Engankihn Ma Wo Nuhkewa Ma Jeova El Acse Nuh Sesr

1, 2. (a) Meac nuhnak luhn Mwet Loh luhn Jeova ke Bible uh? (b) Piyac puk se ma kom luhngse emeet ke Bible uh?

KUHT, Mwet Loh luhn Jeova uh luhngse na pwacye Bible uh. Ma inge acse mwe ahkkweye, finsrak ac kahs in luti ma kuht kuh in luhlahlfongi. (Rome 15:4) Puk se inge tiac nwacnack nuhnak luhn mwet, tuhsruhktuh pa inge “kahs luhn God.”​—Sie Thessalonica 2:13.

² Oasr ip ke Bible ma kuht nuhkewa luhngse. Kuhtuh sesr luhngse puk luhn Matthew nuh ke John, mweyen ma inge ahkkahlwemye ohiyac wowo luhn Jeova in oacna ke Jesus el ahkkahlwemye. (John 14:9) Oasr pac mwet suc luhngse puk in kahs pahluh oacna Fwackyuk, ma ahkkahlwemye ke “ma suc ac fah sikyak” ke pacl fahsruh uh. (Fwackyuk 1:1) Kuhtuh, eltahl ahkkweyeyuck ke pacl ma eltahl riti puk luhn Psalm ac kuhtuh eltahl luhngse riti kahs in kahsruh ke puk luhn Soakas. Pwacnacng, kahlwem lah Bible uh sie puk nuh sin mwet nuhkewa.

3, 4. (a) Meac puhlakihn lasr ke mwe rit nahtuhsr uh? (b) Kain in mwe rit fuhkah kuht eis ma oreklac nuh sin kais kuhtuh un mwet?

³ Ke srihpen kuht luhngse Bible uh, kuht oacyacpac luhngse mwe rit nahtuhsr uh mweyen ma inge fal nuh ke kahs luhn God. Puk, mackuhsin, ac mwe rit nuhkewa ma kuht eis uh ma tuhkuh sin Jeova me. Ma inge kahsre kuht in fototo nuh sel ac in sruokyac kuh luhlahlfongi lasr uh.​—Titus 2:2.

⁴ Puhs mwe rit nahtuhsr ma sihmlac nuh sin Mwet Loh luhn Jeova nuhkewa. Tuhsruhktuh, oasr pac mwe rit ma sihmlac yohk na nuh sin un mwet kuh matwac se, oacna mwet fuhsr kuh pahpah ac ninac pucspucs. Inkaiyen mwe lutlut ac video ke website lasr uh ma som yohk nuh sin mwet suc tiac Mwet Loh luhn Jeova. Kain in mwe lutlut pucspucs inge ahkkahlwemye lah Jeova el sruokyacna wuhlelah lal in sang kahs in luti pucspucs nuh sin mwet nuhkewa.—Isaiah 25:6.

5. Meac kuht kuh in luhlahlfongi na pwacye muh Jeova el insewowo kac uh?

⁵ Inkaiyacsr luhngse in yohk pacl lasr in riti Bible ac mwe rit pucspucs nahtuhsr uh. Pwacnacng, sahp tiac oacna sie lusen pacl ma kuht orekmakihn in lutlut ke mwe rit nuhkewa ma kuht eis uh. Kuht kuh in luhlahlfongi lah Jeova el insewowo sesr ke kuht orekmakihn wo pacl lasr in rit ac lutlut Bible ac mwe rit nahtuhsr uh. (Ephesus 5:15, 16) Tuhsruhktuh, oasr ma se kuht enenuh in taran kac. Meac se inge?

6. Meac ac kuh in oruh kuht in tiac wi eis ma wo ma tuhkuh ke mwe kahsruh luhn Jeova nuh sesr uh?

⁶ Kuht fin tiac taran, sahp kuht ac kuh in nuhnkuh muh kuhtuh ip ke Bible kuh kuhtuh mwe rit nahtuhsr uh tiac fal nuh sesr. Ke sie mwe puhpuhlyuck, fuhkah fin sie ip ke Bible uh tiac sramsramkihn ke kuhtwena ma kuht sun? Kuh fuhkah fin kuht tiac oasr ke un mwet kuh matwac se ma mwe rit inge som yohk nuh se? Yac kuht suhlahklahk in riti koano uh kuh sahp kuht tiac srihke in riti nohfohn? Fin ohinge, kuht ac tiac wi eis ma wo ma kuht ac kuh in eis kac uh. Kuht ac oruh fuhkah kuht in tiac sun ma upac se inge? Kuht enenuh in esam lah kahs in luti nuhkewa ma kuht eis uh ma sin Jeova me. Ke Bible uh, kuht riti: “Nga LEUM GOD lowos, suc luhngse luti kowos ke ma ac wo nuh suwos sifacna.” (Isaiah 48:17) Sie mwe kahsruh na yohk in nuhnkuh ke kahs in kahsruh tolu nuh ke ma wo ma kuht kuh in eis ke ip nuhkewa ke Bible ac ke kain in mwe kahsruh nuhkewa luhn Jeova ma el acse nuh sesr ke pacl inge.

KAHS IN KAHSRUH NUH KE MA WO KE RIT BIBLE LASR UH

7. Efuh kuh kuht enenuh in lohacng ahkwoyac nuh ke mwe lutlut sasuc ma kuht kuh in lotwelah ke pacl kuht rit Bible uh?

⁷ Ke pacl nuhkewa ma kom rit, lohacng ahkwoyac nuh ke mwe lutlut sasuc ma kom kuh in orekmakihn kac an. Pwacye lah, kuhtuh ip ke Bible uh sihmlac nuh sin un mwet kuh matwac se. Tuhsruhktuh, Bible uh fahk kahlwem lah “ma suhmuhslah nuhkewa ituckuh ke Nguhn luhn God, ac oasr srihpac.” (Luo Timothy 3:16) Pa inge srihpac pwacnacng kuht enenuh in lohacng ahkwoyac nuh ke mwe lutlut sasuc ma kuht kuh in orekmakihn ke rit Bible lasr uh. Sie mukul lili el srihke in esam lah puhs mwe lutlut ma el kuh in lotwelah ke fuhs sefanna in Bible. Ma inge kahsrel elan akihlen mwe lutlut sasuc ma el kuh in lotwelah kac uh. Pwacnacng, meet liki kuht riti Bible uh, kuht enenuh in siyuck sin Jeova elan kahsre kuht in lohacng ahkwoyac ac lahlmwetmwet in akihlen mwe lutlut ma el luhngse kuht in lotwelah uh.​—Ezra 7:10; riti James 1:5.

8, 9. (a) Ke pacl ma kuht riti Bible uh, meac kuhtuh kihsen siyuck ma kuht kuh in siyuck sesr sifacna uh? (b) Meac ma enenweyuck sin mwet elder uh ahkkahlwemye nuh sesr kacl Jeova?

⁸ Kihsen siyuck nuh sum sifacna. Ke kom riti ma suhmuhslah in Bible uh, tui ke kais kuhtuh pacl in siyuck sum sifacna kain in kihsen siyuck inge: ‘Meac ma inge ahkkahlwemye nuh sihk kacl Jeova? Nga ac orekmakihn fuhkah mwe lutlut se inge ke moul luhk uh? Nga ac orekmakihn fuhkah ma inge in kahsruh mwet sahyac?’ Ke kuht nuhnkuh yohk ke kain in kihsen siyuck inge, kuht ac fah eis mwe insewowo yohk ke rit Bible lasr uh. Ke sie mwe puhpuhlyuck, nuhnkuh ke ma suhmuhslah pucspucs ma ahkkahlwemye ke ma enenweyuck nuh sin mwet elder uh. (Riti Sie Timothy 3:2-7.) Inkaiyacsr tiac mwet elder. Pwacnacng sahp, kuht kuh in nuhnkuh muh mwe lutlut inge ac tiac kuh in kahsre kuht ke kuhtwena ma. Tuhsruhktuh, lwelah kuht in orekmakihn kihsen siyuck tolu ma kuht ahkkahlwemye piacng sac in liye lah ma enenweyuck nuh sin mwet elder inge ac kahsre kuht nuhkewa fuhkah.

⁹ “Meac ma inge ahkkahlwemye nuh sihk kacl Jeova?” Jeova el ahkkahlwemye nuh sesr ma enenweyuck sin mwet elder ke congregation uh. Arlacna fuhlwact oakwuck lal nuh sin mukul suc karihngihn congregation uh. Ma inge ahkkahlwemye lah congregation uh arlacna sacohk ye muhtuhn Jeova. Bible uh fahk lah el molwelah congregation uh oacna “ma lal ke srihpen misac luhn wen nahtuhl.” (Orekma 20:28) Ke ma inge, Jeova el luhngse mwet elder uh in mwe srihkasrak wo ac eltahl fah nuhnuhnkweyuck fal nuh ke inkacnek ma eltahl ahkkahlwemye nuh sin mwet ke congregation uh. El luhngse kuht in puhla karihngihnyuck wo laltahl uh. (Isaiah 32:1, 2) Ke pacl ma kuht riti ma enenweyuck sin mwet elder uh, kuht lotwelah ke luhpan luhngse yohk luhn Jeova nuh sesr.

10, 11. (a) Ke pacl ma kuht riti ma enenweyuck nuh sin mwet elder uh, kuht ac orekmakihn fuhkah mwe lutlut inge ke moul lasr sifacna? (b) Kuht ac orekmakihn fuhkah ma kuht lotwelah uh in kahsruh mwet sahyac?

¹⁰ “Nga ac orekmakihn fuhkah ma nga lotwelah inge ke moul luhk uh?” Kom fin sie mwet elder, kom enenuh in sifwil pac kalweni ma enenweyuck sum uh ac kwacfeacng in kapkapwack kac. Kom fin luhngse in eklac “sie mwet sropo,” kom enenuh in kwacfeacng kom in ahkfalye ma enenweyuck inge ke kuh lom kewa. (Sie Timothy 3:1) Tuhsruhktuh, oasr ma mwet Christian pwacye nuhkewa uh kuh in lotwelah ke ma enenweyuck inge. Ke sie mwe puhpuhlyuck, Jeova el luhngse kais sie sesr in orekmakihn nuhnak lasr uh ke ohiyac wo ac fal. (Philippi 4:5; Sie Peter 4:7) Ke pacl ma mwet elder uh ahkkahlwemye “mwe srihkasrak wo” nuh sesr nuhkewa, kuht kuh in lutlut seltahl ac “etahi ohiyen luhlahlfongi lalos.”​—Sie Peter 5:3; Hebrew 13:7.

¹¹ “Nga ac orekmakihn fuhkah ma nga lotwelah inge in kahsruh mwet sahyac?” Kuht kuh in orekmakihn ma enenweyuck sin mwet elder inge in kahsruh mwet suc lutlut ke Bible ac kuhtuh pac mwet sahyac suc luhngse in lohng eltahl in kahlwem kac lah, mwet elder lasr uh siena liki mwet kol ke alu sahyac uh. Ma enenweyuck sin mwet elder inge ac kuh pac in kahsre kuht in esam orekma upac ma mwet elder ke congregation lasr uh oruh. Ac ma inge ac fah kahsre kuht in suhnakihn mukul lili inge. (Sie Thessalonica 5:12) Ke kuht ahkyohkye suhnak lasr nuh seltahl uh, engan laltahl ke kunohkohn ma eltahl oruh inge ac fah yohkwelihk pac.​—Hebrew 13:17.

12, 13. (a) Kuht fin orekmakihn kuhfwen orekma ma oreklac ac ituckuh nuh sesr uh, kain in research fuhkah kuht ac kuh in oruh uh? (b) Sang sie mwe puhpuhlyuck an lah kahs in ahkuhtweyac uh ac kuh in ahkkahlwemye mwe lutlut ma tiac arlac kahlwem uh.

¹² Oruh research lom. Ke pacl ma kuht lutlut Bible uh, kuht kuh in suk top nuh ke kihsen siyuck inge:

• Suc suhmuhslah ip se ke Bible inge?

• Piyac acn ac pacl ma ma inge sihmlac uh?

• Meac kuhtuh ma yohk srihpac ma sikyak ke pacl se ma puk se inge sihmlac ah?

Kain in ma kuht konwacack inge ac kuh in kahsre kuht in akihlen mwe lutlut ma tiac arlac kahlwem uh.

¹³ Ke sie mwe puhpuhlyuck, Ezekiel 14:13, 14 el fahk: “Fin oasr sie muhtuhnfacl oruh ma kuluk ac tiac pwacye nuh sihk, nga ac ahsroelah pouk ac suhpwaclah sie pacl in sracl in uniyac mwet ac kosro, oacna sie. ‘Finne Noah, Daniel ac Job wi muhta we, a moul suwohswohs lalos luhkuhn molwelah na moul lalos sifacna.’ LEUM GOD Fuhlwactlacna pa fahk ma inge uh.” Kuht fin oruh research lasr ke ma inge, kuht ac kuh in lotwelah lah Ezekiel el suhmuhslah kahs inge apkuhran nuh ke yac 612 meet liki pacl luhn Christ. Noah ac Job eltahl misac ke lusen yac pucspucs tari, tuhsruhktuh Jeova el srackna esam ohiyen oaru laltahl uh. Daniel, el srackna moul in pacl sac. Sahp, el yac 20 ke pacl se ma Jeova el pahnglol sie mwet suwohswohs oacna Noah ac Job. Meac kuht lotwelah kac? Jeova el liye ac ahksacohkye mwet kuhlwacnsap oaru lal nuhkewa, wekuhnacng mwet fuhsr.​—Psalm 148:12-14.

MA WO KE KAIN IN MWE RIT PUCSPUCS NAHTUHSR UH

14. Mwe rit nuh sin mwet fuhsr uh kahsreltahl fuhkah? Ac ma wo fuhkah mwet sahyac uh kuh in eis kac? (Liye petsac se meet ke mwe lutlut se inge.)

¹⁴ Mwe rit nuhtin mwet fuhsr. Kuht lotwelah lah oasr ma wo ma kuht kuh in eis ke ip nuhkewa in Bible uh. Ke inkacnek se pacna inge, oasr pac ma wo ma kuht kuh in lotwelah ke mwe rit nuhkewa nahtuhsr uh. Kuht srihke tuni ke kuhtuh mwe puhpuhlyuck inge. Ke yac ekahsr somlah ah, Jeova el oraclah mwe luti pucspucs nuh sin mwet fuhsr.^[1] (Liye endnote.) Kahs in luti inge kahsreltahl in muhtwacnglah kain in mwe sruhf ma eltahl sun ke lohm lutlut ac, ac oacyacpac ke eltahl mahtuhlah uh. Tuhsruhktuh, ma wo fuhkah mwet sahyac uh ac kuh in eis eltahl fin riti mwe rit ac puk pucspucs inge? Ke kuht riti ma inge, kuht lotwelah ke ma upac ma mwet fuhsr uh sun ac kuht kuh in kahsreltahl ac ahkkweyacltahl.

15. Efuh kuh mwet mahtuh uh enenuh in lohacng pac nuh ke mwe luti ma oreklac nuh sin mwet fuhsr uh?

¹⁵ Mwet mahtuh uh tiac enenuh in nuhnkuh muh mwe lutlut nuh sin mwet fuhsr inge tiac ma nuh seltahl in riti. Puhs sin ma upac ma sramsramkihnyuck ke mwe lutlut nuh sin mwet fuhsr uh puhlakihnyuck pac sin mwet Christian nuhkewa sahyac. Ke sie mwe puhpuhlyuck, kuht nuhkewa enenuh in etuh in ahkuhtweyac luhlahlfongi lasr uh, leumi puhlakihn lasr, fahsr liki mwe ahkkuluk ma tuhkuh sin mwet ke matwacsr, asruoki kuluk, ac mwe ahkengan kuluk. Pwacnacng, finne mwe rit inge ma sihmlac nuh sin mwet fuhsr uh, koano uh ma tuhkuh ke Bible me ac oasr ma mwet Christian nuhkewa kuh in eis kuh lotwelah kac.

16. Meac pac mwe rit pucspucs nahtuhsr uh kahsruh mwet fuhsr eltahl in oruh?

¹⁶ Mwe rit ma sihmlac nuh sin mwet fuhsr uh ac kuh pac in kahsreltahl in ahkkweye fototo laltahl nuh sin Jeova. (Riti Ecclesiastes 12:1, 13.) Mwet mahtuh uh kuh pac in puhla ma wo inge. Ke sie mwe puhpuhlyuck, ke Awake! mackuhsin ke April 2009 oasr mwe lutlut se inge “Young People Ask . . . How Can I Make Bible Reading Enjoyable?” Ke mwe lutlut se inge, oasr kahs in kahsruh wi sie pohk ma kuh in sihpsihplac ac orekmakihnyuck nuh ke lutlut Bible. Yac oasr mwet mahtuh ma eis mwe kahsruh ke mwe lutlut se inge? Sie muhtwacn pahyuck suc oasr tuhlihk nahtuh el fahk lah ma na upac se nuh sel pa in rit Bible. Tuhsruhktuh, el orekmakihn kahs in kahsruh ke mwe rit se inge ac ingena el engan ke rit Bible lal uh. El fahk lah el pwacr in liye kuhpahsr luhn puk pucspucs in Bible uh ac el kuh pac in luhmahlah atacn ma el riti uh. El oacyacpac fahk: “Nga tiac puhla kain in engan se inge ke rit Bible luhk in pacl meet ah.”

17, 18. Kuht ac eis fuhkah ma wo ke kuht riti mwe rit ma sihmlac nuh sin mwet nuhkewa uh? Sang sie mwe puhpuhlyuck an.

¹⁷ Mwe rit nuh sin mwet nuhkewa. Muhtwacwacack ke yac 2008, kuht engankihn mwe lutlut ke Tower in San uh. Mwe lutlut se inge sihmlac yohkna nuh sin Mwet Loh luhn Jeova uh, tuhsruhktuh oasr pac mackuhsin ma oreklac nuh sin mwet nuhkewa. Kuht ac eis fuhkah ma wo ke mackuhsin inge? Kuht srihke nuhnkuh ke sie mwe puhpuhlyuck. Ke pacl se kom suli sie mwet nuh ke Lohm in Toeni uh ac el tuhkuh, kom arlacna engan. Ke pacl se mukul lili sacn oruh mwe sramsram lal, kom nuhnkuh ke mwet se ma wi ingacn. Sahp, kom nuhnkuh ke ma el puhla ac nuhnkuh ke ma el lohng ingacn ac lah fuhkah mwe lutlut inge ac ekuhllah moul lal an. Ke srihpac sacn, insiom nwacnwaclah ke engan ac kom arlacna srui na pwacye ke sifac se ma sramsramkihnyuck an.

¹⁸ Kuht kuh pac in puhla ma inge ke pacl ma kuht riti mwe rit ma sihmlac nuh sin mwet nuhkewa uh. Ke sie mwe puhpuhlyuck, Tower in San ma sihmlac nuh sin mwet nuhkewa wi kuhtuh pac mwe lutlut sahyac ke jw.org uh ahkuhtweyac Bible uh ke kahs fihsracsr ma kuht kuh in kahlwem kac. Ke pacl ma kuht riti mwe lutlut inge, ma inge ahkyohkye kahlwem ac luhngse lasr nuh ke ma pwacye in Bible ma kuht etuh tari uh. Oacyacpac sahp, kuht ac kuh pac in lotwelah kuhtuh inkacnek sasuc ma kuht ac kuh in ahkuhtweyac luhlahlfongi lasr ke orekma in luti uh. Ke inkacnek se pacna inge, mackuhsin nahtuhsr ke Awake! ahkkweye luhlahlfongi lasr ke God suc orekuhtlac. Ma inge kahsre kuht in etwaclah pac in ahkuhtweyac luhlahlfongi lasr uh.​—Riti Sie Peter 3:15.

19. Kuht ac ahkkahlwemye fuhkah srui lasr nuh sin Jeova ke ma nuhkewa ma el acse nuh sesr uh?

¹⁹ Kahlwem, Jeova el acse nuh sesr kahs in kahsruh ac kahs in luti pucspucs ma ac wo nuh sesr. (Matthew 5:3) Lwelah kuht in tahfwelah na in riti ac orekmakihn kahs in luti nuhkewa ma el acse nuh sesr uh. Kuht fin oruh ma inge, oasr ma wo ma kuht ac kuh in eis kac ac ma inge ac ahkkahlwemye nuh sin Jeova lah kuht arlacna srui ke ma nuhkewa ma el use nuh sesr uh.​—Isaiah 48:17.