Mea God El Siyuk Nu Sesr?
“Tu pa inge lungse lun God, tu kut in liaung ma sap lal; a ma sap lal tia toasr.”—1 JON 5:3.
“NGA insemwomwo tari ke alu luk!” Ya tia pa inge met puspis elos fwak pal nu kemwa? Tusruktu ke ma paye, kusensiyuk pa, “ya alu luk akinsmewomwoye God?” Aok, oasr ma God el siyuk nu selos nu kemwa su lungse in alu fwal nu ke lungse lal. Ya ma inge aklutye kut?” Mo. Ke sie me pupulyuk, fuka fwin oasr loom kato lom, su kom tufwanu orala a yok mani kom sisla ka. Ya kom lela kutena met in muta ka? Paye kom tia oru ou inge. Kutena met su lungse in muta ka enenu in sun me enenu su kom siyuk.
2 In oupanu, Jeova God el wise nu sesr fwalu se inge oanu nien muta lun metu. Ye koko lun Togusrai lal, fwalu se inge e fwa “sifwil akmwoye”—ekulla nu ke sie paredais kato. Jeova el e fwa oru ma inge. Ma inge arulanu yok molo nu sel, el sang Mwen kulu nutul tu lan ku in oru ma inge. Paye, oasr me enenu su God el siyuk nu selos nu kemwa su lungse in muta we!—Sam 115:16; Mattu 6:9, 10; Jon 3:16.
3 Fuka kut ku in etu me enenu su God el siyuk? Jeova el mokle Togusra Solomon in akkalemye ke kas futoto me enenu su El siyuk nu sesr. Tukun el akkalemye ma nu kemwa su el eisla tari—me kasrup, loom puspis su el musa, on puspis, a lungse puspis su tuku nu sin mutan—Solomon el fwak kas inge ke saflaiye: “Pa inge saflaiyen mao, longyuk tari ma nu kemwa: Sangeng sin God a liaung ma sap lal. Tu pa inge orekma mwo nu kemwa lun metu.”—Ekklisiastis 12:13.
“Ma Sap lal Tia Toasr”
4 “Liaung ma sap lal.” Fwin ke me enenu, pa inge me enenu su God el siyuk nu sesr. Ya arulanu upa me siyuk lal inge nu sesr? Mo, tia. Met sap Jon el akkalemye nu sesr ma se su mwo fwin ke ma sap lun God, ku me enenu su el siyuk nu sesr. El simusla: “Tu pa inge lungse lun God, tu kut in liaung ma sap lal; a ma sap lal tia toasr.—1 Jon 5:3.
5 Kalmen kas Grik inge su langasyukla “toasr” pa “upa in srukak.” Ma inge ku in sramsram nu ke kutena ma su upa in sun ku upa in akpayeye. In Mattu 23:4, ma inge orekmakinyuk in aketeye “me utuk toasr,” ma sap a fasin lun met, su met sim a met Farisi elos filiye fwin pisen metu. Ya kom kalem ke ma met sap Jon su matuo tari el lungse in akkalemye? Ma sap lun God tia me utuk toasr se, ku arulanu upa nu sesr in liaung. (Srike liye Duteronomi 30:11.) A, kut fwin lungse God, akos ke ma sap lal akinsemwomwoye kut. Ma inge ase nu sesr pal mwo in akkalemye lungse lasr nu sin Jeova
6 Tu in akkalemye lungse nu sin God, kut enenu in etu na paye me enenu su el siyuk nu sesr. Ke kut oru ou inge, kut enenu in esam ma Jon el simusla: ‘Ma sap lun God tia toasr.’
Eis Etauk ke God
7 Me enenu se meet pa eis etauk ke God. Tuni kas lal Jisus su simusyukla in Jon sapter 17. Pa inge fong safla lal Jisus oanu sie met Ke pal se ma el fwak kas inge. Jisus el orekmakin fong se nu fon in akola met sap ke pal in som lal. El fosrnga ke pal fwasru lalos, pal fwasru ma patpat lalos. Ke el ngetuk nu in kosrao, el pre kelos. In fus 3, kut ku in rid: “A pa inge moul ma patpat, tu elos fwa etu kom God paye mukefwunnu, a Jisus Kraist su kom supwelmu.” Aok, molela lalos oakiyuki nu ke orekma lalos in “eis etauk” ke God a Kraist. Ma inge fwal pa nu sesr misinge. Kut fwin lungse in moul, kut enenu in eis kain in etauk inge.
8 Mea kalmen in ‘eis etauk’ lun God? Kalmen kas Grik inge su langasyukla “eis etauk” pa “in etu, akilen,” ku “in kalem na paye.” Nunku pa, kas se inge “eis etauk” el akkalemye la orekma se inge tia kitin pal na a enenu in oru pal nu kemwa. Ke ma inge, kalmen eis etauk ke God pa enenu in etel na paye a tia ke ma srisrik na, akkapye sie oiye futoto na paye oanu in kamwuk nu sel. Sie moul futoto su wangin safla nu sin God ku in wise nu sesr etauk yok kel. Kain in orekma se inge el tafwela na ma patpat, meyen kut tia ku in etu nu fon ma puspis su kut ku in etu nu sin Jeova.—Rom 11:33.
9 Fuka kut eis etauk ke God? Oasr buk luo su ku in kasru kut. Ma se meet pa Buk ke ma orekla. Ma nu kemwa su Jeova el orala—ma moul a ma tia moul—ma inge wise nu sesr lalmetmet ke kain in oiye fuka oasr yurol. (Rom 1:20) Tuni kutu me srikasrak. Pusren kof putat su arulanu kato, pusren noa su sun eka ke pal in paka, itu puspis in kosrao su ku in liyeyuk ke eku fwin wangin af ku pukunyeng—ya ma inge nu kemwa tia luti kut la oasr “ku lulap” lun Jeova? (Isaia 40:26) Isrusr lun sie tulik ke el liye kosro srisrik su sritel a ukwe palal sifwanu ku sie kisrik ngiow su sritel ke sie ball—ya ma inge tia akkalemye nu sesr la Jeova el sie “God insemwomwo,” su engun oasr yurol? (1 Timote 1:11) Eman me mongo eueu, keng lun ros ke imae, kain in tun mwomwo lun seliki, pusren won su on, kafselak lun met su kom lungse—ya kut tia ku in akilen ke ma inge nu kemwa la Met Su Orekutla el kain in God lun lungse, su lungse kut in insemwomwo ke moul lasr?—1 Jon 4:8.
10 Tusruktu, oasr saflaiyen ma kut ku in etu kel Jeova ke buk lun ma orekla. Ke sie me pupulyuk: Su en God? Efu el orala fwalu a filiye met ka? Efu el lela ma koluk? Mea pal fwasru lasr? Fwin ke topuk nu ke kusensiyuk inge nu kemwa, kut enenu in som nu ke siepa buk su ase nu sesr lalmetmet lun God—Baibel. Ke sra lal, Jeova el akkalemyel sifwanu, enel, oiyel, a akmwuk lal—me lutlut su kut tia ku in konaok ke kutena ma.—Exodus 34:6, 7; Sam 83:18; Emos 3:7.
11 Ke Ma Simusla, Jeova el ouyepa wise nu sesr lalmetmet tu kut in etu kutu met su arulanu yok sripe. Ke sie me pupulyuk, su Jisus Kraist, a mea kunokon su oasr yurol tu in akpayeye akmwuk lun Jeova? (Orekma 4:12) Su Setan su devil? Ke inkanek fuka el keapela metu? Fuka kut ku in fwasr liki orekma kutusrik lal? (1 Piter 5:8) Topuk nu ke ma inge nu kemwa su ku in molikutla ku in konoiyukyuk mukena in Baibel.
12 Ya sie me toasr in eis kain in etauk lun God inge a akmwuk lal? Mo tia! Ya kom srakna esam ma kom pula ke pal se ma kom tufwanu etu la enen God pa Jeova, la Togusrai lal akola in orala fwalu se inge sie paredais, la el ase nu sesr Mwen kulu nutul in molikutla liki ma koluk, a kutupa ma paye? Ya kom tia pula oanu ma se ku nukin su afwunye mutom etukla liki paenang kom ku in liye mwo misinge ke pal se meet? In eis etauk lun God tia toasr. Sie me insemwomwo!—Sam 1:1-3; 119:97.
Srikasrak Fwal nu ke Akmwuk lun God
13 Ke kut eis etauk lun God, kut ku in akilen la kut enenu in ekulla oiyen moul lasr. Ma inge wiskutla nu ke me enenu akluo. Kut enenu in fwal nu ke akmwuk lun God ke oiye sumwos a eis ma paye lal. Mea se inge ma paye? Ya arulanu yok sripe nu sin God ma kut lalalfongi a ma kut oru? Arulanu kalem la met puspis misinge elos tia nunku ou inge. Sie report su orekla sin Church of England ke 1995 akkalemye la tukeni muta fwinne tia payuk tia fwal in nunkeyuk oanu ma koluk se. “kas se inge ‘moul in ma koluk’ sie me akngal a tia me kasru nu sin met,” sie bishop ke alu el fwak.
14 Ke ma inge, ya “moul in ma koluk,” tia koluk? Jeova el aketeye nu sesr arulanu kalem mea nunuk lal ke kain in oiye se inge. Kas Lal, Baibel, el fwak: “Lela met nu kemwa in akfulatye mare, a lela nien on in mutal, tu God el fwa nununku met kosro nu kemwa.” (Hebru 13:4) Osun ke mano meet liki payuk saap tia koluk ye mutun met kol ke alu puspis a kutu met, tusruktu ma inge sie me koluk upa ye mutun God! Wekunang kosro inmaslon met payuk, pukasr, a orekma lun mokul nu sin mokul a mutan nu sin mutan. (Livitikus 18:6; 1 Korint 6:9, 10) God el siyuk nu sesr in fwasr liki kain in oiye koluk inge nu kemwa, su el pangon fokfok.
15 Tusruktu, tia fwal, tu kut in fwasr liki na orekma koluk su God el nunku oanu sesumwos. Ouyepa wikin me siyuk lun God pa ke oiye se su kut akkalemye nu sin kutu met. Fwin ke sou, el lungse mokul tuma mutan kie in oasr lungse a akfulat inmaslolosr. God el siyuk nu sin papa a nine in kurungin tulik nutulos ke elos sang nu selos ma enenu lalos ke ikwe, a ngun, a kurungin su tulik eneneyuk. El sapkin nu sin tulik srisrik in akos papa a nine kielos. (Soakas 22:6; Kolosse 3:18-21) A fuka ke lalalfongi lasr? Jeova God el lungse kut in fwasr liki lalalfongi a fasin su tuku ke alu kikiap ku elos su lain ma paye su lutiyuk in Baibel.—Duteronomi 18:9-13; 2 Korint 6:14-17.
16 Ya sie me toasr nu sesr in akfwalye moul lasr ke akmwuk lun God ke oiye sumwos a in eis ma paye lal? Mo kut fwin tuni ma lane su tuku ka—moul in payuk su mokul tuma a mutan kie elos lungse sie sin sie a lalafongi sie sin sie liki moul in payuk su kitakatelik a fwasrelik ke sripoen suoaru; sie loom su tulik srisrik nu kemwa pulakin lungse a kurungin sin papa a nine liki sou puspis su tulik nu kemwa tia pulakin lungse, pilesreyuk, a tia eneneyuk; sie ela nasnas a mano fukoko liki ela fokfok a mano su akkolukyeyuk ke AIDS ku kutu mas su tuku ke sripen kosro. Paye, me enenu su Jeova el siyuk tia eisla kutena ma kut enenu tu kut in insemwomwo ke moul lasr!—Duteronomi 10:12, 13.
Akkalemye Akfulat ke Moul a Sra
17 Ke kom akfwalye moul lom ke akmwuk lun God, kom ku in akilen la moul arulanu yok sripe na paye. Lela kut in sramsram ingenu ke me enenu aktulo su God el siyuk. Kut enenu in akkalemye akfulat ke moul a sra. Moul arulanu mutal nu sin Jeova. Enenu pa inge, meyen El pa Sropon Moul. (Sam 36:9) Aok, fwinne moul lun awowo su sonna isusla a srakna muta ke insien nine kiel yok sripe nu sin Jeova! (Exodus 21:22, 23) Sra el aoliyen moul. Ke ma, inge, sra ouyepa mutal ye mutan God. (Livitikus 17:14) Tia me lut fwin God el siyuk nu sesr in nunku moul a sra oanu ma el nunku ka.
18 Mea akfulat ke moul a sra el siyuk nu sesr? Oanu met Kristian, kut tia filiye moul lasr ke me sensen ke sripen oasr me insemwomwo su tuku ka. Kut arulanu karunganang moul lasr paenang kut kaifweung in taran tu in wangin me sensen ke moul in loom sesr a ke sitosa okwesr. (Duteronomi 22:8) Kut tia orekmakin paip, betel nut, ku kutena ono su kunausla nunuk lasr ke sripen me insemwomwo. (2 Korint 7:1) Ke sripen kut porongo God ke pal se ma el fwak ‘liyekomwosyung liki sra’ paenang kut tia etuk sra ku eis sra a filiye ke manosr. (Orekma 15:28, 29) Fwinne kut lungse moul, tusruktu kut tia nunku in molela moul lasr inge tu in kunausla ma sap lun God su ke ma inge akwanginye fwinsrak lasr nu ke moul ma patpat!—Mattu 16:25.
19 Ya me toasr nu sesr in akfulatye moul a sra oanu ma mutal? Mo tia! Nunku ke ma se inge. Ya sie me toasr nu sesr kut fwin sokosok liki cancer ke lung su tuku ke orekmakinyen paip? Ya sie me toasr nu sesr in sokosok liki nunuk a mano su sremla ke ono koluk? Ya sie me toasr nu sesr in sukosok liki AIDS, hepatitis, ku kutu mas su tuku ke etuk sra? Paye, orekma lasr in fwasr liki oiye koluk a me akkolukye mano kol nu ke insemwomwo lasr.—Isaia 48:17.
20 Nunku ke experience se inge. Ke yiu ekasr somla, ke sie eku sra suror liki mutan Met Lo se su putete ke lusen malem tulo tafwu paenang el wisella nu loom ono. Tukun taktu el tuni ma sikyuk nu sel, el longol ma el sromon nu sin sie met tutaf ke akmwuk laltal in kunausla awowo ke insiel. Meyen el etu nunuk lun Jeova ke ma moul su sonna isusla, paenang el tia lela eltal in uniye awowo ke insiel, a el fwak nu sin taktu: “Fwin el moul lela lan muta na we!” El tafwela in keok ke sra su sorola liki manol ke kais kutu pal, tusruktu tukun malem ekasr fwinne sonna pal el isusla ke sie awowo mokul su arulanu fokoko su ke pal inge el yiu 17 matwe tari. El aketeye: “Sromonyuk ma inge nu sin tulik nutik, a el engun meyen el tia sisila nu in nien sisi kutkut. El etu la kulansap lasr nu sin Jeova pa sripe siefwunnu paenang el moul” Paye, in srukye nunuk lun God ke moul tia me toasr ke sou se inge!
Kulansap Wikin Met lun Jeova Su Fwal a Takla
21 Tia kut mukena ekulla oiyen moul nu ke me enenu tu in fwal nu ke akmwuk lun God. Oasr met lun Jeova fwin fwalu se inge, a el lungse kut in kulansap nu sel wilultal. Ma inge wiskutla nu ke me enenu akakosr. Kut enenu in “kulansap nu sin Jeova wikin u lal su muta ye koko lun ngun mutal lal.
22 Ke ma inge, fuka met ke u lun God ku in akilenyuk? Fwal nu ke akmwuk su simusyukla in Baibel, elos inge arulanu lungse sie sin sie a elos arulanu akfulatye Baibel, a elos akfulatye en God, elos luti ke Togusrai lal, a elos tia ma lun fwal koluk se inge. (Mattu 6:9; 24:14; Jon 13:34, 35; 17:16, 17) Oasr alu siefwunnu fwin fwalu su srukye akul inge nu kemwa lun met Kristian paye—Met Lo lun Jeova!
23 Ya sie me toasr nu sesr in kulansap nu sin Jeova wikin met lal su muta ke u se? Mo na mo! Paye sie me sang na yok nu sesr kemwa in eis lungse a kasru lun sou lulap lun met Kristian brother a sister fwin fwalu nu fon. (1 Piter 2:17) Nunku ke sie luma oanu kom moula liki oak soko musalla a kom patpat in kof, a kaifweung na in kofkof. Ke pal se ma kom pulakin la wanginla ku lom a kom apkurun in tilli, sie pao el amakin komyuk nu ke sie oak. Aok, oasr kutu met su moul! Ke kom muta tari ke oak, kom a kutupa met komwos kaifweung in kal a filiye pa ke oak kutena met su komwos liye ke kof ke komwos kampare in kal som nu ke an mwes.
24 Ya kut tia oanu sie met ke me luma inge? Elos amakinkutla liki “kof” koluk lun fwal se inge nu ke “oak” soko lun Jeova su lumeyuk nu ke u lal fwin fwalu. Ke kut muta tari ka, kut kulansapu sie sin sie ke kut kasrusr som nu ke an “mwes” lun fwalu sasu sumwosmwos. Fwin ma upa lun moul oru kut in pulakin munas ke fwafwasyesr lasr ke inkanek sum nu we, kut arulanu sang kulo ke sripen oasr me kasru a me pwarak su tuku nu sin met Kristian wiesr su wi kut!—Soakas 17:17.
25 Fuka kutu met—su inse pusisel tusruktu srakna muta ke “kof”? Oasr kunokon lasr in kasrelos tu elos in muta pa ke u lun Jeova, paye? (1 Timote 2:3, 4) Elos enenu kasru tu in etu me enenu su God el siyuk. Kut enenu in ekla met fwakelik oaru ke Togusrai lun God. Kut fwa sramsramkin ke me lutlut toko mea eneneyuk nu ke ma inge.
Ya Kom Esam?
◻ Efu ku ma sap lun God tia toasr?
◻ Fuka kut ku in eis etauk lun God?
◻ Efu ku tia toasr in akfwalye moul lasr ke akmwuk lun God ke oiye sumwos a in eis ma paye lal?
◻ Mea nunuk lun God ke moul a sra el siyuk nu sesr?
◻ God el lungse kut in kulansap nu sel wikin su, a elos inge ku in akilenyuk fuka?
[Study Questions]
1, 2. Efu ku tia me lut fwin oasr me enenu su God el siyuk nu selos nu kemwa su lungse in kulansap nu sel fwal nu ke lungse lal?
3. Fuka Solomon el aketeye ke kas futoto me enenu su God el siyuk nu sesr?
4-6. (a) Mea kalme na paye lun kas Grik inge su langasyukla “toasr”? (b) Efu kut ku in fwak la ma sap lun God tia toasr?
7. Molela lasr oakiyuki nu ke mea?
8. Mea kalmen ‘eis etauk lun God’?
9. Mea kut ku in lotela kel Jeova su tuku nu ke buk lun ma orekla?
10, 11. (a) Mea ma puspis inge ke Jeova a akmwuk lal su kut tia ku in lutlutkin ke buk lun ma orekla? (b) Topuk nu ke kain in kusensiyuk fuka kut ku in konaok mukena in Baibel?
12. Fuka kom ku in aketeye efu tia toasr ku upa in eis etauk lun God a akmwuk lal?
13, 14. (a) Ke kut eis etauk lun God, kain in ekla fuka ke oiyen moul lasr eneneyuk? (b) God el siyuk tu kut in fwasr liki kain in orekma fokfok fuka?
15. Fuka me enenu su God el siyuk ku in toeni nu ka oiye su kut akkalemye nu sin kutu met a ke ma kut lalalfongi?
16. Aketeye efu tia me toasr in akfwalye moul lasr nu ke akmwuk lun God ke oiye sumwos a in eis ma paye lal?
17. Mea nunuk lun Jeova ke moul a sra?
18. Mea nunuk lun Jeova ke moul a sra el siyuk nu sesr?
19. Aketeye fuka kut ku in eis ma lane su tuku ke akfulat lasr ke moul a sra?
20. Fuka sie sou el eis insemwomwo ke sripen elos akfulatye ma God el nunku ke moul?
21, 22. (a) Jeova el lungse kut in kulansap nu sel wikin su? (b) Fuka kut ku in akilen met lun God su arulanu fwal ke orekma oanu sie u?
23, 24. Fuka kut ku in orekmakin me pupulyuk in akkalemye la tia toasr nu sesr in kulansap nu sin Jeova wikin met lal su fwal ke orekma nu kemwa oanu sie u?
25. (a) Kain in kunokon fuka oasr yurosr nu sin met nu kemwa su srakna muta in “kof” lun fwalu koluk se inge? (b) Kain in me enenu fuka su God el siyuk kut fwa sramsramkin ke me lutlut toko?
[Pictures on page 11]
Kut lutlut kel Jeova ke buk lun ma orekla a ke Baibel
[Credit Lines]
Crocodile: By courtesy of Australian International Public Relations; bear: Safari-Zoo of Ramat-Gan, Tel Aviv