“Sahflah Uh” Meac Kalmen Ma Inge?

Kom fin lohng kahs inge “Sahflah uh apkuhran me!” meac kom petsacelah ke nuhnak lom? Yac kom petsacelah ke sie mwet luti el kahskahs upac ke pusra yohk, ac srihsrihsr, wi Bible nahtuhl in pahol? Kuh kom petsacelah ke sie mwet mahtuhoh suc loeslac ahluht la el nukum nuknuk loes ac kapriyucki sucl soko infulwacl, ac el sruok sie mwe akuhl suc sihmlac fahk muh sahflah uh apkuhran me? Kuhtuh mwet uh fosrngahlah, ac kuhtuh seltahl ahlohloh kuh isrucn ma inge ke eltahl nuhnkuh ke kain in ohiyac inge.

Bible uh fahk muh: “Sahflah ac fah tuhkuh.” (Matthew 24:14, BMK) Ma se pacna inge oacyacpac pahngpahng “lwen luhlahp luhn God” ac “Armageddon.” (Fwackyuk 16:14, 16) Pwacye, alu pucspucs arlac fohsack ke kalmen sahflah uh, ac oasr kain in mwe luti sakihrihk, nuhnak ac luhlahlfongi pucspucs kac. Tuhsruhktuh, Bible uh ahkkahlwemye kahlwem ke sahflah uh, lah meac se inge, ac tiac kalmen ma inge. Kahs luhn God uh kahsre kuht pac in kahlwem na pwacye fin sahflah uh apkuhran me. Yohk liki nuhkewa, ma inge luti kuht lah fuhkah in moliyucklac. Ma se meet, lwelah kuht in ahkpwacyeye lah kuhtuh nuhnak luhn mwet kac uh suhtuhuh na pwacye ac kuht in oakiyac lah meac kalmen kahs inge. Meac na pwacye kalmen kahs inge “sahflah,” fal nuhke ma Bible uh fahk?

TIAC PA INGE KALMEN SAHFLAH UH

1. TIAC KALMEN SAHFLAH UH PA SIE E LUHLAHP AC FAH KUHNAHOSLAH FACLUH.

   Bible uh fahk lah: “Kom [God] oakiyac facluh fin pwelucng kuh la, ac fah tiacna mukuikui.” (Psalm 104:5) Fuhs se inge ac kuhtuh pac sahyac ahkkweye kuht in luhlahlfongi lah God el ac tiac kuhnahoslah facluh ac tiacna lwelah in kuhnausyucklac!​—Ecclesiastes 1:4; Isaiah 45:18.

2. SAHFLAH UH AC TIAC SIKYAK KE SIE PACL SUC TIAC PAKIYUCKI.

   Bible uh ahkkahlwemye lah sahflah uh oakiyucki tari. God el oakiyac tari pacl luhn ma inge. Kuht riti: “Tuhsruhktuh, wacngihn sie mwet etuh ke lwen sac kuh ke ao sac tiac lipufacn inkuhsrao kuh Wen, a Pahpah muhkefanna etuh. Kowos liyekowosyang ac tuhpan, tuh kowos tiac etuh ke pacl se ac sikyak.” (Mark 13:32, 33) Kahlwem lah God (“Pahpah”) el oakiyac tari “ke pacl se ac sikyak” ma inge ac ke el ac fah muhtwacwack ke lwen sahflah uh.

3. SAHFLAH UH TIAC MA KE SRIHPEN OREKMA LUHN MWET KUH KE KUHTWENA MA TUHKUH INKUHSRAO ME.

   Meac ac fah ahkfahsrye sahflah uh? Fwackyuk 19:11 fahk: “Na nga liye kuhsrao ikacklah ac oasr soko horse fasrfasr we. El suc muhta fac pahngpahng Oaru ac Pwacye.” Fuhs 19 tahfwelah in fahk: “Na nga liye kosro suhlallacl soko ah ac tohkohsrah luhn facluh ac un mwet mweun lalos.” (Fwackyuk 19:11-21) Inkaiyen kahs inge finne mwe akucl na, kuht kuh in akihlen ac kahlwem ke ma inge: God el ac fah suhpwacma sie un mwet mweun ke lipufacn lal in kuhnahoslah mwet lokoalok lal uh.

MEAC KALMEN SAHFLAH UH

1. SAHFLAHIYEN GOVERNMENT LUHN MWET UH.

   Bible uh ahkuhtweyac: “God inkuhsrao El ac fah oakiyac sie tohkohsrahi suc ac fah wacngihn sahflahiyac. Ac fah tiacna kuh in kuhtangyucklac, a ac fah kuhnahoslah nohfohn tohkohsrahi ingacn, na ac fah oan na nwe tok.” (Daniel 2:44) Oacna ke fwack tari, ke ip ahktolu, ac fah kuhnausyucklac “tohkohsrah luhn facluh ac un mwet mweun lalos,” suc ac fah “toeni in mweun lain el suc muhta fin horse soko ac un mwet mweun lal.”​—Fwackyuk 19:19.

2. SAHFLAHIYEN MWEUN, SUHLALLACL, AC OREKMA SESUWOHS.

   “[God] El tulokihnyac mweun fin facluh nohfohn.” (Psalm 46:9) “Mwet suwohswohs, elos suc pwacye in ma nuhkewa ac fah muhta in facl sesr uh. Tuh God El tuhlahkuhnla mwet kuluk uh liki acn uh, ac fuhsuhlosyak suc orekma kuluk.” (Soakas 2:21, 22) God el fahk: “Inge nga oruh ma nuhkewa sasuc!”​—Fwackyuk 21:4, 5.

3. SAHFLAHIYEN ALU MA TIAC AKINSEWOWOYE GOD AC MWET UH.

   Bible uh fahk: “Mwet pahluh tiac fahk ma pwacye a kikiacp muhkwena; ac mwet tol uh kol mwet uh oacna ma mwet pahluh sapkihn. . . . Na meac elos ac oruh pacl se ke ma nuhkewa sun sahflahiyac uh?” (Jeremiah 5:31) Jesus Christ el fahk pac: “Ke Lwen in Nuhnuhnkuh ac tuhkuh, mwet pucspucs ac fah fahk nuh sihk, ‘Leum, Leum! Kuht tuh fahkwack kahs luhn God inem, ac sislah demon pucspucs inem, ac oruh ma usrnguck pucspucs!’ Na nga ac fahk nuh selos, ‘Nga tiacna etwekowos. Fahlac likiyuc, kowos mwet kuluk!’”​—Matthew 7:21-23.

4. SAHFLAH LUHN MWET UH SUC WI AC AKKWEYE OAKWUCK LUHN FACLUHKE PACL INGE.

   Jesus Christ el fahk: “Pa inge luhman nuhnuhnkuh sac kahlwem tuhkuh tari nuh facluh, a mwet uh elos luhngse lohsr yohk liki kahlwem sac, mweyen orekma lalos uh kuluk.” (John 3:19) Bible uh ahkkahlwemye ke kuhnanuclac luhlahp emeet ke pacl luhn mukul oaru se inge, pahngpahng Noah. “Ac oacyacpac ke kof, sronot uh tuh kuhnahoslah facluh se meet ah. Tuhsruhktuh ke kahs sac na, kuhsrao ac facluh se ma oasr inge karihngihnyuck tuh in fah kuhnausyucklac ke e. Ma inge ac oan na nuhke lwen se ac fah nuhnuhnkweyuck ac kuhnausyucklac mwet suc seahkos God.”​—Luo Peter 3:5-7.

Lohacng nuh kac lah lwen in “nuhnuhnkweyuck ac kuhnausyucklac” ac kuh in puhpuhlyuckkihn nuhke kuhnanuclac luhn “facluh” ke lwen lal Noah. Facluh kuhnausyucklac fuhkah? Facluh se ma kuhnausyucklac inge tiac facluh na pwacye se a “mwet suc seahkos God,” kuh mwet lokoalok luhn God, mweyen facluh suc kuht muhta kac inge ac oan na. Ke lwen in nuhnuhnkuh luhn God ma ac apkuhran in tuhkuh, mwet nuhkewa suc sulaclah in mwet lokoalok luhn God ac fah kuhnausyucklac pac. Tuhsruhktuh mwet nuhkewa suc kawuck luhn God ac fah moliyucklac, oacna Noah ac sucu lal.​—Matthew 24:37-42.

Nuhnkuh ke luhpan woiyen facluh tukun God el ahkwacngihnyaclah ma kuluk nuhkewa. Kahlwem lah, ma Bible uh fahk ke sahflah uh sie pweng wo ac tiac pweng kuluk. Finne ohinge, sahp kom nuhnkuh: ‘Yac Bible uh fahkwack nuh sesr lah sahflah ac tuhkuh ngac? Yac ma inge apkuhran? Nga kuh in moullac liki fuhkah?’