Kom Kuh In Lainuhl Satan ac Kuhtanguhllah!
“Tu na kuh ke luhlahlfongi lowos an, ac lainuhl [Satan].”—SIE PETER 5:9.
1. (a) Efuh kuh orekma lasr in lainuhl Satan arlac yohk srihpac ke pacl inge? (b) Kuht etuh fuhkah lah kuht kuh in kuhtanguhllah Satan?
SATAN el lain mwet akmuhsralah nuhkewa suc srackna oasr fin facluh ac el lain “kuhtuh pac sheep” uh. (John 10:16) Ke arlac fototoeni pacl luhlah lal, Devil el luhngse in kuhnahoslah luhlahlfongi luhn mwet kuhlwacnsap luhn Jeova inge. (Riti Fwackyuk 12:9, 12.) Tuhsruhktuh kuht kuh in lainuhl Satan. Bible uh ahkkahlwemye: “Kowos in lain Devil, ac El ac fah kahingkihn kowos.”—James 4:7.
2, 3. (a) Efuh kuh Satan el luhngse mwet uh in luhlahlfongi muh el tiac ma na pwacye se? (b) Kom etuh fuhkah lah Satan el ma na pwacye se?
2 Puhs mwet ma isrucn nuhnak inge muh Satan el mwet na pwacye se. Nuh seltahl, Satan ac dimon uh sruhmuhnyuck muhkwena ke puk, petsac ahksahngweng, ac video game. Mwet inge eltahl nuhnkuh muh kom fin lahlmwetmwet, kom tiac enenuh in luhlahlfongi lah ngun kuluk uh oasr na pwacye. Yac Satan el suhpwacr ke mwet uh tiac luhlahlfongi lah el ac dimon lal uh tiac ma na pwacye? Moh. Fihsracsr nuh sel Satan elan kiacpwelah mwet ma tahfuh luo el fin ma na pwacye se kuh tiac. (Luo Corinth 4:4) Satan el ahkkweye kain in nuhnak inge tuh elan kiacpwelah mwet uh.
3 Kuht suc Mwet kuhlacnsap luhn Jeova, kuht tiac kuh in kiacpweyucklac. Kuht etuh lah Devil el ma na pwacye se. Kuht etuh fuhkah? Mweyen Bible uh ahkkahlwemye lah Satan el orekmakihn serpent soko in kahskahs nuh sel Eve. (Genesis 3:1-5) El sramsram nuh sin Jeova, ac fahk muh Job el tiac kuhlwacnsuhpwacl ke inse pwacye. (Job 1:9-12) Satan el srihke in srihfacl Jesus. (Matthew 4:1-10) Tukun Jesus el Tohkohsrahlac ke yac 1914, Satan el muhtwacwack “in mweun” nuh sin mwet akmuhsralah suc srackna oasr fin facluh. (Fwackyuk 12:17) Mweun se inge tahfwelah na ke Satan el srihke in kuhnahoslah luhlahlfongi luhn mwet akmuhsralah ac sip ngiac. In kuhtanglah ke mweun se inge, kuht enenuh in lainuhl Satan ac karihngihn luhlahlfongi lasr in fokoko pacl nuhkewa. Ke mwe lutlut se inge, oasr inkacnek tolu ma ac ahkuhtweyucki lah fuhkah in oruh ma inge.
SISLAH FIHLACNG AC INSE FUHLWACT
4. Fuhkah Satan el mwe srihkasrak kuluk se emeet ke inse fuhlwact?
4 Satan el inse fuhlwact ac fihlacng na pwacye. Lipufacn kuluk se inge el arlacna ke lain suwohs luhn God in kol, ac el srihke tuh mwet pucspucs in alu nuh sel ac tiac nuh sin Jeova. Ke ma inge el mwe srihkasrak se ke ohiyacn inse fuhlwact ac fihlacng. Pwacnacng sie inkacnek ma kuht kuh in lainuhl Satan kac uh pa in sislah inse fuhlwact ac kuht in inse puhsisacl.—Riti Sie Peter 5:5.
5, 6. (a) Kuht fin ahksacohkye ac luhlahlfongi ke kuhiyacsr sifacna, yac ma inge kuluk? Ahkuhtweyac. (b) Meac kuhtuh mwe puhpuhlyuck in Bible suc ahkkahlwemye lah inse fuhlwact kuh fihlacng arlacna sensen?
5 Kuht fin luhlahlfongi kacsr ac suhnakihn kuht sifacna, ma inge tiac ma kuluk se. Oacpacna ke kuht engan mweyen kuht ac mwet in sucu lasr oruh ma na wo se, kuh oasr yurosr ac yohrohltahl kain in ohiyac ma arlacna wo. Mwet sap Paul el fahk: “A ingacn srihpac se pwacnacng kuht kohnkihn keiwos nuh sin mwet in church [“congregation,” NW] nuhkewa lun God. Kuht kohnkihn ke ohiyacn muhtweng lowos ac luhlahlfongi lowos ke pacl in kalyei ac kweok nuhkewa ma sun kowos.” (Luo Thessalonica 1:4) Ke ma inge puhlakihn nuhke orekma luhn mwet sahyac ac kuht sifacna pac ma ac wo nuh sesr. Kuht tiac enenuh in mwekihn ke sucu lasr, facsin, kuh ke acn ma kuht mahtuhlah we.—Orekma 21:39.
6 Tuhsruhktuh, oasr sie kain in kohnkihn ma kuh in kuhnahoslah fototo luhn mwet uh, yohk na nuhke fototo lasr nuh sin Jeova. Kain in kohnkihn inge kuh in oruh kuht in sa in foloyak fin kaiyuck kuht. Ohiyac inge kuh in oruh kuht in pihlesruh kahs in kahsruh. (Psalm 141:5) Kain in kohnkihn inge ahkkahlwemye lah kuht nuhnkuh kacsr sifacna kuh oacna sie “ohiyac inse fuhlwact suc ahkkahlwemyeyuck sin mwet suc luhlahlfongi, ac kwacna tiac kuh in ahksuwohsyeyuck, muh eltahl wo liki mwet sahyac.” Jeova el sruhnga na pwacye inse fuhlwact ac kohnkihn. (Ezekiel 33:28; Amos 6:8) Tuhsruhktuh Satan el luhngse in liye ke mwet uh etahi inse fuhlwact lal ke eltahl kohnkihn kacltahl sifacna. Srihke luhmahlah ke nuhnak lom luhpan engan yohk lal Satan ke pacl se Nimrod, Pharaoh ac Absalom, eltahl ahkkahlwemye kain in kohnkihn tiac wo inge ke ohiyacn inse fuhlwact laltahl ke ma eltahl oruh. (Genesis 10:8, 9; Exodus 5:1, 2; Luo Samuel 15:4-6) Ke srihpen inse fuhlwact, tuhlac pac fototo lal Cain nuh sin Jeova. Jeova el sang kahs in kai nuh sel Cain, tuhsruhktuh Cain el arlac inse fuhlwact ac srunga in lohng. El lihkkeke na pwacye, pihlesruh kahs in sensen luhn God, ac el tiac tahfuh luo in oruh ma kuluk lain Jeova.—Genesis 4:6-8.
7, 8. (a) Meac se inge srisri kuh sulosol mwet, ac fuhkah ma inge kuhpahsr nuhke kohnkihn? (b) Ahkuhtweyac lah fuhkah kohnkihn ac kuh in kuhnahoslah mislac luhn sie congregation?
7 Ke pacl inge, mwet uh ahkkahlwemye inse fuhlwact ke inkacnek kuluk pucspucs. Kuhtuh pacl uh ohiyacn inse fuhlwact kuhpahsr nuhke srisri kuh sulohsohl mwet. In fal nuhke sie dictionary, ma inge kalmackihn nuhke nuhnak in lain, sruhnga mwet ke muhtuhnfacl sahyac. Oacyacpac, ma inge kalmackihn nuhke “luhlahlfongi muh oasr ohiyac ac kuh pucspucs luhn mwet ke kain in sruf, ac kuhtuh sruf uh wo liki, kuh kuluk liki kuhtuh sruf sahyac.” Ohiyac inge pa srihpac pwacnacng oasr alein, mweun ac ahkmas orek yen pucspucs.
8 Pwacye lah kain in ohiyac inge ac tiac enenuh in sikyak ke congregation luhn mwet Christian uh. Tuhsruhktuh, srackna oasr pacl mwet lili uh tiac insese nuh sin sie sin sie ke srihpen inse fuhlwact ac ma inge kuh in upaclah kuh yohkwelihk. Ma inge sikyak nuh sin kuhtuh mwet Christian in pacl meet ah. Pa inge srihpac pwacnacng James el siyuck kihsen siyuck na yohk se inge nuh seltahl: “Tuhkuh yac me acnwuck ac akuhkuhin inmahsrlowos inge?” (James 4:1) Kuht fin sruhnga mwet sahyac ac puhla muh kuht wo luhkeltahl, sahp oasr ma kuht ac kuh in fahk kuh oruh ma se ma ac fah ahktoasryacltahl. (Soakas 12:18) Kahlwem lah, sie mwe sensen nuhke mislac luhn congregation uh pa kohnkihn.
9. Bible uh kahsre kuht fuhkah in lain ohiyacn srisri ac kuhtuh pac inkacnek in kohnkihn sahyac ma tiac wo? (Liye petsac se meet ke mwe lutlut inge.)
9 Kuht fin kwacna puhla muh kuht wo liki mwet sahyac uh, kuht enenuh in esam lah Jeova el sruhnga “mwet nuhkewa suc fihlacng.” (Soakas 16:5) Kuht enenuh pac in tuni insiacsr ac siyuck sesr sifacna: ‘Yac nga puhla muh nga wo liki mwet ma tuhkuh ke siena muhtuhnfacl kuh facsin?’ Fin ahok, kuht muhlkuhnlah lah God “el oraclah muhtuhnfacl nuhkewa sin mwet sefanna.” (Orekma 17:26) Pwacnacng kuht nuhkewa, tuhkuh sin mwet sefanna ke srihpen mwet nuhkewa tuhkuh sel Adam. Sie nuhnak lahlfon in luhlahlfongi muh God el oraclah kuhtuh mwet uh wo liki kuhtuh. Kuht fin nuhnkuh ohinge, oacpacna kuht in lwelah Satan elan kuhnahoslah luhngse ac inse sefanna lasr oacna mwet Christian. (John 13:35) Kuht enenuh in fahsr liki kuhtwena kain in kohnkihn ma tiac wo tuh kuht in lainuhl Satan ac kuhtanguhllah.—Soakas 16:18.
FAHSR LIKI LUHNGSE FACLUH AC MWE KASRUHP LUHN FACLUH
10, 11. (a) Srihpac fuhkah oruh fihsracsr nuh sin sie mwet elan luhngse facluh? (b) Ke srihpen Demas el luhngse facluh, meac sikyak nuh sel?
10 Satan pa “leum luhn facluh,” ac el pa kol uh. (John 12:31; Sie John 5:19) Ma pucspucs suc facluh ahkkweye uh lain kahs in kahsruh luhn Bible kac uh. Pwacye, tiac ma nuhkewa fin facluh kuluk. Tuhsruhktuh, kuht kuh in etuh lah Satan el ac fah orekmakihn facl se lal inge in srihke ahkkulukye kena lasr tuh kuht in oruh ma kuluk. Kuh el ac srihke oruh kuht in luhngse facluh ac in pihlesruh kuhlwacnsap lasr nuh sin Jeova.—Riti Sie John 2:15, 16.
11 Kuhtuh sin mwet Christian in pacl meet ah luhngse facluh. Ke sie mwe puhpuhlyuck, Paul el suhmuhslah: “Demas el fahsr likiyuc ac som nuh Thessalonica, mweyen el luhngse ma luhn facluh.” (Luo Timothy 4:10) Bible uh tiac fahk lah meac se fin facluh Demas el luhngse nwe oruh elan sisuhllah Paul. Sahp Demas el muhtwacwack in luhngse mwe kahsruhp yohk liki kuhlwacnsap lal nuh sin Jeova. Fin pa inge, Demas el sislah pacl wowo se lal in engankihn kunohkohn pucspucs ke orekma in kuhlwacnsap luhn God uh. Yac oasr srihpen sulaclah lal ah? Moh. Demas el luhkuhn tahfwelah na in sie mwet kahsruh lal Paul. Wacngihn kuhtwena ma facluh kuh in sang nuh sel wo liki ma Jeova el kuh in sang nuh sel!—Soakas 10:22.
12. Satan el ac orekmakihn fuhkah kena lasr in “luhngse . . . nuhke mwe kahsruhp”?
12 Ma inge kuh pac in sikyak nuh sesr ke pacl inge. Oacna mwet Christian, tiac ma kuluk se in suk mwe enenuh lasr ac luhn sucu lasr uh. (Sie Timothy 5:8) Kuht etuh lah Jeova el ke kuht in engankihn moul lasr uh, mweyen el sang imac na kahto se Adam ac Eve eltahl in muhta kac. (Genesis 2:9) Tuhsruhktuh, Satan el kuh in orekmakihn kena lasr uh ke inkacnek luhn “luhngse . . . nuhke mwe kahsruhp.” (Matthew 13:22) Mwet pucspucs eltahl nuhnkuh muh mani ac mwe kahsruhp uh ac oruh eltahl insewowo. Fin pa inge ma kuht nuhnkuh uh, ma inge ac kuh in oruh tuhlac ma se ma sacohk emeet yohrohsr uh, pa fototo lasr nuh sin Jeova. Jesus el sensenkackihn: “Wacngihn mwet kuhlwacnsap kuh in kuhlwacnsuhpuh leum luo. El ac sruhnga sie, ac luhngse el ngiac; el ac pwacye nuh sin sie, ac kwase el ngiac. Kowos koflahna kuhlwacnsuhpuh God ac mani.” (Matthew 6:24) Kuht fin kuhlwacnsuhpuh mwe kahsruhp, kalmac pa kuht tui in kuhlwacnsuhpuh Jeova. Pa inge ma Satan el ke kuht in oruh uh. Pwacnacng, kuht in tiac lwelah mani kuh kuhtwena ma mani kuh in molwelah in yohk srihpac liki na fototo lasr nuh sin Jeova. In lainuhl Satan ac kuhtanguhllah, enenuh in oasr yohrohsr nuhnak suwohs ke mwe kahsruhp uh.—Riti Sie Timothy 6:6-10.
FAHSR LIKI OREKMA IN KOSRO
13. Fuhkah facluh ahkkweye nuhnak tiac wo ke macruht ac ke ohsun luhn mukul ac muhtwacn ke mahno?
13 Sie pac sin mwe sruhf lal Satan uh pa orekma in kosro. Mwet pucspucs eltahl nuhnkuh muh ma na emeet pa in oaru nuh sin mukul kuh muhtwacn kiyacltahl, ac lah ma inge oruh srihklac ma eltahl sukohsohk nuh kac. Ke sie mwe puhpuhlyuck, sie actress el fahk lah tiac kuh sie mwet elan oaru nuh sin mwet sefanna. El fahk pac lah: “Wacngihn sie mwet nga etuh muh oaru kuh luhngse in oaru.” Sie actor el fahk: “Nga nihkihn lah kuht ac kuh in wi mwet sefanna ke lusen moul lasr uh nohfohn.” Kahlwem lah Satan el engan ke mwet pwengpweng inge ahkkulukye mwe sang luhn God ke macruht uh. Devil el tiac ahkkweye oakwuck in macruht, ac el tiac ke in oasr insewowo ke moul in pahyuck uh. Pwacnacng in lainuhl Satan ac kuhtanguhllah, kuht enenuh in suhnakihn oakwuck luhn God ke macruht uh.
14, 15. Meac kom kuh in oruh kom fin srihfeyuck in oruh orekma in kosro?
14 Kuht finne pahyuck kuh lolacp, kuht enenuh in kwacfeacng in lain inkacnek in kosro nuhkewa. Yac ma inge fihsracsr? Moh, tiac! Ke sie mwe puhpuhlyuck, kom fin sie mwet fuhsr, sahp kom lohng ke tuhlihk lutlut wiyom eltahl fihlacngkihn ke eltahl kuh in wi mwet nuhkewa eltahl ke kosro nuh se. Sahp eltahl fihlacngkihn pac sramsram laltahl ke cell phone ke eltahl suhpuh sap ac petsac fohkfohk suc ahkkahlwemye orekma in kosro. Ke kuhtuh muhtuhnfacl, ohiyac kuluk ke cell phone inge etweyuck muh oacpacna ke suhpweyuck petsac fohkfohk ke tuhlihk srihsrihk. Bible uh fahk: “Mwet se suc kosro el oruh ma kuluk nuhke mahnol sifacna.” (Sie Corinth 6:18) Mas pucspucs suc fahsrelihk ke inkacnek luhn orekma in kosro ke sahflahiyac ah mwe kweok yohk ac misac pac. Ac inkaiyen mwet fuhsr ma ohsun nuh sin mwet ke mahno tuhsruhktuh tiac pahyuck eltahl fahk lah eltahl auli ke ma eltahl oruh inge. Mwet ma ahkkweye mwe ahkengan pucspucs eltahl ke kuht in luhlahlfongi lah wacngihn kuhtwena ma upac ac sikyak ke kuht kuhnahoslah ma sap luhn God uh. Kuht fin luhlahlfongi kain in kahs kikiacp inge kuht ac kuh in kiacpweyucklac ke “ma kikiacp luhn ma kuluk.”—Hebrew 3:13.
15 Kom fin ac srihfeyuck in kosro, meac kom kuh in oruh? Akihlen lah oasr mwe muhnahs lom. (Rome 7:22, 23) Puhruhe nuh sin God in siyuck ke kuh. (Philippi 4:6, 7, 13) Fahsr liki kuhtwena ma ac kuh in oruh kom in kosro. (Soakas 22:3) Ac ke pacl se oasr mwe sruhf, suhlahklahk forlah liki.—Genesis 39:12.
16. Meac Jesus el fahk ke pacl se Satan el srihke in srihfacl ah, ac meac kuht kuh in lotelah ke mwe srihkasrak lal se inge?
16 Jesus el oakiyac mwe srihkasrak na wowo se nuh sesr. Tiacna kiacpweyucklac el ke wuhlelah lal Satan. El tiac pac tui in nuhnkaclah. Tuhsruhktuh, el suhlahklahk na fahk nuh sel Satan: “Ma Suhmuhslah uh fahk.” (Riti Matthew 4:4-10.) Jesus el etuh Kahs luhn God uh, pwacnacng el kuh in suhlahklahk fahk ma suhmuhslah uh ke pacl se Satan el srihke in srihfacl. In lainuhl Satan ac kuhtanguhllah, kuht enenuh in tiac lwelah kuht in sruhflah in oruh orekma in kosro.—Sie Corinth 6:9, 10.
KUHTANGLAH KE KUHT MUHTWENG
17, 18. (a) Meac kuhtuh pac mwe sruhf Satan el orekmakihn, ac efuh kuht etuh lah kuht ac sun ma inge? (b) Meac ac fah sikyak nuh sel Satan, ac ma inge ahkkweye kom fuhkah in tu na kuh ac muhtweng?
17 Inse fuhlwact ac fihlacng, luhngse nuhke mwe kahsruhp, ac orekma in kosro pa tolu na sin mwe sruhf pucspucs lal Satan uh. Srackna puhs ma sahyac. Ke sie mwe puhpuhlyuck, kuhtuh sin mwet Christian uh oasr sucu la suc lainuhltahl kuh mwet ma ahngloltahl ke acn in lutlut. Kuhtuh seltahl muhta ke muhtuhnfacl ma government we srihke in tulokihnyac orekma in luti laltahl uh. Kuht etuh lah kuht ac fah sun kain in ma upac inge. Jesus sifacna el sensenkackihn kuht: “Mwet nuhkewa ac fah kwase kowos ke srihpuck. Tuhsruhktuh elos nuhkewa suc muhtweng nwe ke sahflah, elos fah moul.”—Matthew 10:22.
18 Fuhkah kuht kuh in lain ac kuhtanguhllah Satan? Jesus el fahk: “Kowos tu na kuh, ac kowos fah sifacna molikowoslac.” (Luke 21:19) Wacngihn ma kuhtwena mwet kuh in oruh in ahkngalye kuht nwe tok. Wacngihn sie mwet kuh in eslah fototo lasr nuh sin God kuht fin tiac lwelah. (Rome 8:38, 39) Mwet kuhlwacnsap oaru luhn Jeova eltahl finne misac, tiac kalmac pa Satan el kuhtanglah. Jeova el ac fah sifwil ahkmoulyacltahlack. (John 5:28, 29) Tuhsruhktuh wacngihn finsrak lal Satan ke pacl fahsruh uh. Tukun facl kuluk se inge ac kuhnanuclac, el ac fah sisiyang nuh in abyss ke lusen sie tausin yac. (Fwackyuk 20:1-3) Ke sahflahiyen sie tausin yac ke kolyuck luhn Christ, Satan el ac fah “tuhlweyucklac liki presin lal” ac ke pacl sahflah se el fah srihke in kiacpwelah mwet suwohswohs uh. El ac fah kuhnausyucklac tukun ma inge. (Fwackyuk 20:7-10) Finne wacngihn finsrak luhn Devil nuhke pacl fahsruh uh, srackna oasr finsrak lom! Tahfwelah na in lainuhl Satan, ac sruokyacna kuh luhlahlfongi lom. Kom kuh in lainuhl Satan ac kuhtanguhllah!