“Pa Inge Inkanek Lun God In Akkalemye Lungse Nu Sesr”
“God el fwin lungsel kut ou inge, fwal nu sesr tu kut in ouyepa lungse sie sin sie.”—1 JON 4:11.
KE Sunday, March 23, 1997, tukun fwatu tilli, wangin alollo la pus liki 13,000,000 met fwin fwalu nu fon elos fwa tukeni nu sie ke Kingdom Hall a nien toeni puspis su Met Lo lun Jeova elos orekmakin. Efu? Meyen insielos mokleyuk ke lungse yok emeet lun God su el akkalemye nu sin metu. Jisus el sramsram yok ke me akpayeye ke lungse lun God inge, el fwak: “Tu God el lungsel fwalu ou inge, tu el ase Mwen siefwunnu isusla nutul, tu el su lalalfongel fwa tia tula, a el fwa eis moul ma patpat.”—Jon 3:16.
2 Ke kut sramsram ke lungse su God el akkalemye, sie orekma mwo in siyuk sesr sifwanu, ‘Ya Nga insemwomwo na paye ke ma God el oru? Ya inkanek luk in orekmakin moul inge sang me akpayeye ke insemwomwo luk?’
“God El Lung”
3 In akkalemye lungse tia upa nu sin God meyen “God el lung.” (1 Jon 4:8) Lungse pa oiye mwo fulat lal. Ke pal se ma el akola fwalu tu met in muta ka, orekma lal in oru eol in mayuk nu fwin kofu a ke pal se ma el oreni kof in lulu a ke mwea ma inge nu kemwa akkalemye ku sakuruk lal. (Genesis 1:9, 10) Ke pal se ma God el orala akmwuk ke mokuikui lun kof a engyeng, ke pal se ma el lumala ma puspis su mutasr tia ku in liye a kain in fokinsak puspis su ekulla ono fwin fwalu nu ke me mongo tu in kasru met ke moul lalos, ke pal se ma el orala clock ke manosr tu in fwal nu ke lusen len a malem lun fwalu, ma inge akkalemye lalmetmet. (Sam 104:24; Jeremaia 10:12) Aok, me akpayeye ke ma orekla yok nu kemwa pa lungse lun God.
4 Ema lun kais sie sesr luti nu sesr ke lungse lun God ke pal se ma kut ngalis, fokinsak mwes, su yok srano ka su God el orala tia in kasru kut mukena ouyepa in akinsemwomwoye kut. Mutasr ku in liye me akpayeye ke ma se inge ke pal se ma kut liye tilli kato lun fwat, a kosrao su nenela ke itu ke sie fong su wangin pukunyeng ku af, kain in luma a tun nu kemwa lun ros, sritel lun kosro srisrik, a isrusr mwo lun kamwuk lasr. Infwesr ku in akilen ma inge ke kut ngok keng lun ros, insresr akilen ma inge kut fwin long pusren kof putat, on lun mwon, a pusren met su kut lungse. Kut ku in pula ma inge fwin sie met su kut lungse el embrace kut. Kutu kosro oasr ku lalos in liye, long, ku ngok ma puspis su metu tia ku in oru. Tusruktu met nu kemwa, orala in luman God, oasr ku lalos in akilen lungse lun God ke inkanek su kosro nu kemwa tia ku in oru.—Genesis 1:27.
5 Ke pal se ma Jeova God el orala met se meet, Edam a If, elos raunilosla ke me akpayeye ke lungse lal. El orala sie imae, sie paredais, a orala kain in sak nu kemwa in kapek ka. El orala infwal in aksroksrokye ma inge a el nekla ma inge ke kain in mwon a kosro nu kemwa. El sang ma inge nu kemwa sel Edam a If oanu nien muta lalos. (Genesis 2:8-10, 19) Jeova el oanu Papa tumalos a elos pa tulik nutul, elos ipen sou lal fwin fwalu a kosrao. (Luk 3:38) El orekmakin imae lun Eden oanu me srikasrak, Papa tuman seanyen se inge in kosrao el sang nu selos orekma mwomwo in orala fwalu nu fon sie Paredais. Fwalu nu fon e fwa nenela ke tulik nutulos.—Genesis 1:28.
6 Tusruktu, tia pat toko, Edam a If elos sun me srifwe ke akos, sie me srifwe ke oaru lalos. Ke mutamwauk If meet na tok Edam elos tia akkalemye insemwomwo ke lungse su akkalemyeyuk nu selos. Ma elos oru arulanu koluk. Wangin nunuk munas! Ke sripe se inge, elos tula futoto lalos nu sin God, elos tilli ipen sou lal, a sisilosla liki imae. Kut nu kemwa misinge srakna ku in pula fwokin ma koluk lalos. (Genesis 2:16, 17; 3:1-6, 16-19, 24; Rom 5:12) Tusruktu ya oasr ma kut lotela ke ma sikyuk inge? Fuka kut topuk ke lungse lun God? Ya sulela su kut oru ke len nu kemwa akkalemye la kut insemwomwo ke lungse lal?—1 Jon 5:3.
7 Fwinne papa a nine se meet lasr elos tia akkalemye kulo ke ma mwo nu kemwa su God el oru nu selos ma inge tia akwanginye lungse lun God su oasr yurol. Ke sripen pakoten nu sin metu su sonna isusla in pal meeta—wekunang elos nu kemwa su moul misinge—paenang God el lela Edam a If in orala sou lalos meet liki elos mise. (Genesis 5:1-5; Mattu 5:44, 45) Fwin el tia oru ou inge, kut nu kemwa tia isusla. Ke el fwakak ma lungse lal ke inkanek takla, Jeova el ouyepa sang fwinsrak nu sin tulik nutul Edam nu kemwa su akola in akkalemye lalalfongi. (Genesis 3:15; 22:18; Isaia 9:6, 7) Akmwuk lal inge orala met nu kemwa ke mutanfwal nu kemwa in sifwil srukye ma Edam el tula, pa inge, moul sumwosmwos oanu sie ipen sou lun God in kosrao a fwin fwalu su oasr insese lal. El oru ou inge ke el ase nu sesr lango.
Efu Sie Lango?
8 Ya oasr enenu na paye sie lango moul oanu sie met tu in molela ma inge? Ya God el tia ku in orala na ma sap a fwak fwinne Edam a If elos koluk a enenu in mise ke sripen ma koluk lalos, tusruktu tulik nutulos nu kemwa su akos God ku in moul ma patpat? Kut fwin sramsram ke akmwuk lun met sesumwos ma inge luman fwal tari. Tusruktu, Jeova el sie God su “lungse sumwosmwos a nununku sumwomwos.” (Sam 33:5) Edam a If elos oswela fwako lalos tukun elos oru ma koluk; ke ma inge wangin fwinne sie sin tulik nutulos su isusla sumwosmwos. (Sam 51:5) Elos nu kemwa usrui ma koluk, a molin ma koluk mise. Fwin Jeova el tia loang nu ke ma inge, kain in me srikasrak fuka el orala? El tia ku in pilesru akmwuk sumwosmwos lal sifwanu. El akfulatye me siyuk lun nununku sumwosmwos. Wangin kutena met su ku in konaok ma tafongla ke inkanek lun God in akmsumwosye me sramsram yok inge.—Rom 3:21-23.
9 Ke ma inge, ya akmwuk sumwos a fwal tu in aksukosokyelos ku in etukyung nu sin tulik nutul Edam su akola in akkalemye akos lalos ke lungse nu sin Jeova? Fwin sie met sumwosmwos el ku in mise oanu me kise, nununku sumwos el lela sripen moul sumwosmwos inge tu lan ku in afwunye ma koluk nu kemwa lun met su akkalemye lalalfongi ke lango. Ke sripen ma koluk lun met se meet, Edam, pa oasr kunokon ke ma koluk lun met nu kemwa, paenang sra su surorla liki siepa met sumwosmwos, su oanu el, ma inge ku in akfwalye me paon lun nununku sumwos. (1 Timothy 2:5, 6) Tusruktu piye kut ku in konaok kain in met inge?
Ekasr Lupan Molo?
10 Inmaslon tulik nutin met koluk Edam, wangin fwinne sie su ku in sang me enenu se inge tu in sifwil molela fwinsrak ke moul su Edam el tula. “wangin sie selos ku in molela met lel ke kutena ma lal, ku sang nu sin God me mol kel; (tu saok mol in moul lalos, a wanginla nu tok) tu el fwa moul ma patpat, tu lan tia liye kulamwi.” (Sam 49:7-9) El tia likiye met in wanginla fwinsrak, Jeova el orala inkanek ke sripen pakoten lal.
11 Jeova el tia supwela lipufon fwin fwalu in orek luma oanu el mise ke el sisla mano in ikwe su el orekmakin a in pal se na el moul in ngun. A, ke inkanek in menmen su God mukena, el Su Orala Ma Nu Kemwa ku in oru, el filiye ku lun moul a luman mwen nutul in kosrao ke insien mutan se, nu sel Mary an nutul Heli, su tuku ke sruf lal Juda. Ku lun God, ngun mutal lal, kurunganang kapek lun awowo se inge ke insien nine kiel, a el isusla oanu sie met sumwosmwos. (Luk 1:35; 1 Piter 2:22) Ke lungse lal oasr yurin sie met inge me mol a lango su eneneyuk tu in akfwalye me enenu lun nununku mutal—Hebru 10:5.
12 Nu sin su inamaslon tulik puspis lun Jeova in kosrao el sang kunokon inge. Nu sel su Ma Simusla el pangnol “Mwen siefwunnu isusla nutul.” (1 Jon 4:9) Kas se inge orekmakinyuk in akkalemye la, pa inge pangpang nu sel ke pal se ma el muta in kosrao, meet liki el isusla fwin fwalu oanu sie met. El mukena su Jeova el sifwanu orala a wangin kutena met su kasrel. El pa Ma Orekla se meet. God el orekmakunul ke el orala ma orekla saye. Lipufon nu kemwa elos mwen nutin God, oupanu Edam el mwen nutin God. Tusruktu Jisus el akkalemyeyuk oanu ‘oasr mwolanu lal, mwolanu oanu el siefwunnu isusla nutin Papa.” El inge akkalemyeyuk oanu el “on in imwel Papa,” (Jon 1:14, 18) Asrouki lal nu sin Papa arulanu futoto, eltal mukena etu, a arulanu mwo. El wi Papa tumal ke lungse lal nu sin metu. Soakas 8:30, 31 el akkalemye mea Papa tumal el pulakin nu sin Mwen nutul a mea pulakin lun Mwen se inge nu sin metu: “A nga kulu yurol [Jeova] len nu kemwa, a engun pal e nu kemwa ye mutal, . . . a Nga [Jisus Kraist oanu sie Met Orekma Usrnguk] engun yurin mwen nutin metu.” Mwen kulu se inge pa God el supwema nu fwalu in sang lango. Ke ma inge, arulanu yok sripe kas inge lal Jisus: “Tu God el lungsel fwalu ou inge, tu el ase Mwen siefwunnu isusla nutul”!—Jon 3:16.
13 Tu kut in kalem nu ke kalmen ma inge, yiu puspis meet liki Jisus el tuku fwin fwalu, oasr ma God el sapkin nu sel Ebream, 3,890 yiu somla. “Eis inge mwen nutum, mwen siefwunnu nutum su kom lungsum, aok Isaak, a som nu fwal Moraia, a kisekunul ingo tu in me kise furur fwin soko eol su Nga fwakak nu sum.” (Genesis 22:1, 2) Ke lalalfongi, Ebream el akos. Srike in nunku la kom pa Ebream. Fuka fwin tulik nutum pa inge, tulik siefwunnu nutum su kom arulanu lungse. Mea pulakin lom ke kom lip etong su kom e orekmakin ke me kise, a fwafwasyesr ke lusen len ekasr som nu an Moraia, a filiye mwen nutum fwin loang se.?
14 Efu ku papa a nine pakoten oasr kain in pulakin inge? Genesis 1:27 el fwak la God el orala met in Lumal sifwanu. Pulakin lasr ke lungse a pakoten arle srikla kut fwin srikiye nu ke lungse a pakoten lun Jeova. Fwin ke ma sikyuk nu sel Ebream, God el kutongyel, tu lan tia ku in kisekin Isaak. (Genesis 22:12, 13; Hebru 11:17-19) Tusruktu ke ma sikyuk nu sel, Jeova el tia kutongyel sifwanu tu lan tia ku in wise lango, fwinne ma inge arulanu yok nu Sel a nu sin Mwen nutul. El tia oru ou inge, ke sripen oasr kunokon lun God, a ke sripen lungkulang yok lal su wangin ma oanu. Ya kut insemwomwo na paye ke ma se inge?—Hibru 2:9.
Mea Lango El Ku In Oru
15 Me sang ke lungse se inge su God el wise oasr me purakak yok nu selos su eis lango se inge ke lalalfongi. Elos inge sriyukla sin God ke sripen ma koluk. Elos inge, oanu Kas Lal el fwak, ‘met lokwalok insielos ke sripen orekma koluk lalos.’ (Kolosse 1:21-23) Tusruktu elos inge “iumwekyukla nu sin God ke mise lun Mwen nutul.” (Rom 5:8-10) Ke sripen elos ekulla oiyen moul lalos a eis nunuk munas su God el sang nu selos su akkalemye lalalfongi ke me kise lal Kraist, elos inge eis insemwomwo ke sie ela nasnas.—Hibru 9:14; 1 Piter 3:21.
16 Jeova el sang nu sin kutu met, sie u srisrik, sie me insemwomwo ke kulang tu elos in wilul Kraist ke sie Togusrai in kosrao, ke sie nien sun tu elos in akpayeye na paye ma lungse lun God fwin fwalu ke mutamwauk me. Ma inge nu kemwa moliyukla liki sin “sruf nu kemwa, a kaskas nu kemwa, a fwin nu kemwa, a mutanfwal nu kemwa . . . a oralos tu elos in togusra a met tol nu sin God, a elos fwa togusra fwin fwalu. (Fwakyuk 5:9, 10) Nu selos, met sap Poul el simusla: “A komwos eis ngun lun ma nutla, su kut ku in pangon ka: ‘Abba, Papa!’ Ngun el sifwanu orekma lo nu ke ngunasr, tu kut ma nutin God. A kut fwin ma natul na kut met usru: met usru lun God, a met usru yurin Kraist.” (Rom 8:15-17) Meyen elos nutla sin God oanu mwen nutul, paenang elos eis moul futoto nu sel oanu ma Edam el tula meet; tusruktu nu sin mwen nutul inge etukyung nu selos kunokon in kosrao—orekma su Edam el tia eis ke pal lal. Tia me lut paenang met sap Jon el fwak: “Liye, oiyen lungse lun Papa el ase nu sesr, tu kut in pangpang mwen nutin God.”! (1 Jon 3:1) Nu selos su ou inge God el tia akkalemye mukena lungse su yok emeet (a·gaʹpe) ouyepa el akkalemye kain in lungse futoto (phi·liʹa), pa inge kain in lungse su oanu me kapur inmaslon met kamwuk na paye.—Jon 16:27.
17 Nu sin kutu met—elos nu kemwa su akkalemye lalalfongi ke me sang lun God ke moul ke inkanek lal Jisus Kraist—Jeova el ikasla nu selos pal mwo in eis moul futoto saok nu sel su Edam el tula. Met sap Poul el aketeye: “Tu tawinu ma lulap lun ma orekla [metu su tuku sel Edam] tupan sikme lun tulik nutin God [elos sano ke pal in akkalemye la mwen nutin God su met usru wilul Kraist ke Togusrai in kosrao pa oru orekma in kasru metu]. Tu akpusisilye tari ma orekla nu ke ma wangin sripe [elos isusla ke ma koluk a mise sanoltal ke pal fwasru, a wangin inkanek tu elos in ku in aksokokyelos sifwanu], tiu ke lungse la sifwanu, a ke el su akpusisilyel, in fwinsrak [su God el sang nu selos] tu ouyepa ma orekla fwa taltalla liki sruo lun ma kulamwi nu ke sukosok lun mwolanu lun tulik nutin God.” (Rom 8:19-21) Mea kalmen sukosok inge? Elos pa sukosokla liki sruo lun ma koluk a mise. Mano a nunuk lalos e fwa ekla sumwosmwos, paredais pa nien muta lalos, oasr moul ma patpat lalos su kasrelos in engunkin moul sumwosmwos a in akkalemye insemwomwo lalos nu sin Jeova, God paye mukefwunnu. A fuka ma inge nu kemwa ku in tuku na paye? Ke inkanek lun lango lun Mwen siefwunnu isusla nutin God.
18 Ke Nisan 14, 33 C.E., ke sie infwokil lung fwin an Jerusalem, Jisus el oakiye me eismakin ke len in mise lal. Akfulat ke len in mise lal ke yiu nu kemwa sie ma saok ke moul lun met Kristian nu kemwa. Jisus el sapkin nu selos: “Oru ma inge in esam yu.” (Luk 22:19) Ke yiu se inge 1997 Memorial ku mongo in eku lun Leum e fwa orek tukun fwatu tilli ke len 23 lun March (pa inge mutamweyen Nisan 14). Ke len inge, wangin ma saok liki kaifweung lun sie met in wi ke Memorial ku mongo in eku lun Leum inge.
Fuka Kom Topuk?
◻ Ke inkanek puspis fuka God el akkalemye lungse yok nu sin Metu?
◻ Efu ku sie met su oasr moul sumwosmwos eneneyuk in molela mwen nutul Edam?
◻ Jeova el sang lango ke me mol yok fuka nu sel?
◻ Mea lango el ku in oru?
[Study Questions]
1. In March 23 tukun fwatu tilli, efu million sin met elos orek toeni lalos ke Kingdom Hall puspis a kutu nien toeni fwin fwalu nu fon?
2. Kain in kusensiyuk puspis fuka su saok kut ku in siyuk sesr sifwanu fwin ke topuk lasr ke lungse lun God?
3. (a) Efu ku in akkalemye lungse tia upa nu sin God? (b) Fuka ku a lalmetmet akkalemyeyuk ke ma orekla lal
4. Fwin ke ma orekla lal su kut ku in liye, mea me akpayeye ke lungse lun God kut nu kemwa ku in liye a engunkinyuk?
5. Fuka Jeova el akkalemye lungse yok sel Edam a If?
6. (a) Mea pulakin lom ke orekma koluk su Edam a If elos oru? (b) Mea ma inge su akkalemye la oasr ma kut lotela ke ma sikyuk in Eden a ke ma kut lotela inge wise nu sesr me insemwomwo?
7. Fwinne Edam a If elos oru ma koluk, fuka Jeova el akkalemye lungse nu sin tulik nutulos?
8. Efu God el tia orala na ma sap su akkalemye la fwinne Edam a If elos oru ma koluk a enenu in mise, tusruktu tulik nutulos nu kemwa su aksol tia enenu in mise?
9. Fwal nu ke akmwuk lun nununku mutal, kain in lango fuka eneneyuk?
10. Efu ku tulik nutul Edam nu kemwa elos tia ku in wise lango su eneneyuk?
11. Ke inkanek fuka Jeova el sang met sumwosmwos su eneneyuk ke lango?
12. (a) Ke inkanek fuka Jisus el “Mwen siefwunnu isusla” nutin God? (b) Fuka orekma lun Jeova in supwela met se inge in sang lango akkalemye lungse lal nu sesr?
13, 14. Fuka record lun Baibel ke kaifweung lal Ebream in kisekin Isaak kasru kut in engunkin ma Jeova el oru? (1 Jon 4:10)
15. Fuka lango se inge el orekma ke moul lun met puspis fwinne ke moul lun met ke akmwuk se inge ke len lasr?
16. Kain in me insemwomwo fuka etukyung nu sin u srisrik ke sripen lalalfongi lalos ke lango?
17. (a) Nu selos nu kemwa su akkalemye lalalfongi ke lango, kain in fwinsrak fuka etukyung nu selos? (b) Mea “sukosok lun mwolanu lun Mwen nutin God” kalmen ma inge nu selos?
18. Ke March 23 tukun fwatu tilli, mea kut akola in oru, a efu?
[Picture on page 22]
God el sang Mwen siefwunnu isusla nutul