”​—Mattu 24:​3, 14.

² Ip se akluo ke orekma se inge pa enenu in lutiyuk elos nu kemwa loang mwo ke peng mwo lun Togusrai. Tukun sifwil moulyuk lal, Jisus el sramsram ke sie un met tumal lutlut lal: “Ke ma inge komwos som, a oru met in mutanfwal nu kemwa tu elos in met tumuk lutlut, baptaiselosla in En Papa, a Mwen, a ngun mutal, luti nu selos in liaung ma nu kemwa Nga sapkin nu sumwos. A liye, Nga wi komwos pal e nu kemwa, nu ke saflaiyen fwalu.” (Mattu 28:19, 20) ‘Ma nu kemwa su Kraist el sapkin nu selos in oru’ tia tuku sel sifwanu; el luti pa kutu met in liaung ma sap lun God ku ma God el siyuk. (Jon 14:23, 24; 15:10) Ke ma inge in ‘luti ma Kraist el sapkin nu selos in oru’ ku in kalmekin, kasrelos in lutlut ke me enenu su God el siyuk nu selos. Met fwokpap nu kemwa elos enenu in etu a sun me enenu su God el siyuk nu selos elos fwin lungse in muta ye koko lun Togusrai lal.

³ Mea se inge Togusrai lun God? A mea el akola in oru paenang peng ke Togusrai se inge sie peng mwo na paye? Togusrai lun God pa sie guferment in kosrao. Ma inge arulanu yok sripe nu sin Jeova, meyen pa inge el orekmakin in akmutalye El, a in aknasnasye El liki me akfokfok nu kemwa. Togusrai se inge pa Jeova el orekmakin in oru ma lungse lal fwin fwalu oanu in kosrao. Paenang Jisus Kraist el luti kut in pre ke Togusrai lun God in tuku a in suk meet ma inge ke moul lasr. (Mattu 6:​9, 10, 33) Ya kom ku in akilen efu lutlut lasr nu sin kutu met ke Togusrai lal arulanu yok sripe nu sin Jeova?

Sie Me Srifwe Tusruktu Tia Toasr

⁴ Ya sie me toasr nu sesr in luti ke Togusrai se inge? Mo tia! Ke sie me pupulyuk: Oasr kunokon lun sie papa in kurungin sou lal ke ma lun ikwe. El fwin tia oru ou inge oanu el srunga lalalfongi. Met sap Poul el simusla: “A sie met fwin tia liaung met sral, a yokna kelos su muta in loom sel sifwanu, el lafwekin lalalfongi, a koluk liki met su tia lalalfongi.” (1 Timote 5:8) Ya konokon inge me toasr nu sin mokul Kristian? Mo el fwin lungse sou lal, meyen fwin ou inge el lungse in sang ma enenu lalos.

⁵ Oupanu ou inge, orekma in luti a oru met tumal lultut oanu sie kunokon, sie me enenu su ke ma inge moul lasr nu kemwa oakiyuki. Poul el aketeye ou inge ke kas inge: “Tu Nga tia ku in tia fwakak mwosasu!” (1 Korint 9:​16; srike liye Ezekiel 33:​7-9.) Aok, lungse pa mokle kut in oru orekma in luti, a tia ke sripen kunokon. Ma se meet pa, kut lungse Jeova God, a kut ouyepa lungse met tulan lasr, a kut etu la arulanu yok sripe tu elos in long peng mwo. (Mattu 22:37-​39) Ma inge sang nu selos fwinsrak nu ke pal fwasru. Kitin pal lula Togusrai lun God el aksumwosye nununku sesumwos, eisla liki me keok nu kemwa, sifwil folokonang misla a inse siefwunnu​—⁠ke insemwomwo ma patpat lun met nu kemwa su pusisel nu ke kolyuk sumwosmwos lal. Ya kut tia insemwomwo aok, engunak, in fwakak peng mwo se inge nu sin kutu met?

⁶ In pal sena, orekma in luti a orekma in oru met tumal lutlut tia fwusesr. Kais sie met tia oanu sie. Tia oanu sie pwar ku etauk lun kais sie met. Kutu selos arulanu fulat lutlut, a kutu arulanu srik. Rid​—⁠ in pal meeta ma inge nunkeyuk oanu me eisla tasek​—⁠misinge ma inge nunkeyuk oanu sie orekma. Oiye se inge aliteracy, su ku in kalmekin “ku lun sie met in rid tusruktu el tia pwar in oru ou inge” pa sie sin ma upa su yokyokelik, fwinne ke an puspis su kunkon ke lutlut fulat lun met su muta we. Ke ma inge fuka kut ku in kasru kutu met su oasr kain in oiye a pwar inge nu kemwa in etu me enenu su God el siyuk?​—Srike liye 1 orint 9:​20-​23.

Akola Mwo in Sang Kasru Nu Sin Kutu Met

⁷ Sie orekma upa ku in fwusesr in oru fwin oasr kofwen orekma fwal su kom ku in orekmakin. Sie kofwen orekma su fwal ke sie orekma ke len lasr ku in sifwil ekulla ku ayaolla lutu ke sripen me enenu eklelik pal nu kemwa. Oupanu kunokon lasr in sulkakin peng ke Togusrai lun God, Ke lusen yiu puspis met kulansap oaru a lalmetmet elos wise nu sesr kofwen orekma fwal, me rid su fwal in orekmakinyuk nu ke lutlut ke Baibel nu sin met. (Mattu 24:45) Ke ma inge kut akola in sang kasru nu sin met nu kemwa sin “mutanfwal nu kemwa, sruf nu kemwa a . . . loa” in etu me enenu lun God su el siyuk. (Fwakyuk7:9) Ke kais kutu pal, kofwen orekma sasu elos toeni tu kut in fwal nu ke me enenu su ekla pal nu kemwa ke fwalu se inge. Lela kut in tuni kutu met pupulyuk

⁸ Mutamwauk 1946 nu ke 1968, buk inge “Let God Be True” pa orekmakin oanu kofwen orekma fokoko ke lutlut ke Baibel, a oasr ke 19,250,000 buk orekla a kitelik ke kas 54. Kitelik ke 1968, buk inge “Luti Paye Su Kol Nu Ke Moul Ma Patpat orekmakinyuk ke lusen yiu puspis ke lutlut ke Baibel nu sin met insemwomwo in lutlut. In pal meeta arulanu pengpeng nu sin kutu met in lutlut nu sin Met Lo lun Jeova ke lusen yis puspis fwinne elos tia baptais. Tusruktu kofwen orekma se inge orekla in kasru tulik lutlut in nunku a in orekmakin ma el lotela tari. Mea fwokin ma inge? Buk inge Jehovah’s Witnesses​—Proclaimers of God’s Kingdom el akkalemye: “Ke lusen yiu lun orekma tulo mutamwauk September 1, 1968, a safla nu ke August 31, 1971, sie pise nu fon su oasr ke 434,906 met baptisla​—⁠pus liki pal luo ke pisen met su baptaisla ke lusen yiu lun orekma tulo su somla!” Mutamweyen pal in kitakut lal, buk inge Luti Paye el sun pise yok emeet su kitakutla​—⁠pus liki 107,000,000 ke kas 117.

⁹ Ke 1982 buk inge Kom Ku In Moul Ma Patpat In Paredais Fwin Fwalu pa sie sin buk su orekmakinyuk emeet ke Baibel study. Pitse ke buk se inge oasr ke 150 kutu, kais sie selos oasr aketeye su akfulatye me luti su tuku ke pitse. October 1982 Orekma Lun Togusrai Lasr el fwak: “Ke lusen yiu 20 kutu su buk inge ‘Let God Be True’ pa kut orekmakin yok emeet ke lutlut (Mutamwauk 1946 nu ke infwulwen 1960 kutu) pus liki 1,000,000 met fwakelik sasu ke Togusrai pa toeni nu ke u lasr. Na sulpa 1,000,000 met orekma toeni nu ka ke pal se ma buk inge Luti Paye Su Kol Nu Ke Moul ma Patpat pa kut orekmakin yok emeet ke Baibel study su kitakutla ke 1968. Ke kut orekmakin buk sasu inge ke Baibel study, Kom Ku In Moul Ma Patpat In Paredais Fwin Fwalu, ya kut ku in liye kapek ke pisen met orekma lun Togusrai? Aok, fwin lungse lun Jeova!” Arulanu kalem la lungse lun Jeova pa inge, meyen mutamwauk 1982 nu 1995, pus liki 2,700,000 met orekma toeni nu ke pisen met sulkakin lun Togusrai!

¹⁰ “Paye kosrani yok, a pu met orekma,” Jisus el fwak. (Mattu 9:37) Paye kosrani arulanu yok na paye. Srakna oasr orekma yok su kut enenu in oru. In an puspis met puspis elos enenu in sano tu in oasr Baibel study nu selos. Ke ma inge ke sripen elos nunku in fwasrelik etauk lun God ke inkanek pisrpisr, ke 1995 “met kulansap oaru a lalmetmet” elos wise nu sesr kofwen orekma sasu, buk inge Etauk Su Kol Nu Ke Moul Ma Patpat su oasr sra 192. Kofwen orekma se inge el tia srukak lalalfongi kikiap lun met saye. A el aoliyen ma paye lun Baibel ke inkanek mwo. Ke ma inge kut lalalfongi la tulik lutlut elos pisrpisr ke kapek lalos ke ma lun ngun. Buk inge Etauk ku in pulakin tari orekma lal fwin fwalu su pisen ma orekla tari oasr ke 45,500,000 ke kas 125 wikin lengla nu ke kas 21 su apkurun in tari.

¹¹ Kais kutu pal, ‘met kulansap oaru’ elos orala kofwen orekma su fwal nu ke ma enenu na lun kutu met. Ke sie me pupulyuk, fuka met puspis su enenu kasru su siena liki ke sripen alu lalos a an se ma elos kapek siena liki? Fuka kut ku in kasrelos in etu me enenu su God el siyuk nu sesr? Ke 1982 kut eis ma kut enenu​—⁠buk srisrik inge Moul Insemwomwo Fwin Fwalu Ma Patpat su oasr sra 32 orekla! Me rid inge su nenela ke pitse sie kofwen orekma mwo su ku in orekmakin in luti nu selos nu kemwa su tia lutlut ku nu selos su tia etu ku munas in rid. Koanon ma inge ke me lutlut lun Baibel arulanu fwusesr in akilen. Ke mutamweyen pal in kitakut ke ma se inge, buk srisrik inge Moul Insemwomwo Fwin Fwalu Ma Patpat el orala nien sun yok ke program in luti fwin fwalu nu fon. Pus liki 105,100,000 buk srisrik orekla ke kas 239, pa inge me rid lun Watch Tower Society su langasyukla ke kas puspis emeet nu ke pal inge!

¹² Sayen me rid ke pepu, mutamwauk 1990 ‘met kulansap oaru a lalmetmet’ elos wise nu sesr inkanek sasu in luti nu sin met puspis​—⁠videocassette. Ke malem lun October ke yiu ingo, sie video ke lusen minit-55 su oasr sifwe Jehovah’s Witnesses​—The Organization Behind the Name kitakatla​—pa inge video se meet su Watch Tower Society el orala. Me sramsram mwo, a video kato inge ku in eis ke kas 35, el akkalemye u lun met lun Jeova fwin fwalu nu fon fuka elos akpayeye ma sap lal Jisus in sulkakin peng mwo fwin fwalu nu fon. Video inge orekla in kasru kut ke orekma lun forfor lasr in suk met tumal lutlut. Met orekma puspis elos silaklak in orekmakin kofwen orekma se inge ke orekma lun forfor lalos. Kutu sin met orekma elos wis ma inge ke bag nutulos, a akola in akkalemye ku lela met insemwomwo in ngusre kitin pal tu elos in liye. Tia pat toko tukun kitakut ke ma se inge, sie met fwafwasyesr el fwak: “Video pa kofwen orekma ke century ak21 inge tu in sun nunuk a inse lun million puspis, ke ma inge kut fwinsrak la video se inge pa mutamweyen video puspis su Society el orekmakin in sulkakin orekma lun Togusrai fwin fwalu nu fon.” Paye, video puspis sifwil orekla, wekunang ip tulo lun video ke sifwe se inge The Bible​—A Book of Fact and Prophecy a Jehovah’s Witnesses Stand Firm Against Nazi Assault. Fwin kom ku in eis video lun Society ke kas lom, ya kom orekmakin ma inge ke orekma lun forfor lom?a

¹³ Kofwen orekma sasu tufwanu orek, buk srisrik inge Mea God El Siyuk Nu Sesr?, orekla in sang kasru nu ke orekma in orala met tumal lutlut. Efu ma inge orekla? Fuka in orekmakin ma inge?

Tuni Kofwen Orekma Sasu

¹⁴ Me rid sasu se inge Mea God El Siyuk Nu Sesr? orekla nu sin met su lalalfongi tari ke God a akfulatye Baibel. Met fwafwasyesr puspis wekunang missionary puspis su graduate ke Gilead a oasr experience ke lusen yiu puspis ke an puspis su elos muta we elos sang kasru tu in orala buk srisrik inge. Koanon ma inge pa me lutlut mwo, su sramsramkin me lutlut yok lun Baibel. Kas se ma orekmakinyuk arulanu fwusesr, sumwos, a mwo. In pal sena, fus in Baibel su orekmakinyuk tia arle fwusesr. El tia akkalemye “mongo titi” na a el akkalemye pa “mongo upa” su tuku ke Kas lun God ke sie inkanek su orala met puspis in kalem ka.​—Hibru 5:​12-​14.

¹⁵ Ke yia ekasr su tufwanu som met orekma lun Togusrai in an puspis elos siyuk ke kain in me rid inge. Ke sie me pupulyuk ofus lun Watch Tower Society fwin an Papua New Guinea el simusla: “Metu elos fos ke kain in luti puspis lun alu su lain sie sin sie. Elos enenu me sramsram fokoko ke ma paye, su akkeyeyuk ke fus ekasr lun Baibel su elos ku in liye ke Baibel nutulos. Elos enenu sie sramsram kalem ke me enenu su God el siyuk nu sin met Kristian paye a ke fasin a orekma su el tia insese ka.” Buk srisrik inge Siyuk pa ma kut enenu na paye in kasru met in etu me enenu su God el siyuk.

¹⁶ Fuka kom ku in orekmakin kofwen orekma sasu se inge? Ma se meet, ma inge ku in orekmakin in lutlut nu sin met su tia arulanu etu in rid ku elos su tia pwar in rid.b Kain in met inge ku in eis ma lane ke aketeye fwusesr ke buk srisrik inge. Tukun el kalweni ke pal sa me rid inge, ofus puspis lun Watch Tower elos simusla: “Buk srisrik inge sie me kasru yok ke an puspis lun mutanfwal inge su oasr met puspis su tianu arle pwar in rid ke ma loeloes. (Brazil) “Oasr pise yok lun met saye su lungse in muta inge su tia ku in rid kas lalos sifwanu a srakna pulakin upa in ridi kas France. Buk srisrik inge ku in orekmakin oanu me kasru nu selos su ou inge.” (France) Ya oasr met kom nunku ke territory lom su ku in eis insemwomwo ke buk srisrik inge Siyuk?

¹⁷ Ma se akluo, in an puspis buk srisrik se inge arulanu mwo in orekmamkin in mutamwauk Baibel study nu sin met su sangeng sin God fwinne elos wi lutlut fulat ku tia. Paye, kaifweung eneneyuk tu in mutamwauk ke lutlut ke buk inge Etauk Su Kol Nu Ke Moul Ma Patpat. Tusruktu ke oiye puspis arulanu fwusesr in mutamwauk lutlut ke buk srisrik. Na fwin pal fwal tuku, lutlut ku in ekulla nu ke buk inge Etauk, meyen pa inge buk se ma kut orekmakin yok ke lutlut. Fwin ke orekmakinyen buk srisrik inge Siyuk, ofus puspis lun Watch Tower el simusla: “In mutamwauk Baibel study upa, a pal mwo in mutamwauk Baibel study mwo liki fwin met orekma el orekmakin meet buk srisrik.” (Germany) “Kain in buk srisrik inge arulanu fukoko ke ikasla Baibel study sasu, na ku in tafwela nu ke buk inge Etauk.” (Italy) “Fwinne oasr lutlut fulat lun met Japan, tusruktu arulanu supus met su etu Baibel a me luti lal. Buk srisrik se inge sie inkanek mwo som nu ke buk inge Etauk.”​—Japan.

¹⁸ Ofus lun Society fwin fwalu nu fon elos siyuk ke buk srisrik inge, a fulela etukyung nu selos in langasla ma inge ke kas 221. Kut fwinsrak la me rid sasu inge sie me kasru yok nu sesr tu kut in ku in kasru pa kutu met mea me enenu su Jeova God el siyuk nu selos. Kut fwin sramsram ke ip lasr, lela kut in esam la wikin me enenu su God el siyuk nu sesr pa orekma in luti a oru met tumal lutlut, ma inge ase nu sesr pal mwo in akkalemye nu sin Jeova fuka lupan lungse lasr nu sel. Aok, ma God el siyuk nu sesr tia toasr. Pa inge inkanek mwo emeet in moul!​—Sam 19:​7-​11.

[Footnotes]

Ya Kom Ku In Aketeye?

◻ Ke kain in orekma luo fuka Jeova el siyuk nu sin met kulansap lal in oasr ip lalos ka?

◻ Efu ku konokon lasr in luti a in oru met tumal lutlut tia sie me toasr nu sesr?

◻ “Met kulansap oaru a lalmetmet” el ase nu sesr kain in kofwen orekma fuka su kut ku in orekmakin ke orekma in luti a oru met tumal lutlut?

◻ Buk srisrik inge Siyuk orekla in fwal nu sin su, a fuka kut ku in orekmakin ma inge ke orekma lun forfor lasr?

[Study Questions]

1, 2. (a) Kain in orekma luo fuka Jeova God el siyuk nu sesr in oasr ip ka? (b) Mea met fwokpap elos enenu in etu tu in ekla sie met ye koko lun Togusrai lun God?

3. Mea se inge Togusrai lun God, a mea el akola in oru paenang me sramsram ke Togusrai se inge sie peng mwo na paye?

4. Fuka kut ku in orala me pupulyuk in akkalemye la kunokon lasr in luti ke peng mwo tia toasr?

5. Fwinne orekma in luti a oru met tumal lutlut sie kunokon lasr, tusruktu efu kut enenu in insemwomwo in wi epeis nu ka?

6. Efu ku orekma in luti a in oru met tumal lutlut tia fwusesr?

7. Fuka “met kulansap oaru a lalmetmet” elos kasru kut tu kut in akola in kasru kutu met in etu me enenu su God el siyuk?

8. (a) Mea ip lun buk inge “Let God Be True” ke lutlut lun Baibel su arulanu kapkapek? (b) Kain in kofwen orekma fuka ke orekma in luti ke Baibel kut eis ke 1968, a ma inge orekla fuka? (c) Fuka buk inge Paye el kasru ke orekma in oru met tumal lutlut?

9. Me lutlut mwo fuka ku in liyeyuk ke buk inge Moul Ma patpat, a orekma yok fuka ma inge el oru ke kapek lun met sulkakin Togusrai?

10. Kain in kofwen orekma sasu fuka orekla ke 1995, a efu ma inge ku in kasru tulik lutlut in sa na kapek ke ma lun ngun?

11. Kain in kofwen orekma fukoko fuka orekla in kasrelos su tia lutlut a tia arle etu rid, a fuka ma inge el sun nien sun fulat fwin ke orekma in luti fwin fwalu nu fon?

12, 13. (a) Mutamwauk 1990, ‘met kulansap oaru a lalmetmet’ elos orala kain in inkanek sasu fuka in sun met puspis fwin fwalu? (b) Fuka kut ku in orekmakin video lun Society ke orekma lun forfor lasr? (c) Kain in kofwen orekma fuka su tufwanu kitelik orekla in kasru kut ke orekma in oru met tumal lutlut?

14, 15. Buk srisrik inge Siyuk orekla in fwal nu sin su, a mea koanon ma inge?

16. (a) Su ku in eis ma lane yok ke aketeye fwusesr ke buk srisrik sasu? (b) Fuka met ke territory lom elos ku in eis me insemwomwo su tuku ke buk srisrik inge Siyuk?

17. Ke inkanek fuka buk srisrik sasu inge ku in orekmakin yok nu ke an puspis, a efu ou inge?

18. Mea kut enenu in esam fwin ke orekma in sun me enenu su God el siyuk nu sesr?