KUTU PA ME AKUTEYE
Fuka Kas Palu lal Daniel el Akkalemye ke Tuku lun Messaia
MET palu Daniel el moul yea 500 kutu meet liki isusla lun Jisus. Tusruktu, Jeova el akkalemye nu sel Daniel etauk su fwa sang kasru nu ke pal se su Jisus el fwa akmusrala, ku srusrngiyuki, oana sie Messaia, ku Kraist. Kas inge akkalemyeyuk nu sel Daniel: “Ke ma inge etu a akilenye, tu liki pal se ke masap illa in sifwil oru a musai Jerusalem nu ke tuku lun Messaia, su Leum, fwa wik itkosr, a wik onngoul luo.”—Daniel 9:25.
In etu ke pal se su Messaia el tuku, ma se meet kut enenu in etu ke mutaweyen pal su kol nu ke sikyak lun Messaia. In fwal nu ke kas palu, pal se inge pa “liki pal se ke masap illa in sifwil musai Jerusalem.” Nge pal inge su “masap illa liki” el sikyak? In fwal nu ke met sim lun Baibel inge Niemaia el akkalemye, masap illa liki in sifwil musai pot lun an Jerusalem in “yea se aklongoul lal Artaxerxes togusra.” (Niemaia 2:1, 5-8) Met sim puspus ke me sramsram lun metu elos fwak mu yea 474 B.C.E. pa yea se meet lal Artaxerxes ke kolyuk lal. Ke ma inge, yea aklongoul ke kolyuk lal pa in yea 455 B.C.E. Inge kut etu tari ke mutaweyen pal ke kas palu lal Daniel ke Messaia, a yea se inge pa 455 B.C.E.
Daniel el akkalemye la putaka lusen pal su kol nu ke tuku lun “Messaia su Leum.” Kas palu se su el akkalemye ke “wik itkosr, a wik onngoul luo”—el orala wik 69 nufon. Putaka lusen pal se inge? Oasr met puspus su lungasla Baibel elos akkalemye mu lusen pal inge, el tia wik ke len itkosr, a el wik ke yea puspus. Kalme pa, kais sie wik el lumeyuk nu ke yea itkosr. Kain in akwuk inge ke wik lun yea itkosr, el eteyuk sin met Ju in pal meeta. Ke sie me pupulyuk, elos akfulatye yea lun Sabbat ke yea akitkosr nukewa. (Exodus 23:10, 11) Ke ma inge, kas palu ke wik 69, el oapana kais sie pal 69 su oasr yea itkosr ke kais sie, ku oasr yea 483 nufon.
Ke ma inge kut enenu in oekla ingena. Kut fwin oek mutamwauk ke yea 455 B.C.E., yea 483 el e safla ke yea 29 C.E. Pa inge yea se su Jisus el baptaisla a el ekla Messaia!a (Luk 3:1, 2, 21, 22) Ya me akpayeyen kas palu inge lun Baibel el tia me akkeye nu ke lulalfongi lasr?
a Mutamwauk ke yea 455 B.C.E. nu ke 1 B.C.E. el oasr ke lusen yea 454. Mutamwauk 1 B.C.E. nu ke 1 C.E. el oasr ke lusen yea se (wangin yea zero). A mutamwauk ke yea 1 C.E. nu ke 29 C.E. el oasr ke lusen yea 28. In toeni numbu tolu inge (454+1+28) el oasr ke yea 483. Jisus el “sisila” ku mise in yea 33 C.E., ke lusen wik ak70 lun yea puspus. (Daniel 9:24, 26) Ridi buk inge Loang Akmwoye nu ke Kas Palu lal Daniel! sapta 11, a Etauk Yok ke Ma Simusla, Volume 2 ke kas English, sra 899-901. Buk luo inge orekla sin Met Lo lun Jeova.