SIFAC KE KOLO | YAC OASR SRIHPEN PUHRUHE UH?
Suc Lohng Puhruhe Lasr Uh?
Kuhtuh mwet uh puhla muh wacngihn srihpen puhruhe uh, mweyen wacngihn mwet lohng. Oasr mwet ma srihke in puhruhe tuhsruhktuh eltahl puhla muh wacngihn na top nuh ke puhruhe laltahl uh. Sie mwet suc tiac luhlahlfongi ke God el luhmahlah atacn God ke nuhnak lal ac puhruhe fahk: “Mahmah na nuh sihk.” Tuhsruhktuh el fahk muh God “el mihslac na.”
Tuhsruhktuh, Bible uh ahkkahlwemye nuh sesr lah pwacye oasr God se suc lohng puhruhe uh. Ma inge sihmlac in Bible nuh sin mwet in pacl meet ah: “LEUM GOD El pahkotwen, ac pacl kowos wowoyak nuh sel in suk kahsruh, El ac topuk kowos.” (Isaiah 30:19) Sie pac fuhs in Bible fahk ohinge: “LEUM GOD El insewowo ke puhruhe luhn mwet wo.”—Soakas 15:8.
Jesus el puhruhe nuh sin Pahpah tuhmwacl ac “God El porongel.”—Hebrew 5:7
Bible uh oacyacpac ahkkahlwemye kuhtuh mwe puhpuhlyuck ke puhruhe luhn mwet ma lohngyuck. Sie fuhs inge sruhmuhn ke Jesus “el puhruhe ac siyuck ke puhsra luhlahp ac tuhng nuh sin God, suc kuh in molwellah” ac “God El porongel.” (Hebrew 5:7) Kuhtuh pac mwe puhpuhlyuck inge kuh in konweyuckyak ke Daniel 9:21 ac Luo Chronicle 7:1.
Pwacnacng, efuh kuh kuhtuh mwet uh puhla muh tiacna topukyuck puhruhe laltahl uh? Puhruhe lasr uh ac kuh in lohngyuck kuht fin puhruhe muhkwena nuh sin Jeova,a God ke Bible uh ac tiac nuh sin kuhtwena god sahyac kuh mwet mahtuh lasr ma misac tari. God el oacyacpac ke kuht in siyuck “ma suc fal nuh ke luhngse lal.” God el wuhlelah lah kuht fin puhruhe fal nuh ke ma luhngse lal uh el ac fah “lohng kuht.” (Sie John 5:14) Pwacnacng kuht enenuh in etuh God ke Bible ac etuh lah meac ma luhngse lal uh tuh fah kuh in lohngyuck puhruhe lasr uh.
Puhs mwet luhlahlfongi lah God el lohng ac topuk puhruhe uh ac puhruhe uh tiac oakwuck se muhkwena ma orek ke alu. Isaac, sie mukul fin acn Kenya el fahk: “Nga puhruhe siyuck kahsruh tuh nga in kuh in kahlwem ke Bible uh. Kihtin pacl na tohkoh, mwet se tuhkuh nuh yuruk ac use kahsruh ma nga enenuh ah.” Hilda, sie muhtwacn fin acn Philippine el ke tui ke sismohk lal ah. Tukun el srihke pacl puhs tuh koflah in tui, mukul tuhmwacl ah sang kahs in kahsruh inge nuh sel: “Efuh kom tiac puhruhe siyuck kahsruh sin God?” El srihke ma inge ac fahk: “Nga lut na pwacye ke kahsruh Lal nuh sihk inge. Pwacnacng nga sruhngaclah sismohk ac nga tui.”
Yac kom nuhnkuh tuh God el ac ke kahsre kom ke kuhtwena ma upac lom suc fal nuh ke ma luhngse lal uh?
a In oacna ma Bible uh ahkkahlwemye, Jeova pa inen God.