Met Kol Moniyuk Lasr Ke Pal Inge
“El fwasrot in kutangla a el fwa kutangla.”—FWAKYUK 6:2.
1, 2. (a) Fuka orekma lun Kraist oana sie togusra su mutawauk in yea 1914 akkalemyeyuk in Baibel? (b) Orekma fuka Jisus el orala tari mutawauk ke pal se el ekla togusra?
KRAIST el srusrngiyuki oana sie Togusra ke Togusrai lun Jeova in yea 1914. Kut ku in lumala fuka ke nunak lasr sifwana ke mwolana lal ke pal inge? Ya kom nunku kel mu el oana sie togusra mwomwo su muta ke tron lal, in ngetla nu fwalu ke kais kutu pal in liye ma mwomwo a ma tia mwo su sikyak ke congregation lal? Fwin ouinge, kut enenu in ekulla nunak lasr inge. Buk lun Sam a Fwakyuk akkalemyel oana sie togusra kulana su muta fwin soko ors, a el “fwasrot in kutangla a el fwa kutangla” ke inkanek nukewa.—Fwakyuk 6:2; Sam 2:6-9; 45:1-4.
2 Orekma se meet lun Kraist tokin el ekla togusra pa ke el kutangulla “dragon a lipufon nukewa lal.” Oana Maikael su leum lun lipufon, Kraist el sisulla Setan a dimon nukewa lal liki kosrao nu fwalu. (Fwakyuk 12:7-9) Tokin ma inge, Jisus su oana “met roso lun mwuleang” sin Jeova, el tuku wi Papa tumal in temple in liye a tuni akmwoye akwuk nukewa ke alu paye. (Malakai 3:1) El koneak la oasr ma koluk yok lun alu nukewa su fwak mu elos fwasr tokin Kraist, su wi pa ke “Babulon Lulap.” Ke sripe se inge el nununkelos meyen elos aksurorye sran met puspus a elos wi pa ke akwuk lun politic lun fwal se inge su oana orekma lun kosro.—Fwakyuk 18:2, 3, 24.
Kraist El Aknasnasye Met Orekma Lal Fwin Fwalu
3, 4. (a) Orekma fuka Kraist el akpayeye oana “met roso” lun Jeova? (b) Orekma in liye a tuni temple akkalemye mea? A oana Leum ku sifwen congregation, Jisus el srusrngiye met kulansap lal in oru mea?
3 Ke pal se Jeova a “met tutafpo” lal elos liye a tuni akwuk ke alu paye fwin fwalu, elos koneak pa ka la oasr sie u lun met Kristian paye su tia ma lun alu nukewa lun Kristendom. Ne ouinge, met Kristian akmusrala inge, su lumeyuk oana “tulik natul Livai” elos enenu pa in aknasnasyeyukla. Oana ke ma Malakai el akkalemye ke kas palu se inge: “[Jeova] El fwa aknasnasye mwen natul Livai, a akmwoyelos oana gold a silfer; a elos fwa kisekin nu sin Jeova me kise in sumwosmwos.” (Malakai 3:3) Jeova el orekmakin “met roso ke mwuleang” lal, Jisus Kraist, in aknasnasye met Kristian akmusrala nukewa inge.
4 Kraist el koneak la met Kristian akmusrala oaru inge elos oru ke ku lalos kewa in akola me lutlut mwomwo su oana me mongo nu sin met nukewa ke sou in lulalfongi. Mutawauk in yea 1879 fwasru, ke kain in ma sikyak nukewa, elos akkalemye ke magasin se inge me lutlut mwomwo ke ma paye ke Togusrai lun God. Jisus el palye la ke pal se el “tuku” in liye a tuni met kulansap lal nukewa ke loom sel ke ‘saflaiyen akwuk puspus lun fwalu,’ el a fwa koneak sie met kulansap su orala “me mongo ke pal fwal,” su kalmekin nu ke me lutlut mwomwo in akkeye met Kristian. El fwa akkalemye la met kulansap se inge el insemwomwo, a el ‘srusrngilye fwin ma nukewa lal’ fwin fwalu. (Mattu 24:3, 45-47) Oana Sifwen congregation lun met Kristian, Kraist el orekmakin “met kulansap oaru a lalmetmet inge” in karungin ma nukewa lun Togusrai Lal fwin fwalu. El sang kas in kasru nu sin met akmusrala nukewa su wi ke “loom sel” a nu sin “sip ngie” nukewa ke inkanek lun Governing Body.—Jon 10:16.
Orekma in Kosrani Fwin Fwalu
5. Orekma fuka met sap Jon el liye su Togusra Messaia el oru ke sie aruruma?
5 Met sap Jon el liye sie aruruma ke orekma saye su Togusra Messaia el fwa oru ke “len lun Leum,” tokin God el srusrngilye oana sie togusra in yea 1914. Jon el simusla: “A nga suiye, a, liye! sie pukunyeng fwosfwos, a sie met muta fwe oana mwen nutin met, a fwin sifwel tefuro gold a in paul sie mitmit kosra.” (Fwakyuk 1:10; 14:14) Jon el long sin lipufon lun Jeova fwak nu sin lipufon se inge su akola in kosrani in orekmakin mitmit natul meyen “aur in kosrani summu, tu sifweni lun fwalu mesrla.”—Fwakyuk 14:15, 16.
6. Mea Jisus el fwak mu e fwa sikyak?
6 Orekma se inge in “kosrani fwalu” el akesmakinye kut ke me pupulyuk lun Jisus ke wit a tau. Jisus el pupulyuk kunul sifwana nu ke sie met su taknelik futen witu in imae lal su fwinsrakkin in kosrani wit mwomwo. Fute mwomwo inge lumeyuk nu ke “tulik nutin togusrai,” ku met Kristian akmusrala paye su fwa welul in kol ke Togusrai lal. Tusruktu ke fong, oasr sie met lokwalok, pa “Devil,” el taknelik pa maa ku tau nu ke imae se inge, su lumeyuk nu ke ‘tulik nutin met koluk se.’ Met taknelik fute el sapkin met orekma lal elos in lela witu a tau in tukeni kapak nu ke pal in kosrani, kalme pa ke ‘saflaiyen akwuk puspus lun fwalu.’ In pal san, el fwa supwela lipufon puspus lal in srela witu liki tau.—Mattu 13:24-30, 36-41.
7. Ke inkanek fuka Kraist el akpayeye ‘kosrani su orek fwin fwalu’?
7 In akpayeye aruruma itukyang nu sel Jon, Jisus el oru orekma in kosrani fwin fwalu nufon. ‘Kosrani su orek fwin fwalu’ mutawauk in orek ke pal se met lula sin 144,000 “tulik nutin togusrai” esaniyuki, a u se inge lumeyuk pa nu ke “witu” ke me pupulyuk lun Jisus. Ma tia oana sie inmasrlon met Kristian paye a met Kristian tia paye arlana kalem tokin Meun Lulap I, a ke sripen metu akilen oiya mwo inge, ma inge sang kasru nu ke ip akluo ke ‘kosrani su orek fwin fwalu,’ ke orekma in oreni sip ngie. Sip ngie tia “tulik nutin togusrai,” tusruktu elos “sie u lulap” sin met su insemwomwo in kulansap nu ke Togusrai se inge. Elos tuku liki “met e nukewa, mutunfwalu, a kas” nukewa. Elos akpusiselyelos nu ke Togusrai lun Messaia, su Kraist Jisus pa togusra ka a met 144,000 ‘met mutal’ e fwa welul pa ke guferment se inge in kosrao.—Fwakyuk 7:9, 10; Daniel 7:13, 14, 18.
Kolyuk lun Kraist ke Congregation Nukewa
8, 9. (a) Mea akkalemye la Kraist el liye oiya a ella lun congregation nufon a el liye pa oiyen moul lun kais sie met ke congregation? (b) In oana ke ma akkalemyeyuk in sra 22, mea “ma loal lun Setan” su kut enenu in fwasr liki?
8 Kut lotela ke me lutlut se meeta la Kraist el loang akmwoye ke orekma lun kais sie congregation in century se meet C.E. Ke len lasr, Kraist el kol oana sie Togusra su “ku e nukewa . . . in kosrao a fwin fwalu,” itukyang nu sel, a oana met Kol lasr el oru kolyuk lal fwin congregation nukewa fwin fwalu a el kol met liaung nukewa ka. (Mattu 28:18; Kolosse 1:18) Jeova el oral “lan sifwen ma nukewa ke congregation” lun met akmusrala nukewa. (Efesus 1:22) Ke sripe se inge, el etu ma nukewa su sikyak ke congregation nukewa lun Met Lo lun Jeova su pus liki 100,000.
9 Nu sin congregation lun Tiataira in pal meeta, Jisus el supwela kas inge: “Mwen nutin God, su mutal oana fururrur in e, . . . El fwak ma inge, ‘Nga etu orekma lom.’” (Fwakyuk 2:18, 19) El sang kas in kai upa nu sin met puspus lun congregation se inge ke sripen oiyen moul lalos su tia mwo, su lungse in akinsemwomwoyelos sifwana, pasis el fwak nu selos: “Tu nga el, su suk insien met a nunak lalos, a nga fwa sot nu sin kais sie sumwos fwal nu ke orekma lomwos.” (Fwakyuk 2:23) Kas inge akkalemye la Kraist el liye pa orekma lun kais sie met ke congregation a ke inkanek in moul lun kais sie selos. Jisus el sang kas in kaksak nu sin met Kristian ke congregation lun Tiataira “su tia etu ‘ma loal lun Setan.’” (Fwakyuk 2:24) Ke pal inge, el insemwomwo pa nu selos, met fwusr a met matu, su tia lungse in liye a orekmakin “ma loal lun Setan” ke inkanek lun Internet a me sritel ke video, ku ke inkanek lun nunak tia mwo lun metu su lungse in oru ma puspus su tia mwo. Aok, el arlana engun in liye kafweang lun met Kristian puspus ke elos lafwekunulos sifwana ke pal inge, a elos akos ke ku lalos kewa kolyuk lal ke inkanek nukewa lun moul lalos!
10. Kolyuk lun Kraist nu sin met elder lun congregation nukewa el pupulyukkinyuk fuka? Tusruktu akwuk fuka elos enenu in akilen?
10 Kraist el oru kolyuk mwomwo lal nu sin congregation nukewa lal fwin fwalu ke inkanek lun met elder nukewa. (Efesus 4:8, 11, 12) In century se meet, met liaung nukewa elos akmusrala ke ku lun God. Elos akkalemyeyuk ke buk lun Fwakyuk oana itue puspus ke lepaul leyot sin Kraist. (Fwakyuk 1:16, 20) Ke pal inge, met elder puspus ke congregation elos wi ke u lun sip ngie. Elos oasr pa ke kolyuk lun Kraist meyen met elder nukewa srusrngiyuki tokin pre puspus a oasr kasru yok lun ku lun God ka. (Orekma 20:28) Tusruktu, elos akilen la Kraist el orekmakin sie u srisrik lun met Kristian akmusrala oana sie Governing Body in kol a kasru met tuma lutlut nukewa lal fwin fwalu.—Ridi Orekma 15:6, 28-30.
“Fwasru, Leum Jisus”
11. Efu ku kut lungse in liye met kol lasr in sa tuku?
11 Ke sie aruruma su itukyang nu sel met sap Jon, ke pal puspus Jisus el fwak la el sa in tuku. (Fwakyuk 2:16; 3:11; 22:7, 20) Wangin alolo ka la, el sramsramkin tuku lal in oru nununku nu ke Babulon Lulap a nu ke akwuk koluk nukewa lal Setan. (2 Tessalonika 1:7, 8) Ke sripen met sap Jon su matu tari in pal san el lungse na paye in liye me akpayeyen ma nukewa su palyeyuk tari, paenang el fwak: “Amen! Fwasru, Leum Jisus.” Kut su moul ke pal se inge ke saflaiyen akwuk koluk nukewa inge, kut lungse pa in liye Leum a Togusra lasr in tuku ke ku lal oana sie togusra in akmutalye inen Papa tumal a in akfulatye Kolyuk lal.
12. Orekma fuka Kraist el fwa aksafyela meet liki eng lun kunausten fuleyukla?
12 Meet liki Jisus el kunausla u lal Setan su liyeyuk fwin fwalu, met safla su wi ke u lun met 144,000 lun met Kristian akmusrala fwa eis sil lalos. Baibel el akkalemye kalem la eng lun kunausten nu ke akwuk nukewa lal Setan fwa tia fuleyukla meet liki orekma in sang sil nu sin 144,000 aksafyeyukla.—Fwakyuk 7:1-4.
13. Kraist el fwa akkalemye fuka oasr tari lal ke mutaweyen “ongoiye lulap”?
13 Met puspus su muta fwin fwalu elos tia etu a akilen ke “oasr tari” lun Kraist mutawauk in yea 1914. (2 Piter 3:3, 4) Tusruktu, tia pat, el fwa oru tu oasr tari lal in arlana kalem ke pal se el oru nununku lun Jeova nu ke akwuk nukewa lal Setan. Kunausla lun “met koluklanu se,” su lumeyuk nu sin met kol nukewa lun Kristendom, e fwa sie “me akkalemyeyen oasr tari lal,” ke oiya su arlana kalem. (2 Tessalonika 2:3, 8, NW) Ma inge e fwa sang me akpayeye fokoko la Kraist el eis me akkeye yok in orekma oana sie met nununku su Jeova el srusrngiye. (Ridi 2 Timote 4:1.) Kunausla lun Kristendom su ip yok lun Babulon Lulap pa mutaweyen kunausla ma patpat lun alu kikiap nukewa fwin fwalu. Jeova el fwa filiye ma inge nu ke insien met kol puspus lun fwalu in kunausla mutan kosro se inge. (Fwakyuk 17:15-18) Pa inge ip se meet ku mutaweyen “ongoiye lulap.”—Mattu 24:21.
14. (a) Efu ku lusen pal lun ongoiye lulap e fwa akfototoyeyuk? (b) Mea fwa “akul lun Mwen nutin met” kalmekin nu sin met kulansap nukewa lun Jeova?
14 Jisus el fwak la lusen pal ke ongoiye lulap e fwa akfototoyeyuk ke sripen “met sulela,” su met lula sin met Kristian akmusrala su srakna oasr fwin fwalu. (Mattu 24:22) Jeova el fwa tia lela met Kristian akmusrala a sip ngie nukewa in musalla ke pal se alu kikiap nukewa kunausyukla. Jisus el fwak pa la “tokin ongoiye in len se ingo,” e fwa oasr me akul ke fwatu, malem a itue, “a na me akul lun Mwen nutin met fwa sikyuk in kosrao.” Oiya inge fwa oru sruf lun mutunfwalu nukewa ‘fwa onelosla sifwana ke sripen asor yok lalos.’ Kain in oiya inge fwa tia sikyak nu sin met Kristian akmusrala, su oasr fwinsrak lalos in moul ma patpat in kosrao, a tia pa sikyak nu sin sip ngie su welulos, su oasr fwinsrak in moul ma patpat fwin fwalu. Elos e fwa ‘ngetuk a keyuk sifwelos, tu molela lalos apkurun.’—Mattu 24:29, 30; Luk 21:25-28.
15. Orekma fuka Kraist el fwa oru ke pal se el tuku?
15 Meet liki el aksafyela orekma lal in kunausla met lokwalok nukewa lal, Mwen nutin met el fwa tuku ke sie pa oiya. El fwak kas in palye inge: “A ke Mwen nutin met el fwa tuku in mwolana lal, a lipufon nukewa oelul, na el fwa muta fwin tron in mwolana lal. A mutanfwal nukewa fwa tukeni ye mutal, a el fwa srealoselik sie sin sie, oana sie met sropu el srela sipu liki goatu. A El fwa filiye sipu on lepaul leyut, a goatu on lese.” (Mattu 25:31-33) Kas palu se inge akkalemye ke tuku lun Kraist oana sie met Nununku in srela met lun “mutunfwalu nukewa” nu ke u luo: u se meet pa “sipu,” met nukewa su oana sip elos sang kasru nu sin met lel nukewa (met Kristian akmusrala su oasr fwin fwalu) a u akluo pa “goat,” su lumeyuk nu selos “su tia akos mwosasu lun Leum Jisus.” (2 Tessalonika 1:7, 8) Met nukewa su oana sipu, akkalemyeyuk oana “met sumwosmwos,” elos fwa eis “moul ma patpat” fwin fwalu, tusruktu met nukewa su oana goat elos “fwa som nu ke kai kaul,” su kalmekin nu ke kunausten.—Mattu 25:34, 40, 41, 45, 46.
Jisus el Aksafyela Orekma lal in Kutangla
16. Kraist el fwa aksafyela fuka orekma lal in kutangla?
16 Ke pal se met nukewa su welul oana togusra a met tol siliyuki tari a met nukewa su oana sip oasr tari ke lepaul leyot in eis molela lalos, Kraist el fwa tafwela orekma lal in ‘aksafyela kutangla lal.’ (Fwakyuk 5:9, 10; 6:2) Ke el kol un lipufon ku nukewa su oana met meun, a wangin alolo ka la met lili wiyel nukewa su akmoulyeyukla tari wi pa, el fwa kunausla akwuk nukewa lal Setan, ke politic, ke un met meun nukewa a ke akwuk lun business nukewa fwin fwalu. (Fwakyuk 2:26, 27; 19:11-21) Kutangla lal Setan fwa aksafyeyukla ke pal se el kunausla akwuk koluk nukewa lal Setan. Tokin ma inge el fwa sisulla Setan nu in abyss wi dimon nukewa lal ke lusen sie tausan yea.—Fwakyuk 20:1-3.
17. Nu ke mea Kraist el fwa kol sip ngie nukewa lal ke lusen Sie Tausan Yea Kolyuk lal? (b) A sulela mwomwo fuka kut lungse in akpayeye?
17 Ke “u lulap” sin sip ngie, su e fwa moliyukla liki ongoiye lulap, met sap Jon el akkalemye kas palu inge la “Lam su infulwen tron el fwa seperd lalos, a el fwa kololos nu ke lufin kof in moul.” (Fwakyuk 7:9, 17) Aok, ke lusen Sie Tausan Yea Kolyuk lal, Kraist el fwa tafwela in kol sip ngie nukewa, su porongo pusrel, a el fwa kololos nu ke moul ma patpat. (Ridi Jon 10:16, 26, 27.) Lela kut nukewa in oaru in fwasr tokin togusra lasr su met kol lasr, ke pal inge a nu ke fwal sasu su Jeova el mwulela ka!
Ke Inkanek lun Kalweni
• Orekma fuka Kraist el oru tokin el ekla sie togusra?
• Ma liyeyuk fuka Kraist el orekmakin in kol congregation nukewa?
• Ke inkanek puspus fuka Kraist Leum lasr e fwa sa in tuku?
• Fuka Kraist el fwa tafwela in kol kut nu ke fwal sasu?
[Caption on page 21]
Kunanela lun akwuk koluk nukewa lal Setan fwa oru in arlana kalem oasr tari lun Kraist