Misac Ac Sifwil Moulyak Lal Jesus​—Meac Ma Inge Kuh in Oruh Nuh Sum

Mwet uh tiac enenuh in misac

“Na LEUM GOD el fihliyac mwet sac in imac Eden tuh elan yukwi ac karihngihn. El fahk nuh sel: ‘Kom kuh in mongo ke fukun sahk ke kuhtwena sahk in imac se inge, sahyacn sahk soko ma acsacng etwacack ke ma wo ac ke ma kuluk. Kom fah tiac kang fukun sahk soko ingacn. Kom fin kang, kom ac misac ke lwen sacn na.’”​—Genesis 2:15-17.

God el fihlilyac Adam, mukul se meet in imac Eden, sie paradise fin facluh suc nwacnwaclah ke ma orahkrahk ac sahk na kahto. Puhs kain in fukun sahk we, suc Adam el sukohsohk in kang. Tuhsruhktuh, Jeova God el fahklah arlac kahlwem ke soko sin sahk ah, muh Adam elan tiac kang. El sensenkackuhnuhl Adam muh el fin kang, el ac misac.

Adam el kahlwem fuhkah ke ma sap se inge? El etuh lah meac se inge misac, mweyen el liye tari ke ma orahkrahk uh misac. Fin oreklac Adam el in misac na, ac tuh wacngihnlac srihpen kahs in sensen luhn God nuh sel Adam ah. Tuhsruhktuh, Adam el akihlen lah el fin ahkos God ac tiac kang fukun sahk ke sahk soko ah, el ac kuh in moul ma pahtpaht ac tiac misac.

Kuhtuh mwet uh luhlahlfongi muh sahk soko inge mwe luhmah se na ke ohsun luhn muhtwacn ac mukul ke mahno, tuhsruhktuh ma inge tiac kuh in pwacye. Jeova el luhngse tuh Adam ac Eve, eltahl in “isus fahko in puhs” ac eltahl in “fahsrelihk fin facluh nohfohn ac leumi ma inge.” (Genesis 1:28) Ma sap sac sramsramkihn sahk na pwacye soko. Jeova el pahngon ma inge “sahk soko ma acsacng etwacack ke ma wo ac ke ma kuluk,” mweyen sahk soko ah luhmweyuck nuh ke suwohs lal in etuh lah meac wo ac meac kuluk nuh sin mwet uh. Adam el fuhnuh tiac kang fukun sahk ke sahk soko ah, el luhkuhn ahkkahlwemye ahkostwen lal ac srui lal nuh sin God se ma oracllah, suc kuh in sang mwe insewowo yohk nuh sel.

Adam el misac ke srihpen el seahkos God

“[God] El fahk nuh sin mukul sac: ‘Kom tuh . . . kanglah fukun sahk suc nga wihli nuh sum in tiac kang . . . Kom fah fiyoh in kwemkahtuh lom in ahkwoyelah fohk uh tuh in kuh in oswe kuhtwena mwe mongo, nwe ke na kom fohlohklac nuh ke fohk suc kom oreklac kac. Kom tuh oreklac ke fohk uh, ac kom fah sifwil pac eklac nuh ke fohk.’”​—Genesis 3:17, 19.

Adam el kang fukun sahk se ma fwack nuh sel elan tiac kang ah. Orekma in seahkos se inge ma na upac se. Sie orekma in lain suc mwe lut ke srihpen el pihlesruh ma wo nuhkewa ma Jeova el sang nuh sel ah. Ke el kanglah fukun sahk soko ah, Adam el pihlesruh Jeova God, ac sulaclah in sifacna kol inkacnek lal, suc kuluk na pwacye sahflahiyac ah.

Oacna ke Jeova el palye, Adam el misac. God el oracllah Adam ke “fohk liki infohk uh” ac el fahk nuh sel lah el fah “fohlohklac nuh ke fohk.” Adam el tiac tahfwelah na moul ke sie pacna ohiyac kuh nuh ke sie pacna acn. Ke el misac, el fohlohklac nuh ke kutkut suc wacngihn moul kac.​—Genesis 2:7; Ecclesiastes 9:5, 10.

Kuht misac ke srihpen kuht tuhkuh sel Adam me

“Ma kuluk tuhkuh nuh facluh ke mwet se, ac ma kuluk lal use pac misac. Ke srihpac se inge, misac ma nuh sin mwet nuhkewa, mweyen mwet nuhkewa orekma kuluk.”​—Rome 5:12.

Seahkos lal Adam, kuh ma kuluk lal, sun ma upac na pwacye. Ke Adam el oraclah ma kuluk inge, tuhlac luhkel sie finsrak na wowo, tiac yac 70 kuh 80 na, a el sislah finsrak lal in moul ma pahtpaht. Yohk liki na, ke pacl se Adam el oraclah ma kuluk inge, el sislah ohiyac suwohswohs nuhkewa, ac ohiyac sesuwohs na lal pa tuhlihk nuhkewa nahtuhl usrui.

Kuht nuhkewa tuhlihk nahtuhl Adam. Kuht usrui sel sie mahno sesuwohs suc wacngihn sulaclah lasr kac, ac ma inge kol nuh ke ma kuluk ac oacyacpac misac. Paul el ahkuhtweyac wo ohiyac ma kuht oasr kac uh. El fahk: “Nga sie mwet moul in ikoac, kuhkackihnyucklac oacna sie mwet kohs nuh ke ma kuluk. Nga suhpwacrlac na pwacye! Suc ac fah moliyuclac liki mahno se inge, ma pwenyuclac nuh ke misac?” Paul el sifacna tohpohklah kihsen siyuck lal uh: “Nga kuloh nuh sin God, suc moliyuclac ke Leum lasr Jesus Christ!”​—Rome 7:14, 24, 25.

Jesus el acse moul lal tuh kuht in moul ma pahtpaht

“Pahpah el suhpwacma Wen nahtuhl tuh elan Mwet Lahngo luhn facluh.”​—Sie John 4:14.

Jeova God el oakiyac sie inkacnek kuht in kuhtanglah liki ohiyac ma tuhkuh ke orekma kuluk ac in ahksukohsohkye kuht liki mwe kai luhn misac ma pahtpaht. Fuhkah? El suhpwacma Wen kuloh sefanna nahtuhl in kuhsrao me in isuslac facluh oacna sie mwet suwohswohs, ohiyac ma oasr pac yohrohl Adam ah. Jesus el tiac oacna Adam, mweyen “wacngihn ma kuluk el oraclah.” (Sie Peter 2:22) Ke srihpen el mwet suwohswohs se, el tiac eis mwe kai ke misac ac el kuh in moul ma pahtpaht oacna sie mwet suwohswohs.

Tuhsruhktuh, Jeova el lwelah in acnwucki Jesus sin mwet lokoalok lal ah. Lwen tolu tohkoh, Jeova el ahkmoulyaclack oacna sie ngun tuh el in fohlohk nuh in kuhsrao. Inkuhsrao, Jesus el ahkkahlwemye nuh sin God luhpan sacohkiyacn moul suwohswohs lal in loangelah ma Adam el sislah kacl sifacna ac nuh sin tuhlihk nahtuhl uh. Jeova el eis mwe kihsac inge, suc oruh tuh mwet nuhkewa suc ahkkahlwemye luhlahlfongi nuh sel Jesus fah eis moul ma pahtpaht.​—Rome 3:23, 24; Sie John 2:2.

Ke ma inge, Jesus el sifwil pac molwelah ma Adam el sislah ah. El kweok ke misac lal tuh kuht in moul ma pahtpaht. Bible uh fahk: “Jesus . . . ke kweok luhn misac, . . . tuh ke kuhlwacng luhn God el fah puhlakihn misac ke mwet nuhkewa.”​—Hebrew 2:9, BMK.

Oakwuck wowo inge ahkkahlwemye yohk kacl Jeova. Oakwuck fuhlwact lal ke nuhnuhnkuh suwohs uh oruh mwet sesuwohs in tiac kuh in sifacna molwelah moul laltahl. Tuhsruhktuh, luhngse ac ohiyacn pahkotwen lal uh moklel in ahkfalye oakwuck fuhlwact lal sifacna ke sie luhpah na yohk ke el sang Wen sefanna nahtuhl in molwelah luhpah se inge.​—Rome 5:6-8.

Ahkmoulyeyuckyak Jesus liki misac, ac kuhtuh pac sahyac ac fah wi

“Christ el ahkmoulyeyuckyak liki misac, in mwe ahkpwacyei lah elos suc mutul in misac fah oacyacpac ahkmoulyeyuckyak. Tuh oacna ke misac tuhkuh ke sie mwet, in luhmah sac na moulyak liki misac tuhkuh pac ke sie mwet. Tuh oana ke mwet nuhkewa misac ke srihpen kuhpahsr lalos nuh sel Adam, in luhmah sac na mwet e nuhkewa fah ahkmoulyeyuckyak ke srihpen kuhpahsr lalos nuh sin Christ.”​—Sie Corinth 15:20-22.

Wacngihn ahlohloh kac lah Jesus el moul nwe misac, tuhsruhktuh meac mwe ahkpwacyeye lah el ahkmoulyeyuckyak liki misac? Inmahsrlon mwe ahkpwacyeye nuhkewa suc arlac wo, etweyuck muh ke Jesus el sifwil moulyak el sikyak nuh yurin mwet pucspucs ke kain in pacl ac kain in acn. Ke sie pacl ah, el sikyak yurin un mwet se, puhs liki mwet 500. Mwet sap Paul el suhmuhslah ma inge ke sie lwacta lal nuh sin mwet Corinth, suc akihlenyuck muh kuhtuh sin mwet loh in pacl sac srackna moul, suc kalmac pa eltahl kuh in fahkwack ma eltahl liye kuh lohng.​—Sie Corinth 15:3-8.

Yohk liki na, ke pacl se Paul el suhmuhslah lah Christ pa “emeet” ke mwet ma ahkmoulyeyuckyak, el ahkkahlwemye lah oasr kuhtuh pac mwet misac suc ac fah ahkmoulyeyuckyak tohkoh. Jesus el sifacna fahk lah “pacl se ac tuhkuh ke mwet misac nuhkewa” ac “ilme liki kuclyuck lalos.”​—John 5:28, 29.

Kuht enenuh in ahkkahlwemye luhlahlfongi lasr kacl Jesus tuh kuht in moul ma pahtpaht

“God El luhngse facluh ouinge: el acse Wen sefanna nahtuhl, tuh elos nuhkewa suc luhlahlfongi in el fah tiac misac, a elos fah eis moul ma pahtpaht.”​—John 3:16.

Puk se meet ke Bible uh ahkuhtweyac ke pacl se ma muhtwacwack oasr misac ac ke wacngihnlac Paradise. Puk sahflah sac sruhmuhn ke pacl se ac fah wacngihnlac misac ac ke God el ac fah sifwil oakiyac Paradise fin facluh. Ke pacl sacn, mwet uh ac kuh in moulkihn moul engan suc oasr srihpac nwe tok ma pahtpaht. Fwackyuk 21:4 fahk: “Ac fah wacngihn misac.” In akihlen pwacyeiyacn wuhlelah se inge, fuhs 5 fahk: “Kahs inge kahs pwacye ac fal in luhlahlfongiyuck.” Ma Jeova el wuhlelah uh, el arlacna kuh in ahkfahsrye.

Yac kom luhlahlfongi lah “kahs inge kahs pwacye ac fal in luhlahlfongiyuck”? Ahkyohkye etwacack lom kacl Jesus Christ, ac ahkkahlwemye luhlahlfongi lom nuh sel. Kom fin oruh ouinge, kom ac fah eis mwe insewowo luhn Jeova. Kom ac tiac engankihn muhkwena mwe insewowo ke pacl inge tuhsruhktuh kom ac fah eis finsrak in moul ma pahtpaht ke sie Paradise fin facluh, sie acn suc wacngihnlac misac, “wacngihn ahsor kuh tuhng kuh kweok.”