SIFAC KE KOLO | YAC OASR SRIHPEN PUHRUHE UH?
Efuh Kuh Mwet uh Puhruhe?
“Nga tuh sritacl mani na upac meet. Nga ac muhta puhruhe nga in kahsruhpi ke mani ma nga muhta itto kac inge, tuhsruhktuh tiacna sikyak.”—Samuel,a Kenya.
“Ke lutlut ah, kuht enenuh in kalweni puhruhe ma lutiyuck nuh sesr in kaliyac ah.”—Teresa, Philippines.
“Nga puhruhe ke pacl nga sun ma upac. Nga puhruhe in siyuck nuhnak muhnahs ke ma kuluk luhk uh ac in eklac sie mwet Christian wowo.”—Magdalene, Ghana.
Kahs lal Samuel, Teresa, ac Magdalene inge kewa ahkkahlwemye lah mwet uh puhruhe ke srihpac pucspucs, kuhtuh wo liki kuhtuh sahyac. Kuhtuh puhruhe luhn mwet uh ma tuhkuh ke inse pwacye laltahl, kuhtuh puhruhe sahyac uh wacngihn na nuhnkweyac. Tuhsruhktuh, eltahl finne puhruhe na in siyuck kahsruh ke sie test luhlahp ke lutlut ah, ke kuhtanglah luhn sie un mwet sritacl, ke kahsruh luhn God nuh ke moul in sucu laltahl uh, kuh ke kuhtuh pac srihpac pucspucs sahyac, puhs mwet puhla lah eltahl enenuh in puhruhe. Ke kihsen siyuck ma orek nuh sin mwet pucspucs, ma inge ahkkahlwemye lah nwe ke mwet ma tiac wi ke kuhtwena alu eltahl oacyacpac puhruhe pacl nuhkewa.
Yac kom muhta puhruhe? Fin ahok, meac kom kwacna puhruhe kac uh? Kom fin ac kain in mwet se ma kwacna puhruhe kuh kom finne tiac, sahp kom nuhnkuh: ‘Yac oasr srihpen puhruhe uh? Yac oasr na pwacye mwet lohng?’ Sie mwet sihm el ahkkahlwemye lah puhruhe uh sie inkacnek in ahkwoye nuhnak ac puhlakihn lasr uh ke kihtin pacl na. Kuhtuh mwet ma orekma ke ip luhn ono nuhnkuh oacpacna, eltahl muh puhruhe uh pa sie inkacnek in “ono sahyac.” Yac mwet ma puhruhe uh oruh ma inge ke srihpen eltahl pahlah in oruh ke kais sie lwen, kuh sahp ke srihpen oasr ma wo eltahl puhla tuhkuh kac?
Ahkuhtweyac luhn Bible ke puhruhe uh siena liki nuhnak luhn mwet uh, muh ma inge mwe na ahkwoye puhlakihn ac nuhnak laltahl. Bible uh fahk nuh sesr lah oasr na pwacye mwet se ma muhta lohng puhruhe nuhkewa ma orek ke inkacnek wo uh ac ma fal in siyuckyuck. Yac ma inge pwacye? Kuht srihke liye mwe ahkpwacyeye nuh kac uh.
a Inen mwet inge ikihlyucklac.