SIFAC KE KOLO | EFUH KUH JESUS EL KWEOK AC MISAC?

Yac Ma Inge Sikyak Na Pwacye?

Ke yac 33, Jesus, suc mwet Nazareth el acnwucki ke srihpen mwet uh tahfonglac ac nuhnkuh muh el ahkkweye mwet pucspucs in lain mukwikwi ac oakwuck luhn government. Upac acnwuck orek nuh sel ac patpucti mahnol nuh ke sahk soko. El kweok na upac nwe ke na el misac. Tuhsruhktuh, God el ahkmoulyelack, na tukun lwen 40 el sohwack nuh in kuhsrao.

Ma sihmlac inge ma tuhkuh ke puk ahkosr in Bible ma sruhmuhn ke moul lal Jesus fin facluh, ac puk inge pahngpahng Testament Sasuc. Yac ma inge sikyak na pwacye? Kihsen siyuck na yohk srihpac se pa inge. Ma inge fin tiac sikyak na pwacye, na e wacngihn srihpen luhlahlfongi luhn mwet Christian pucspucs. Ac finsrak se inge in moul ma pahtpaht ke sie Paradise el sie mwemwe ma ac fah tiacna sikyak. (Sie Corinth 15:14) Tuhsruhktuh, ma inge fin sikyak na pwacye, na oasr sie finsrak na wo ke moul luhn mwet uh nuh ke pacl fahsruh uh ma kom ac kuh in wi pac sun. Pwacnacng, yac ma puk ahkosr ma moul lal Jesus uh sihmlac oasr kac inge ma na pwacye kuh sramsram in pihlenfong na?

MA AHKKAHLWEMYEYUCK KE MA SIKYAK INGE

Puk ahkosr ma sihmlac moul lal Jesus fin facluh kac inge tiac oacna sramsram in pihlenfong mweyen ma suhmuhslah inge ahkkahlwemye ma na pwacye ac ip srihsrihk nuhkewa ke ma sikyak uh. Ke sie mwe puhpuhlyuck, ma inge ahkkahlwemye inen acn na pwacye ma mwet uh som muhtwacta we ke pacl inge. Ma suhmuhslah inge sruhmuhn ke mwet na pwacye ke oasr laltahl uh ahkpwacyeyuck sin mwet sihm sahyac luhn facluh in pacl meet ah.—Luke 3:1, 2, 23.

Jesus el oacyacpac sruhmuhnyuck sin mwet sihm pucspucs luhn facluh suc moul ke pacl luhn mwet sap ac ke yac siofok kuhtuh tukun Christ.a Ohiyen misac lal ma ahkuhtweyucki ke puk ahkosr ke moul lal fin facluh inge fal nuh ke inkacnek in nuhnuhnkuh luhn mwet Rome in pacl sac. Ma suhmuhslah inge arlacna suwohs ac fal nuh ke ma sikyak in pacl sac, oacna ke ohiyac sesuwohs ma liyeyuck sin kuhtuh mwet tuhma lutlut lal Jesus inge. (Matthew 26:56; Luke 22:24-26; John 18:10, 11) Ma inge nuhkewa ahkpwacyeye lah mwet sihm ke puk ahkosr inge pwacye ac suwohs ke ma eltahl suhmuhslah kacl Jesus uh.

FUHKAH NUH KE SIFWIL MOULYAK LAL JESUS?

Inkaiyen mwet uh finne luhlahlfongi lah Jesus el moul ke sie pacl ah nwe misac, srackna oasr kihsen siyuck ke sifwil moulyak lal uh. Mwet sap lal ah tiac pac luhlahlfongi ke pacl se emeet ma eltahl lohng muh el sifwil moulyak. (Luke 24:11) Tuhsruhktuh, wacngihnlac nuhnak in ahlohloh nuhkewa inge ke pacl se eltahl ac kuhtuh pac mwet tuhma lutlut lal Jesus ah liyaclwack ke pacl pucspucs sahyac. Ac ke sie pacl ah, puhs liki mwet 500 wi liye ma inge.—Sie Corinth 15:6.

Mwet tuhma lutlut lal Jesus inge finne etuh lah moul laltahl uh oasr in mwe sensen ac eltahl kuh pac in sruhoh, eltahl puhlaik in fahkwack ke sifwil moulyak lal Jesus uh nuh sin mwet nuhkewa, wekuhnacng mwet suc unilyac inge. (Orekma 4:1-3, 10, 19, 20; 5:27-32) Yac mwet tuhma lutlut pucspucs inge ac kuh in puhlaik ac oruh ma inge eltahl fin tiac etuh na pwacye lah Jesus el sifwil moulyak? Ke ma na pwacye uh, sifwil moulyak lal Jesus uh pa mwe ahkkweye yohk nuh sin mwet Christian ke orekma nuhkewa laltahl nuh sin mwet uh ke pacl sac ac ke pacl inge.

Ma suhmuhslah ke misac lal Jesus ac sifwil moulyak lal ke puk ahkosr inge ahkkahlwemye kahs pwacye nuhkewa ke ma sikyak in pacl meet ah. Kom fin riti ma inge ahkwoyac, ac fah ahkkweye luhlahlfongi lom lah ma inge sikyak na pwacye. Luhlahlfongi lom uh ac kuh in yohkwelihk kuh ahkkweyeyuck ke kom kahlwem kac lah efuh ma inge sikyak. Pa inge ma ac fah ahkuhtweyucki ke mwe lutlut se tok uh.

a Tacitus, suc isuslac ke yac 55, el suhmuhslah lah “Christus, suc kahs se inge [Christian] el tuhkuh kac, el sun mwe kweok upac ke lusen kolyuck lal Tiberius ke srihpen sie sin mwet kol lasr inge, Pontius Pilatus.” Jesus el oacyacpac sramsramkihnyuck sel Suetonius (suc moul ke pacl luhn mwet sap); Josephus suc sie mwet Jew ac el sihm sruhmuhn ke ma sikyak in pacl meet ah (suc moul pac ke pacl luhn mwet sap); ac Pliny governor se fin acn Bithynia suc fuhsr emeet (suc moul ke yac siofok kuhtuh tukun Christ).

Efuh kuh Suhpuhs Mwe Ahkpwacyeye Sahyac?

Ke kuh ac orekma yohk ma Jesus el oruh fin facluh ah, yac kuht enenuh in luhlahlfongi ke ma suhmuhslah luhn mwet sihm sahyac luhn facluh ke pacl luhn mwet sap ah in ahkpwacyeye lah Jesus ac sifwil moulyak lal ah ma na pwacye? Moh. Sie srihpac an pa, mweyen puk ahkosr ke Bible ma sramsramkihn moul lal Jesus uh sihmlac ke yac 2,000 somlah ah. Tiac arlac puhs ma sihmlac ke pacl sac ma srackna oan nwe mihsenge. (Sie Peter 1:24, 25) Ac oacyacpac, kuht tiac kuh in luhlahlfongi muh mwet suc lainuhl Jesus inge ac kuh in sihmihs kuhtwena ma in ahkkweye luhlahlfongi luhn mwet pucspucs kacl Jesus.

Peter, suc sie sin mwet sap lal Jesus el fahk ma inge ke sifwil moulyak lal Jesus ah: “God el ahkmoulyelack liki misac tukun lwen se ahktolu, ac oruh tuh elan sifwil pac sikyak nuh sin mwet uh, tiac nuh sin mwet nuhkewa, a nuh sesr muhkwena, suc God el nuhna sulaclah tuh kuht in orek loh kac. Ahok, kuht tuh weluhl mongo ac nihm tukun el moulyak ah.” (Orekma 10:40, 41) Efuh kuh el tiac sikyak nuh sin mwet nuhkewa? Ma suhmuhslah ke puk lal Matthew uh ahkkahlwemye nuh sesr lah ke pacl se ma mwet lokoalok lal Jesus uh lohngack ke sifwil moulyak lal, eltahl oraclah sie pwacpa suhlallacl ah in tulokihnyac sramsram kacl Jesus inge tuh in tiac fahsrelihk.—Matthew 28:11-15.

Yac kalmen ma inge pa Jesus el sruhnga in etweyuck sifwil moulyak lal uh? Moh, mweyen Peter el tahfwelah in fahk: “El sapkin nuh sesr in luti ke Wosasuc nuh sin mwet uh, ac in fahkwack lah el pa God El srihsrngiyac in tuh nuhnuhnkuh mwet moul ac mwet misac.” Mwet Christian pwacye uh pa oruh ma sapkihnyuck inge.—Orekma 10:42.