Fuka Jisus el Akfulatye Sumwosmwos lun God?

“God el fwakak [Kraist] tu lan me imwe, ke lulalfongi, ke sral, in fwakak sumwosmwos lal.”​—ROM 3:⁠25.

1, 2. (a) Mea Baibel el luti nu sesr ke oiya su sikyak nu sin metu? (b) Kusensiyuk fuka me lutlut inge fwa akuteyuki?

ME SRAMSRAM lun Baibel ke orekma in lain orek in imae Eden arlana eteyuk. Kut nukewa pula fwokin ma koluk lal Adam oana ma akkalemyeyuk ke kas inge: “Oana ke sie met ma koluk ilyuk nu fwalu, a mise ke ma koluk, a ouinge mise tuku nu fwin met nukemwa, meyen elos nukemwa oru ma koluk.” (Rom 5:​12) Kut fwinne kafweang na upa in oru ma mwo, kut oru pa ma koluk, su paenang kut enenu nunak munas lun God ka. Met sap Poul el akkalemye pa asor lal a fwak: “Ma mwo su nga lungse nga tia oru, a ma koluk su nga tia lungse, ma inge nga oru. O nga met keoklanu!”​—Rom 7:​19, 24.

² Ke sripen kut nukewa orekma koluk, paenang arlana fwal in siyuk kusensiyuk yok sripe inge: Fuka Jisus el isusla a wangin kutena ma koluk a sesumwos lal, a efu ku el baptaisla? Fuka inkanek in moul lal Jisus akfulatye sumwosmwos lun Jeova? Yok liki nukewa, mea mise lun Kraist akpayeye?

Sumwosmwos lun God Lainyuk

3. Fuka Setan el kiapella If?

³ Papa a nine se meet kiyesr, Adam a If elos pulesru kolyuk lun God a elos sulela me kolyuk lun “serpent matu, el su pangpang Devil a Setan.” (Fwakyuk 12:⁠9) Loang akmwoye la fuka ma inge sikyuk. Setan el kusensiyukkin inkanek lun Jeova God in kol. El oru ma inge ke pal se el siyuk sel If: “Ya God el fwak, nik komtal mongo ke sak nu kemwa in ima se inge?” A If el fwak nu sel la God el sapkin elos in tia kal fwokin sak sokofwanna inge, a fwin eltal kal eltal fwa mise. Setan el fwak mu God el kikiap. “Paye komtal fwa tia mise,” Devil el fwak. El kiapella If in lulalfongi mu oasr ma mwo su God el srunga in sang nu sel a ke el kang ke fwokinsak soko, el fwa oana God, a oasr sukosok lal in sulela ma mwo a ma koluk.​—Genesis 3:​1-5.

4. Fuka metu oasr ye kolyuk lun Setan su lain God?

⁴ Setan el fwak mu metu elos fwa insemwomwo fwin elos sukosokla liki God. Adam el tia sang kasru ke sumwos lun God in kol, a el porongo pusren mutan kiyel a welul in mongo fwokin sak su sapkinyuk nu selos in tia kal a mongo ka. Ke ma inge tula moul sumwosmwos lal Adam ye mutun Jeova a use nu sesr me keok su tuku ke ma koluk a mise. Siepa fwako koluk lun orekma in seakos lal Adam pa metu oasr ye kolyuk lal Setan, su “god lun fwal se inge.”​—2 Korint 4:4; Rom 7:⁠14.

5. (a) Jeova el akpayeye fuka la el paye ke kas lal? (b) Fwinsrak fuka God el sang nu sin tulik natul Adam a If nukewa?

⁵ In fwal nu ke kas paye lal, Jeova el sang nununku nu sel Adam a If elos in mise. (Genesis 3:​16-19) Tusruktu ma inge tia kalmekin mu akwuk lun God wanginla a tia ku in akpayeyuk. Mo tia ouinge! Ke pal se el oru nununku lal nu sel Adam a If, Jeova el akkalemye nu sin tulik natulos nukewa sie fwinsrak mwomwo. El oru ouinge ke el fwakak akwuk lal in orala sie “fute” su Setan el a fwa kunausla kapinnie. Tusruktu, Fute se inge su God el mwulela ka fwa kela ke kinet se ke kapinniel a fute se inge el fwa “kunausla sifwel [Setan].” (Genesis 3:​15) Baibel el akuteye mwo me sramsram inge ke el akkalemye kas inge kel Jisus Kraist: “Ke sripe se inge Mwen nutin God el sikme, tu lan kunausla orekma lun Devil.” (1 Jon 3:⁠8) Tusruktu, oiya a mise lun Jisus akfulatye fuka sumwosmwos lun God?

Kalmeyen Baptais lal Jisus

6. Kut etu fuka la Jisus el tia usrui ma koluk kel Adam?

⁶ Ke el matula tari, Jisus el oana Adam ke pal se el srakna met sumwosmwos. (Rom 5:14; 1 Korint 15:​45) Kalmen ma inge la Jisus el enenu in sumwosmwos ke el isusla. Fuka ma inge ku in orek? Lipufan Gabriel el akkalemye me akuteye kalem ke nine kiyen Jisus, Mary: “Ku lun God a fwa tuku nu fwom, a ku lun el su Fulat liki nu kemwa a fwa lulikomi. Ke ma inge ma mutal se su tufwa isusla fwa pangpang Mwen nutin God.” (Luk 1:​35) Ke mutaweyen moul lun Jisus, saap Mary el akkalemye nu sel Jisus kutu ma paye ke isusla lal. Ke ma inge, ke sie pal ke Mary a Josef, papa tumal Jisus fwin fwalu, elos konelak in temple lun God, tulik fwusr se inge el siyuk seltal: “Ya komtal tia etu tu fwal nu sik in muta in loom sin Papa tumuk?” (Luk 2:​49) Kalem la mutamwauk ke el tulik srisrik, Jisus el etu la el Mwen nutin God. Ke ma inge, in akfulatye sumwosmwos lun God pa ma yok emeet nu sel.

7. Oasr yurol Jisus kain in ma saok fuka?

⁷ Jisus el akkalemye insemwomwo yok lal ke ma paye ke el wi ke tukeni pal nukewa ke alu. Ke sripen oasr yurol nunak sumwosmwos, paenang el ku in lotela a kalem ke ma nukewa el long a rid ke ma Simusla ke kas Hibru. (Luk 4:​16) Oasr pa yurol siepa ma saok, sie mano sumwosmwos su ku in kisekinyuk in moli met puspus. Ke el baptaisla, Jisus el pre a saap el nunku ke kas palu in Sam 40:​6-8.​—Luk 3:21; ridi Hibru 10:​5-10.a

8. Efu ku Jon Baptais el srike in kutongilye Jisus in tia eis baptais?

⁸ Ke mutamwauk Jon Baptais el lungse in kutongilye Jisus in tia eis baptais. Efu? Meyen Jon el baptaisela met Ju oana me akul la elos auliyuk liki ma koluk lalos su lain Masap. Oana sie sou fototo, Jon el etu la Jisus el sumwosmwos a ke ma inge el tia enenu in auliyuk. Jisus el akkeyel Jon la fwal nu Sel in eis baptais. Jisus el akuteye: “Tu ouinge fwal nu sesr in akpayeye ma sumwosmwos nukewa.”​—Mattu 3:⁠15.

9. Mea kalmen baptais lun Jisus?

⁹ Oana sie met sumwosmwos, Jisus el ku in nunku mu, oana Adam oasr ku lal in orek fwako puspus in ekla papa tumun met sumwosmwos. Tusruktu, wangin ke nunak lal Jisus kain in pal fwasru inge meyen tia pa inge ma lungse lun God nu sel. God el supwelma Jisus nu fwalu in akpayeye kunokon lal oana sie Fute se su God el mwulela ka. Sie ke kunokon lun Jisus pa in kisekin moul sumwosmwos lal. (Ridi Isaia 53:​5, 6, 12.) Aok, baptais lun Jisus el tia oana sie nu ke baptais lasr, oasr kalme saye lun baptais lal. El tia mwulela moul lal nu sin Jeova, ke sripen Jisus el wi tari ke mutanfwal Israel su mwuleyukla nu sin God. A, kalmen baptais lal Jisus pa in esalang sifwana in oru ma lungse lun God oana ma palye ke ma Simusla ke Messaia.

10. Oana sie Messaia, mea el enenu in oru in akpayeye ma lungse lun God, a mea pulakin lun Jisus ka?

¹⁰ Ma lungse lun Jeova nu sel Jisus pa in luti peng mwo lun Togusrai lun God, oru met tuma lutlut, a akoelosla nu ke orekma in oru met tuma lutlut ke pal fwasru. Me akkalemye sifwana lal Jisus kalmekin pa la el lungse in muteng ke me kalyai a mise ke inkanek upa in sang kasru nu ke kolyuk sumwosmwos lun Jeova God. Ke sripen Jisus el lungse na paye Papa tumal in kosrao, el inse mulala in oru ma lungse lun God a el insemwomwo na paye in akkalemye manol oana sie me kise. (Jon 14:​31) Me insemwomwo pa nu sel in etu la saokyen moul sumwomwos lal ku in kisekin nu sin God oana sie me molela in molikutla liki me kos lun ma koluk a mise. Ya God el insemwomwo ke Jisus el akkalemyel sifwana nu sel in akpayeye kunokon yok inge nukewa? Aok el arlana insemwomwo!

11. Fuka Jeova el akkalemye insemwomwo lal kel Jisus oana sie Messaia ku Kraist, su el mwulela?

¹¹ Met sim nukewa lun Gospel akosr elos akpayeye kas lun Jeova God ke me insemwomwo ke Jisus el utyuk liki in kofu lun Infwal Jordan. Jon Baptais el akpayeye: “Nga liye ngun oatui in kosrao me oana sie mwulioa, a on fwel [Jisus] . . . A nga liye, a orekma lo tu el inge Mwen nutin God.” (Jon 1:​32-34) Yok liki nukewa, ke pal inge Jeova el akkalemye: “El inge Mwen kulu nutik, su Nga insemwomwo ke el.”​—Mattu 3:17; Mark 1:11; Luk 3:⁠22.

Jisus el Oaru Nu Ke Mise

12. Mea Jisus el oru ke lusen yea tolu tufwa tokin el baptaisla?

¹² Ke lusen yea tolu tafwu toka, Jisus el akkafofoyel sifwana in luti metu ke Papa tumal a ke sumwos lun kolyuk lun God. El fwufwasryesr yen nukewa in Fwal Mwulela nufon paenang oral in totola, ne ouinge wangin kutena ma ku in tulokinilye in orek ma lo nu ke ma paye. (Jon 4:​6, 34; 18:​37) Jisus el luti met puspus ke Togusrai lun God. Ke el akkeyela met mas ke inkanek lun mwenmwen, kite met musrinsral puspus, akmoulyeyukyak met mise, el akkalemye ke ma Togusrai a fwa akpayeye nu sin metu.​—Mattu 11:​4, 5.

13. Mea Jisus el luti ke pre?

¹³ Jisus el tia eis kaksak nu sel sifwana ke me luti a orekma puspus lal, a el oakiye sie me srikasrak mwomwo ke el sang kaksak nukewa nu sin Jeova. (Jon 5:19; 11:​41-44) Jisus el akkalemye kalem ke ma yok sripe puspus kut enenu in fwak ke pre lasr. Kut enenu in fwak ke pre lasr in “akmutalye” inen God, Jeova, a kolyuk sumwosmwos lun God in aola kolyuk koluk lal Setan tu “ma lungse Lal in orek, oana in kosrao, ouinge fwin fwalu.” (Mattu 6:​9, 10) Jisus el kaifwe kut pa in akfwalye moul lasr fwal nu ke pre inge ke kut “suk meet Togusrai a ma sumwosmwos lun [God].”​—Mattu 6:⁠33.

14. Efu ku Jisus el enenu in kafweang yok in akpayeye kunokon lal ke akwuk lun God fwinne el sie met sumwosmwos?

¹⁴ Ke pal se mise lal apkuran, Jisus el mutawauk in pulakin me fosrnga yok ke sripen kunokon yok sripe lal. Akwuk a oiya mwomwo lun Papa tumal el ku in akfulatyeyuk fwin Jisus el muteng ke orekma upa lun metu a ke mise lal su orek ke inkanek tia mwo. Len limekosr meet liki mise lal, Jisus el pre ouinge: “Inge ngunik toasrnu, a mea Nga fwa fwak? Papa, moliyula liki aur se inge. A ke sripe se inge Nga tuku nu ke aur se inge.” Tokin el akkalemye kain in pulakin lal inge oana met, Jisus el loang akmwoye ke ma yok sripe emeet a el pre: “Papa, nawela em.” Jeova el sa in topuk a fwak: “Nga naweyukla tari, a fwa sifwil naweyukla.” (Jon 12:​27, 28) Aok, Jisus el lela me srufwe upa emeet inge nu ke oiyen oaru lal, aok me srufwe upa se meet su kutena met ku in sun. Tusruktu kut ku in lulalfongi ka la ke pal se el long ke pusren Papa tumal, paye la ma inge akkeyel Jisus elan ku in kutangla in akfulatye a akmutalye kolyuk lun Jeova. Aok el oru ouinge!

Mea Mise lun Jisus Akpayeye?

15. Meet liki el mise, efu ku Jisus el fwak: “Ma inge akpayeyuk”?

¹⁵ Ke pal se Jisus el srupsrupyak fwin sak soko a ke pal se el apkuran na in mise, el fwak: “Ma inge akpayeyuk!” (Jon 19:​30, NW) Aok Jisus el akpayeye ma yok sripe puspus ke kasru lun God ke lusen yea tolu tafwu mutawauk ke pal in baptais lal nu ke pal in mise lal! Ke pal se Jisus el mise, oasr kusrusr lulap su sikyak, a sie met kol ke met meun lun an Rom su kol orekma in anwuki Jisus el fwak: “Paye el inge Mwen nutin God.” (Mattu 27:​54) Kalem la met kol se inge el liye met puspus su kaskaskou nu sel Jisus ke sripen el fwak la el Mwen nutin God. Jisus el sruokye oiyen oaru lal a akpayeye la Setan el kikiap na paye fwinne el sun me srufwe a me keok nukewa inge. Setan el akkalemye kas in lain inge nu sin met nukewa su aksaokye kolyuk lun God, el fwak: “Sie met el fwa fuleak ma nukewa lal in molela moul lal sifwana.” (Job 2:​4, Complete Jewish Bible) Aok Jisus el sruokye oaru lal, a ke sripe inge el akkalemye la Adam a If elos ku in akpayeye oaru lalos ke pal se elos sun me srufwe su fusrasr liki ma Jisus el sun. Yok liki nukewa, moul a mise lun Jisus el sang me akfulatye a ma inge akmutalye sumwosmwos lun kolyuk lun Jeova. (Ridi Soakas 27:11.) Ya oasr pa ma yok sripe saye su mise lun Jisus akpayeye? Aok oasr!

16, 17. (a) Efu ku met lo puspus lun Jeova meet liki pal lun met Kristian elos ku in engunkin oiya sumwosmwos nu sel? (b) Jeova el akinsemwomwoye fuka oaru lun Mwen natul, a mea Leum Jisus Kraist el tafwela in oru?

¹⁶ Oasr met kulansap puspus lun Jeova su moul meet liki Jisus el tuku nu fwalu. Elos sumwosmwos ye mutun God a oasr fwinsrak lalos ke sifwil moulyuk. (Isaia 25:8; Daniel 12:​13) Tusruktu, Jeova God el ku in akinsemwomwoye ke inkanek mwolana met sesumwos nukewa fwal nu ke akwuk fuka lal? Baibel el akkalemye ouinge: “God el fwakak [Jisus Kraist] tu lan me imwe, ke lulalfongi, ke sral. In fwakak sumwosmwos lal ke alukela ma koluk su orek tari, in mongfusresr lun God; aok, tu lan fwakak sumwosmwos lal in pal se inge, tu lan sifwana sumwosmwos a el met aksumwoswosyel su lalalfongi Jisus.”​—Rom 3:​25, 26.b

¹⁷ Jeova el akinsemwomwoyel Jisus ke el akmoulyelak a sang nu sel sie kunokon su mwo liki ma oasr yurol meet liki el tuku nu fwalu. Oasr yurol Jisus ke pal inge sie moul su tia ku in mise oana sie ma orekla in ngun. (Hibru 1:⁠3) Oana sie Met Tol Fulat a Togusra, Leum Jisus Kraist el tafwela in kasru met tuma lutlut nukewa lal in akfulatye sumwosmwos lun God. A kut lungse na paye in sang kulo ke sripen Papa tumasr in kosrao, Jeova, el met sang moul nu selos nukewa su akfulatyel a kafweang in kulansapul ke oaru in etawi Mwen natul!​—Ridi Sam 34:3; Hibru 11:⁠6.

18. Mea e fwa lutlutkinyuk ke me lutlut toko?

¹⁸ Met kulansap oaru nukewa mutawauk in pal lal Ebel elos engunkin fototo mwomwo nu sin Jeova meyen elos akkalemye lulalfongi lalos ke Fute se su God el mwulela ka. Jeova el etu la Mwen natul el fwa akkalemye oaru lal ke inkanek nukewa a mise lal fwa orekmakinyuk in ela “ma koluk lun fwalu.” (Jon 1:​29) Mise lun Jisus el sang pa kasru yok nu sin metu su moul ke pal inge. (Rom 3:​26) Ke ma inge, me insemwomwo fuka me lango lun Kraist oru nu sum? Pa inge me lutlut su fwa lutlutkinyuk ke me lutlut toko.

[Footnote]

Kom E Topuk Fuka?

• Sumwosmwos lun God lainyuk fuka?

• Baptais lun Jisus el lumeyuk nu ke mea?

• Mea mise lun Jisus akpayeye?

[Caption on page 4]

Ya kom etu la mea baptais lun Jisus el lumeyuk nu ka?