Ahkkapye Ohiyen Forfor Lasr Ke Kuht Sang Ma Loh nuh sin Mwet Suc Siena Kahs La
Efuh Yohk Srihpac: Jeova el nuhnkuh ke ma enenuh luhn mwet “in muhtuhnfacl e nuhkewa” ke fototo laltahl nuh sel. (Orekma 10:34, 35, BMK) Pwacnacng, Jesus el ahkkahlwemye lah pweng wo inge ac fah lutiyuck “fin facluh nohfohn” ac “nuh sin mwet nuhkewa.” (Matthew 24:14) Zechariah el palye lah mwet ke “kahs nuhkewa luhn muhtuhnfacl uh” fah lohng. (Zechariah 8:23, BMK) In fal nuhke aruhruhma lal mwet sap John, “kain in mwet nuhkewa, ke sruf nuhkewa, ke muhtuhnfacl nuhkewa, ac ke kain in kahs nuhkewa” pa ac fah moullac liki pacl in ongaiyac luhlahp. (Fwackyuk 7:9, 13, 14) In fal nuh ke ma nuhkewa suc ahkkahlwemyeyuck inge, ke pacl se kuht sun sie mwet ke acn in forfor lasr uh suc siena kahs la, wo kuht in sang ma loh nuh sel.
Orek Fuhkah:
• Ahkolah. Ke bag in forfor nuhtum an, pacl nuhkewa us puk srihsrik se inge Good News for People of All Nations. Srihke kom in kahlwem ke kahs in ahkuhtweyac ye sihfac inge “How to Help Those Who Speak Another Language,” suc oasr ke muhtwacwackiyen puk srihsrihk se inge. Motkwelah na meet kain in mwet ma kom ac kuh in osun nuh se uh. Downloadiyac sie video kuh sie mwe rit ke kahs ingacn kewa ke jw.org nuh ke mobile device nuhtum an. Srihke orekmakihn JW Language app in etwaclah kuhtuh kahs ah. Fin oasr congregation sahyac ma siena kahs la eltahl orekma ke inkucl se pacna ingacn, utuck mwe rit ke kahs ma congregation lom an orekmakihn ke pacl in som lohm nuh ke lohm. Tuhsruhktuh, ke kom wi ke orekma in fahkwack ke acn ma mwet pucspucs oasr we ac kain in kahs luhn mwet ingacn, us wi kom mwe rit ke kahs luhn mwet ma kom ac kuh in osun nuh se an.
• Ke pacl se kom osun nuh sin sie mwet suc siena kahs la, kwacfeacng in sramsram nuh sel ke “orekma yohk suc God el oruh” ke kahs lal uh. (Orekma 2:11) Sang elan liye jw.org ke kuhtuh pac mwe ahkuhtweyac ah ke kahs lal sifacna. El fin ahkkahlwemye kena lal in lohng, suhlahklahk nwacklah sie Please Follow Up (S-43) ac sang nuh sin secretary. Tahfwelah na fohlohk nuh yurin mwet ma luhngse lohng nwe ke pacl se ma oasr mwet lili suc kahskahskihn kahs lal sonuhl.
Srihke ke Mahlwem Inge:
• Ke pacl se kom sifwil oruh Lutlut luhn Sucu lom an, srihke oruh sie mwe ahkpah ke kom sang ma loh nuh sin sie mwet suc siena kahs la.