Oiye Kulang Lun Met Kristian Ke Sie Fwalu Su Kitakatelik
“Ke ma inge, fwal nu sesr in eselos su ou inge, tu kut in met orekma yurolos ke ma paye.”—3 JON 8.
“TU wangin sie ma yurin metu ye fwatu mwo liki in mongo, a in nim, a in engun, tu ma inge fwa on yurol in orekma lal len nu kemwa in moul lal, su God el sang nu sel ye fwatu.” (Ekklisiastis 8:15) Ke kas se inge met Hibru se su orala met puspis in oasr ke u siefwunnu in pal meeta el fwakak nu sesr la Jeova el tia lungse mukena metu in insemwomwo a el ouyepa sang nu selos inkanek tu elos in ou inge. Ke lusen me sramsram nu kemwa lun metu sie kena pengpeng inmaslon metu in an nu kemwa pa in akinsemwomwoyelos sifwanu a suk me akengun.
2 Ke len inge kut moul ke sie pal su met puspis lungse me akengun elos arulanu kafofo ke sukok me akengun. Met puspis elos “lungselos sifwanu, . . . lungse me akengun yok liki lungse God,” oanu Baibel el fwak. (2 Timote 3:1-4) Paye, ma inge sie me akkoluk yok ke ma Jeova el akmwuki. Fwin orekma in sukok me akengun pa yok emeet, ku fwin orekma in akinsemwomwoyelos sifwanu pa nien sun lun sie met pal nu kemwa, na wangin insemwomwo na paye, a ‘ma nu kemwa ma losrongten a ukweyen engu.’ (Ekklesiastis 1:14; 2:11) Ke sripe se inge fwalu misinge nenela ke met asor, su kol nu ke ma upa yok lun an’u. (Soakas 18:1) Met puspis elos tia lalalfongi sie sin sie a kitakatelik ke sripen siena sruf, tun, lutlut, ku me kasrup.
3 Fuka siena ma sikyuk na paye fwin metu elos etawi orekma lun Jeova nu sin kutu met—in kulang, akola in sang, a mwo! El akkalemye na paye la key ke me insemwomwo na paye tia tuku ke orekma in akinsmwomwoye kut sifwanu. A, pa inge key: “Insemwomwo in sang yok liki insemwomwo in eis.” (Orekma 20:35) Tu in konaok insemwomwo na paye, kut enenu in kutangla liki kutena me kutong su saap kosroila inkanek lasr. A kut enenu in loang yok nu selos su kulansap nu sin Jeova oanu kut. Arulanu yok sripe in akos kai se inge: “Ke ma inge fwal nu sesr in eselos su ou inge, tu kut in met orekma yurolos in ma paye.” (3 Jon 8) In akkalemye kulang nu selos su fwal in eis, ke ku lasr nu kemwa, wise nu sesr ma lane ke inkanek luo—el sang ma lane nu sin met sang a nu sin met su eis. Na su, met inge su fwal su kut enenu in “eis ke kulang’?
“Fwasr Nu Yurin Met Mukaimtal a Mutan Katinmas”
4 Sou fukoko a moul in payuk su insemwomwo pal nu kemwa arulanu supus misinge. Fwasrelik yokyokelik a mutan puspis su puteteyuk fwinne wangin mokul tumalos arulanu puseni a ma inge ekulla oiyen moul lun sou. Ke sripe se inge, met puspis su ekla Met Lo lun Jeova ke yiu ekasr somla elos tuku ke sou musalla. Fwin tia devorce na elos tia muta yurin mutan kielos ku mokul tumalos, ku wangin papa ku nine in loom. In toeni nu ke ma inge, oanu Jisus el fwak, ma paye su el luti ku in kol nu ke kitakatelik lun sou puspis.—Mattu 10:34-37; Luk 12:51-53.
5 Arulanu akkeye insiesr in liye met sasu alos tu ku ke ma paye, a pal nu kemwa kut akkeyelos ke kas in akkeye lal Jisus inge: “Payenu Nga fwak nu sumwos, tu wanginu met su filiye loom, ku ma lel, a ma loul, ku nine ku papa, ku tulik, ku fwal, keik, a ke mwosasu a el fwa eis pal siefok in pal se inge, loomu, a ma lel a ma loul, a nine, a tulik, a fwal, wi kolyai, a in fwal se su e fwa tuku moul ma patpat.”—Mark 10:29, 30.
6 Ke ma inge, su, ‘ma lel, ma loul, a tulik’ inge? In liye pisen met puspis in Kingdom Hall, pal nu kemwa siefok kutu ku pus liki, su pangnolos sifwanu brother ku sister, tia mokle sie met in nunku pal nu kemwa la pa inge ma lel ku ma luol, ku nine kiel a tulik. Nunku ma inge: Met tumal lutlut Jemes el akismakinye kut la kut fwin lungse alu lasr in akinsemwomwoye Jeova, na kut ‘enenu in fwasr yurin met makaimtal a mutan katinmas ke ongoiyelos, a sifwanu kurungikomyung in tia oasr tunum ke fwalu.’ (Jemes 1:27) Kalmen ma inge pa kut enenu in tia lela oiye koluk lun fwalu se inge ke insefulat ke sripen me kasrup, a pulakin la u lasr fulat liki u lalos in kaliye srungal lun pakoten lasr nu sin “met makaimtal a mutan katinmas.” A, kut enenu in akola in sang nu selos pal in asrouki a oiye kulang lasr.
7 In akkalemye kulang nu sin “met makaimtal a mutan katinmas” tia kalme la kut sang pal nu kemwa ma wangin selos in ikwe. Sou puspis su oasr papa se na ku nine se na su liaung sou lal tia pal nu kemwa elos sikasrup. Tusruktu, asrouki mwo, moul in sie sou, asrouki nu sin kutu met su matwe oanu sie, a sramsram inmaslon met ke ma lun ngun —ma inge nu kemwa arulanu yok sripe ke moul lun sie met. Ke ma inge, in esam, tia kalme la kut sramsram ke sie kofwo mwomwo, a ngun in lungse a inse siefwunnu pa yok emeet, fuka sie me insemwomwo, meyen kutupal, fwinne “met makaimtal a mutan katinmas” elos akkalemye kulang lalos nu sin met Kristian wielos!—Srike liye 1 Togusra 17:8-16.
Ya Oasr Met Fwafwasyesr Inmaslomwos?
8 Kut moul misinge ke sie pal su met puspis elos fwafwasyesr in an nu kemwa a muta we. “Pus liki 100 million sin met fwin fwalu nu fon elos muta ke mutanfwal puspis su elos tia citizen ka, a 23 million selos som liki an selos tia ke sripen lungse lalos.” pa inge World Press Review el fwak. Fwokin ma inge pa, in an puspis, yokna ke siti lulap puspis, congregation puspis lun Met Lo lun Jeova meet su oasr na met lun an se, na misinge nenela ke met saye su tuku ke kain in an nu kemwa fwin fwalu. Saap ma inge paye pa ke an sum. Fuka, nunuk lasr nu ke “met saye” a “met fwafwasyesr” su fwalu se inge pangnolos ou inge, su kas lalos, fasin, a oiyen moul tia oanu kut?
9 Lela kut in tia srukye kain in nunuk koluk nu sin met saye a oru kut in pulakin la kut mukena oasr sumwos in etu ma paye liki met inge su tuku liki an kut nukin ku an lun met Pegan; ku lela kut in tia pulakin la met sasu se inge tia fwal in akkalemye ma elos nunku ke mokuikui in Kingdom Hall ku kutu ma lun congregation. Met sap Poul el enenu in akismakinye kutu nu sin met Ju Kristian in pal meeta su srukye kain in nunuk inge, su tia fwal nu selos in ou inge; aok lungkulang lun God pa orala met nu kemwa in eis moul. (Rom 3:9-12, 23, 24) Kut enenu in engun meyen lungkulang lun God sun met puspis misinge su in pal meeta wangin pal mwo in long mwosasu. (1 Timote 2:4) Fuka kut ku in akkalemye la insemwomwo lasr nu selos arulanu paye?
10 Kut ku in akos kas in kai lal Poul: “Komwos in eis sie sin sie, aok, oanu Kraist el ouyepa eis komwos, nu ke mwolanu lun God.” (Rom 15:7) In etu la oiyen moul lun met puspis su muta in an saye tia mwo liki oiyen moul lasr, ma inge mokle kut in akkalemye kulang nu selos a nunuk yok fwin oasr ku lasr in oru ou inge. Kut enenu in paingnulos su muta inmaslosr, nunkelos oanu “el su isusla yen sesr,” a “lungselos oanu kut sifwanu.” (Livitikus 19:34) Saap ma inge tia fwusesr in oru, tusruktu kut e fwa kutangla kut fwin esam kai se inge: “A komwos in tia oanu luman fwal se inge, a komwos in ekla ke aksasu lun nunuk lomwos, tu komwos in srike mea lungse lun God, su mwo a me akinsemwomwo a sumwosmwoslanu.”—Rom 12:2.
Epeis Nu Sin Met Mutal
11 Elos nu kemwa su fwal nu ke nunuk yok a oiye kulang lasr pa met matu Kristian su oru orekma yok tu elos in kasru kut ke ma lun ngun. Jeova el orala sie akmwuk mwo ke me sang nu sin met tol a met Livai fwin an Israel in pal meeta. (Oekyuk 18:25-29) Ke century se meet, met Kristian nu kemwa ouyepa sapkinyuk in kurunganang a liaung elos nu kemwa su kulansap nu selos ke ma mwo. Me sramsram in 3 Jon 5-8 wise nu sesr pitse ke moul futoto ke sripen lungse inmaslon met Kristian in pal meeta.
12 Met sap Jon su arulanu matou el arulanu aksaokye a kaksakin kulang su Gaius el akkalemye nu sin met fwafwasyesr su supweyukla in oru muteta nu ke congregation. Brother inge nu kemwa—wekunang Demetrius, su wis gospel—Gaius el tia etelos ku elos oanu met saye sel. Tusruktu Gaius el wiselos ke kulang meyen ke “E se [God] elos fwasr.” Jon el fwak kas inge: “Ke ma inge fwal nu sesr in eselos su ou inge, tu kut met orekma yurolos ke ma paye.”—3 Jon 1, 7, 8.
13 Ke len lasr misinge, ke u lun Jeova, oasr met puspis su kaifweung in orekmakin moul lalos na paye in kasru met lili wielos. Wikin ma inge pa met fwafwasyesr, su orekmakin kais sie wik in musaiyuk congregation puspis; missionary puspis, su likiye sou a kamwuk lalos tu elos in ku in luti in an saye; elos su kulansap in Bethel ku ofus puspis, su kisekin moul lalos ke orekma tu elos in ku in kasru orekma lun forfor fwin fwalu nu fon; a elos su wi ke orekma lun pioneer, su orekmakin pal yok lalos sifwanu a ku lalos ke orekma lun forfor. Arulanu kalem, met inge nu kemwa elos oru orekma yok, tia ke sripen kutena mwolanu ku ma lane, a ke sripen lungse nu sin met lili Kristian a nu sin Jeova. Arulanu fwal nu sesr in etawi elos ke sripen orekma mutal lalos a arulanu fwal nu sesr in ‘wiselos ke kulang.’
14 Kut fwin “esalos ke kulang kain in met inge,” met sap Jon el fwak la, “kut ekla met orekma yurolos ke ma paye.” Ke ma inge kut ekla met Kristian mwo. Meyen wikin orekma lun met Kristian pa orekma mwo yurin met wielos in lalalfongi. (Soakas 3:27, 28; 1 Jon 3:18) Oasr pa ma lane ke inkanek saye. Ke pal se ma Martha a Mary elos esel Jisus in muteta nu in loom selos, Martha el lungse in ekla sie met liaung mwo ke el kafofo ke “ma puspis” tu lan ku in sang nu sel. Mary el akkalemye kulang ke inkanek saye. “El muta sisken nien Leum, a long kas lal,” a Jisus el kaksakunul ke ma el sulela in oru “ma mwo.” (Luk 10:38-42) Sramsram a asrouki nu selos su oasr experience puspis ke lusen yiu puspis pal nu kemwa pa inge ma yok ke sie fong in asrouki nu selos.—Rom 1:11, 12.
Ke Sie Pal Saok
15 Fwinne met Kristian paye elos tia fwasr tukun kutena me akfulat ku fasin lun fwalu, tusruktu oasr pal elos tukeni nu sie a engunkin asouki lun sie sin sie. Ke sie me pupulyuk, Jisus el wi ke sie kofwo in mare fwin an Cana a el sang kasru ke insemwomwo lun met we ke pal se ma el oru menmen se meet lal we. (Jon 2:1-11) Oupanu ke len lasr, oasr pal in engun lun met lun Jeova oanu meet, a me akfulat fwal a kofwo ku in toeni nu ke ma inge. Tusruktu, fwinne ou inge, mea ma fwal su kut in oru?
16 Ke lutlut lasr ke Baibel, kut lotela tari ke oiye su fwal nu sin me Kristian, a kut fwasr tukun ma inge pal nu kemwa. (Rom 13:12-14; Galetia 5:19-21; Efesus 5:3-5) Kofwo nu kemwa, fwinne ke pal in mare ku kutu sripe, ma inge tia sang sukosok nu sesr in som liki oiyen moul Kristian lasr ku oru kutena orekma su kut tia oru meet; ku in fwasr tukun fasin lun sie an su kut muta. Pus ke ma inge tuku ke alu kikiap ku alialu, a kutu orekma nu ka tia fwal nu sin met Kristian.—1 Piter 4:3, 4.
17 Kut fwin ridi Jon 2:1-11, fwusesr nu sesr in etu la sie kofwo lulap pa orek we a sie u lulap lun met pa oasr we. Tusruktu, Jisus a met tumal lutlut lal elos “met suleyuku” elos tia tuku na fwinne wangin me solsol ku fwinne luman kutu selos sou lun met su mare. Ouyepa kut ku in ridi la oasr selos su “kulansap” a oasr pa “leum lun kofwo” su kol ke orekma a ke kutena ma su elos enenu in kitakut. Ma inge nu kemwa akkalemye la kofwo se inge arulanu fwal a takla ke ma nu kemwa. Me sramsram inge aksafyeyukla ke kas se ma akkalemye ma Jisus el oru ke kofwo, in “fwakak mwolanu lal.” Ya el ku in sulela in wi ke kofwo se inge fwin ma inge sie kofwo koluk? Aok el tia.
18 Ke ma inge, oiye fuka kut enenu in akkalemye ke kutu kofwo su kut akola? Kut enenu in esam la nien sun lasr paenang kut eis met saye ke kulang pa kut lungse “in met orekma yurolos ke ma paye.” Ke ma inge, tia fwal na in fwak toeni ku kofwo lun “Met Lo.” Sie kusensiyuk ku in fwal in siyuk, Ya ma inge sie met lo ke oiyesr a ke ma kut lalalfongi? Lela kut in tia nunku ke kutena pal oanu kofwo se pa pal mwo lasr in som nu ke orekma lun fwalu, “lung lun ikwe, a lung lun muta a mwolanu losrongten lun moul.” (1 Jon 2:15, 16) A, kain in pal se inge enenu in akkalemye kunokon lasr oanu sie Met Lo lun Jeova, a kut enenu in etu na paye la kutena ma kut oru ma inge sang mwolanu a akmutalye Jeova.—Mattu 5:16; 1 Korint 10:31-33.
‘Komwos in Kulang Nu Sin Sie Sin Sie a Tia Torkaskas’
19 Luma a ma sikyuk fwin fwalu se inge el tafwela na in akkolukyeyuk a met puspis elos kitakatelik, paenang kut enenu in oru ma nu kemwa in akkeye me kapur su oasr yurin met Kristian paye. (Kolosse 3:14) Ke sripe se inge kut enenu in “lungse sie sin sie” oanu Piter el kaifwe nu sesr in oru. Na, el tafwela: “Komwos in sama sie sin sie a tia torkaskas.” (1 Piter 4:7-9) Ya kut akola in akkalemye oiye kulang nu sin met lili wiesr, in oru mwo a in kasrelos? Ku, ya kut torkaskas fwin pal se inge tuku? Kut fwin oru ou inge, na kut oru in wangin sripe me insemwomwo su kut ku in eis a kut tula me sang ke insemwomwo su tuku ke orekma mwo.—Soakas 3:27; Orekma 20:35.
20 Asrouki a orekma yurin met Kristian wiesr, in kulang nu sin sie sin sie, ku in wise me insemwomwo lulap su wangin ma oanu. (Mattu 10:40-42) Nu sin met nu kemwa su akkalemye ou inge Jeova el mwolela nu selos la “loom sin God e fwa muta yurolos. Elos fwa tia sifwil musrensral, a tia sifwil malu.” Fwin sie met el muta ke loom sin Jeova na el engunkin kulang a me loeyuk lal. (Fwakyuk 7:15, 16; Isaia 25:6) Aok, ke pal na futoto oasr fwinsrak in engunkin kulang lun Jeova ma patpat.—Sam 27:4; 61:3, 4.
Ya Kom Ku In Aketeye?
◻ Mea ma inge su kut enenu in tia pilesru kut fwin lungse in konaok insemwomwo na paye a inse misla?
◻ Su “met mukaimtal a mutan katinmas,” a fuka kut ku in “kurunginelos”?
◻ Nunuk fuka kut enenu in akkalemye nu sin “met saye” a “met fwafwasyesr” su muta inmaslosr?
◻ Su met inge su fwal in eis nunuk yok ke len lasr?
◻ Fuka pal in asrouki ku kofwo ku in akkalemye ngunin kulang na paye?
[Study Questions]
1. Mea me sang yok emeet su Met Orekutla el sang nu sin metu?
2. (a) Fuka metu elos akkolukye ma Jeova el akmwuki nu selos? Mea fwokin ma inge?
3. Fuka kut ku in konaok insemwomwo na paye a inse misla?
4. Kain in ma ekla fuka ke oiyen sou ku in liyeyuk nu sin Met puspis lun Jeova?
5. Kain in kas fuka Jisus el oru su oanu me akkeye nu selos nu kemwa su oasr sou su kitakatelik?
6. Fuka kut ku ekla oanu ‘ma lel, ma loul, nine, a tulik nutin “met mukainmtal a mutan katinmas” su muta inmaslosr?
7. (a) Mea nien sun na paye ke kut akkalemye kulang nu sin “met mukaimtal a mutan katinmas? (b) Su ku in kasru pa in akkalemye kulang lun met Kristian?
8. Kain in ma ekla fuka ku in liyeyuk ke congregation puspis lun Met Lo lun Jeova?
9. Kain in me sruf fuka ku in oru kut in putatla fwin ke nunuk lasr nu sin “met saye” a “met fwafwasyesr” su tuku nu ke congregation lun met Kristian?
10. Fuka kut ku in akkalemye la kut kulang na paye nu sin “met saye” su muta inmaslosr?
11, 12. Kain in nunuk yok fuka etukyung nu sin kutu met kulansap lun Jeova ke pal lun (a) Met Israel in pal meeta (b) ke century se meet?
13. Su inmaslosr ke len lasr yok na fwal in ‘eis kulang’?
14. (a) Efu kut ku in fwak la kut ekla met Kristian mwo ke pal se ma kut akkalemye kulang nu sin met oaru? (b) Efu Jisus el fwak la Mary el sulela “ma mwo”?
15. Kain in pal fuka oru met lun Jeova in engun?
16. Kain in akmwuk fuka ke oiye fwal oasr yurosr fwinne ke pal in kofwo?
17. (a) Mea me akpayeye su akkalemye la kofwo in mare fwin an Cana arulanu fwal a takla? (b) Mea akkalemye la Jisus el insese ke kofwo se inge?
18. Kain in nunuk sumwos fuka kut enenu in srukye ke kutena kofwo ku toeni?
19. Efu kut enenu in akkalemye “kulang sie sin sie a tia torkaskas”?
20. Kain in me insemwomwo fuka sano kut fwin kut akkalemye kulang ke fwal se inge su kitakatelik?
[Pictures on page 27]
Ke pal lun me akengun kut ku in akkalemye kulang nu sin met fwafwasryesr, tulik nu kemwa su wangin papa, elos su oru orekma lun forfor pal nu kemwa, a kutupa met su muteta nu yurosr