Kom Tu Na Ku ke Alu Paye

1, 2. Kusensiyuk fuka kom enenu in siyuk sum sifwana tokin kom resign liki sie alu kikiap, a efu ku kom nunku mu ma inge yok sripe?

FWIN kom koneak mu oasr poison su sisila nu in an sum ke inkanek lukma, a ke sripe se inge el aksensenye moul lun metu. Mea kom fwa oru? Wangin alolo ka la, kom fwa som liki an san kom fwin ku in oru. Tusruktu fwinne kom oru tari ma inge, srakna oasr kusensiyuk su eneneyuk in siyukyak sum sifwana, ‘Ya Nga akkolukyeyuk tari ke poison inge?’

² Oiya se inge sikyak pa nu ke alu kikiap. Baibel el luti la alu kikiap el akkolukyeyuk ke me luti a orekma fokfok. (2 Korint 6:17) Pa inge sripe yok paenang kom enenu in illa liki “Babulon Lulap,” u lun alu kikiap nukewa fwin fwalu. (Fwakyuk 18:2, 4) Ya kom oru tari ma inge? Fwin aok, arlana fwal in kaksakinyuk kom. Tusruktu oasr ma puspus eneneyuk liki na kom in srikomla ku in resign liki sie alu kikiap. Tokin ma inge, kom ku in siyuk sum sifwana, ‘Ya srakna oasr kutena akwuk ke alu kikiap su oan in nga?’ Nunku ke kutu me pupulyuk.

MA SROLELA PUSPUS A ALU NU SIN PAPA A NINE MATOU NUKEWA SU MISE TARI

3. (a) Mea Baibel el akkalemye ke orekmakinyen ma srolela? A efu ku upa nu sin kutu met in eis nunak lun God ka? (b) Mea kom enenu in oru ke kutena ma srolela lom su kupasr nu ke alu kikiap?

³ Oasr kutu met su oasr ma srolela puspus ku loang lun ma srolela ke loom selos. Ya ma inge oasr pa yurum? Fwin aok, saap kom ku in pulakin mu tia sumwos in pre nu sin God fwin wangin kain in me kasru su ku in liyeyuk. Saap kom lungse na paye kutu ma srolela inge. Tusruktu God pa fwakak ke inkanek su kut enenu in oru ke alu lasr nu sel, a Baibel el luti la God el srunga kut in orekmakin ma srolela. (Exodus 20:4, 5; Sam 115:4-8; Isaia 42:8; 1 Jon 5:21) Ke ma inge kom ku in tu na ku ke alu paye fwin kom kunausla ma srolela lom inge su orekmakinyuk ke alu kikiap. Paye la, nunak su enenu in oasr in kom ke ma inge pa in oana nunak lun Jeova nu ka​—in oana ma se su “me srungeyuk.”​—Duteronomi 27:15.

4. (a) Kut etu fuka la orekma in alu nu sin papa a nine matou nukewa su mise tari el wangin sripe? (b) Fuka Jeova el sapkin met kulansap lal in tia wi ke kutena orekma lun inutnut?

⁴ Orekma in alu nu sin papa matou a nine matou nukewa su mise tari el orek pa ke alu kikiap puspus. Meet liki elos lotela ma paye, kutu met elos lulalfongi mu met mise oasr etauk yurolos a elos oasr in sie an su tia liyeyuk a elos ku in kasru ku akkolukye met moul. Saap in pal meeta kom arlana lungse in akenganye a akmisye papa a nine matou nukewa kiyom su mise tari. Tusruktu in oana ke ma kom lotela ke Sapta 6 ke buk se inge, la wangin etauk lun met mise a elos tia moul ke kutena an. Ke ma inge, wangin sripe in orek sramsram nu selos. Kutena kas ku pusra su longyuk ku luma su liyeyuk mu tuku sin met kom lungse su mise tari, ma inge tuku na paye sin dimon ku lipufan koluk puspus. Ke ma inge, Jeova el sapkin nu sin met Israel elos in tia suk in sramsram nu sin met mise ku in wi ke kutena kain in orekma lun inutnut.​—Duteronomi 18:10-12.

5. Mea kom ku in oru fwin in pal meeta kom orekmakin ma srolela ku kom alu nu sin papa a nine matou puspus su mise tari?

⁵ Fwin orekmakinyen ma srolela ku alu nu sin papa a nine matou nukewa su mise tari el sie inkanek in orekma in alu lom meet, mea kom ku in oru? Ridi a sifwil pa nunku ke ma simusla puspus in Baibel su akkalemye ka la mea nunak lun God ke ma nukewa inge. Pre nu sin Jeova len nukewa siyuk ke lungse lom in tu na ku ke alu paye, a siyuk sel in kasre kom in orekmakin nunak lom oana el.​—Isaia 55:9.

CHRISTMAS​—TIA AKFULATYEYUK SIN MET KRISTIAN IN PAL MEETA

6, 7. (a) Mea metu fwak mu elos akfulatye ke len in Christmas, a ya met tuma lutlut lun Jisus in century se meet elos akfulatye ma inge? (b) Me akfulat puspus ke len in isusla el kupasr nu ke mea in len lun met tuma lutlut lun Jisus in pal meeta?

⁶ Akwuk in alu lun sie met el ku in akfokfokyeyuk ke alu kikiap ke inkanek lun me akfulat puspus. Ke sie me pupulyuk, nunku ke Christmas. Christmas el akkalemyeyuk mu el me akesmakin se nu ke len in isusla lun Jisus Kraist, a alu nukewa su fwak mu elos met Kristian elos akfulatye ma inge. Tusruktu, wangin me akpayeye nu ka la met tuma lutlut lun Jisus in century se meet elos akfulatye kain in me akfulat inge. Oasr sie buk su akkalemye kas inge: “Ke lusen yea luofoko tokin isusla lun Kraist, wangin met etu, a met ekasr yena elos nunku ka, in suk ke len se su el isusla na paye ka.”​—Sacred Origins of Profound Things.

⁷ Fwinne met tuma lutlut nukewa lun Kraist elos etu ke len na paye se ke isusla lal, tusruktu elos tia akfulatye ma inge. Efu? Meyen, in oana ke sie buk el akkalemye, la met Kristian in century se meet elos “nunku ke me akfulat nu ke kutena len in isusla lun met el fasin se su tuku sin met pegan.” (The World Book Encyclopedia) Me akfulat luo ke len in isusla su akkalemyeyuk in Baibel pa ke len lun met kol luo su tia alu nu sin Jeova. (Genesis 40:20; Mark 6:21) Me akfulat nu ke len in isusla el orek pa in sang akfulatye god kikiap puspus lun met pegan. Ke sie me pupulyuk, ke len 24 lun May met Rom elos akfulatye len se inge nu ke len in isusla lun god mutan se su pangpang Diana. Ke len tok a, elos akfulatye len in isusla lun god fwat se lalos, su pangpang Apollo. Ke ma inge, me akfulat ke len in isusla el kupasr nu ke akwuk lun met pegan, tia ke akwuk lun met Kristian.

8. Akuteye la efu ku me akfulat ke len in isusla el kupasr nu ke alialu.

⁸ Oasr sie pa sripe su paenang met Kristian in century se meet elos tia akfulatye len in isusla lal Jisus. Met tuma lutlut lal elos etu la me akfulat ke len in isusla el kupasr nu ke orekma lun alialu. Ke sie me pupulyuk, oasr met Grik a met Rom puspus in pal meeta elos lulalfongi mu oasr sie met in ngun el tuku ke len se su sie met el isusla a met in ngun inge el sang me kasru ke lusen moul lun met se inge. Oasr sie buk el akkalemye: “Met in ngun inge el kupasr nu ke inkanek sakuruk nu sin sie god su la len in isusla lun sie met.” (The Lore of Birthdays) Paye la Jeova el tia akinsemwomwoyeyuk ke kutena me akfulat su kupasr kin Jisus nu ke orekma in alialu. (Isaia 65:11, 12) Ke ma inge, efu ku met puspus elos akfulatye Christmas?

MUTAWEYEN CHRISTMAS

9. Efu ku len 25 ke December el sulosolla in orek oana len in akfulatye isusla lun Jisus?

⁹ Oasr foko foko yea somla tokin pal se su Jisus el moul fwin fwalu metu mutamwauk in akesmakinye len in isusla lal ke December len 25 nukewa. Tusruktu tia pa inge len se su Jisus el isusla, meyen ma inge sikyak ke malem lun October.a Ke ma inge efu ku len 25 ke December el sulosolla? Saap oasr kutu met su ekin mu elos met Kristian elos “lungse in oru ma inge ke len se su orek me akfulat lun met Rom ke ‘len in isusla lun fwat su tia ku in kutongyuki.’” (The New Encyclopædia Britannica) Ke pal in musrisr, ke pal se fwatu nunkeyuk mu arlana munasla, met pegan elos oru me akfulat puspus in sang orala fwatu su sropon fol a kalem inge in foloku liki fwufwasryesr lal nu yen loeloes. Len 25 ke December el motkeyuk mu pa inge len se su fwatu el mutamwauk in foloko. Ke inkanek yok su orek in sang kufusla nunak lun met pegan puspus, paenang met kol puspus lun alu elos oru me akfulat inge a elos srike in oru ma inge in oana akwuk lun “met Kristian.”b

10. In pal somla, efu ku kutu met elos tia akfulatye Christmas?

¹⁰ Eteyuk tari ke lusen pal loeloes la mutaweyen Christmas el tuku ke akwuk lun met pegan. Ke sripen mutaweyen ma inge el tia fwal nu ke ma simusla, paenang oasr masap fwin an England su orekla in tia akfulatye Christmas a in kutu an in an Merika ke lusen century ak 17. Kutena met su tia orekma a muta na ke loom selos ke len in Christmas elos sapkinyuk in moli penalty. Tusruktu, tia pat, fasin puspus su orek in pal meeta elos sifwil pa folokunak, a oasr kutu pa ma sasu su weang ka. Christmas el sifwil pa ekla sie me akfulat lulap, a srakna orek ouinge nu in an puspus. Tusruktu, ke sripen oasr kupasr lun Christmas nu ke alu kikiap, paenang met nukewa su lungse in akinsemwomwoye God elos tia enenu in akfulatye ma inge ku kutu pa me akfulat su tuku ke akwuk lun alu lun met pegan.c

YA MUTAWEYEN ME AKFULAT PUSPUS YOK SRIPE NA PAYE?

11. Efu ku kutu met elos akfulatye me akfulat puspus, tusruktu ma yok sripe fuka kut enenu in nunku yok ka?

¹¹ Kutu met elos insese ka la me akfulat puspus inge oana Christmas el tuku ke fasin lun met pegan tusruktu elos srakna nunku mu tia koluk in akfulatye ma inge. Paye la, met puspus elos tia nunku ke alu kikiap ke elos akfulatye me akfulat puspus inge. Me akfulat puspus inge el sang pa pal mwomwo nu sin met in sou in fototo nu sin sie sin sie. Ya pa inge ma kom pula? Fwin aok, saap lungse ke sou, a tia lungse ke alu kikiap pa oru kom in upakin in tu na ku ke alu paye. Kom lulalfongi la Jeova, el su orala akwuk nu ke sou, el lungse kom in orekmakin akwuk fototo a mwo nu sin sou lom. (Efesus 3:14, 15) Tusruktu kom ku in akkeye kain in fototo inge ke inkanek su God el insemwomwo ka. Ke ma puspus su kut enenu in nunku yok ka, met sap Poul el simusla: “Srike ma su akinsemwomwoye Leum.”​—Efesus 5:10.

12. Sang me pupulyuk nu ka la efu ku kut enenu in fwasr liki fasin a me akfulat puspus su tuku ke ma fokfok.

¹² Saap kom nunku mu mutaweyen me akfulat puspus el tia kupasr nu ke inkanek su ma inge akfulatyeyuk ka ke pal inge. Ya mutaweyen me akfulat puspus yok sripe na paye? Aok! In oana me pupulyuk: Fwin kom liye candy ke on ke sie luf. Ya kom lungse in srukak candy inge a kangla? Paye la kom tia lungse in eis kang ma inge! Meyen candy inge el fokfokla. In oana ke candy inge, me akfulat puspus el lumeyuk nu ka su arlana mwo a lungkinyuk, tusruktu ma inge tuku ke an puspus su fokfok. In kasre kut in tu na ku ke alu paye, kut enenu in akkalemye sie nunak su oana nunak lal Isaia met palu, su fwak nu sin met nukewa su wi ke alu paye: “Nikmet kaliye kutena ma tia nasnas.”​—Isaia 52:11.

OREKMAKIN LALMETMET NU KE KUTENA AKWUK LUN MET PUSPUS

13. Ma upa puspus fuka saap ku in sikyak fwin kom tia wi akfulatye me akfulat puspus?

¹³ Saap ma upa puspus fwa sikyak fwin kom sulela in tia wi akfulatye me akfulat puspus. Ke sie me pupulyuk, saap met orekma puspus su wi kom ke niyen orekma elos nunku ka la efu ku kom tia wi ke orekma puspus su kupasr nu ke me akfulat ke niyen orekma lom. Fuka fwin oasr sie met el sot sie me sang nu sum ke pal in Christmas? Ya koluk in eis ma inge? Fuka fwin mokul tumom ku mutan kiyom el tia wi ke lulalfongi lom? Mea kom ku in oru in akpayeye la tulik nutum elos tia pulakin ku nunku mu kom srungelosla in akenganye ma puspus ke sripen elos tia akfulatye me akfulat puspus?

14, 15. Mea kom ku in oru fwin oasr kas in paing akkalemyeyuk nu sum ku fwin oasr sie met su sot me sang nu sum?

¹⁴ Oasr ma eneneyuk in orek nu ke sulela mwomwo in eis kalem ka ke inkanek mwo a fwal in sang aksumwosye kais sie luma ku oiya inge. Fwin oasr sie met el akkalemye nu sum ke sie kas in paing su orekmakinyuk nu ke akfulat, kom ku in sang kulo nu sin met inge. Tusruktu fwin met se su paing kom el sie met su kom sramsram nu se pal nukewa ku el wi kom ke niyen orekma. Ke luma ouinge, saap kom lungse in oru sulela in akuteye kutu ma nu sel. Nu ke luma nukewa, kom enenu in akkalemye nunak a oiya mwo in sramsram nu selos. Baibel el sang kas in kasru: “Lela kas lomwos in kulang pal e nu kemwa, solela ke sol, tu komwos fwa ku in etu fuka fwal in topuk nu sin kais sie met.” (Kolosse 4:6) Kafweang in akkalemye sunak. Orekmakin inkanek mwo in akuteye lulalfongi lom. Kom akuteye in kalem la kom tia lain orekmakinyen me sang nu sin sie sin sie a ke tukeni puspus tusruktu kom akkalemye in kalem la kom lungse in wi ke kain in oiya inge fwin orek ke kutena pal saye.

¹⁵ Fuka fwin oasr sie met su lungse in sot me sang nu sum? Luma a ma sikyak puspus ku in kasre kom la mea kom enenu in oru. Saap met su oru me sang el fwak: “Nga etu la kom tia akfulatye me akfulat ke Christmas. Ne ouinge, Nga srakna lungse in sot ma inge nu sum.” Kom ku in oru sulela lom fwin kom eis me sang ke luma a ma sikyak inge, la ma inge el tia oana sie kom fwin wi ke me akfulat. Aok, fwin met su oru me sang el nukin lulalfongi lom, kom ku in fwak nu sel la kom tia wi akfulatye kutena me akfulat. Ma inge ku in sang me kasru mwomwo in akuteye la efu ku kom eis sie me sang tusruktu kom tia sang me sang ke pal in akfulat sa. Ke luma saye, mwo in tia eis me sang inge fwin ma kalem se la oasr nunak koluk lun met su oru me sang inge el lungse in akkalemye la kom tia ku in tu ku ke lulalfongi lom. A el ku pa in nunku mu kom fuleak lulalfongi lom ke sripen kom lungse in eis ma lane su tuku ke me sang inge.

OIYA FUKA KOM E FWA AKKALEMYE NU SIN MET NUKEWA KE SOU?

16. Fuka kom ku in akkalemye nunak a oiya mwo fwin kom sun oiya puspus su kupasr nu ke me akfulat?

¹⁶ Fuka fwin met puspus in sou lom elos tia wi kom ke lulalfongi? Kom enenu pa in akkalemye nunak a oiya mwo. Tia enenu kom in orek akukuin ke kais sie fasin ku me akfulat su met ke sou lom elos lungse in akfulatye. A, akkalemye sunak nu ke nunak lalos, oana ke kom lungselos in akkalemye pa sunak nu ke nunak lom. (Mattu 7:12) Fwasr liki kutena orekma su ku in oru kom in wi ke me akfulat. Ne ouinge, akkalemye nunak mwo ke ma puspus su tia kupasr nu ke akfulatyeyen me akfulat. Paye la, kom enenu in oru kutena ma pal nukewa ke sie inkanek su fwa tia akkolukye nunak ku conscience mwomwo lom.​—1 Timote 1:18, 19.

17. Fuka kom ku in kasru tulik nutum in tia nunku mu kom srunga elos in eis me insemwomwo ke sripen elos liye tulik puspus elos akfulatye me akfulat puspus?

¹⁷ Mea kom ku in oru in kasru tulik nutum elos in tia nunku mu kom srunga elos in insemwomwo ke sripen elos tia wi akfulatye me akfulat puspus? Ma inge ku in akkalemyeyuk yok ke ma kom oru ke kutu pa pal saye ke yea nukewa. Kutu papa a nine elos oakiye kutu pal in sang me sang nu sin tulik natulos. Me sang mwomwo emeet su kom ku in sang nu sin tulik nutum an pa ke pal a karunginyuk mwomwo lom.

AKPAYEYE ALU PAYE

18. Fuka orekma in wi ke meeting nukewa lun met Kristian el kasre kom in tu na ku ke alu paye?

¹⁸ In akinsemwomwoye God, pa kom enenu in tia eiskomyang nu ke alu kikiap a tu na ku ke alu paye. Mea eneneyuk nu ka in tu na ku ke alu paye? Baibel el akkalemye: “A lela kut in nunku ke sie sin sie in akkeye kut nu ke lungse a orekma mwo, a kut in tia likiye tukeni nu sie lasr in alu, oana lia lun kutena, a kut in kaifwe sie sin sie, a akyokye, oana komwos liye tu len apkuran me.” (Hibru 10:24, 25) Meeting nukewa lun met Kristian pa pal mwomwo nu sum kom in oru alu lom nu sin God ke inkanek su el insemwomwo ka. Ke meeting nukewa inge, oasr pal in ‘akpwarye’ a akkeye sie sin sie inmasrlon met Kristian oaru nukewa.​—Rom 1:12.

19. Efu ku yok sripe kom in sramsramkin nu sin met puspus ke ma puspus su kom lotela ke Baibel?

¹⁹ Siepa inkanek su kom ku in tu na ku ke alu paye pa in sramsram nu sin met puspus ke ma puspus su kom lotela ke lutlut lom ke Baibel yurin Met Lo lun Jeova. Met puspus elos “mongi a tung” na paye ke ma koluk nukewa su sikyak fwin fwalu ke pal inge. (Ezikiel 9:4) Saap kom etu ke kutu met su mongi a tung inge. Efu kom ku tia sramsramkin nu selos ke fwinsrak lom su tuku ke Baibel ke pal fwasru? Ke kom wi asrouki nu sin met Kristian paye puspus a sramsramkin ma paye lun Baibel su kom lotela tari nu sin met puspus, kom ku in pulakin a liye la kutena kain in lungse lom nu ke fasin puspus lun alu kikiap su srakna oasr ke insiom mutamwauk in wanginla kais kutu srisrik. Kom ku in lulalfongi la kom e fwa arlana engan a fwa eis me insemwomwo puspus kom fwin tu na ku ke alu paye.​—Malakai 3:10.