Taran Satan El Ke Kuhnauskomlac!

1. Ahkuhtweyac lah fuhkah tuh lipufacn se eklac Satan.

KE SIE PACL AH, el engankihn fototo lal nuh sin Jeova. Tuhsruhktuh, tok, lipufacn se inge el ke mwet uh in alu nuh sel. El tiac lain kena kuluk se inge, a el lwelah in yohkwelihk nwe ke na elan oraclah sie ma kuluk. (James 1:14, 15) Ke muhtwacwackiyac ah, kuht tiac etuh na pwacye inel, tuhsruhktuh ke pacl inge, kuht pahnglol Satan. El “tiac wi lacyen ma suwohs.” El lainuhl God ac eklac “pahpah tuhmuhn kikiacp nuhkewa.”​—John 8:44.

2, 3. In fal nuh ke kahs inge “Satan,” “Devil,” “serpent,” ac “dragon,” meac ahkkahlwemye ke mwet lokoalok yohk emeet se luhn Jeova inge?

² Muhtwacwackiyen orekma in lain lal Satan, el eklac sie mwet lokoalok yohk emeet luhn Jeova ac luhn mwet uh. Kuht kuh in liye luhpan kuluk lal Satan ke kuht tuni mwe ahkuhtweyac luhn Bible kacl uh. Kalmacn Satan pa “Mwet Lain,” suc ahkkahlwemye lah lipufacn suhlallacl se inge sruhnga kolyuck luhn God ac el lainuhl ke kuh lal kewa. Ma Satan el arlacna ke liye in sikyak uh pa in sahflah kolyuck luhn Jeova.

³ Ke Fwackyuk 12:9, Satan el pahngpahng Devil, suc kalmac pa “Mwet Kikiacp.” Satan el tiac ahkfuhlwactye God ke pacl se el pahnglol sie mwet kikiacp. Kahs inge “serpent soko in pacl omeet ah,” ahkacsmakihnye kuht ke inkacnek lal Satan ke el orekmakihn serpent soko in kiacpwellah Eve. Kahs inge “dragon luhlahp,” pa sie pac inkacnek wo in sang ahkuhtweyac kacl Satan. Wacngihn pahkomuhta lal, el suhlallacl, ac el kuluk na pwacye. El ke tulokihnyac oakwuck luhn God uh in tiac ahkpwacyeyuck oacyacpac el ke kuhnahoslah mwet luhn God uh.

4. Meac kuht ac fah sramsramkihn ke mwe lutlut se inge?

⁴ Kahlwem lah, Satan el mwe sensen na yohk se nuh ke oaru lasr uh. Pa inge srihpac pwacnacng Bible uh sensenkackihn kuht ohinge: “Ngucsrihk ac tawi! Devil, mwet lokoalok lowos, el forfor oacna soko lion ngutngut, sukok mwet elan kanglah.” (Sie Peter 5:8) Pwacnacng, mwe lutlut se inge ac fah sruhmuhn ke ohiyac tolu lal Satan ma ahkkahlwemye lah efuh kuht enenuh in karihngihn kuht sifacna liki mwet lokoalok kuluk se luhn Jeova inge ac mwet Lal uh.

SATAN EL ARLACNA KUH

5, 6. (a) Sang kuhtuh mwe puhpuhlyuck ma ahkkahlwemye lah lipufacn uh arlacna kuh. (b) Ke inkacnek fuhkah Satan el pa “srihpen misac”?

⁵ Lipufacn uh arlacna kuh. (Psalm 103:20) Eltahl fuhlwact liki mwet uh ac ma inge pwacnacng yohk lahlmwetmwet ac kuh laltahl. Pwacye lah lipufacn oaru inge orekmakihn kuh laltahl uh ke ma wo. Ke sie mwe puhpuhlyuck, ke sie pacl ah lipufacn se luhn Jeova tuh uniyac un solse lokoalok se luhn acn Assyria suc pihsacltahl oasr ke 185,000. Tiac kuh in orek ma inge sin mwet sefanna kuh finne un solse se. (Luo Tokosra 19:35) Ke sie pacl ah lipufacn se tuh orekmakihn suhmaht ac kuh lal inge in ahksukohsohkyelah mwet sap luhn Jesus liki presin. Mwet topang ah finne fototo nuh kac, eltahl tiac kuh in liye ke lipufacn sac ikucslah lak ke sruhnguhl sac, ahksukohsohkyelah mwet sap ah, ac sifwil lakiyac sruhnguhl sac.​—Orekma 5:18-23.

⁶ Lipufacn oaru inge orekmakihn kuh laltahl ke ma wo, tuhsruhktuh Satan el orekmakihn kuh lal uh nuh ke ma kuluk. Ac arlacna yohk kuh lal Satan in ahkkulukye mwet uh. Bible uh pahnglol oacna “leum luhn facluh” ac “god kuluk lun facl se inge.” (John 12:31; Luo Corinth 4:4) Satan pac pa “srihpen misac.” (Hebrew 2:14) Tiac kalmen ma inge pa el uniyac mwet uh ke pacl sefanna. Ac meac kalmac? Ma se meet, facluh nwacnwaclah ke ohiyac kuluk lal Satan suc mwe sruhngacyuck. Ma se ahkluo, Eve el luhlahlfongi kahs kikiacp lal Satan ac ke srihpen Adam el seahkos God, pwacnacng mwet nuhkewa oruh ma kuluk ac misac. (Rome 5:12) Jesus el pahnglol Satan, “mwet ahkmas se.” (John 8:44) El sie mwet lokoalok suc arlacna kuh.

7. Demon uh ahkkahlwemye fuhkah lah eltahl arlacna kuh?

⁷ Ke pacl se kuht lainuhl Satan uh, kuht oacyacpac lain mwet nuhkewa ma ahkkweyacl in lain kolyuck luhn God. Ma inge wekuhnacng sie u na luhlahp ke lipufacn lal suc wi lain, eltahl pahngpahng demon. (Fwackyuk 12:3, 4) Puhs pacl eltahl ahkkahlwemye lah eltahl kuh liki mwet uh, ke pacl se eltahl oruh mwe ahkkweok yohk nuh seltahl. (Matthew 8:28-32; Mark 5:1-5) Nikmet muhlkuhnlah lah fuhkah luhpan kuh luhn demon inge ac mwet kol se laltahl inge. (Matthew 9:34) Jeova el fin tiac kahsre kuht, na kuht ac tiacna kuh in kuhtanguhllah Satan.

SATAN EL SUHLALLACL

8. (a) Meac finsrak lal Satan uh? (Liye petsac se meet ke mwe lutlut inge.) (b) Ke ma kom liye tari, ke inkacnek fuhkah facluh ahkkahlwemye ohiyacn suhlallacl oacna Satan?

⁸ Mwet sap Peter el puhpuhlyuckkuhnuhl Satan nuh ke “soko lion ngutngut.” Sie puk ahkuhtweyac lah kahs Greek ke “ngutngut” pa “puhsren soko kosro ke el kasrkuhsrak ke masrinsracl.” Ma inge ahkuhtweyac wo na pwacye ke ohiyac suhlallacl ac kuluk lal Satan uh. El kol tari facluh, tuhsruhktuh ma inge srackna suhfal nuh sel. Satan el oacna soko lion ngutngut suc suk pac kuhtuh kosro sahyac elan kanglah. (Sie John 5:19) Mwet ma el suk emeet uh pa mwet akmuhsralah ma srackna oasr fin facluh, wekuhnacng “kuhtuh pac sheep” sahyac. (John 10:16; Fwackyuk 12:17) Finsrak lal Satan uh pa in kuhnahoslah mwet luhn Jeova uh. Mwe kalyei luhn mwet Christian pwacye ke pacl lal Jesus ah fahfahsruh nwe mihsenge ahkpwacyeye luhpan suhlallacl lal Satan uh.

9, 10. (a) Satan el ahkkulukye muhtuhnfacl Israel fuhkah? (Sang mwe puhpuhlyuck nuh kac.) (b) Meac srihpac yohk lal Satan in ahkkulukye muhtuhnfacl Israel in pacl meet ah? (c) Meac kom nuhnkuh muh Devil el puhla ke sie sin mwet kuhlwacnsap luhn Jeova el oraclah sie ma na kuluk ke pacl lasr uh?

⁹ Satan el ahkkahlwemye suhlallacl lal uh ke sie pac inkacnek. Lion masrinsracl soko el tiac pahkomuhta kosro ma el ac kanglah uh. Wacngihn na pahkomuhta lal meet liki el uniyac ac tiac pac na ahkkulukyacl tukun el uniyac. Ke inkacnek se pacna inge, Satan el tiac pahkomuhta mwet ma el ahkkulukye uh. Ke sie mwe puhpuhlyuck, meac kom nuhnkuh muh Satan el puhla ke kais sie pacl ma el liye mwet Israel ah oruh ma kuluk oacna orekma in kosro ac rahpkuh? Yac kom kuh in luhmahlah ke nuhnak lom an ke Satan el engankihn kuhtanglah lal in liye ma upac ma sikyak nuh sel Zimri ke srihpen orekma in kosro lal ac ke pacl se Gehazi el rahpkuh?​—Oekyuk 25:6-8, 14, 15; Luo Tokosra 5:20-27.

¹⁰ Oasr na srihpac yohk lal Satan in ahkkulukye mwet Israel in pacl meet ah. Esam lah Messiah el tuhkuh ke muhtuhnfacl sac, ac el pa mwet se ma ac fah kuhnausuhllah Satan ac ahkpwacyeye lah Jeova pa oasr kuh la in kol. (Genesis 3:15) Satan el sruhnga mwet Israel ah in eis mwe insewowo luhn God, pwacnacng el oruh ke kuhiyacl ma nuhkewa tuh elan ahkkulukyacltahl in oruh ma kuluk. Nikmet nuhnkuh muh Satan el pahkomuhtahl David ke pacl se ma el oruh orekma in kosro. Nikmet nuhnkuh muh el pahkomuhtahl Moses ke pacl se ma wacngihnlac finsrak lal in wi utyak nuh ke Facl in Wuhlelah. Ke ma na pwacye uh, Satan el arlacna engan in liye ke mwet kuhlwacnsap luhn God uh oruh ma kuluk. Ma na pwacye se lah, Devil el orekmakihn kuhtanglah lal inge nuhkewa in ahngon Jeova.​—Soakas 27:11.

11. Efuh kuh Satan el ahkkulukyacl Sarah?

¹¹ Satan el sruhnga na pwacye sucu se ma Messiah el ac fah tuhkuh kac ingacn. Ke sie mwe puhpuhlyuck, nuhnkuh ke ma sikyak tukun Jeova el fahk nuh sel Abraham lah el enenuh in eklac “sie muhtuhnfacl luhlahp.” (Genesis 12:1-3) Ke Abraham ac Sarah eltahl muhta in acn Egypt, Pharaoh el usacllah Sarah nuh in lohm sel ah ac ke elan eklac muhtwacn kiyacl. Tuhsruhktuh, Jeova el karuhnguhnuhl Sarah ac molwellah liki pacl upac sac. (Riti Genesis 12:14-20.) Kain in ohiyac se pacna inge sikyak ke siti se inge Gerar meet liki Isaac el isuslac. (Genesis 20:1-7) Ke ma nuhkewa ma sikyak inge yac Satan pa kuluk uh? Esam lah Sarah el likiyac siti na kahsruhp se pahngpahng Ur ac som muhta ke lohm nuknuk. Pwacnacng, yac Satan el finsrak tuh elan srihfacl ke lohm wowo pucspucs lal Pharaoh ac Abimelech? Yac Satan el nuhnkuh muh el ac kuhtasrihk nuh sin mukul tuhmwacl ah ac nuh sin Jeova in pahyuck nuh sin sie tohkohsrah inge? Tiac fwack na pwacye in Bible uh, tuhsruhktuh arlacna kahlwem lah Devil el ac engan na pwacye Sarah el fin sislah pacl na wowo se lal in kuhpahsryang nuh sin sucu lal Messiah. Ac tiacna ahkkulukyacl Satan, muhtwacn na wowo se inge fuhnuh kuhnahoslah macruht lal, inel, ac fototo lal nuh sin Jeova. Satan el arlacna kuluk ac suhlallacl!

12, 13. (a) Satan el ahkkahlwemye luhpan suhlallacl lal fuhkah tukun Jesus el isuslac? (b) Kom nuhnkuh muh meac Satan el puhla ke tuhlihk srihsrihk suc luhngse Jeova ac kampare in kuhlwacnsuhpwacl ke pacl inge?

¹² Jesus el isuslac ke yac pucspucs tohkohl Abraham. Nikmet nuhnkuh muh Satan el liye ahwowo se inge oacna sie ma kahto kuh sacohk. Satan el etuh lah in oacna ma wihliyucklac ahwowo se inge pa ac muh mahtuhlah te eklac Messiah. Jesus pa yohk srihpac emeet ke tuhlihk nahtuhl Abraham, ac tok el ac fah “kuhnahoslah orekma luhn Devil.” (Sie John 3:8) Yac Satan el nuhnkuh muh orekma in ahkmas se pa in uniyac sie tuhlihk srihsrihk? Moh. El tiac elyah ke ma wo ac ma kuluk uh. Ac el srihke in suhlahklahk unilyac tuhlihk srihsrihk Jesus. Fuhkah?

¹³ Ke Tohkohsrah Herod el lohng sin mwet lahlmwetmwet ah lah “tohkohsrah luhn mwet Jew” el isuslac, el arlacna kasrkuhsrak ac el ke uniyac tuhlihk sac. (Matthew 2:1-3, 13) Pwacnacng el sapkihn in acnwucki tuhlihk mukul nuhkewa suc oasr ke yac luo nuh ten fin acn Bethlehem ac acn nuhkewa ma oan ye kuh luhn acn we. (Riti Matthew 2:13-18.) Jesus el moullac liki ahkmas na upac sac, tuhsruhktuh meac ma inge ahkkahlwemye nuh sesr ke mwet lokoalok se lasr inge Satan? Devil el tiac ahksacohkye moul luhn mwet uh. El tiac pac nuhnkuh ke tuhlihk uh. Ma na pwacye se lah Satan el “soko lion ngutngut.” Nikmet muhlkuhnlah luhpan suhlallacl lal uh!

SATAN EL KIKIACP

14, 15. Satan el “ahklohsrye nuhnak” luhn mwet suhlahlahlfongi fuhkah?

¹⁴ Inkacnek sefanna ma Satan el kuh in furohklah mwet uh in lain God luhn luhngse, suc pa Jeova, pa el fin kiacpweltahl ah. (Sie John 4:8) Satan el kiyacpuh mwet uh tuh eltahl in tiac “nuhnkuh ke ma enenuh lalos in nguhn,” kalmac pa eltahl in tiacna akihlen lah eltahl enenuh in fototo nuh sin God. (Matthew 5:3, NW) Devil el “ahklohsrye nuhnak” luhn mwet suhlahlahlfongi tuh eltahl in tiac liye ma pwacye kacl Jeova.—Luo Corinth 4:4.

¹⁵ Sie inkacnek yohk emeet ma Satan el orekmakihn in kiacpwelah mwet uh pa ke alu kikiacp. El etuh lah Jeova “el tiac luhngse in oasr kuhtwena god sahyacl.” (Deuteronomy 4:24) Pwacnacng srihke nuhnkuh ke luhpan engan lal Satan ke el liye mwet uh alu nuh sin mwet mahtuh laltahl suc misac tari, kuh nuh ke ma oreklac kuh nuh ke ma orahkrahk, oacna sie mwet kuh ma sahyacn Jeova. Mwe ahsor se lah mwet pucspucs nuhnkuh muh alu laltahl uh wo sin God eltahl sremlah ke luhlahlfongi kikiacp ac facsin ma wacngihn srihpac. Mwet Israel ke lwen lal Isaiah eltahl sun kain in ma upac inge. Jeova el srihke in kahsreltahl, ke el fahk: “Efuh kuh kowos sisi mani ke ma ac tiac ahkinsewowoye kowos? Efuh kuh kowos sislah molin orekma lowos ac srackna masrinsracl? Porongeyuc ac oruh ma nga fahk uh, na kowos fah engankihn mwe mongo ma wo emeet uh.”​—Isaiah 55:2.

16, 17. (a) Efuh kuh Jesus el fahk nuh sel Peter: “Fahlac nuh tukuk, Satan”? (b) Satan el ac kuh in kiacpwekuhtlac fuhkah tuh kuht in tilac taran?

¹⁶ Satan el kuh pac in kiacpwelah mwet kuhlwacnsap moniyuck luhn Jeova. Ke sie mwe puhpuhlyuck, nuhnkuh ke ma sikyak ke pacl se Jesus el fahk nuh sin mwet tuhma lutlut lal lah ke pacl na sa el ac fah acnwucki. Mwet sap Peter, suc luhngse Jesus, el fahk: “Lwelah in loeslac liki kom, Leum; ma inge fah tiacna sikyak nuh sum!” Jesus el fahk nuh sel Peter: “Fahlac nuh tukuk, Satan!” (Matthew 16:22, 23) Efuh kuh Jesus el pahnglol Peter “Satan”? Ma ke srihpen Jesus el etuh lah meac ac fah sikyak nuh sel. Ke pacl na sa, Jesus el ac misac tuh in mwe molwelah ac in ahkpwacyeye lah Devil el mwet kikiacp se. Pacl na upac se pa inge ke mwe sramsram luhn mwet uh ac tiac pacl wo nuh sel Jesus in pahkomuhtahl sifacna. Jesus el fin tilac taran ac karuhnguhnuhl, Satan el arlacna luhngse ma inge.

¹⁷ Ke sahflahiyen oakwuck kuluk se inge apkuhran me, kuht oacyacpac muhta ke puhlan pacl na upac se. Satan el ke kuht in nuhnkuh kacsr sifacna ke kuht suk in eis ma wowo nuhkewa luhn facluh. El ke kuht in muhlkuhnlah lah kuht moul ke lwen sahflah ac kuht in tilac taran. Nikmet lwelah ma inge in sikyak nuh sum! Tuhsruhktuh, “tawi ac karuhnguhnwacng.” (Matthew 24:42) Nikmet luhlahlfongi kahs kikiacp lal Satan muh sahflah uh srackna loes kuh lah ac tiacna tuhkuh.

18, 19. (a) Satan el ac srihke in kiacpwekuhtlac ac oruh kuht in nuhnkuh muh kuht tiac fal in eis luhngse luhn Jeova fuhkah? (b) Jeova el ac kahsruh kuht fuhkah in taran pacl e nuhkewa?

¹⁸ Satan el ac srihke pac in kiacpwekuhtlac ke sie inkacnek sahyac. El ke kuht in luhlahlfongi muh kuht tiac fal in eis luhngse luhn Jeova ac lah God el ac tiacna nuhnak muhnahs nuh sesr ke ma kuluk lasr uh. Tuhsruhktuh kahs kikiacp inge ma tuhkuh sel Satan. Srihke nuhnkuh kac, suc na pwacye tiac fal in eis luhngse luhn Jeova uh? Satan. Suc na pwacye God el ac fah tiacna nuhnak muhnahs nuh se uh? Satan. Tuhsruhktuh nuh sesr, Bible uh fahk: “God El tiac oruh ma suhfal. El ac fah tiac muhlkuhnlah orekma suc kowos oraclah, kuh luhngse suc kowos ahkkahlwemye nuh sel.” (Hebrew 6:10) Jeova el ahksacohkye ma nuhkewa kuht oruh in ahkenganyacl, ac orekma in kuhlwacnsap lasr nuh sel uh tiac wacngihn srihpac. (Riti Sie Corinth 15:58.) Pwacnacng, nikmet kiacpweyucklac ke kahs kikiacp lal Satan uh.

¹⁹ Oacna ke ma kuht liye uh, Satan el arlacna kuh, suhlallacl ac kuhtasrihk. Kuht ac kuh in kuhtanglah fuhkah in lain sie mwet lokoalok ohinge? Jeova el ase nuh sesr mwe kahsruh. Kahs lal luti nuh sesr ke kain in inkacnek lal Satan tuh “kuht etuh ohiyac kuhtasrihk lal.” (Luo Corinth 2:11) Kuht fin etuh na pwacye ke kain in inkacnek lal Satan in ahkkulukye kuht, ac fihsracsr kuht in taran pacl nuhkewa. Arlac wo kuht in etuh ke kain in inkacnek lal Satan, tuhsruhktuh oasr pac ma enenweyuck sahyac. Bible uh ahkkahlwemye ohinge: “Kowos in lain Devil, ac el ac fah kahingkihn kowos.” (James 4:7) Mwe lutlut tohkoh an ac fah ahkuhtweyucki ke ohiyac tolu ma kuht ac kuh in lainuhl Satan ac kuhtanguhllah kac uh.