Ma Kom Kuh In Oruh In Muhtweng Ke Ahsor Lom

Arlacna puhs kahs in kahsruh ke sihfac se inge. Tuhsruhktuh, tiac nohfohnna mwe kahsruh inge wo. Ke sie mwe puhpuhlyuck, sahp kuhtuh sin kahs in kahsruh nuh sum inge pa kom in tiac tuhng kuh oruh in kahlwem ma kom puhla uh. Kuhtuh pac mwet uh ac ahkkweye kom in oruh siena liki ac ahkkahlwemye nohfohnna ma kom puhla an. Bible uh ahkuhtweyac ke nuhnak ma wo ac fal emeet uh, sie ma ahkkweyeyuck sin mwet suc oruh lutlut yohk kac ke pacl inge.

Ke kuhtuh acn uh, tiac fal nuh ke facsin, mukul se in tuhng. Tuhsruhktuh, yac oasr srihpac wo in mwekihn ke tuhng uh, yohkna in walihl? Mwet suc yohk etuh la ke ip luhn mental eltahl ahkkahlwemye lah tuhng uh sie ma mwet ahsor se ac nuhna oruh. Ac ke pacl fal, sahp ahsor uh kuh in kahsre kom in tilac nuhnkuh kac, finne mwet se ma wacngihnlac liki kom an arlacna fototo nuh sum. Tuhsruhktuh, kom fin sruokyacna ahsor lom an, ma inge ac kuh in oraclah ma upac liki na ma wo. Bible uh tiac ahkkweye nuhnak se inge lah tiac fal mukul se in tuhng. Ke sie mwe puhpuhlyuck, nuhnkuh kacl Jesus. Ke misac luhn kawuck fototo se lal uh, Jesus el tuhng ye muhtuhn mwet nuhkewa finne oasr kuh lal in ahkmoulyelack Lazarus!​—John 11:33-35.

Inkaiyen pacl uh mwet se ac kuh in kasrkuhsrak ke kais kuhtuh pacl ke na srihpen ahsor lal uh, yohk na ke pacl ma tiac motkoeyuck a sie mwet el misac. Puhs srihpac ma ac kuh in pwacnacng sie mwet ahsor elan kasrkuhsrak kac. Oacna, ke pacl ma sie mwet suc kom suhnakihn el fahk kahs ma wacngihn kalmac ac tiac pwacye. Mike, sie mukul fin acn South Africa el fahk, “Nga yac 14 ke pacl se ma pahpah tuhmuhk ah misac. Ke mas lal ah, sie mwet kol ke alu luhn Anglican tuyak ac fahk lah God el enenuh mwet wo ac el sa in eisacltahl.a Ma inge arlacna ahkkasrkuhsrakyeyuc, mweyen kuht enenuh na pwacye pahpah se tuhmwacsr inge. Yac 63 somlah tari a nga srackna kweok ke nuhnkweyac.”

Ac fuhkah fin puhlakihn lasr uh ahkkulukye kuht? Yohk na tukun sie mwet suc tiac motkoeyuck muh el ac misac a el misac. Sahp, mwet ahsor sacn ac sikaleni na in nuhnkuh, ‘Ma inge luhkuhn tiac sikyak nga fuhnuh oruh kuh tiac oruh ma sac.’ Kuh sahp, ke ohsun sahflah se lom nuh sin mwet misac sacn, komtacl akuhkuhinlac. Ma inge ac kuh in weacng nuh ke puhlakihn lom ma ahkkulukyeyuck ingacn.

Kain in puhlakihn inge fin ahkkulukye kom, arlacna yohk srihpac kom in tiac sruokyac puhlakihn lom inge nuh sum sifacna. Tuhsruhktuh, sramsramkihn nuh sin sie kawuck suc ac kuh in lohng ac ahkacsmakihnye kom lah puhlakihn se lom inge oasr yurin mwet pucspucs sahyac suc ahsor ke mwet laltahl suc wacngihnlac. Bible uh ahkacsmakihnye kuht: “Sie mwet kawuck el luhngse pacl e nuhkewa; a sie mwet lili el isuslac tuh elan mwet kahsruh in pal in ongoiyac.”​—Soakas 17:17, BMK.

Kawuck se ma wo emeet luhn sie mwet ahsor uh pa Jeova God. Ikacslah insiom nuh sel ke inkacnek luhn puhruhe mweyen ‘el nuhnke kom.’ (Sie Peter 5:7) In wekuhnacng, el wuhlelah muh mwet nuhkewa suc oruh ma inge ac fah puhla “mislac luhn God, suc yohk liki ma mwet uh kuh in kahlwem kac.” (Philippi 4:6, 7) Oacyacpac, lwelah God elan kahsre kom ke inkacnek luhn Kahs in ahkkweye lal ke Bible uh. Suhmuhslah kuhtuh fuhs ma ac kuh in ahkkweye kom. (Liye pohk se ma wi uh.) Sahp, kom ac luhngse pac in kaliyac kuhtuh fuhs ingacn. Kom fin sikaleni in nuhnkuh ke ma inge ac kuh in kahsre kom ke fong ma kom muhkwena ac upac nuh sum in mutul uh.​—Isaiah 57:15.

Ke pacl inge, oasr mukul se suc yac 40, kuht ac pahnglol na Jack. Muhtwacn kiyacl uh misac ke cancer. Jack el fahk lah oasr pacl el arlacna ahsor ac muhkwena. Tuhsruhktuh, el konwacack lah puhruhe uh arlacna kahsrel. Pa inge ma el fahk, “Ke pacl nga puhruhe nuh sin Jeova, puhlakihnyen muhkwena luhk uh wacngihnlac. Nga kwacna tuhkahkwek ke fong uh ac tiac kuh in sifwil mutullac. Tukun nga rit ac nuhnkuh yohk ke fuhs in Bible ma ahkmihsye nuhnak luhk uh ac nga ikacslah insiuck nuh sin Jeova, nga puhla mislac lal tuhkuh nuh sihk. Ma inge ahkfihsracsrye nuhnak ac puhlakihn luhk uh nga in kuh in sifwil mutullac.”

Vanessa el sie muhtwacn fuhsr. Ninac kiyacl ah misac ke sie mas upac. El oacyacpac puhla kuhiyacn puhruhe uh. El fahk, “Ke pacl upac nuhkewa luhk, nga ac pahngon inen God ac muhtwacwacack na tuhng. Jeova el lohng puhruhe luhk uh ac pacl nuhkewa el acse kuh ma nga enenuh uh.”

Kuhtuh mwet suc orekma la uh pa in sang kahs in kahsruh nuh sin mwet ahsor, eltahl fahk lah wo mwet ahsor inge in wi oruh orekma in kahsruh nuh sin mwet sahyac. Kain in orekma inge ac kuh in ahkenganyacltahl ac ahkfihsracsrye ahsor laltahl uh. (Orekma 20:35) Mwet Christian pucspucs suc ahsor eltahl puhla lah ke eltahl wi oruh ke orekma in kahsruh nuh sin mwet sahyac, ma inge ahkkweyacltahl na pwacye.​—Luo Corinth 1:3, 4.