Ya Kom Ilyuk Tari Nu Ke Mongla lun God?
“Kas lun God moul a ku.”—HIBRU 4:12.
1. Mea sie inkanek su kut ku in ilyuk nu in mongla lun God ke pal inge? Efu ku oasr pal upa in akos?
KE ME lutlut meeta, kut lotela la kut ku in ilyuk nu in mongla lun God ke pal inge kut fwin akos Jeova a orekma wi u lal. Akosten lasr akkalemye nu sin Jeova la kut lungse akwuk lal in akpayeye. Tusruktu kutupal upa nu sesr in akos. Ke sie me pupulyuk, ke pal se kut lotela la Jeova el lungse kut in tui in oru ma su kut lungse in oru, saap upa in aksol ke pal sa. Fwin ma inge sikyak nu sesr, kut enenu in lutlut in akola in “akos” pal nukewa. (Orekma 5:29) Ke me lutlut se inge, kut fwa sramsramkin ke kutu oiya su ase nu sesr pal mwo lasr in akkalemye kut fwin akola na paye in akos pal nukewa.
2, 3. Mea kut kafweang in oru in akinsemwomwoye Jeova?
2 Ke pal se kom lotela ke Baibel la kom enenu in ekulla oiyen moul lom, ya kom akola in akos? Nunku ke ma inge: Baibel el akkalemye la ma lungse lun God in oreni nu ke u lal “ma saok lun mutanfwal nu kemwa.” (Haggeai 2:7) Kalmen ma inge pa God el sulela met puspus su saok sel meyen elos lungse ma sumwos. Paye la, kut nukewa tia ma saok ke pal se meet kut lutlutkin ma paye su oasr in Baibel. Tusruktu, lungse lasr nu sin God a nu sin Mwen kulo natul akkeye kut in oru me aksumwos ke ella lasr a oiyesr tu kut ku in akinsemwomwoye God ke inkanek nukewa. Kut siyuk ke kasru lun Jeova ke inkanek lun pre a kut kafweang in ekulla oiyesr. A tokin kutupal kut eis baptais a eis me insemwomwo lun Jeova.—Ridi Kolosse 1:9, 10.
3 Tusruktu kut srakna sesumwos. Kut srakna enenu in ekulla oiya puspus ke moul lasr a in kafweang yok in oru ma sumwos. Tusruktu Jeova el mwulela in kasre kut fwin kut oru ke ku lasr kewa in akinsemwomwoyel.
Kut Fwin Enenu in Ekulla Oiya Puspus ke Moul Lasr
4. Mea inkanek tolu su Jeova el orekmakin in akkalemye nu sesr la kut enenu in ekulla oiya puspus ke moul lasr?
4 Meet liki kut ku in ekulla oiya puspus ke moul lasr, kut enenu in etu la mea kut enenu in ekulla. Jeova el kasre kut ka ke inkanek puspus. El ku in orekmakin sie me sramsram mwo ke An in Toeni lasr ku sie me lutlut ke magasin nutusr in akkalemye la oasr ma se ke nunak ku orekma lasr su tia mwo. Kutu pal kut tia kalem la kut enenu in ekulla oiyesr fwinne kut long tari sie me sramsram ku kut rid tari sie me lutlut ke me rid nutusr, ke ma inge Jeova el ku in orekmakin sie met lili ke congregation in aksumwosye kut ke inkanek kulang.—Ridi Galetia 6:1.
5. Oiya puspus fuka kut akkalemye ke pal se oasr sie met lili aksumwosye kut? Efu ku met Kristian elder elos kafweang in kasre kut?
5 Fwin sie met oapana kut el aksumwosye kut, tia fusrasr in long ma el fwak, fwinne el kaskas nu sesr ke inkanek mwo a kulang. Tusruktu Jeova el sapkin met elder in “aksumwosye” kut, elos fwa oru ma inge ke inkanek kulang a oiyen “fwokpap.” (Galetia 6:1) Kut fwin orekmakin kas in kasru lalos, kut e fwa arlana “saok” nu sin Jeova. Aok, ke pre lasr kut fwak nu sin Jeova la kut sesumwos a oru ma koluk puspus. Tusruktu fwin sie met elder el fwakak ma sesumwos lasr, kutu pal kut oru sie oiya ku luma in akkalemye la kut tia engun. Kut srike in akkalemye sripe puspus ke ma kut oru, ku kut fwak la ma tafongla su kut oru tia arlana koluk. Saap kut ku in fwak mu met ma su aksumwosye kut el tia lungse kut, ku el tia sramsram nu sesr ke inkanek kulang. (2 Togusra 5:11) Ku saap kut fwa arlana kasrkusrak fwin sie met elder el fwak ma se su kut srunga in long. Ke sie me pupulyuk, met elder elos fwak nu sesr la oasr sie met in sou lasr su oru ma koluk, ku tia fwal kain in nuknuk su kut nukum. Siepa oiya pa fwin elos fwak nu sesr kut in taran manosr ku aknasnasye manosr, a fwin elos fwak mu Jeova el srunga me akengun su kut oru. Ke sripen kut kasrkusrak, saap kut fwak ma puspus su tia fwal kut in fwak. Oiya inge su kut akkalemye ku in akasorye kut sifwana a ma inge ku in oru brother se inge su kafweang in kasre kut in asor pa. Tusruktu tok, kut fwin tila kasrkusrak, kut insese ka la ma el fwak mwo nu sesr.
6. Kas lun God el akkalemye fuka “nunak a papu lun insiesr”?
6 Ma simusla su orekmakinyuk yok nu ke me lutlut se inge, Hibru 4:12 el akkalemye nu sesr la kas lun God el “ku.” Aok, Kas lun God el arlana ku in ekulla moul lun met puspus. Baibel el kasre kut in oru me aksumwos puspus su kut enenu meet liki kut eis baptais. A ma inge ku in kasre kut pa in ekulla oiya puspus lasr tokin kut eis baptais. Ke leta lal nu sin met Kristian Hibru, Poul el simusla pa la kas lun God el “akilen nunak a papu lun inse.” (Hibru 4:12) Ke ma inge Poul el akuteye la kut fwin etu a kalem ke ma Baibel el akkalemye ke ma God el lungse kut in oru, orekma lasr fwa akkalemye ma oan ke nunak a insiesr. (Ridi Mattu 23:27, 28.) Nunku akmwoye la mea kom fwa oru ke oiya puspus inge su kut fwa sramsramkin ingena.
Kafweang in Oru Kapkapek Yurin U lun Jeova
7, 8. (a) Efu ku kutu sin met Kristian Hibru elos lungse in tafwela in akos kutu ke Masap lal Moses? (b) Efu ku kut ku in fwak la elos lain akwuk lun Jeova?
7 Pus inmasrlos etu na paye a ku in kalweni Soakas 4:18: “A inkanek lun met sumwosmwos oana kalem lun lenelik, su saromromelik nu ke len sumwosna.” Kalmen ma inge pa ke palu fwafwala nu tok, kut eis etauk a kalem yok ke ma Jeova el siyuk sesr a kut ku in oru ma nukewa su akinsemwomwoyel yok liki meeta.
8 In oana ke ma kut lutlutkin tari ke me lutlut se meeta, tokin mise lal Jisus arlana upa nu sin met Ju Kristian puspus in tui in oru Masap lal Moses. (Orekma 21:20) Paye la Poul el akuteye kalem la met Kristian elos tila enenu in akos Masap lal Moses, tusruktu kutu selos srakna pulesru ma Jeova el lungselos in oru. (Kolosse 2:13-15) Saap elos nunku mu fwin elos tafwela na in akos kutu ke Masap inge, elos tia ku in sun me kalyai sin met puspus su wi ke alu lun met Ju. Tusruktu Poul el akkalemye kalem nu sin met Kristian Hibru la fwin elos tafwela in lain akwuk lun God, elos tia ku in ilyuk nu in mongla lun God.a (Hibru 4:1, 2, 6; ridi Hibru 4:11.) Fwin elos lungse in akinsemwomwoye Jeova, elos enenu in akilen a insese ka la mutawauk in pal san Jeova el lungse met nukewa lal in alu nu sel ke inkanek mwo saye.
9. Mea pulakin lasr fwin met kulansap oaru a lalmetmet elos oru sie me aksumwos nu ke oiya su kut etu a kalem ke me luti lun Baibel?
9 Ke pal inge, met kulansap oaru a lalmetmet elos kasre kut in kalem ke sie me luti lun Baibel ke sie oiya su siena liki ke ma kut nunku ka in pal somla. Kut enenu in insemwomwo ke me aksumwos inge. Elos akkalemye nu sesr la Jeova el orekmakin met kulansap oaru a lalmetmet in luti kut ke ma paye. Kutupal Governing Body, su oana met tutafpo lun met kulansap oaru a lalmetmet, elos kalweni ke inkanek su kut kalem ke kutu me luti paye lun Baibel. Fwin met lili inge elos oru sulela in oru me aksumwos su eneneyuk, elos tia sangeng in aksumwosye ma elos akuteye tari ke kutu me luti in pal somla, ku in oru me akuteye lalos in kalem na paye yok liki meeta. Elos etu la oasr kutu met su fwa fwak ma koluk ke met kulansap oaru a lalmetmet ke sripen me aksumwos inge, tusruktu tia pa inge ma yok sripe nu selos. Ma yok sripe emeet nu selos pa in akos a orekma fwal nu ke akwuk lun God. Mea pulakin lom fwin met kulansap oaru a lalmetmet elos oru sie me aksumwos nu ke oiya su kut etu a kalem ke me luti lun Baibel?—Ridi Luk 5:39.
10, 11. Mea kutu sin met lutlut lun Baibel elos oru ke pal se elos lotela la elos enenu in srike inkanek sasu puspus in luti peng mwo? Mea kut ku in lotela ke me srikasrak se inge?
10 Lela kut in sramsramkin siepa me pupulyuk. Yea siofok kutu somla, kutu sin met lili wiyesr su eteyuk pa oana Bible Students su sumat in oru me sramsram yok elos nunku mu me sramsram yok pa inkanek mwo emeet nu selos in luti. Elos lungse in sramsram ye mutun met puspus. Kutu selos lungse na paye ma inge ke pal se oasr met puspus su kaksakinelos ke me sramsram lalos. Tusruktu, met kulansap lun Jeova elos eis kalem yok la Jeova el lungselos in oru orekma mwo saye liki na in oru me sramsram yok. El lungselos in luti met ke sie loom nu ke sie loom a ke kutu pa inkanek mwomwo puspus. Kutu sin met lili inge su sumat in orek sramsram elos srunga in oru ma inge. Me sramsram lalos oru met puspus in nunku mu elos lungse a akos Jeova, tusruktu orekma lalos nu ke oiya se inge akkalemye la elos tia na. Kut etu la Jeova el tia insemwomwo ke orekma lalos. Elos som liki u lal.—Mattu 10:1-6; Orekma 5:42; 20:20.
11 Tia pa na fusrasr nu sin met lutlut Baibel inge in luti peng mwo sie loom nu ke sie loom, yokna in pal san su orekma inge mutawauk in orek. Tusruktu elos akos a oaru nu ke u lun Jeova. Tokin kutu pal, orekma in luti peng mwo sie loom nu ke sie loom fusrasr nu selos. Jeova el akinsemwomwoyelos ke inkanek puspus. Mea kom a oru fwin met kulansap oaru a lalmetmet elos fwak nu sum in srike sie inkanek in luti peng mwo su kom soenna oru in pal somla? Ya kom akos fwinne inkanek se inge in luti peng mwo upa nu sum in oru?
Fwin sie Met Su Kut Lungse el Forla liki Jeova
12, 13. (a) Efu ku Jeova el fwak nu sesr in “sisla met koluk se” liki inmasrlos? (b) Mea sie ma upa nu sin papa a nine su met Kristian?
12 Paye la kut insese ka la kut enenu in akos masap lun Jeova in nasnas ke oiya nukewa kut fwin lungse in akinsemwomwoyel. (Ridi Taitus 2:14.) Tusruktu saap oasr pal, upa nu sesr in akos masap se inge. Ke sie me pupulyuk, nunku ke ma sikyuk se inge: Sie siyanyen Kristian su oaru nu sin God oasr tulik sefwanna natulos tusruktu el som liki ma paye. El lungse in “engun ke ma koluk ke kitin pal na” liki na in liaung fototo lal nu sin Jeova a nu sin papa a nine kiyel. Ke sripen orekma lal, el tila ku in wi ke congregation. Ke ma inge el sisila liki congregation, aok inmasrlon un met kulansap lun God.—Hibru 11:25.
13 Papa a nine kiyel elos arlana asor ka! Elos etu la Baibel el akkalemye in “tia aengune yurin sie met, fwin etukyung e, met lili, a el met kosro, ku met rapku, ku met alu nu ke me srulela, ku met aksruksruk koluk, ku met srui, ku met pusrapasr, mwo in tia mongo yurin sie su ouinge.” A fwak pa: “Komwos sisla met koluk se liki in masrlomwos.” (1 Korint 5:11, 13) Elos etu pa la kas inge “sie met” ke fus se inge ku in kalmekin pa nu sin met in sou su tia muta yurolos. Tusruktu elos lungse na paye tulik mokul natulos inge, paenang elos ku in nunku mu: ‘Kut ku in kasru fuka tulik nutusr in folokla nu sin Jeova kut fwin tia sramsram nu sel pal nukewa? Kut tia ku in kasrel in folokla nu sin Jeova kut fwin tia ku in sramsram nu sel.’b
14, 15. Mea papa a nine elos enenu in esam ke pal se elos oru sulela lalos fwin elos fwa sramsram nu sin tulik natulos su sisila?
14 Kut asor pa in liye papa a nine puspus su keok ka. Tulik natulos ku in oru sulela lal in ekulla ma el oru. Tusruktu el lungse in tafwela in oru ma koluk yok liki na in engunkin asrouki mwomwo lal yurin papa a nine kiyel a yurin met lili ke congregation. Papa a nine elos lungse in kasru tulik mokul natulos, tusruktu elos tia ku in kutongilye in oru sulela lal sifwana. Kut ku in kalem na paye la efu ku elos arlana asor.
15 Tusruktu mea papa a nine inge elos e fwa oru? Ya elos fwa akos masap lun Jeova ka su arlana kalem? Paye la oasr kutu pal su elos enenu in kaskas nu sin tulik natulos meyen oasr sie ma eneneyuk nu sin sou lalos. Tusruktu ya elos fwa nunku mu a oasr sripe puspus lalos in sramsram nu sin tulik mokul natulos? Ke pal se elos oru sulela lalos ka, elos enenu in esam ke ma Jeova el lungselos in oru. Elos enenu in esam la Jeova el lungse met kulansap lal in nasnas pal nukewa. Paenang el sapkin masap se inge in “sisla met koluk se” liki congregation. El lungse in kasru met se su oru ma koluk in ekulla orekma koluk lal a elan folokla nu ke congregation. Fuka papa a nine su met Kristian elos ku in akkalemye la elos akos akwuk se inge?
16, 17. Me lutlut fuka kut lotela ke me srikasrak lal Aron?
16 Aron, ma wiyel Moses, el sun sie oiya upa ke sripen ma tulik mokul luo natul elos oru. Tulik mokul luo natul inge Nedab a Ebaiu elos orek kise ke sie inkanek su Jeova el tia insemwomwo ka. Jeova el supwema e liki in kosrao a uniye met luo inge. Srike nunku ke asor yok su Aron el pulakin ke ma sikyak se inge. Aron el tila ku in sramsram nu sin tulik mokul luo natul. Elos mise tari. Tusruktu oasr pa ma saye ke ma sikyuk se inge oru in arlana upa nu sel Aron a nu sin met nukewa in sou lal. Moses el fwak nu sel Aron a nu sin tulik mokul saye puspus natul la Jeova el srunga elos in akkalemye la elos asor. Moses el fwak: “Nik puksif aunsifwomwos, ku selik nuknuk lomwos, tu komwos in tia mise, a tu el in tia mulat nu sin u nu kemwa.” (Livitikus 10:1-6) Arlana kalem me lutlut yok ka. Lungse lasr nu sin Jeova enenu in yok liki lungse lasr nu sin met in sou lasr su tia oaru nu sin Jeova.
17 Ke pal inge, Jeova el tia sa in kunausla met nukewa su seakos masap lal. El akkalemye lungse nu selos a sang pal mwomwo nu selos in tui ke orekma koluk lalos. Tusruktu mea pulakin lun Jeova fwin papa a nine elos tia akos masap lal a elos nunku mu oasr sripe puspus lalos in sramsram nu sin mwen ku an natulos su sisila?
18, 19. Me insemwomwo fuka met in sou ku in eis fwin elos oaru nu sin Jeova pal nukewa?
18 Met puspus elos fwak la elos foloko nu ke congregation ke sripen elos liye la met kawuk lalos a met in sou lalos sruokye oaru lalos nu sin Jeova a elos tia pa sramsram nu selos ke pal se elos srakna sisila. Ke sie me pupulyuk, oasr sie mutan fwusr el fwak nu sin met elder la ma se su oru elan ekulla oiyen moul lal pa ke oiya su akkalemyeyuk sin tulik mokul se wiyel. El oaru nu sin Jeova a akos masap lal ke pal se el srakna sisila. Ma inge kasrel in lungse na paye in foloko nu ke congregation.
19 Ke ma inge mea kut enenu in oru? Kut enenu in akos Jeova ke oiya nukewa ke moul lasr. Ke sripen kut sesumwos, paenang upa nu sesr in oru kutupal. Tusruktu kut enenu in lulalfongi na paye la ma Jeova el fwak nu sesr in oru pa ma mwo emeet nu sesr pal nukewa.
“Kas lun God El Moul”
20. Ke inkanek fuka luo Hibru 4:12 ku in orekmakinyuk? (Srike liye footnote.)
20 Kut ku in rid in Hibru 4:12 la “kas lun God el moul.” Ke pal se Poul el simusla kas inge, el tia sramsramkin ke Baibel.c Ke fus puspus saye ke sapta se inge akkalemye la el sramsramkin ke kas in mwulela lun God. Poul el akkalemye la mwulela nukewa lun Jeova akpayeyuk pal nukewa. Jeova el fwak ke kas lal: “Kas luk . . . a fwa tia foloko nu yuruk a wangin sripe, a a fwa . . . kapkapek in ma Nga supala nu ka.” (Isaia 55:11) Ke ma inge kut enenu in mongfusrasr fwin God el tia akpayeye mwulela lal ke pal se kut lungse elan akpayeye ma inge. Kut ku in lulalfongi ka la Jeova el orekma in akpayeye akwuk lal.—Jon 5:17.
21. Fuka Hibru 4:12 el sie me akkeye nu sin met lili nukewa su matou tari su wi ke “u lulap”?
21 Oasr met puspus su wi ke “u lulap” elos kulansap nu sin Jeova ke lusen yea puspus ingena. (Fwakyuk 7:9) Elos tia nunku mu elos ku in sun matwelos oana met matou ke fwal koluk inge. Ne ouinge elos srakna oru orekma in kulansap nu sin Jeova ke ku lalos. (Sam 92:14) Elos etu la “kas lun God moul” a mwulela nukewa lun Jeova e fwa akpayeyuk. (Hibru 4:12) Elos etu la el orekma in akpayeye akwuk lal ke fwalu a nu sin metu. Ke sripen akwuk lun God arlana yok sripe nu sel, ma inge oru elan insemwomwo kut fwin akkalemye la akwuk lal yok sripe pa nu sesr. Ke lusen len akitkosr ke mongla lal, wangin kutena ma su ku in tulokinye Jeova ke orekma lal in akpayeye akwuk lal. A el etu la met nukewa lal, oana sie u, elos kafweang in oru orekma fwal nu ke akwuk lal. A fuka kom? Ya kom ilyuk tari nu in mongla lun God?
[Footnote]
a Oasr met kol puspus lun met Ju elos arlana oaru in akos Masap lal Moses. Tusruktu ke pal se Jisus el tuku nu fwalu, elos srunga in lulalfongi la el pa Messaia. Elos lain akwuk lun God.
b Srike liye buk se inge “Keep Yourselves in God’s Love,” sra 207-209 ke kas English a Orekma lun Togusrai Lasr August 2002, sra 3, 4.
c Ke pal inge, God el kaskas nu sesr ke inkanek lun Kas lal. Oasr ku lun Baibel in ekulla oiyen moul lasr. Ke ma inge, ma kut rid in Hibru 4:12 paye pa ke Baibel.
Ya Kom Esam?
• Mea kut enenu in oru in ilyuk nu in mongla lun God ke pal inge?
• Ke pal se kut kalem ke ma Baibel el akkalemye ke ma God el lungse kut in oru, kut akkalemye fuka la kut lungse in akinsemwomwoye Jeova?
• Ke ma sikyuk puspus fuka ku in upa nu sesr in oru ma Jeova el fwak nu sesr in oru? Tusruktu efu ku arlana yok sripe kut in aksol?
• Ke inkanek fuka luo kut ku in kalem ke Hibru 4:12?
[Petsac ke sra 19]
Papa a nine elos arlana asor!