Ya Kom Eteyuk sin Jeova?

“[Jeova] God el etu met lal.”—2 TIMOTE 2:19.

1, 2. (a) Jisus el nunku yok ke mea? (b) Kusensiyuk fuka kut enenu in nunku ka?

SIE len oasr sie met Farisi el siyuk sel Jisus: ‘Pia ma sap se ma yok emeet ke Ma Sap?’ Jisus el topuk: ‘Kom fwa lungsum Jeova God lom ke insiom kemwa, a ke moul lom kemwa, a ke nunkom kemwa.’ (Mattu 22:35-37) Oasr lungse yok lal Jisus nu sin Jeova. Inkanek in moul lal akkalemye la el nunku yok ke nunak lun Jeova kel. Paenang, meet liki Jisus el mise, el ku in sramsram ke akosten lal nu sin God, a fwakang: “Nga liaung ma sap lun Papa tumuk, a mutanu in lungse lal.”—Jon 15:10.

² Met puspus ke pal inge elos fwak mu elos lungse God. Aok, kut fwak pa ouinge. Tusruktu oasr kutu kusensiyuk yok sripe su kut enenu in nunku ka: ‘Mea nunak lun Jeova keik? Ya nga ku in fwak la Jeova el ‘eteyu’, ku ya oasr yuruk me insemwomwo lun Jeova? Ya Jeova el nunku keik oana met lal?’ (2 Timote 2:19) Arlana mwo in nunku la kut ku in engunkin kain in fototo mwomwo inge nu sin God Fulatlanu in kosrao a fwalu!

3. Efu ku upa nu sin kutu met in lulalfongi la elos ku in ma lun Jeova? Mea ku in kasrelos in ekulla kain in nunak inge?

³ Tusruktu arlana upa fwinne nu sin kutu met su lungse Jeova in lulalfongi la elos ku in kawuk nu sin God. Kutu met elos lulalfongi mu elos wangin sripe. Ke sripe inge, elos nunku mu elos tia ku in ma lun Jeova. Arlana mwo in etu la Jeova el liye kut ke inkanek saye. (1 Samuel 16:7) Met sap Poul el fwak nu sin met lili Kristian wiyel: “A kutena met fwin lungse God, God el etal.” (1 Korint 8:3) Lungse lom nu sin God eneneyuk in eteyuk sel. Nunku ke ma inge: Efu ku kom ridi magasin se inge? Efu ku kom kafweang yok in kulansapu Jeova ke insiom kewa, moul lom kewa, nunkom kewa, a ku lom kewa? Fwin kom mwulela moul lom nu sin Jeova a baptaisla, efu ku kom oru ouinge? Baibel el fwak la Jeova el etu insie a el suk met su “ma saok” nu sel. A el “amakunelos” ku sulelos, in oana met kawuk lal. (Ridi Haggeai 2:7; Jon 6:44.) Ke ma inge, kom ku in lulalfongi la kom kulansapu Jeova meyen el lungse kom in oru ma inge. El fwa tia som liki met nukewa su el suli in oana met kawuk lal fwin elos kafweang in oaru nu sel. Elos arlana saok nu sin God, a el lungselos na paye.—Sam 94:14.

4. Efu ku kut enenu in nunku pal nukewa la arlana saok fototo lasr nu sin Jeova?

⁴ Ke sripen Jeova el akfototoye kut nu sel, kut enenu in karunginkutyang in lungse lun God. (Ridi Jud 21.) Esam la, Baibel el akkalemye la kut ku in forla ku patla liki God a kut tila met kawuk lal. (Hibru 2:1; 3:12, 13) Ke sie me pupulyuk, meet liki kas in 2 Timote 2:19, met sap Poul el sramsram kel Haimenius a Failetus. Oasr pal mokul luo inge elos kulansap nu sin Jeova, tusruktu tok elos som liki ma paye. (2 Timote 2:16-18) Kutu met ke congregation in an Galetia forla pa liki ma paye. Elos tia muta in ma paye su elos engunkin meet. (Galetia 4:9) Kut enenu in esam pal nukewa la fototo lasr nu sin Jeova arlana saok.

5. (a) Oiya mwomwo fuka kut enenu in akkalemye tu kut in eteyuk sin God? (b) Me srikasrak fuka kut fwa sramsramkin ke pal inge?

⁵ Oasr kutu oiya mwomwo su eneneyuk kut fwin lungse in eteyuk sin Jeova. (Sam 15:1-5; 1 Piter 3:4) Lulalfongi a inse pusisel arlana kalem sin kutu met su eteyuk sin God. Kut fwa sramsramkin ke me srikasrak lun mokul luo su Jeova el lungse meyen elos akkalemye kain in oiya inge. Kut fwa sramsramkin pa ke sie mokul su insefulat a ke sripe inge God el pulesrel. Kut ku in lotela me lutlut yok sripe ke me srikasrak inge nukewa.

Papa Tumun Met Nukewa su Lulalfongi

6. (a) Ke sripen oasr lulalfongi lal nu ke mwulela lun Jeova, mea Ebream el oru? (b) Ke inkanek fuka Jeova el etu na paye Ebream?

⁶ Ebream el sie met su “lulalfongi Jeova.” El pangpang “papa tumalos nu kemwa su lulalfongi.” (Genesis 15:6; Rom 4:11) Ke sripen lulalfongi lal, Ebream el inse mulala in som liki loom sel, kawuk lal, orekma lal, a liki ma nukewa oasr yurol in som nu ke sie an loeloes. (Genesis 12:1-4; Hibru 11:8-10) Ebream el karungin lulalfongi lal in fokoko pal nukewa. Sie me akpayeye ke ma inge pa tokin yea puspus el akola in akos masap lun Jeova a kisekin mwen natul oana me kise nu sin Jeova. (Hibru 11:17-19) Ebream el akkalemye lulalfongi nu ke mwulela nukewa lun Jeova, ke sripe se inge el arlana saok nu sin God. Jeova el etel na paye Ebream. (Ridi Genesis 18:19.) Kalmen ma inge pa Jeova el etu la Ebream el moul a el etu pa la Ebream el lungsel oana met kawuk lal.—Jemes 2:22, 23.

7. Mea Ebream el etu ke mwulela lun Jeova? Fuka el akkalemye lulalfongi lal?

⁷ Jeova el mwulela nu sel Ebream la “mutunoaoa lun met lokwalok lal a fwa ma lun fute lal” a elos “oana puk su on mweanu.” (Genesis 22:17, 18) Mwulela inge tia akpayeyuk ke lusen moul lal Ebream nufon, ne ouinge el srukye lulalfongi fokoko lal nu sin Jeova. El etu la mwulela nukewa lun God akpayeyuk pal nukewa, a el akkalemye lulalfongi inge ke inkanek el moulkin moul lal. (Ridi Hibru 11:13.) Ya Jeova el ete kut oana met su oasr lulalfongi oana Ebream?

Oiya su Lungse in Sano Jeova Sie Me Akul lun Lulalfongi

8. Mea kutu ma su met puspus elos lungse na paye?

⁸ Saap oasr ma puspus su kut lungse na paye, oana in payukyak, in oasr tulik, a in oasr mano fokoko tia mas. Wangin ma koluk in lungse kain in ma puspus inge. Tusruktu pus inmasrlosr tia ku in eis ma kut lungse. Fwin oasr ma se su kut lungse na paye tusruktu kut tia ku in eis ke pal inge, mea kut a oru? Ke oiya su kut akkalemye ke ma sikyuk inge ku in akkalemye fokokoyen lulalfongi lasr.

9, 10. (a) Mea kutu met elos oru in eis ma elos lungse? (b) Mea pulakin lom ke me akpayeyen mwulela lun God?

⁹ Tia nunak sumwos se in lain me kolyuk lun God in srike in eis ma kut lungse. Ma inge ku in kunausla fototo lasr nu sin Jeova. Ke sie me pupulyuk, kutu met elos sulela kain in inkanek in ono su lain akwuk mwomwo lun Baibel. Kutu elos eis orekma su oralos in wangin pal lalos nu sin sou lalos ku in wi ke meeting puspus lun congregation. Kutu elos mutamwauk in akkalemye lungse ku orek fototo nu sin met su tia kulansapu Jeova. Fwin sie met Kristian el fwasr tokin inkanek inge, ya el kafweang na paye in eteyuk sin Jeova? Mea pulakin lun Jeova fwin Ebream el mongsa ke akpayeyen mwulela nukewa lun God nu sel? Fuka fwin Ebream el oru ma puspus ke inkanek lal sifwana a mutana ke sie an? Fuka fwin el suk in akpengpengye el sifwana a tia sano Jeova in oru ma puspus? (Srike liye Genesis 11:4.) Ya Jeova el srakna nunku kel oana met kawuk lal?

¹⁰ Ma puspus fuka kom lungse na paye? Ya oasr lulalfongi fokoko a fwal in kasre kom in sano Jeova, su mwulela la el fwa akfwalye ma nukewa su kom lungse ke moul? (Sam 145:16) Kutu ke mwulela lun Jeova saap tia sa akpayeyuk ke pal se su kut lungse. Tusruktu kut fwin tafwela in moulkin moul ke sie inkanek su akkalemye la oasr lulalfongi lasr oana Ebream, Jeova el tia ku in mwulkunkutla. El fwa akinsemwomwoye kut.—Hibru 11:6.

Ma Su Tia Oana Sie Inmasrlon Inse Pusisel a Inse Fulat

11. Mea Kora el oru ke lusen yea puspus?

¹¹ Kut fwa lutlutkin yok ke me srikasrak lal Moses a Kora su akkalemye oiya su tia oana sie. Ma elos oru kasre kut in eis kalem ke ma Jeova el nunku kesr el fwal nu ke lupan sunak su kut akkalemye ke sulela nukewa lal a ke inkanek el oru ma puspus. Kora el sie met Livai su tuku ke sruf lal Kohath. Saap oasr pal mwomwo lal in liye ma Jeova el oru in aksukosokyela met Israel nu ke Mwea Srusra. Oasr pa ip lal ke nununku lun Jeova liki met Israel su seakos in Eol Sainai, a el sang kasru in us tuptup in mwuleang. (Exodus 32:26-29; Oekyuk 3:30, 31) Kalem la el oaru nu sin Jeova ke lusen yea puspus, a ke sripe inge, met Israel puspus akkalemye sunak nu sel.

12. In oana ke ma akkalemyeyuk in sra 23, mea sikyuk ke oiyen kawuk lal Kora nu sin God ke sripen inse fulat ku fulang lal?

¹² Tusruktu ke elos fwufwasryesr nu ke Fwal Mwulela, Kora el nunku mu oasr ma sito ke inkanek su Jeova el kol mutanfwal se inge. El lungse in orek me aksumwos. Oasr met pengpeng 250 ke mutanfwal se inge elos welul Kora. Elos lulalfongi na paye la Jeova el etelos a oasr yurolos me insemwomwo lal. Elos fwak nu sel Moses: “Met in u se inge nukewa elos met mutal, aok elos nukewa, a Jeova el muta inmasrlolos.” (Oekyuk 16:1-3) Paye la sie oiyen inse fulat pa inge! Elos lulalfongi yok ke inkanek lalos sifwana in oru ma puspus. Moses el fwak nu selos: “Jeova el fwa fwakak su ma lal.” (Ridi Oekyuk 16:5.) Ke saflaiyen len toka, Kora a met nukewa su welul elos mise.—Oekyuk 16:31-35.

13, 14. Ke inkanek fuka Moses el akkalemye inse pusisel?

¹³ Moses el siena lukel Kora. Moses “el arulanu fwokpap, yok liki met e nu kemwa su muta fwin mutun fwalu.” (Oekyuk 12:3) El akkalemye la el fwokpap a inse pusisel ke el orala ma nukewa oana ke Jeova el sapkin nu sel. (Exodus 7:6; 40:16) Kut tia ku in rid in Baibel la Moses el tia insese ke inkanek su Jeova el oru ma puspus ku el kasrkusrak ke sripen el enenu in akos ma Jeova el sapkin nu sel. Ke sie me pupulyuk, Jeova el sang masap ke orekma in musaela loom nuknuk in tukeni. El akkalemye pa ke masap inge ke tun lun turet a pisen me sremsrem su met Israel elos enenu in orekmakin in orala luslus. (Exodus 26:1-6) Fwin sie met liaung ke u lun God el akkalemye nu sum kas in kasru ke ma puspus, saap kutupal kom pulakin toasr a asor ka. Tusruktu Jeova el sie met liaung sumwosmwos. El sang nu sin met kulansap lal orekma su eneneyuk in orek, a el lulalfongi la elos fwa oru ma inge ke inkanek mwo. Fwin el akkalemye ma puspus, oasr sripe mwomwo lal ke ma inge. Moses el tia kasrkusrak nu sin Jeova ku nunku mu Jeova el tia akkalemye sunak nu sel meyen God el fwak nu sel kain in masap puspus ke orekma se inge. Moses el tia nunku mu Jeova el eisla sukosok lal. Moses el fwak nu sin met orekma in orala ma nukewa oana ke Jeova el sapkin nu selos. (Exodus 39:32) Paye la sie inkanek in inse pusisel pa inge! Moses el etu la orekma lun Jeova pa inge a Jeova el orekmakunul na in oru orekma se inge.

¹⁴ Moses el akkalemye la el inse pusisel fwinne oasr sripe puspus lal in pulakin toasr ku asor. Ke sie me pupulyuk, ke pal se metu elos torkaskas ke sripen wangin kof, Moses el arlana kasrkusrak nu selos a el tia sang mwolana nu sin Jeova. Ke sripe inge, Jeova el fwak nu sel Moses la el fwa tia lela elan kol met Israel nu ke Fwal Mwulela. (Oekyuk 20:2-12) Moses a Aron, mokul wiyel, elos keok ke lusen yea puspus, ke kas in torkaskas lun met Israel. Ke sripen tafongla se inge, Moses el tia ku in eis ma el tupan ka ke lusen yea puspus! Mea Moses el oru? Aok el arlana asor ka. Tusruktu el pusisel a el akos ma Jeova el fwak. El etu la Jeova el sie God sumwos su wangin ma koluk lal. (Duteronomi 3:25-27; 32:4) Ke pal inge, kut fwin nunku kel Moses, kut nunku ke sie met su eteyuk sin Jeova.—Ridi Exodus 33:12, 13.

Inse Pusisel Eneneyuk nu ke Akosten Lasr nu sin Jeova

15. Mea kut ku in lotela ke oiyen inse fulat lal Kora?

¹⁵ Kut ku in eis me insemwomwo lun Jeova fwin kut insese a orekmakin me aksumwos nukewa. A kut enenu in akkalemye sunak nu sin met nukewa su Jeova el orekmakin in kol congregation. Mea kut a oru fwin met liaung elos oru sulela ku elos ekulla oiya su kut oru ma puspus ke congregation? Ke sripen Kora a met nukewa su welul elos lulalfongi ke inkanek lalos sifwana in oru ma puspus, paenang elos tia ku in sifwil kawuk lun God. Elos akkalemye oiyen inse fulat ku fulang a srikla lulalfongi lalos. Kora el nunku mu Moses su matou tari el pa oru sulela lal sifwana, tusruktu el mwulkunla la Jeova pa kol mutanfwal se inge. Ke sripe inge, el tia akkalemye oaru nu sin met su God el orekmakin. Mwo fwin Kora el tupan Jeova in oru me aksumwos nu ka. Jeova el ku in kasrel in etu ke inkanek su ma puspus orek, ku ke me aksumwosye fwin eneneyuk na paye. Meyen Kora el akkalemye oiya inge, ke pal inge kut tia nunku ke orekma in kulansap oaru lal nu sin Jeova ke lusen yea puspus. Kut esamal oana sie met su seakos Jeova ke sripen inse fulat a fulang.

16. Fuka me srikasrak lal Moses ke inse pusisel kasre kut?

¹⁶ Ma sikyuk nu sel Kora el sie me sensen nu sin met elder a nu sin met puspus saye in congregation ke pal inge. Kut enenu in inse pusisel tu kut in tupan Jeova a akos met nukewa su Jeova el orekmakin in kol congregation. Ya kut akkalemye la kut pusisel a fwokpap oana Moses? Ya kut kalem a akilen la Jeova el orekmakin met liaung puspus in kol ke congregation? Ya kut akos kas in kolyuk lalos? Ya kut kutongye pulakin lasr kut fwin toasr ku asor? Kut fwin oru ma inge, kut fwa eis me insemwomwo lun Jeova. Kut fwin akkalemye inse pusisel a akosten, kut fwa arlana saok nu sel.

Jeova el Etu Met Nukewa Su Ma Lal

17, 18. Mea ku in kasre kut in oasr me insemwomwo lun Jeova pal nukewa?

¹⁷ Arlana mwo nu sesr in nunku ke me srikasrak lun met nukewa su Jeova el lungse a suli in oana kawuk lal. Ebream a Moses elos met sesumwos a oasr pa ma upa puspus lalos, oana kut. Tusruktu el nunkelos oana met kawuk, a met su ma lal. Ma sikyuk nu sel Kora el siena. Me srikasrak lal akkalemye la kut ku in forla liki Jeova a tila kawuk lal. Kais sie sesr enenu in nunku yok ke kusensiyuk inge: ‘Mea nunak lun Jeova keik? Mea nga ku in lotela ke me srikasrak inge?’

¹⁸ Jeova el nunku ke met kulansap oaru lal oana met su ma lal. Sie me akkeye yok pa inge nu sesr. Ke ma inge lela kom in kafweang in akkalemye kain in oiya mwomwo oana lulalfongi a inse pusisel pal nukewa. Ma inge fwa oru kom in arlana saok nu sin God mwolana lasr. Sie me insemwomwo yok in eteyuk sin Jeova. Met nukewa su Jeova el insemwomwo kelos, elos engunkin moul engun ke pal inge a fwa oasr me insemwomwo puspus nu selos ke pal fwasru.—Sam 37:18.

Ya Kom Esam?

• Oiya saok fuka kom ku in engunkin nu sin Jeova?

• Kom ku in etawi fuka lulalfongi lal Ebream?

• Me lutlut fuka kut ku in lotela kel Kora a Moses?

[Petsac ke sra 22]

Oana Ebream, ya oasr lulalfongi lasr la Jeova el fwa akpayeye mwulela nukewa lal?

[Petsac ke sra 23]

Kora el srunga in akpusiselyel in akos masap