Me Lango el Molikutla Fuka?

“El su lalalfongi Mwen moul ma patpat lal; a el su tia lulalfongi Mwen fwa tia liye moul, a kasrkusrak lun God on fwel.”​—JON 3:⁠36.

1, 2. Mea sie sripe paenang Zion’s Watch Tower orekla in pal meeta?

“FWIN sie met el lutlut a lungse in eis etauk yok ke Baibel, el e fwa eis kalem yok ke mise lun Kraist la ma inge arlana yok sripe,” pa inge kas su akkalemyeyuk ke issue ak akosr lun magasin se inge in October 1879. Me lutlut se inge el aksafyela ke kas yok sripe se inge: “Lela kut in taran ke kutena kas su akkalemye mu mise lun Kraist el tia me kise a tia me iumwe ku me molela.”​—Ridi 1 Jon 2:​1, 2.

² Sie sripe paenang magasin se inge Zion’s Watch Tower orekla ke pal se meet in July 1879 pa in akkalemye kalem ke me luti lun Baibel ke me lango. Me rid inge el akkalemye ke “me mongo ke pal fwal,” meyen ke saflaiyen century ak18, pisen met su fwak mu elos met Kristian puseni, a elos mutawauk in oasr nunak in alolo ke mise lun Jisus fwin ma inge ku in ela ma koluk lasr oana sie me lango. (Mattu 24:​45) In pal san, oasr met puspus su mutawauk in lulalfongi ke me luti lun evolution, sie me luti su lain ma paye inge la metu elos oru ma koluk paenang elos tila met sumwosmwos. Met su luti evolution elos fwak mu met el kapkapek ke wangin kasru lun kutena ma a wangin pa ma eneneyuk ke sie me lango. Ke ma inge, arlana fwal kas in kai inge lal Poul nu sel Timote: “Kom in liaung ma etukot nu sum, a forla liki sramsram lusrongten a ma lain etauk, su pangpang ‘etauk’ in kikiap. Su, ke kutu fwakak ma inge elos tafongla liki lulalfongi.”​—1 Timote 6:​20, 21.

3. Kusensiyuk puspus fuka kut fwa lutlutkin yok ingena?

³ Wangin alolo ka la kom lungse na paye in tia ‘som liki lulalfongi.’ In kasre kom in oru lulalfongi lom in fokoko pal nukewa, mwo kom in nunku akmwoye kusensiyuk nukewa inge: Efu ku nga enenu me lango? Mea me eneneyuk in akpayeye me lango? Fuka nga ku in eis me kasru yok ke akwuk saoklana se inge su ku in moliyula liki mulat lun God?

Kut Ku In Moliyukla Liki Mulat lun God

4, 5. Mea me akpayeye la kasrkusrak lun God oasr ke akwuk koluk puspus lun fwalu?

⁴ Baibel a me sramsram lun metu akkalemye la ‘kasrkusrak lun God oasr tari’ nu sin metu mutawauk ke pal se Adam el oru ma koluk. (Jon 3:​36) Ma inge arlana kalem ke ma sikyak pal nukewa la metu elos mise. Kolyuk lun Setan su lain kolyuk lun God el tia ku in karungin metu liki ongoiye puspus su sikyuk ke pal inge. A wangin kutena guferment ku in akpayeye ma enenu puspus lun met nukewa su oasr ke kolyuk lalos. (1 Jon 5:​19) Ke ma inge oasr ma upa puspus su sikyak nu sin metu, oana meun, akmas a moul sekasrup.

⁵ Aok, kalem la me insemwomwo lun Jeova wangin ke akwuk koluk nukewa lun fwal se inge. Poul el fwak la “koskusrok lun God sikme in kosrao me lain ma koluk a ma sufwal nu kemwa lun met.” (Rom 1:​18-20) Ke ma inge, met nukewa su moulkin moul su tia akinsemwomwoye God a tia auliyuk ka, elos tia ku in kaengla liki fwako koluk nukewa lun oiya lalos. Ke pal inge, kasrkusrak lun God akkalemyeyuk ke kas in nununku nukewa su me keok upa su okwokla nu ke fwal lal Setan. A me akuteye ke nununku inge su oana me keok el akuteyuki ke me rid puspus nutusr su tuku ke Baibel.​—Fwakyuk 16:⁠1.

6, 7. Met Kristian akmusrala elos kol ke orekma fuka? A pal mwomwo fuka srakna ikak nu sin met puspus su oasr ke fwal lal Setan?

⁶ Ya ma inge kalmekin la patla tari nu sin met puspus elos in aksukosokyelos liki kolyuk lal Setan a elos in forla nu sin God? Mo, meyen srakna oasr pal mwomwo in sifwil forla nu sin God in orala fototo mwomwo nu sel. Met Kristian akmusrala nukewa, su “met tutafpo ke Kraist,” elos kol a kafweang in akpayeye orekma in sulkakin peng mwo nu sin met, a ke inkanek inge met nukewa akkeyeyuk in oru me solsol se inge: “Komwos in iumwela nu sin God.”​—2 Korint 5:​20, 21.

⁷ Met sap Poul el fwak la Jisus el “molikutla liki kasrkusrak su a fwa tuku.” (1 Tessalonika 1:​10) Kasrkusrak lun God fwa akkalemyeyuk ke pal safla, a in pal se God el fwa kunausla met koluk nukewa su srunga in auliyuk. (2 Tessalonika 1:​6-9) Su fwa kaengla liki kasrkusrak lun God? Baibel el akkalemye: “El su lalalfongi Mwen moul ma patpat lal; a el su tia lalalfongi Mwen fwa tia liye moul, a kasrkusrak lun God on fwel.” (Jon 3:​36) Aok, met nukewa su moul a akkalemye lulalfongi nu sin Jisus a ke me lango elos fwa ku in kaengkunla liki kasrkusrak lun God ke pal se akwuk se inge a aksafyeyukla.

Fuka Me Lango el Sang Kasru

8. (a) Fwinsrak mwomwo fuka akkalemyeyuk nu sel Adam a If? (b) Jeova el akpayeye fuka la el sie God lun nununku sumwos?

⁸ Adam a If elos orekla arlana sumwosmwos. Fwin elos akos God, fwalu ke pal inge nenela ke tulik puspus natulos su insemwomwo a muta yurolos ke Paredais. Tusruktu, sie me asor meyen papa a nine se meet kiyesr inge elos kunausla masap lun God. Ke ma inge, God el sang nununku nu selos in mise a luselosla liki Paredais in pal meeta. Ke pal se Adam a If oswela tulik natulos, ma koluk oasr tari yurin metu, a mokul a mutan se meet elos kapek matou a mise. Ma inge sang me akpayeye la Jeova el paye pal nukewa ke kas lal. Sayen ma inge, el God lun nununku sumwos. Jeova el sang kas in sensen nu sel Adam la fwin el eis a kang fwokinsak soko el fwa mise, a pa inge ma sikyak.

9, 10. (a) Efu ku tulik nukewa natul Adam elos mise? (b) Kut ku in kaengla fuka liki mise ma patpat?

⁹ Oana tulik natul Adam, kut usrui mano sesumwos su oasr kena in oru ma koluk a tok e fwa mise. Ke pal se Adam el orala ma koluk, kut nukewa oana tulik natul ekla met koluk pa. Ke ma inge kut wi pa ke nununku lun God nu ke mise. Fwin Jeova el e fwa akwanginyela oiya ma paenang metu kapek matou a mise a el tia orekmakin me molela ku me lango, el a fwa tia paye ke kas lal. Poul el akkalemye nu sesr kas inge: ‘Nga ikwe mukena, kukakunyula nu ye ma koluk. O nga met keoklanu! Su a fwa tulayula liki mano se inge su fwa mise?’​—Rom 7:​14, 24.

¹⁰ Jeova God mukena ku in ase nu sesr akwuk mwo su fwal nu ke masap lal su el ku in nunak munas ke ma koluk lasr a aksukosokye kut la liki nununku lun mise ma patpat. El oru ma inge ke el supwema Mwen natul liki in kosrao me a in isusla oana sie met sumwosmwos, su ku in sang moul lal oana sie me lango kesr. Tia oana Adam, Jisus el sruokye oiyen sumwosmwos lal. Aok, el “tia orek ma koluk.” (1 Piter 2:​22) Jisus el ku in ekla sie papa mwomwo a in oasr tulik sumwosmwos puspus. Tusruktu, el lela met lokwalok lun God in unilye tu elan ku in nutela tulik sesumwos puspus natul Adam a in akpayeye nu sin met puspus su lulalfongi nu sel in eis moul ma patpat. Ma simusla el akkalemye ouinge: “Tu oasr God sefwanna, a oayepa met Iumwe sefwanna inmasrlon God a met, el su sifwana met, aok, Jisus Kraist, su sifwana esalang tu in me mol ke met e nukewa.”​—1 Timote 2:​5, 6.

11. (a) Me kasru su tuku ke me lango ku in pupulyukkinyuk nu ke mea? (b) Su ku in eis me kasru ke me kise lun lango?

¹¹ Me kasru su tuku ke me lango ku in pupulyukkin ke sie oiya su sikyak nu sin metu ke savings lalos ke sie bank koluk paenang elos tia ku in eis mani lalos a ke sripe se inge metu elos orek mise a ma inge yokyokelik. Met nukewa la bank se inge elos filiyuki nu ke niyen prison ke lusen yea puspus. Tusruktu, fuka nu sin met puspus su filiye mani lalos ka? Tokin elos sekasrupla, wangin kutena ma elos ku in oru ka, tusruktu oasr kasru yok nu selos ke pal se oasr sie met kasrup a kulang su molela bank se inge a folokonla nu sin met nukewa savings lalos, a ma inge sang kasru nu selos in ela mise lalos. Ke inkanek ouinge, Jeova God a Mwen kulo natul elos molela tulik natul Adam a ela ma koluk lalos fwal nu ke sran Jisus. Pa inge sripe paenang Jon Baptais el ku in fwak kel Jisus: “Liye, Lam lun God, su wisla ma koluk lun fwalu!” (Jon 1:​29) Met puspus fwin fwalu su ma koluk lalos eyukla lukelos pa met moul a met mise pa.

Mea Eneneyuk in Kisekin Me Lango

12, 13. Mea kut ku in lotela kel Ebream su inse mulala in kisekunul Isaak?

¹² Kut tia ku in kalem na paye ke me lango la mea Jeova God a Mwen kulo natul elos pulakin ka. Baibel el akkalemye ke ma sikyak in pal meeta su ku in kasre kut in nunku ke oiya se inge. Ke sie me pupulyuk, srike lumala ke nunak lom ke pulakin lal Ebream ke el fwasr ke lusen len tolu som nu an Moraia in akos masap se inge lun God: “Eis inge mwen nutum, mwen siefwanna nutum, su kom lungsum, aok Isaak, a som nu fwal Moraia, a kisekunul ingo tu in me kise-furur fwin soko eol su Nga fwa fwak nu sum.”​—Genesis 22:​2-4.

¹³ Tokin len tolu el sun an se ma God el fwak nu sel in som nu we. Nunku ke pulakin upa lal ke pal se el kapriye paol a niyel Isaak a fililye elan oan ke loang su Ebream el sifwana orala. Paye la arlana upa nu sel Ebream in srukak mitmit se in sang uniye mwen natul! A srike lumala ke nunak lom ke pulakin lal Isaak ke el oan ke loang, sano ke mitmit se inge in sang fwakisye manol, su arlana ngal a oru elan mise. Lipufan lun Jeova tulokinyel Ebream ke pal fwal. Ma Ebream a Isaak elos oru in pal san kasre kut in eis kalem la mea pulakin lun Jeova in lela metu su oasr ye kolyuk lun Setan in uniye Mwen Natul. Oiya mwomwo lal Isaak ke el tia lainul Ebream ka el pupulyukkin ke oiyel Jisus ke el lungse in sun me keok a in mise kesr.​—Hibru 11:​17-19.

14. Ma sikyak fuka ke moul lal Jekob kasre kut in eis kalem ke ma eneneyuk nu ke me lango?

¹⁴ Ma eneneyuk nu ke me lango ku in pupulyukkin pa ke ma sikyak ke moul lal Jekob. Inmasrlon tulik puspus natul Jekob, el lungsel Josef yok lukelos. Sie me asor, meyen tulik mokul nukewa wiyel Josef elos sok a srungel. Ne ouinge, Josef el inse mulala in akos ke pal se papa tumal el supwella nu in imae in liye la elos fuka we. In pal san, elos liaung un kosro natul Jekob ke sie an loes su oasr ke mael 60 liki loom selos in an Hebron. Srike lumala ke nunak lom ke asor yok lal Jekob ke pal se tulik mokul natul elos folokla nu yurol a elos akkalemye nu sel nuknuk lal Josef oasr sra ka! El fwak: “Ma inge nuknuk lun mwen nutik! Soko kosro silolel kanglella! Paye Josef el emiyuki!” Paye la ma sikyak inge oru Jekob in arlana asor, meyen el memelil kel Josef len puspus. (Genesis 37:​33, 34) Aok Jeova el tia akkalemye oiya oana ke oiya su metu akkalemye ka. Tusruktu, kut fwin nunku yok ke ma sikyak ke moul lal Jekob ku in kasre kut in eis kalem ka, la mea pulakin lun God ke pal se met lokwalok lal akkolukye a unilye Mwen kulo natul ke pal se el oasr fwin fwalu.

Me Molela el Kasre Kut Fuka

15, 16. (a) Jeova el akkalemye fuka la el eis me kise lun lango? (b) Me lango el kasre kom fuka?

¹⁵ Jeova God el akmoulyeyak Mwen natul a el sang nu sel sie mano in ngun. (1 Piter 3:​18) Ke lusen len 40, Jisus su moulyuk tari el sikyak nu sin met tuma lutlut puspus lal, el akkeye lulalfongi lalos a akoelosla nu ke sie orekma saoklana in luti peng mwo. Tokin ma inge el somwak nu in kosrao. A el kisekin nu sin God saokiyen sral, su e fwa orekmakinyuk ke met tuma lutlut paye lal su akkalemye lulalfongi lalos ke me kise ke me lango lal. Jeova God el eis me kise ke me lango lun Kraist, a el orekmakunul Jisus in sang ku lal nu sin met tuma lutlut puspus su tukeni nu sie in Jerusalem ke len in Pentecost 33 C.E.​—Orekma 2:⁠33.

¹⁶ Met tuma lutlut akmusrala inge lun Kraist elos mutawauk in kaifwe met lili wiyelos in kaengla liki mulat lun God ke elos eis baptais ke inen Jisus Kraist in ela ma koluk lalos. (Ridi Orekma 2:​38-40.) Mutawauk in pal san nu ke pal se inge, oasr million puspus sin met su tuku liki mutunfwal nukewa elos akfototoyelos nu sin God ke inkanek lun lulalfongi lalos ke me kise lun lango lun Jisus. (Jon 6:​44) Ke ma inge, kut enenu in nunku akmwoye ke kusensiyuk luo inge: Ya fwinsrak ke moul ma patpat itukyang nu sesr ke sripen orekma mwomwo lasr? Kut fwin eis tari fwinsrak se inge, ya ku in tula ma inge liki kut?

17. Nunak fuka kom fwa akkalemye ke me insemwomwo ke sripen kom kawuk lun God?

¹⁷ Paye la me lango el tia fwal in orek kesr. Tusruktu oasr million puspus sin met su ekla met kawuk lun God ke sripen elos akkalemye lulalfongi lalos ke me lango, a elos fwinsrakkin in eis moul ma patpat ke sie paredais fwin fwalu. Ne ouinge, oiyen kawuk nu sin God tia me akpayeye la kut fwa kawuk nu sel pal nukewa. Kut enenu in akkalemye kulo yok lasr nu ke ‘me lango su Jisus Kraist el orekmakin in molikutla’ tu kut kaengla liki kasrkusrak lun God ke pal fwasru.​—Rom 3:24; ridi Filippai 2:⁠12.

Kafweang in Akkalemye Lulalfongi ke Me Lango

18. Mea eneneyuk nu ke orekma lasr in akkalemye lulalfongi nu ke me lango?

¹⁸ Ma simusla se su sifwen me lutlut se inge tuku ka, in Jon 3:​36, el akkalemye la orekma in akkalemye lulalfongi nu sin Leum Jisus Kraist oasr ma eneneyuk kut in aksol pal nukewa. Kulo lasr ke me lango fwa ku in mokle kut in moulkin moul fwal nu ke me luti nukewa lun Jisus, wekunang me luti lal ke oiyen moul nasnas. (Mark 7:​21-23) Aok ‘kasrkusrak lun God fwa tuku’ nu selos nukewa su tia auliyuk, a elos tafwela na in oru orekma koluk oana kosro, kaskas koluk, a kain in “ma fokfok nukewa,” a wekunang orekma koluk in liye kain in me rid a petsa fokfok nukewa.​—Efesus 5:​3-6.

19. Ke inkanek mwomwo fuka kut ku in akkalemye lulalfongi lasr ke me lango?

¹⁹ Etauk yok lasr a kulo lasr ke me lango ase me akkeye nu sesr in kafofo pal nukewa ke “orekma mutal a sumwosmwos.” (2 Piter 3:​11) Lela kut in orekmakin pal yok lasr nu ke pre lasr su tuku ke insiesr, lutlut sifwana lasr ke Baibel, wi ke meeting nukewa, a tukeni lutlut lun sou, a in moniyuk in sulkakin peng mwo lun Togusrai pal nukewa. A lela kut in “tia mulkunla in oru mwo, a sang nu sin met ngia, tu ke kise ouinge God el insemwomwo ka.”​—Hibru 13:​15, 16.

20. Met nukewa su kafweang in akkalemye lulalfongi lalos ke me lango ku in sano ke kain in me insemwomwo fuka ke pal fwasru?

²⁰ Ke pal se mulat lun Jeova orek nu ke akwuk koluk nukewa inge, kut fwa arlana insemwomwo in pal se meyen kut akkalemye lulalfongi nu ke me molela a kut kafweang in aksaokye ma inge! A ke akwuk sasu su God el mwulela, kut fwa sang kulo ma patpat ke akwuk mwolana lun God in molikutla liki kasrkusrak lun God.​—Ridi Jon 3:16; Fwakyuk 7:​9, 10, 13, 14.

Kom E Topuk Fuka?

• Efu ku kut enenu me lango?

• Mea ma eneneyuk nu ke me lango?

• Me insemwomwo puspus fuka tuku ke me lango?

• Kut akkalemye fuka lulalfongi lasr nu ke me kise lun lango lun Jisus?

[Caption on page 9]

Inkanek in sifwil fototo nu sin Jeova el srakna ikak

[Caption on page 10]

Orekma in sifwilpa nunku ke ma sikyak kel Ebream, Isaak, a Jekob, ku in kasre kut in aksaokye ma eneneyuk nu ke me lango