Yac Sahflah Apkuhran Me?

Yac God el ac lwelah mwet uh in tahfwelah na in kololos sifacna ac in ahksensenye pacl fahsruh luhn mwet uh? Moh, in oacna ke ma kuht lotelah tari, el ac fah ahksahfyaclah ma upac ac mwe kweok ma oasr ke pacl na loeloes. God, suc oraclah facluh ac mwet uh el luhngse kom in etuh lah pacl pakiyucki lal in oruh ma inge apkuhran in tuhkuh. El ac fah ahkkahlwemye etwacack yohk srihpac inge fuhkah?

Nuhnkuh ke mwe puhpuhlyuck se inge: Ke pacl se kom kahsruhsr ke stosah okom an, sahp kom liye ke internet, ke macp, ac kuhtuh pac ma sihmlac ke acn ma kom ac som nuh we. Ac ke kom liye kain in mwe akucl ke acn uh ma fal nuhke ma ahkkahlwemyeyuck in macp, internet ac puk sacn, kom luhlahlfongi lah kom ac apkuhran in sun acn sac. Ke inkacnek se pacna inge, God el acse nuh sesr Kahs lal, ac ma inge ahkuhtweyac arlac kahlwem ke ma pucspucs ma sikyak fin facluh nohfohn. Ke pacl se kuht liye kain in mwe akucl ma sikyak inge, kuht luhlahlfongi na pwacye lah kuht oasr ke puhlan pacl se ma arlac apkuhran nuhke sahflah.

Bible uh ahkkahlwemye lah ke ma sikyak fin facluh nohfohn ac ma inge fah sun sie puhlan pacl ma arlac siena liki kuhtwena pacl sahyac. Ma inge ac fototo na pwacye nuhke sahflah uh. Ke puhlan pacl se inge, ac fah liyeyuck kain in ma sikyak fin facluh ac ohiyac pucspucs ma siena liki kuhtwena ohiyac ac pacl ke moul luhn mwet uh. Lohacng ahkwoyac nuhke kuhtuh ohiyac ma ahkkahlwemyeyuck inge ke Kahs luhn God.

1. MWE FOSRNGAH AC KWEOK UPAC FIN FACLUH NOHFOHN Sie kahs pahluh ma sihmihsyucklac in Matthew sapta 24 ahkkahlwemye ke ma pucspucs ma ac sikyak fin facluh ma oraclah mwe akucl uh. Mwe akucl inge ac fah kalmackihn nuhke sahflahiyen oakwuck nuhkewa luhn mwet uh ac ma inge kol nuhke puhlan pacl se ke “sahflah” uh ac fah tuhkuh. (Fuhs 3, 14) Mwe akucl inge pa mweun luhlahp, sracl, kusrusr ke acn pucspucs, ma kuluk yohkyohkwelihk, srihkeni luhngse luhn mwet nuh sin sie sin sie, ac orekma kuhtasrihk luhn mwet kol luhn alu in kiacpwelah mwet uh. (Fuhs 6-26) Ahok, ke kuhtuh ohiyac, ma inge sikyak pac ke lusen pacl na loeloes. Tuhsruhktuh, ke sahflah uh apkuhran me, kain in mwe akucl inge ac fah tuhkweni na sikyak ke puhlan pacl sena. Ma inge ac sikyak pac ke pacl se mwe akucl tolu tohkoh ingacn sikyak.

2. ELAH AC OHIYEN MWET UH Bible uh ahkkahlwemye lah ke “lwen sahflah,” sie puhlan pacl ma ac kol nuhke sahflah, ac fah arlacna kahlwem ke srihpen ohiyen mwet uh ac kuluklac liki na meet ah. Kuht kuh in rit ohinge: “Tuh mwet ac fah nuhnkuh kaclos sifacna, luhngse mani, kohnkihn, ac fihlacng. Elos ac fah kahskahs in ahkkulukye mwet, seahkos pahpah ac ninac, nihkihn sang kuloh, ac wacngihn nuhnkeyacn alu selos. Elos ac tiac kuhlwacng, tiac pahkotwen, a elos mwet lwesrihk, suhlallacl, folo, ac kwase ma wo. Elos ac mwet kuhtasrihk, sopoklot, arlacna inse fuhlwact, elos fah luhngse mwe pwacr yohk liki God.” (Luo Timothy 3:1-4) Pwacye, orekma luhn mwet ma wacngihn suhnak la nuh sin mwet sahyac uh tiacna ma sasuc se, tuhsruhktuh ke “lwen sahflah” uh ohiyac inge ac fah arlacna kuluklac kuh upaclah pasis puhlan pacl se inge ahkkahlwemyeyuck oacna sie pacl ma “ac fah oasr mwe ongaiyac luhlahp.” Yac kom akihlen lah elah ac ohiyen mwet uh kuluklac na pwacye?

3. MWET UH KUHNAHOSLAH FACLUH Bible uh ahkkahlwemye lah God el ac fah “kuhnahoslah mwet suc kuhnahoslah facluh.” (Fwackyuk 11:18) Mwet uh kuhnahoslah facluh ke inkacnek fuhkah? Ke pacl se ma Noah el moul ac, ma inge ahkkahlwemyeyuck pac ke inkacnek oacpacna inge: “A facluh kuhlawi ye muhtuhn God, ac facluh sesseslah ke orekma suhlallacl. A God el liye facluh, a, liye, ma kuhlawi.” Ke ma inge God el fahk nuh sin mwet kuluk in pacl sac: “Nga fah ahkwacngihnyeloslac liki fin facluh.” (Genesis 6:11-13, BMK) Yac kom akihlen lah arlacna puhs mwe ahkpwacyeye lah facluh sesseslah ke ma kuluk ac orekma suhlallacl? In wekuhnacng, ke pacl inge mwet uh oraclah ma se ma wacngihn ma oacna. Oasr kuh laltahl in kuhnahoslah na pwacye facluh ke inkacnek in ahkmas nuh sin mwet nuhkewa fin facluh. Oasr kuhfwen mwe mweun nahtuhltahl in oruh ma inge. Ac kuhnausyucklac pac facluh ke sie inkacnek sahyac. Kain in oakwuck ma sang kahsruh ke ma moul nuhkewa fin facluh, oacna ke eng ma kuht momongkihn, ke akacsruhi luhn ma orakrak ac sahk uh, inkof uh, ma inge nuhkewa ahkkulukyeyucklac ke srihpen orekma luhn mwet ma tiac karihngihn ma inge.

Sifacna siyuck sum, ‘Ke yac siofok somlah ah, yac oasr kuh luhn mwet in kuhnahoslah mwet nuhkewa?’ Tuhsruhktuh, ke pacl inge mwet uh ahkkweye kuh laltahl inge, ke eltahl oraclah kain in kuhfwen mwe mweun ma arlac fokoko ac ke eltahl kuhnahoslah inkof uh, yen engyeng uh, ac insack uh. Technology ke pacl inge arlacna sa in kapkapack, ac ma inge sa liki kuh luhn mwet in etuh kuh tulokihnyac kain in ma kuluk ma ac tuhkuh kac uh. Tuhsruhktuh, tiac ma luhn mwet in oruh sulaclah kuh tulokihnyac ma ac fah sikyak fin facluh. Meet liki ma moul nuhkewa fin facluh ac kuhnausyucklac, God el ac fah kuhnahoslah mwet nuhkewa suc kuhnahoslah facluh. God el wuhlelah ma inge!

4. OREKMA IN SULKACKIHN PWENG WO FIN FACLUH NOHFON Sie pac ipin akucl ke sahflah ma palyeiyuck tari pa ke sie orekma ma wacngihn ma oacna ac fah orek. Bible uh fahk: “Ac Pweng Wo inge ke Tohkohsrahi uh ac fah lutiyuck fin facluh nohfohn in mwe loh nuh sin mwet nuhkewa, na facluh fah sahflah.” (Matthew 24:14) Orekma in luti se inge ac fah siena liki orekma luhn alu pucspucs ma orek ke lusen pacl na loeloes in luti ac kwacfe mwet uh in wi ke alu laltahl. Ke lwen sahflah, “pweng wo inge ke Tohkohsrahi” ac fah ahkkahlwemyeyuck yen nuhkewa. Yac kom etuh oasr u luhn kuhtwena alu ma fahkwack ke pweng se inge? Ac finne kuhtuh u luhn alu eltahl luti pweng se inge, yac eltahl oruh na ke acn seltahl sifacna, kuh eltahl sulkackihn pweng wo inge in “lutiyuck fin facluh nohfohn in mwe loh nuh sin mwet nuhkewa”?

Web site se inge www.jw.org ahkkahlwemye “pweng wo inge ke Tohkohsrahi” ke inkacnek yohk. Web site se inge ahkkahlwemye ke mwe rit ma ahkuhtweyac ke pweng wo inge ke kahs 700 kuhtuh. Yac kom etuh ke kuhtuh pac orekma sahyac ma ahkkahlwemye pweng wo ke Tohkohsrahi nuh sin mwet nuhkewa fin facluh nohfohn? Meet liki pacl se ma Internet uh orekmakihnyuck, etweyuck Mwet Loh luhn Jeova ke moniyuck lalos in sulkackihn pweng wo ke Tohkohsrahi luhn God. Muhtwacwack in yac 1939 nwe mihsenge, kolo ke kais sie mackuhsin inge Tower in San ahkkahlwemye kahs inge “Fahkwack Tohkohsrahi luhn Jeova.” Sie puk ma sruhmuhn ke alu uh ahkkahlwemye lah orekma in luti luhn Mwet Loh luhn Jeova uh “wacngihn ma oacna ke srihpen ma inge orek yen nuhkewa ac ke inkacnek moniyuck.” Orekma in luti se inge fahkwack ke pweng wo inge lah ke pacl na sa “sahflah” ac fah tuhkuh ke srihpen orekma luhn Tohkohsrahi luhn God.

SIE PACL MA ARLACNA YOHK SRIHPAC KE MA SIKYAK FIN FACLUH

Yac kom akihlen lah mwe akucl ahkosr ahkkahlwemyeyuck in Bible ac ahkuhtweyucki ke mwe lutlut se inge sikyak tari ke lusen pacl ma kom moul kac inge? Ke yac siofok kuhtuh, mackuhsin se inge ahkkahlwemye nuh sin mwet rit nuhkewa kain in mwe lutlut ke ma pucspucs ma sikyak fin facluh in kahsreltahl sifacna in liye ac kahlwem kac lah kuht apkuhran nuhke sahflah. Pwacye lah mwet suc suhlahlahlfongi ac tiac insese ac fah fahk muh mwe ahkpwacyeye ac statistics nuhkewa fal muhkwena nuhke nuhnak luhn mwet se mwet se, tiac fal nuhke ma pwacye ac ma inge kuh in ikihlyucklac. Eltahl fahk pac muh ke srihpen inkacnek in sramsram nuh sin sie sin sie tahfwelah na in kapkapack, ma upac ma sikyak fin facluh inge kahlwem lah arlac upaclah. Tuhsruhktuh, oasr mwe ahkpwacyeye pucspucs lah kuht oasr tari ke sahflahiyen pacl ma wacngihn ma oacna ke mwe sramsram luhn mwet uh.

Puhs mwe ahkpwacyeye lah apkuhranyang pacl ma eklac luhlahp fin facluh ac sikyak. Ke sie mwe puhpuhlyuck, in yac 2014, kuhtuh sin scientist eltahl sang report nuh sin United Nations Security Council ke mwe sensen upac nuhke moul luhn mwet uh. Scientist inge eltahl fahk: “Ke kuht tuni ahkwoyac ke kain mwe sensen inge oruh kuht in fahk lah oasr na pwacye mwe sensen nuhke moul luhn mwet uh. Ma inge kuh in sikyak ke srihpen ongaiyac ma ac tuhkuh ke technology.” Mwet pucspucs eltahl luhlahlfongi lah kuht sun tari pacl ma oasr eklac luhlahp ac fah sikyak ke mwe sramsram luhn mwet uh. Mwet ma oraclah mackuhsin inge ac mwet pucspucs suc riti ma inge eltahl tiac ahlohloh kac lah puhlan pacl se inge pa lwen sahflah ac sahflah apkuhran me. Kom tiacna enenuh in sahngweng ke pacl fahsruh uh, a kom kuh in engan ke ma ac fah sikyak. Efuh? Mweyen kom kuh in moullac liki sahflah!