“Ngun a Mutan su Akola in Marut Eltal Kafweang in Fwak: ‘Fwasru!’”
“A ngun a mutan su akola in marut eltal kafweang in fwak: ‘Fwasru!’ . . . A el su malu, lan fwasru; el su lungse, lela lan eis kof in moul, tia mol.”—FWAKYUK 22:17, NW.
1, 2. Ya kut aksaokye na paye ma nukewa lun Togusrai lun God ke moul lasr, a efu?
YA KUT aksaokye na paye ma nukewa lun Togusrai lun God ke moul lasr? Jisus el kaifwe met tuma lutlut lal elos in ‘suk meet togusrai,’ a el fwak pa nu selos la ‘ma nukewa fwa itukyang nu selos.’ (Mattu 6:25-33) El pupulyukkin Togusrai lun God nu ke sie mwek su arlana yok molo, paenang ke pal se met kuka el koneak ma inge, el “kukakunla ma lal nukewa a moli mao.” (Mattu 13:45, 46) Ya kut tia aksaokye orekma in sulkakin peng mwo lun Togusrai a in oru met tuma lutlut?
2 In oana ke ma kut lutlutkin tari ke me lutlut luo meeta, orekma lasr in kaskas ke pulaik a orekmakin mwo Kas lun God ke orekma in luti, akkalemye la oasr kolyuk lun ngun mutal nu sesr. Ngun lun God el kasre kut pa in wi pal nukewa ke orekma in sulkakin peng mwo lun Togusrai. Lela kut in liye la fuka.
Sie Me Solsol nu sin Met Nukewa!
3. Ke kain in kof fuka met nukewa suliyuk in “fwasru” a in eis?
3 Oasr sie me solsol mwomwo su akkalemyeyuk nu sin metu ke inkanek lun ngun mutal. (Ridi Fwakyuk 22:17.) Me solsol se inge nu sin metu pa in “fwasru” a in nim kof su saoklana. Kof se inge el tia kof na paye. Aok kof paye el yok sripe nu ke moul lun ma nukewa fwin fwalu, tusruktu oasr ke nunak lun Jisus sie kain in kof mwomwo ke pal se el fwak nu sin mutan Samaria se ke luf in kof: “A el su fwa nim kof se su Nga fwa sang nu sel fwa tiana malu, a kof se su Nga fwa sang nu sel fwa ekla in el nu ke unon in kof se su unonak nu ke moul ma patpat.” (Jon 4:14) Kof mwomwo se inge su metu suliyuk in nim ka ku in kasrelos in eis moul ma patpat.
4. Efu ku kof in moul eneneyuk, a kof in moul lumeyuk nu ke mea?
4 Oasr ma eneneyuk su sikyak ke kain in kof se inge mutawauk ke pal se met se meet Adam, el welul If, mutan kiyel, in seakos Jeova God. (Genesis 2:16, 17; 3:1-6) Siyanyen se meet inge lisyukla liki imae Eden ‘tu [Adam] elan tia asroela paul a oayepa eis liki sak in moul a mongo, a moul ma patpat.’ (Genesis 3:22) Adam su papa tumun met nukewa, el oru mise in ilyuk nu fwalu a tuku nu sin met nukewa. (Rom 5:12) Kof in moul el lumeyuk nu ke akwuk nukewa lun God in molela met akosten nukewa liki ma koluk a mise a in sang nu selos moul sumwosmwos su wangin saflaiye ke sie Paredais fwin fwalu. Akwuk nukewa inge akpayeyuk ke inkanek lun me kise lun lango lun Jisus Kraist.—Mattu 20:28; Jon 3:16; 1 Jon 4:9, 10.
5. Me solsol in fwasru a “eis kof in moul, tia mol” el tuku sin su? Akuteye.
5 Su orala akwuk ke me solsol se inge in fwasru a “eis kof in moul, tia mol”? Ke pal se akwuk nukewa ke moul ke inkanek lun Jisus akpayeyuk nu sin metu ke lusen Sie Tausan Yea Kolyuk lun Kraist, akwuk nukewa inge akkalemyeyuk oana “infwal lun kof in moul, saromrom oana kristal.” Infwal soko inge akkalemyeyuk mu “surorla liki tron lun God a lun Lam.” (Fwakyuk 22:1) Ke ma inge, Jeova su Sang Moul, el pa Sropon kof inge su sang moul. (Sam 36:9) El pa orala akwuk tu metu ku in eis kof mwomwo inge ke inkanek lun “Lam,” Jisus Kraist. (Jon 1:29) Infwal soko inge pa inkanek lun Jeova in akwanginyela ma koluk nukewa su sikyak nu sin metu ke sripen seakos lal Adam. Aok, Jeova God pa orala akwuk in akkalemye me solsol se inge “fwasru.”
6. Ngea “infwal lun kof in moul” el mutawauk in soror?
6 “Infwal lun kof in moul” se inge el mutawauk in soror ke “len lun Leum,” mutawauk ke pal se “Lam” el ekla togusra in kosrao in yea 1914. A ma inge fwa soror ke inkanek yok ke lusen Sie Tausan Yea Kolyuk lun Kraist. (Fwakyuk 1:10) Ke ma inge, kutupa me kasru nu ke moul e fwa itukyang nu sin metu tokin pal se inge. Me kasru inge pa Kas lun God, Baibel, meyen kas su simusyukla ka el sramsramkinyuk oana “kof.” (Efesus 5:26) Me solsol in eis a nim kof in moul el ikasla nu sin met nukewa ke elos porongo peng mwo lun Togusrai. Tusruktu kut ku in siyuk la su akkalemye me solsol inge nu sin met puspus ke lusen len lun Leum?
“Mutan Su Akola In Marut” El Fwak, “Fwasru!”
7. In “len lun Leum” su u lun met su akkalemye meet me solsol se, a nu sin su?
7 U lun met nukewa su pupulyukkinyuk oana mutan su akola in marut, pa met Kristian akmusrala nukewa, elos pa akkalemye me solsol se inge nu sin metu in “fwasru.” Nu sin su? Aok, mutan su akola in marut el tia fwak, “Fwasru!” nu sel sifwana. Kas lal inge akkalemyeyuk nu selos su oasr fwinsrak in eis moul ma patpat fwin fwalu tokin “meun lun len lulap lun God Ku liki Ku” orek tari.—Ridi Fwakyuk 16:14, 16.
8. Mea akkalemye la met Kristian akmusrala elos fwakak me solsol lun Jeova mutawauk in yea 1918?
8 Met tuma lutlut lun Kraist elos akkalemye me solsol se inge mutawauk in yea 1918. In yea se inge, public talk su oasr ke sifwe se inge “Million Puspus su Moul ke Pal Inge Elos Fwa Tia Mise” akkalemye ke fwinsrak la met puspus elos fwa eis moul ma patpat ke sie paredais fwin fwalu tokin meun lun Armagedun. Sie me sramsram yok su akkalemyeyuk ke sie toeni lulap lun Bible Students in an Cedar Point, Ohio, U.S.A., in yea 1922 el akkeye met long nukewa in ‘sulkakin Togusra a togusrai lal.’ Kas in akkeye inge sang kasru nu sin met lula sin u lun met Kristian akmusrala su oana mutan su akola in marut in sun met puspus ke me solsol mwomwo. In yea 1929, ke March 15 issue lun Tauer in San ke kas English el akkalemye ke sie me lutlut su oasr ke sifwe se inge “Me Solsol Mwomwo,” su tuku ke Fwakyuk 22:17. Me lutlut se inge el akkalemye ouinge: “Met lula sin met akmusrala elos wi [God Fulatlanu] ke orekma in fwakak me solsol a fwak, ‘Fwasru.’ Kas inge enenu in fwakak nu selos su oasr lungse lalos ke ma sumwosmwos a ma paye. A orekma in fwakak me solsol se inge enenu in orek ke pal inge.” Ke pal inge, u lun met akmusrala elos srakna kafweang in fwakak me solsol se inge.
“A El Su Long Lan Fwak: ‘Fwasru!’”
9, 10. Fuka met nukewa su long ke me solsol elos suliyuk pa in fwak me solsol se inge “Fwasru!” nu sin met puspus saye?
9 Na mea nu selos su long me solsol se inge in “fwasru”? Elos kaifweyuk pa in fwak, “Fwasru!” Ke sie me pupulyuk, ke August 1, 1932, issue lun Tauer in San ke kas English, in sra 232 oasr kas akkalemyeyuk ouinge: “Lela met akmusrala elos in akkeye met nukewa su fwa wi in fwakak peng mwo lun togusrai. Leum el tia enenu in mosrelosla tu elos in ku in sulkakin peng mwo lun Leum. Sie me insemwomwo yok nu sin Met Lo lun Jeova elos in etu in pal inge la God el lela elos in us kof in moul nu sin met puspus su fwa moliyukla liki Armagedun a su ku in eis moul ma patpat fwin fwalu.”
10 Me rid se inge Tauer in San, ke issue lun August 15, 1934, sra 249, ke kas English el akuteye kalem ke kunokon lun met long nukewa in fwakak, “Fwasru!” A me rid se inge el akkalemye kas ouinge: “Met nukewa su wi ke u lun Jonadab elos enenu wi u lun met Jehu, su kalmekin nu sin met akmusrala nukewa. A elos in sulkakin peng mwo lun togusrai, fwinne elos tia met lo akmusrala lun Jeova.” In yea 1935, oasr akilenyen “sie u lulap” su simusyukla in Fwakyuk 7:9-17 akkalemyeyuk kalem. Ma inge sang kasru yok nu ke orekma in fwakak me solsol lun God. Mutawauk in pal san, pisen met nukewa su wi ke u ulap sin met nukewa su wi ke alu paye, ke pal inge oasr ke million itkosr kutu, elos wi pa in sulkakin me solsol inge. Ke sripen elos insemwomwo yok ke elos long ke peng mwo, paenang elos mwulela moul lalos nu sin God, eis baptais lalos. A elos wi u lun met akmusrala su oana mutan su akola in marut in moniyuk in suli met puspus in ‘fwasru a nim kof in moul, tia mol.’
“Ngun” el Fwak, “Fwasru!”
11. In century se meet C.E., fuka ngun mutal el sang kasru yok nu ke orekma in luti peng mwo?
11 Ke pal se el oru orekma in luti ke sie loom alu sin met Ju in an Nazaret, Jisus el ikasla sie buk in limlim lun met palu Isaia a el rid kas inge: “Ngun lun Jeova on fwuk, tu el mosweyula in luti mwosasu nu sin met sekasrup, el supeyume in fwakak tulala nu sin met sruo, a liyaten nu sin met kun, in aksukosokyelos su kos, in sulkakinelik yea mwona lun Leum.” Tokin el rid kas inge, el orekmakin kas inge nu sel sifwana a el fwak: ‘Misenge kas in ma Simusla inge su komwos long akpayeyuk.’ (Luk 4:17-21) Meet liki el somwak nu in kosrao, Jisus el fwak nu sin met tuma lutlut puspus lal: “Komwos fwa eis ku, ke ngun mutal el tuku nu fwomwos, a komwos fwa met orek lo keik . . . nu ke yen loesilanu fwalu.” (Orekma 1:8) In century se meet, ngun mutal sang kasru yok nu ke orekma in luti peng mwo.
12. Fuka ngun lun God el sang kasru nu ke orekma in fwakak me solsol ke pal lasr?
12 Ngun mutal el sang kasru fuka nu ke orekma in fwakak me solsol nu sin metu ke pal inge? Jeova pa Sropon ngun mutal. El orekmakin ngun mutal lal in ikasla insie a nunak lun met akmusrala su oana mutan su akola in payuk in eis etauk yok ke Baibel. Ngun lun God el akkeyelos in fwakak me solsol a in akuteye ma paye ke ma Simusla nu selos su oasr fwinsrak lalos in moul ma patpat ke sie Paredais fwin fwalu. Na fuka nu selos su eis me solsol, ekla met tuma lutlut lun Jisus Kraist, a akkalemye me solsol nu sin met puspus saye? Ngun mutal lun God el akkeyelos pa in oru orekma inge. Meyen elos baptaisla in ‘en ngun mutal,’ paenang elos akesrui a fungfung nu ke ku lun God in kasrelos. (Mattu 28:19) Nunku akmwoye pa ke kas su sulkakinyuk sin met akmusrala a sin u lulap su piselos yokyokelik. Ma inge tuku ke Baibel, buk su simusyukla ke kasru lun ngun mutal lun God. Ke ma inge, me solsol inge el akkalemyeyuk ke inkanek lun ngun mutal. Aok, oasr kolyuk lun ngun mutal nu sesr. Fuka ma inge ku in sang kasru nu ke lupan pal kut orekmakin in wi ke orekma inge in fwakak me solsol?
“Eltal Kafweang in Fwak: ‘Fwasru!’”
13. Mea kalmen pulo kas inge “ngun a mutan su akola in marut eltal kafweang in fwak: ‘Fwasru!’”?
13 “Ngun a mutan su akola in marut” elos tia tui in fwak “Fwasru!” Kas su orekmakinyuk ka in pal meeta akkalemye la elos in kafweang in oru. Ke ma inge, leng se inge New World Translation el lungasla ouinge: “Ngun a mutan su akola in marut eltal kafweang in fwak: ‘Fwasru!’” Kas se inge akkalemye la elos fwakak me solsol lun God pal nukewa a tia tui. Na fuka nu selos su long a eis me solsol se? Elos fwak pa, “Fwasru!” U lulap sin met su alu nu sin God paye elos sramsramkinyuk pa la elos ‘kulansap ke len a fong in tempel lun Jeova.’ (Fwakyuk 7:9, 15) Elos ‘kulansap len a fong’ ke oiya fuka? (Ridi Luk 2:36, 37; Orekma 20:31; 2 Tessalonika 3:8.) Me srikasrak lun mutan palu Anna su matou tari a met sap Poul akkalemye la ‘kulansap len a fong’ akkalemye la ma inge orek pal nukewa, a kafweang yok ke orekma in luti peng mwo.
14, 15. Daniel el akkalemye fuka yok sripaiyen orekma in alu nu sin God su orek pal nukewa?
14 Met palu Daniel el akkalemye pa ke yok sripaiyen orekma in alu nu sin God su orek pal nukewa. (Ridi Daniel 6:4-10, 16.) El tia ekulla akwuk lal in alu nu sin God, ke oiya mwo lal in pre nu sin God “pal tolu in len se, . . . oana el oru meet.” Aok el tia ekulla ke lusen malem se na, fwinne pa inge sripe paenang el sisila nu in luf in laionu. Arlana kalem nu sin met nukewa su liye orekma mwomwo lal la wangin kutena ma yok sripe liki orekma in alu nu sin Jeova su orek pal nukewa!—Mattu 5:16.
15 Tokin Daniel el oasr ke luf in laion ke fong fon se, togusra el som nu we a wowoyuk nu sel: “O Daniel, met kulansap lun God moul, ya God lom su kom kulansupu pal e nukewa, ku in molikomla liki laionu?” Daniel el sa in topuk: “O togusra, moul ma patpat. God luk el supwema lipufon lal a kaliye oalin laionu, a elos tia akkolukyeyu, meyen wangin ma sito koneakyak in nga ye mutal; a oayepa, O togusra, nga tia oru kutena ma sito ye mutom.” Jeova el akinsemwomwoyel Daniel ke orekma in kulansap lal “pal e nukewa.”—Daniel 6:19-22.
16. Me srikasrak lal Daniel ke orekma in alu nu sin God pal nukewa el oru kut in siyuk kusensiyuk puspus fuka ke orekma lasr in wi sulkakin peng mwo?
16 Daniel el akola in mise liki na in tia oru pre lal nu sin God pal nukewa. Fuka nu sesr ke pal inge? Orekma fuka in lafwekin kut sifwana kut oru tu kut in sulkakin peng mwo ke Togusrai lun God pal e nukewa? Aok, kut fwa tia lela sie malem in alukela a kut tia sramsramkin kel Jeova nu sin met puspus! Ya kut fwa tia kafweang in wi ke orekma in sulkakin peng mwo wik nukewa? Fwinne kut munasla ke manosr ku sekapasrla, kut fwin ku in orekmakin minit 15 na ke lusen sie malem, kut enenu in reporti orekma lasr inge. Efu? Meyen, kut lungse in kafweang in fwak “Fwasru!” oana ngun a mutan su akola in marut elos oru pal nukewa. Aok, kut lungse in oru ke ku lasr kewa in sulkakin peng mwo lun Togusrai pal nukewa oana sie met fwakak.
17. Kain in inkanek mwomwo fuka in akkalemye me solsol lun Jeova kut enenu in akpayeye?
17 Kut enenu in suk inkanek in akkalemye me solsol lun Jeova pal nukewa, a tia ke pal su kut wi sulkakin peng mwo sie loom nu ke sie loom mukena. Sie kunokon na mwomwo in suli met nukewa su malu in ‘fwasru a eis kof in moul, wangin molo’ ke pal puspus, oana ke pal kut moli ke sto, ke kut fwufwasryesr, som vacation, ke niyen orekma, ku ke loom lutlut! Fwinne met kol lun anu elos lain orekma in luti lasr, kut enenu in kafweang in sulkakin peng mwo nu sin met ke inkanek mwo. Saap kut fwa muteta nu ke kutu loom a sifwilpa som nu ke territory saye, ku kut in kafweang in sulkakin peng mwo ke inkanek lun informal.
Kafweang in Fwak, “Fwasru!”
18, 19. Kom akkalemye fuka la kom aksaokye kunokon lom oana sie met orekma yurin God?
18 Ke lusen yea yungoul kutu, ngun a mutan su akola in marut eltal kafweang in fwak, “Fwasru!” nu sin met nukewa su malu ke kof in moul. Ya kom long me solsol mwomwo su elos akkalemye? Ke ma inge kut kaifwe kom in fwakak pa me solsol inge nu sin met puspus saye.
19 Kut tia etu la putaka me solsol mwomwo lun Jeova fwa srakna akkalemyeyuk, tusruktu oiya mwomwo lasr in porongo ma inge a kafweang pa in fwak, “Fwasru!” oru kut in met orekma yurin God. (1 Korint 3:6, 9) Sie kunokon na mwomwo pa inge! Lela kut in akkalemye la kut aksaokye kunokon inge a “lela kut in kise nu sin God ke kaksak” ke kut kafweang in sulkakin peng mwo pal nukewa. (Hibru 13:15) Lela kut nukewa su oasr fwinsrak in moul fwin fwalu in wi u lun met akmusrala su pupulyukkin oana mutan pusla, in kafweang in fwak, “Fwasru!” A lela in fwinsrak la oasr met puspus eis kof in moul ke wangin molo!
Mea Kom Lotela?
• Me solsol in “fwasru” akkalemyeyuk nu sin su?
• Efu ku kut ku in fwak la me solsol in “fwasru” el tuku sin Jeova me?
• Me kasru fuka tuku ke ngun mutal in akkalemye me solsol se inge in “fwasru”?
• Efu ku kut enenu in kafweang in wi pal nukewa in sulkakin peng mwo?
[Siasing el ngar er a page 22]
(For fully formatted text, see publication)
Kafweang in Fwak, “Fwasru!”
1914
5,100 met fwakak peng mwo
1918
Met puspus elos fwa eis moul ke sie Paredais fwin fwalu
1922
“Sulkakin, sulkakin, sulkakin, Togusra a togusrai lal”
1929
Met lula oaru elos fwak, “Fwasru!”
1932
Me solsol akkalemyeyuk nu sin met akmusrala a nu sin met puspus saye
1934
U lun Jonadab su lumeyuk nu ke u lulap suliyuk elos in sulkakin peng mwo
1935
“U lulap” akkalemyeyuk
2009
7,313,173 met fwakak peng mwo