Ma Fwackyuk Nuh Sel John

Ke pacl se mwet sap John el oasr ke tuhka se pahngpahng Patmos ke srihpen el sruhoh we, Jesus el ahkkahlwemye nuh sel aruhruhma 16, kuh petsac ke ma ac fah sikyak ke pacl fahsruh uh. Aruhruhma pucspucs inge ahkkahlwemye lah fuhkah in ahkmuhtahlye inen Jeova, Tohkohsrahi lal ac fah tuhkuh, ac ma luhngse lal in orek fin facluh oacna inkuhsrao.

Ke sie aruhruhma, John el liyacl Jeova el muhta fin tron wolacna lal inkuhsrao, ac rauniyucklac el sin mwet elder 24 suc nukum nuknuk fasrfasr ac tefuro gold oan fin sifacltahl. Sahrom uh sahrmelihk, ac ngihrngihr, ac puhsren puhlahl tuhkuh liki tron. Mwet elder 24 inge epahsr ye muhtuhn Jeova ac alu nuh sel. Ke sie pac aruhruhma, John el liye u na luhlahp se ma tuhkuh ke muhtuhnfacl nuhkewa, ke sruf nuhkewa, ac ke kain in kahs nuhkewa suc alu nuh sin Jeova. Jesus, suc lamb luhn God, el pa karuhnguhnuhltahl ac pwacnuhltahllah nuhke unon in kof in moul. Tok, ke sie pac aruhruhma, Jesus el muhtwacwacack in kol oacna Tohkohsrah inkuhsrao, wi mwet elder 24. Ke aruhruhma tohkoh, John el liye lah Jesus el mweun lain dragon, suc Satan ac lipufacn koluk lal ma pahngpahng demon. Jesus el sisuhltahllah liki inkuhsrao nuh facluh.

Tohkohyang, John el liye Lamb ac mwet 144,000 uh tu Finohl Zion. El liye pac sie lipufacn sohksohk oelucng yen engyeng uh, ac fahkwack nuh sin mwet uh in sahngweng sin God ac kaksakuhnuhl.

Ke aruhruhma tohkoh, mweun luhn Armageddon orek. Ke mweun se inge, Jesus ac un mwet mweun lal kuhtanglah liki oakwuck koluk lal Satan inge. Ke aruhruhma sahflah, John el liye lah oasr mislac ac inse sefanna inkuhsrao ac facluh. Satan ac mwet nuhkewa suc weluhl kuhnahosyucklac nohfohn. Elos nuhkewa suc oasr inkuhsrao ac mwet nuhkewa facluh ahkfuhlwactye inen Jeova ac el muhkwena pa eltahl alu nuh se.