Yac Bible uh Srackna Ahksuwohsye Moul Lom An?

1-3. (a) Meac kuhtuh ohiyac ma ac upac nuh sesr in ahksuwohsye tukun kuht eis bacptais? (b) Ke pacl ma upac na pwacye nuh sesr in kapkapwack, kihsen siyuck fuhkah kuht ac kuh in siyuck sesr sifacna? (Liye petsac se meet ke mwe lutlut se inge.)

KE LUSEN yac pucspucs, Kevin el sritacl mani, sismohk, nihmnihm ahluhkwelah ma fal, ac orekmakihn ono kuluk pucspucs.^[1] (Liye endnote.) Tok, el etwacllah Jeova ac luhngse in kawuck nuh sel. Tuhsruhktuh in oruh ma inge, el enenuh in ekuhllah ma pucspucs ke moul lal uh. El kuh in eklac ke srihpen kahsruh luhn Jeova ac ke kuh luhn Bible.​—Hebrew 4:12.

² Tukun Kevin el bacptaislac, el srackna enenuh in ekuhllah ma pucspucs ke ohiyacl tuh elan eklac sie mwet Christian wo. (Ephesus 4:31, 32) Ke sie mwe puhpuhlyuck, meet el arlacna sa in foloyak. El lut ke el konwacack lah upac nuh sel in kutong mohngohl. Kevin el fahk lah ma inge upac nuh sel in kutongyac liki na ma kuluk upac ma el oruh meet liki el bacptaislac ah! Tuhsruhktuh, el kuh in ekuhllah ohiyacl ke srihpen kahsruh ma el siyuck sin Jeova ac ke lutlut lal ke Bible.

³ Meet liki kuht bacptaislac, puhs sesr enenuh in ekuhllah ma na yohk ke moul lasr uh, tuh kuht in moulkihn moul lasr ke inkacnek ma fal nuh ke Bible. Tuhsruhktuh finne ke pacl inge, kuht akihlen lah oasr ma srihsrihk ma kuht srackna enenuh in kwacfeacng in ekuhllah tuh kuht in etahi God ac Christ. (Ephesus 5:1, 2; Sie Peter 2:21) Ke sie mwe puhpuhlyuck, sahp kuht akihlen lah kuht arlac luhngse tohrkahskahs kuh kuht kwacna lwesrihk ac fahk ma tiac wo ke mwet sahyac uh. Kuh sahp, oasr pacl ma kuht arlacna sahngweng ke ma mwet sahyac uh ac nuhnkuh kuh fahk. Sahp, ke lusen yac pucspucs kuht kwacfeacng in eklac tuhsruhktuh kuht sifwil pacna tahfonglac. Ke srihpac se inge, kuht ac kuh in nuhnkuh: ‘Efuh kuh arlacna upac nuh sihk in ahksuwohsye mwe muhnahs se luhk inge? Meac nga enenuh in oruh tuh nga in ahkos ma Bible uh fahk ac tahfwelah na in kapkapwack ke ohiyuck?’

KOM KUH IN AHKINSEWOWOYE JEOVA

4. Efuh kuh kuht tiac kuh in ahkinsewowoye Jeova ke ma nuhkewa kuht oruh uh?

⁴ Kuht luhngse Jeova ac kuht luhngse in ahkinsewowoyacl ke insiacsr kewa. Tuhsruhktuh, mwe ahsor se lah kuht tiac kuh in ahkinsewowoyacl pacl nuhkewa, mweyen kuht sesuwohs. Kuht kwacna puhla ma mwet sap Paul el fahk inge: “Nga finne ke oruh wo, nga tiac kuh.”​—Rome 7:18; James 3:2.

5. Kain in orekma fuhkah kuht enenuh in ekuhllah meet liki kuht eis bacptais, tuhsruhktuh kain in mwe muhnahs fuhkah ma sahp srackna ahkkulukye kuht uh?

⁵ Meet liki kuht kuh in weacng congregation uh, kuht enenuh in tui ke orekma nuhkewa ma Jeova el sruhnga uh. (Sie Corinth 6:9, 10) Tuhsruhktuh, kuht srackna sesuwohs. (Colossae 3:9, 10) Pwacnacng, kuht finne bacptais ke lusen yac pucspucs kuht tahfonglac pacl puhs. Ke kais kuhtuh pacl, sahp oasr kena ac nuhnak kuluk lasr kuh sahp upac nuh sesr in tulokihnyac sie mwe muhnahs ke ohiyacsr. Kuht ac enenuh in lain ohiyac kuluk se ma kuht muhnahs kac inge ke lusen yac pucspucs.

6, 7. (a) Meac oruh kuht srackna kuh in fototo nuh sin Jeova finne kuht sesuwohs? (b) Efuh kuh kuht tiac enenuh in tiac tui in siyuck ke nuhnak muhnahs luhn Jeova?  

⁶ Kuht finne sesuwohs, kuht srackna kuh in fototo nuh sin Jeova ac kuhlwacnsuhpwacl. Esam pacl nuhkewa ke pacl se ma kom tuh kawuckyak nuh sin Jeova ah. El liye ma wo sum uh ac el luhngse kom in etwacllah. (John 6:44) El oacyacpac etuh lah oasr ma kuluk ac mwe muhnahs lom ac lah kom ac tahfonglac pacl puhs. Tuhsruhktuh, Jeova el srackna luhngse kom in fototo nuh sel.

⁷ Jeova el luhngse kuht na pwacye, pwacnacng el acse nuh sesr sie mwe sang na sacohk. El suhpwacma wen nahtuhl nuh facluh tuh elan kuh in sang moul lal oacna sie mwe molwelah nuh ke ma kuluk lasr uh. (John 3:16) Ke pacl se kuht tahfonglac uh, kuht kuh in siyuck nuhnak muhnahs sin Jeova. Ac ke srihpen mwe molwelah se inge, kuht kuh in luhlahlfongi lah el ac fah nuhnak muhnahs nuh sesr ac kuht srackna kuh in fototo nuh sel. (Rome 7:24, 25; Sie John 2:1, 2) Esam, Jesus el misac ke srihpen mwet suc auliyak ke ma kuluk la. Pwacnacng, kuht finne puhla muh arlacna kuluk ma kuht oruh uh, kuht enenuh in tiacna tui ke puhruhe lasr nuh sin Jeova in siyuck ke nuhnak muhnahs. Kuht fin tiac siyuck elan nuhnak muhnahs nuh sesr, ma inge ac oacpacna kuht in sruhnga ohllah pahosr ke pacl se fohkfohklac uh. Kuht arlacna kuloh nuh sin Jeova lah el oruh kuht kuh in fototo nuh sel oacna sie kawuck kuht finne sesuwohs!​—Riti Sie Timothy 1:15.

8. Efuh kuh kuht tiac enenuh in pihlesruh mwe muhnahs lasr uh?

⁸ Kuht tiac luhngse in pihlesruh mwe muhnahs lasr uh kuh sukok srihpac kuht in oruh. Jeova el fahk nuh sesr tari lah ohiyac fuhkah el luhngse sin kawuck lal uh. (Psalm 15:1-5) Pwacnacng, kuht fin luhngse in fototoyang nuh sel, kuht enenuh in kwacfeacng in etahel ac wen nahtuhl uh. Kuht enenuh pac in sang kuhiyacsr in leumi kena kuluk lasr inge ac sahp kuht ac kuh in sislah kuhtuh sin ma inge. Kuht enenuh in tahfwelah na in kapkapwack ke ohiyacsr, finne loes kuh fototo lusen pacl ma kuht bacptaislac.​—Luo Corinth 13:11.

9. Kuht etuh fuhkah lah wacngihn sahflahiyen kwacfeacng lasr in nokomacng mwet sasuc?

⁹ Mwet sap Paul el fahk nuh sin mwet Christian in pacl meet ah: “Ohinge kowos in sislah ohiyen moul mahtuh lowos ma kowos moulkihn in pacl meet, moul se suc kuhnauskowoslac ke srihpen kena lowos nuh ke ma kikiacp. Insiowos ac nuhnkowos enenuh in arulacna ahksasucyeyucklac. Ac kowos enenuh in nokomacng mwet sasuc, suc oreklac in luhman God, ac suc fwackyuck in moul pwacye, suc suwohswohs ac muhtahl.” (Ephesus 4:22-24) Kalmen ma inge pa kuht enenuh in kwacfeacng in eklac ac “nokomacng mwet sasuc.” Ke ma inge, finne puhtahkah kuht kuhlwacnsuhpuh Jeova, kuht kuh in lotwelah ma pucspucs ke ohiyacl pacl nuhkewa. Ac Bible uh ac kuh in kahsre kuht in ekuhllah ohiyacsr in oacna el.

EFUH ARLACNA UPAC?

10. Meac kuht enenuh in oruh tuhfah kuht in tahfwelah na in kapkapwack ke kahsruh luhn Bible? Ac kihsen siyuck fuhkah kuht ac kuh in siyuck sesr sifacna?

¹⁰ Kuht nuhkewa luhngse in ahkos ma Bible uh fahk. Tuhsruhktuh, kuht enenuh in orekma upac kuht fin luhngse in tahfwelah na in eklac. Efuh kuh kuht enenuh in arlacna sang insiacsr? Yac Jeova el tiac kuh in ahkfihsracsrye na nuh sesr in oruh ma wo pacl nuhkewa?

11-13. Efuh kuh Jeova el siyuck sesr in kwacfeacng in kuhtanglah mwe muhnahs lasr uh?

¹¹ Kuht fin nuhnkuh ke ma oreklac nuhkewa inkuhsrao, kuht ac akihlen lah oasr kuh luhn Jeova in oruh kuhtwena ma. Ke sie mwe puhpuhlyuck, el oraclah faht uh in arlacna kuh. Ke second nuhkewa, faht uh oraclah luhpah na luhlahp se ke kahlwem ac fol. Tuhsruhktuh, kihtin na luhpah ke kuh inge pa facluh enenuh tuh ma moul nuhkewa in muhta we. (Psalm 74:16; Isaiah 40:26) Jeova el oacyacpac sang kuh nuh sin mwet kuhlwacnsap lal uh ke pacl ma eltahl enenuh. (Isaiah 40:29) Pwacnacng, arlacna kahlwem lah Jeova el fin luhngse, el kuh in oruh in arlacna fihsracsr nuh sesr in kuhtanglah mwe muhnahs lasr uh ac tulokihnyac kena kuluk lasr inge. Ke ma inge, efuh kuh el tiac oruh?

¹² Jeova el use sukohsohk lasr in sifacna oruh sulaclah lasr. El lwelah kuht in sifacna sulaclah fin kuht ac ahksol kuh tiac. Ke pacl se kuht sulaclah in ahksol ac kuht kwacfeacng in oruh ma luhngse lal uh, kuht ahkkahlwemye lah kuht luhngse el ac kuht luhngse in ahkinsewowoyacl. Satan el fahk muh wacngihn suwohs luhn Jeova in kol kuht. Tuhsruhktuh, ke pacl ma kuht ahkos Jeova uh, kuht ahkkahlwemye lah kuht luhngse elan mwet kol lasr. Ac kuht kuh in luhlahlfongi lah Pahpah na luhngse se tuhmwacsr inge el ahksacohkye kwacfeacng nuhkewa lasr in ahksol. (Job 2:3-5; Soakas 27:11) Ke kuht sang kuhiyacsr in leumi mwe muhnahs lasr uh finne upac, kuht oaru nuh sin Jeova ac ahkkahlwemye lah kuht luhngse elan mwet kol lasr.

¹³ Jeova el fahk nuh sesr lah kuht enenuh in kwacfeacng in etahi ohiyac wowo lal uh. (Colossae 3:12; riti Luo Peter 1:5-7.) El oacyacpac luhlahlfongi lah kuht ac sang kuhiyacsr in leumi ma kuht nuhnkuh ac puhla uh. (Rome 8:5; 12:9) Ke pacl nuhkewa ma kuht kwacfeacng in ahksuwohsye kuht sifacna ac ma inge fahlac wo, kuht arlacna engan kac.

LWELAH KAHS LUHN GOD IN AHKSUWOHSYE KOM PACL NUHKEWA

14, 15. Meac kuht kuh in oruh tuh kuht in kapkapwack ke ohiyac wo pucspucs ma Jeova el luhngse? (Liye pohk se inge “Bible ac Puhruhe uh Ahkwoye Moul Laltahl uh.”)

¹⁴ Meac kuht enenuh in oruh tuh kuht in kapkapwack ke ohiyac wowo ma Jeova el luhngse uh? Kuht tiac enenuh in sulaclah sesr sifacna ma enenuh in eklac sesr uh, tuhsruhktuh kuht enenuh in lwelah God elan kol kuht. Rome 12:2 el fahk: “Kowos in tiac etahi luhman moul luhn mwet facluh, a kowos in eklac ke srihpen God el arulacna ahksasucye nuhnak lowos. Na kowos fah kuh in etuh ma luhngse luhn God, ma suc wo, ac mwe ahkinsewowoyacl, ac suwohswohslacna.” Pwacnacng, kuht fin luhngse in etuh ma Jeova el luhngse uh, kuht enenuh in luhlahlfongi ke kahsruh ma el use nuh sesr uh. Kuht enenuh in rit Bible lwen nuhkewa, nuhnkuh yohk ke ma kuht riti inge, ac puhruhe nuh sin Jeova elan use nuh sesr nguhn muhtahl lal. (Luke 11:13; Galatia 5:22, 23) Ke inkacnek inge, Jeova el kuh in kahsre kuht in kahlwem ke ma el insewowo kac ac kuht kuh in etwaclah in nuhnak oacna el. Ke ma inge, ma kuht nuhnkuh, fahk ac oruh uh ac fah mwe insewowo nuh sin Jeova ac kuht fah etwaclah in leumi mwe muhnahs lasr uh. Tuh finne kuht eis kahsruh ac etwaclah in leumi ma inge, kuht srackna enenuh in kwacfeacng in lain.​—Soakas 4:23.

¹⁵ Sahyen rit Bible lasr ke lwen nuhkewa, kuht enenuh in lutlutkihn kahs luhn God ke mwe rit pucspucs nahtuhsr, oacna Tower in San! ac Awake! Mwe lutlut pucspucs ke mackuhsin inge luti nuh sesr lah kuht ac etahi fuhkah ohiyac wowo pucspucs luhn Jeova uh ac lain mwe muhnahs lasr inge. Sahp, oasr mwe lutlut kuh fuhs ma arlacna kahsre kuht. Kuht kuh in oracni ac sruokyac ma inge, kuht in sifwil riti tok.

16. Efuh kuh kuht tiac enenuh in toasrlah fin kapkapwack lasr uh pahtlac?

¹⁶ In etahi ohiyac wo pucspucs luhn Jeova uh, yohk pacl ma sie mwet el enenuh tuh elan etwacllah. Pwacnacng, kom fin puhla muh kom soenna ekuhllah ma nuhkewa ma kom luhngse in ekuhllah an, mongfihsracsr na. Ke muhtwacwacackiyac an, sahp kom ac enenuh in pahtok kom in oruh ma Bible uh fahk. Tuhsruhktuh, ke kom nuhnak ac orekma ke inkacnek ma Jeova el luhngse, ma inge ac oruh fihsracsr nuh sum in nuhnak oacna el ac in oruh ma wo.

NUHNKUH KE FINSRAK WOWO LASR KE PACL FAHSRUH UH

17. Kuht fin oaru nuh sin Jeova, finsrak wo fuhkah kuht kuh in ngwetlah nuhnkuh ac tuhpan uh?

¹⁷ Kuht engan in ngwetlah nuhnkuh ac tuhpan ke pacl se ma kuht ac fah eklac suwohswohs ac kuhlwacnsuhpuh Jeova ma pahtpaht. Ke pacl sacn, kuht ac tiac enenuh in lain mwe muhnahs lasr uh ac ac fah fihsracsr nuh sesr in etahi Jeova. Tuhsruhktuh, ke pacl inge kuht srackna kuh in alu nuh sel ke srihpen el acse nuh sesr mwe sang se ke mwe molwelah uh. Kuht finne sesuwohs, kuht kuh in ahkinsewowoyacl ke kuht kwacfeacng in oruh ma enenuh in eklac sesr uh ac ke kuht ahkos ma el luti nuh sesr in Bible uh.

18, 19. Efuh kuh kuht kuh in luhlahlfongi lah Bible uh kuh in tahfwelah na in ekuhllah ac ahksuwohsye moul lasr uh?

¹⁸ Kevin el oruh ma nuhkewa ma el kuh in oruh tuh elan kutongyac mongsa lal uh. El nuhnkuh yohk ke ma el riti in Bible ac el kwacfeacng in ekuhllah moul lal uh. El oacyacpac ukwe kahs in kahsruh ma mwet lili wiyacl uh sang nuh sel. Ke lusen yac ekahsr, Kevin el ekuhllah ma pucspucs ke ohiyacl ac el kapkapwack. Tukun pacl sac srihsrngiyucki el oacna sie mukul lili suc kahsruh mwet elder (ministerial servant). Ac ke lusen yac 20 somlah ne mihsenge, el kuhlwacnsap oacna sie mwet elder. Tuhsruhktuh, finne ke pacl inge el etuh lah el srackna enenuh in tahfwelah na in lain mwe muhnahs lal uh.

¹⁹ In oacna Kevin, kuht kuh in tahfwelah in kapkapwack ke ohiyacsr. Kuht fin oruh, kuht ac fah fototoyang nuh sin Jeova liki na meet ah. (Psalm 25:14) Ac kuht fin sang kuhiyacsr nohfohn in eklac ac ahkinsewowoyacl, el ac kahsre kuht in kuhtanglah. Kuht kuh in luhlahlfongi lah ke kahsruh luhn Bible, kuht kuh in tahfwelah na in ahksuwohsye moul lasr uh.​—Psalm 34:8.