Sie Mwe Solsol

1. Ngac orekma sacohk in kihtaclah mwe solsol nuh ke toeni luhlahp ac fah muhtwacwacack?

¹ Kom fin nuhnkuh in orek mongo yucyuc nwacn sucu kuh mwet kawuck lom, kom orekma upac nuh kac ac yohk mani ma kom sislah in ahkolah ma inge, sahp kom ac arlac engan in suli pac mwet pucspucs in wi mongo. Ke inkacnek se pacna inge, yohk orekma in ahkolah mwe luti ma tuhkuh sin Jeova me oacna sie kuhfa luhlahp suc ac fah ahkkahlwemyeyuck ke toeni luhlahp lasr ma apkuhran me. Wik tolu meet liki muhtwacwackiyen toeni luhlahp lasr uh, kuht ac muhtwacwacack oruh kunohkohn wo se ma Jeova el use nuh sesr in oruh, pa in suli mwet nuh kac. Meac ac fah kahsre kuht in arlacna engan in suli mwet pucspucs?

2. Meac ac fah ahkkweye kuht in wi pacl nuhkewa in kihtaclah mwe solsol ke orekma na sacohk se inge?

² Kuht ac fah ahkkweyeyuck in wi pacl nuhkewa ke orekma sacohk se inge in kihtaclah mwe solsol kuht fin nuhnkuh yohk ke mwe ahkkweye ma kuht sifacna eis ke mwe luti wo nuhkewa ma Jeova el ase nuh sesr ke toeni luhlahp lasr uh. (Isaiah 65:13, 14) Kuht enenuh pac in esam lah oasr ma wo suc tuhkuh ke orekma in kihtakat lasr ma orek ke yac nuhkewa uh. (Liye pohk se inge, “Oasr Ma Wo Tuhkuh Kac.”) Kuhtuh mwet ma kuht suli nuh ke toeni uh ac fah wi. Finne puhs kuh suhpuhs mwet ma ac wi uh, moniyuck lasr ke orekma in kihtaclah mwe solsol inge ac sang wolacna nuh sin Jeova ac ma inge ac ahkkahlwemye pac kuhlwacng lal.—Psalm 145:3, 7; Fwackyuk 22:17.

3. Mwe solsol uh ac fah kihtakatlah fuhkah?

³ Un mwet elder uh enenuh in etuh lah fuhkah oakwuck nuh ke orekma in kihtakat inge. Wekuhnacng pac oakwuck nuh ke mwe solsol ke lohm ma wacngihn mwet kac, kuh nuh sin mwet ke acn ma puhkantwen mwet. Ke Saturday ac Sunday enenuh in kihtakatlah mackuhsin wi pac mwe solsol, fin fal. Ke pacl se orekma in kihtakat mwe solsol uh sahflah, kuht arlacna insewowo mweyen kuht etuh lah kuht engan ke kuht wi kac. Kuht engan pac ke mwet pucspucs wi ke toeni inge, oasr mwe luti wowo oacna kuhfa se ma Jeova el use inge.

Oasr Ma Wo Tuhkuh Kac

Yac ekahsr somlah ah ke pacl se sie muhtwacn lili el wi ke orekma in kihtaclah mwe solsol, el nuhnkuh fin oasr srihpen kwacfeacng nuhkewa lal nuh ke orekma se inge. El nuhnkuh, ‘Yac mwet uh ac lohacng nuh kac ac wi kuht ke toeni luhlahp inge?’ Ke lututacng in Saturday ke pacl in toeni luhlahp ah orek, el liye sie mukul suc wi ke alu luhn Sikh el muhta we, pwacnacng el som nuh yohrohl ac fahk lah suc el uh. Ke eltahl sramsram ah mukul sac sruhmuhn muh el wi toeni sac mweyen ituckyang nuh sel mwe solsol se. Puhs kihsen siyuck lal ma muhtwacn lili sac tohpohklah. Mukul se inge fahk muh el arlacna engankihn program sac ac el fwefwelac ke mwe yucn, atac ac ohiyac luhn mwet lili nuhkewa ma wi kac ah. Tok kuhtuh in lwen sac pacna, muhtwacn lili se inge el sramsram pac nuh sin sie siacnyacn ma muhta apkuhran nuh yohrohl. Eltahl eis pac mwe solsol ac eltahl wi ke bus tuhkuh pac nuh ke toeni luhlahp sac. Eltahl engankihn toeni sac ac luhngse pac in wi ke Sunday. Muhtwacn lili se inge el akihlen lah yohk na pwacye srihpen orekma in kihtakat mwe solsol ma orek ke yac nuhkewa uh.
Ke sie toeni luhlahp ma tuhfahna orek, sie siacnyacn suc kewana regular pioneer eltahl tuhkahkuhnuhltahl sifacna nuh sin siacnyacn se suc mahtuh luhkeltahl. Siacnyacn se inge ahkuhtweyac lah pa inge pacl se emeet laltahl in wi. Pioneer luo ah siyuck seltahl: “Suc suli komtacl uh?” Siacnyacn sac topuk fahk: “Sie lwen ah kuht som lohm sesr ah tuh konwacack mwe solsol se ye sruhnguhl ah.” Eltahl riti mwe solsol sac ac nwacklah coupon tukun mwe solsol sac. Kuhtuh sin mwet lili ma wi ke toeni luhlahp sac kihtacltahl mongo ke infulwacn lwen sac. Eltahl engankihn na pwacye program uh pwacnacng eltahl oraclah oakwuck in sifwil tuhkuh ke lwen tok ah. Oasr oakwuck oreklac tuh in oasr mwet lili som muhtwacta yurin siacnyacn se inge ac ahkkweyacltahl.