Inkanek lun Jeova in Kol Akfulatyeyuk!
“El su Fulat liki nu kemwa Leum in togusrai lun metu.”—DANIEL 4:17.
1, 2. Mea kutu sripe efu ku kolyuk lun met tia orala fwako mwomwo?
KOLYUK lun met tia ku in eis kutangla a tia pa ku in orala fwako mwomwo! Arlana paye ma inge. Sripe yok emeet la efu ku metu tia ku in eis kutangla ka pa srikla etauk lalos in oru me kolyuk ke inkanek mwomwo. Arlana kalem yokna ke pal inge la kolyuk lun metu tia ku in eis kutangla meyen met kol puspus elos akkalemye la elos ‘sifwana lungselos, elos fwa met lungse mani, met konkun, fulang, seoaru, met sulallel, met lesrik, tia sifwana leum fwelos, met lemnak, met su tia lungse ma mwo.’—2 Timote 3:2-4.
2 Mutawauk in pal meeta, papa a nine se meet kiyesr elos pulesru inkanek lun God in kol. Ke ma inge, elos nunku mu elos sulela in oasr sukosok lalos. Tusruktu, payeiye pa, siyanyen se meet inge oralos in oasr ye kolyuk lal Setan. Kolyuk lun met orek tari ke lusen tausan onkosr kutu yea, su oasr ye kolyuk lun Setan su “leum lun fwal se inge,” a kut pulakin ingena kain in me keok a ma upa su arlana pukanten. (Jon 12:31) Oasr sie buk su akkalemye ke ma sikyak nu sin metu ke pal inge, ma inge akkalemye la wangin sripe in “sukok ke sie fwal sumwosmwos.” (The Oxford History of the Twentieth Century) Buk se inge el akkalemye pa: “Kain in akwuk inge tia ku in koneyukyuk, a fwinne metu kafweang in orala kain akwuk sumwosmwos ka, ma inge kol mukena nu ke ongoiye, oasr kolyuk upa lun met kol, a orala meun puspus.” Aok kas inge el arlana paye la kolyuk lun met el tia ku in eis kutangla!
3. Mea kut ku in fwak ke inkanek su God el fwa oru kolyuk lal fwin Adam a If elos tia oru ma koluk?
3 Ke ma inge, sie me asor yok ke sripen papa a nine se meet kiyesr elos pulesru kolyuk sefwanna su arlana mwo, ma inge pa kolyuk lun God! Aok, kut tia etu ke akwuk su Jeova el fwa oru kolyuk lal fwin fwalu fwin Adam a If elos tia oru ma koluk a sruokye paye lalos nu sel. Tusruktu, kut ku in lulalfongi ka la kolyuk lun God fwin met nukewa akos ma inge, elos fwa akkalemye lungse nu sin sie sin sie a wangin kutena met su fwa akkalemye srisri. (Orekma 10:34; 1 Jon 4:8) Ke sripen lalmetmet lun God su wangin ma oana, kut ku in lulalfongi la fwin metu elos tia pulesru kolyuk lun God, fwako koluk nukewa su tuku ke kolyuk lun metu fwa tia sikyak. Paye la kolyuk lun God el ku in “akkupye ma lungse lun ma nukewa su moul.” (Sam 145:16) Ke kas fototo, ma inge el sie kain in kolyuk su arlana sumwosmwos. (Duteronomi 32:4) Sie me asor yok ke metu elos pulesru kolyuk inge!
4. God el lela Setan in oru kolyuk lal ke inkanek fuka?
4 Tusruktu, mwo kut in esam la fwinne Jeova el lela metu in oru kolyuk lalos, el tia na fuleak sumwos lal in kol nu sin ma orekla nukewa lal. Sie togusra lun an Babulon su arlana ku a pengpeng el akilen la “el su Fulat liki nukewa Leum in togusrai lun metu.” (Daniel 4:17) Ke saflaiye, ma lungse lun God ka fwa orek. (Mattu 6:10) Paye la, ke lusen pal fototo, Jeova el lela Setan in orekma oana sie “god lun fwal se inge” in sang me top mwomwo nu ke kas in lain su akkalemyeyuk sin met lokwalok se inge. (2 Korint 4:4; 1 Jon 5:19) Ne ouinge, Setan el tia ku in oru ma el lungse liki ma Jeova el lela nu sel in oru. (2 Kronikel 20:6; srike liye Job 1:11, 12; 2:3-6) A mutawauk in pal meeta ne ke pal inge oasr kutu met su sulela in akpusiselyelos nu sin God, fwinne elos muta ke sie fwalu su oasr ye kolyuk lun met Lokwalok se meet lun God.
Kolyuk lun God nu sin Met Israel
5. Mea met Israel elos mwulela nu sin God ka?
5 Mutawauk in pal lal Ebel nu ke pal se su mutunfwal Israel oakiyuki, oasr kutu met oaru a paye su alu nu sin Jeova a akos masap lal. (Hibru 11:4-22) In pal lal Moses, Jeova el oru mwuleang nu sin tulik natul Jekob, a met nukewa inge ekla mutunfwal lun Israel. In yea 1513 B.C.E., met Israel a tulik natulos elos eis Jeova oana Met Kol lalos, a elos fwak ouinge: “Ma nu kemwa Jeova el fwak kut fwa oru.”—Exodus 19:8.
6, 7. Kolyuk lun God nu sin met Israel el fuka?
6 Oasr akwuk lun God ke pal se el sulela met Israel in met lal. (Ridi Duteronomi 7:7, 8.) Sulela lal inge oasr kalme yok liki na in sang karungin a kasru met Israel. Inen God a ku lal akkalemyeyuk pa ke sulela lal inge, a ma luo inge arlana yok sripe. Met Israel elos enenu in kulansap oana met lo nu ke ma paye la Jeova pa God paye mukefwanna. (Isaia 43:10; 44:6-8) Ke ma inge, Jeova el fwak nu sin mutunfwal se inge: “Kom sie mutanfwal mutal nu sin Jeova God lom, a Jeova el suli kom tu kom in sie mutanfwal su ma lal sifwana, yok liki mutanfwal nu kemwa su muta fwin mutun fwalu.”—Duteronomi 14:2.
7 Inkanek lun God in kol met Israel akkalemye nu selos la elos met sesumwos. Ke pal sepana, masap lal sumwosmwos a akkalemye ke oiya mwomwo nukewa lun God. Masap nukewa lun Jeova su el sang nu sel Moses akkalemye kalem ke oiyen mutal lun God, lungse lal ke ma sumwosmwos, el akola in sang nunak munas pal nukewa, a ke mongfusrasr lal. Tok, in pal lal Josua a lun fwil lal, mutunfwal se inge elos akos masap nukewa lun Jeova a elos engunkin misla a kasru lun God nu selos. (Josua 24:21, 22, 31) Lusen pal se inge ke me sramsram lun met Israel akkalemye ke kutangla lun kolyuk lun God.
Kolyuk lun Met Oasr Fwako Koluk
8, 9. Me siyuk tia mwo fuka met Israel elos oru, a mea fwako lun sulela lalos inge?
8 Tusruktu, tokin kutu pal, met Israel elos forla liki kolyuk lun God ke pal puspus a tula me karungin lal nu selos. Oasr pal, ke inkanek lun met palu Samuel, met Israel elos siyuk ke sie togusra, sie met su elos ku in liye. Jeova el fwak nu sel Samuel in sang ma elos siyuk inge. Tusruktu, Jeova el fwak pa: “Elos tia siskomla, a elos sis yu la, tu Nga fwa tia togusra fwelos.” (1 Samuel 8:7) Fwinne Jeova el lela met Israel in oasr sie togusra su elos ku in liye, el sang kas in sensen nu selos la kolyuk lun sie met oana togusra lalos e fwa oasr fwako koluk su tuku ka.—Ridi 1 Samuel 8:9-18.
9 Ma sikyak nu selos akkalemye la kas in sensen lun Jeova el paye. Kolyuk lun sie togusra el orala ma upa puspus nu sin met Israel, yokna ke pal se togusra se el seoaru. Ke kut nunku ke me srikasrak se inge ke met Israel, tia sie me lut la ke lusen tausan yea puspus, ke kolyuk lun met su tia etu Jeova el tia orala akwuk mwomwo su ku in sang kasru pal nukewa. Paye la, kutu sin met kol lun politics elos pang nu sin God in akinsemwomwoye kafweang lalos in oasr misla a moul mwomwo. Tusruktu na fuka God el fwa akinsemwomwoyelos su tia akpusiselyelos nu ke inkanek in kolyuk lal?—Sam 2:10-12.
Sie Mutunfwal Sasu Ye Kolyuk lun God
10. Efu ku God el aola met Israel ke sie mutunfwal sasu?
10 Mutunfwal Israel akpayeye la elos tia lungse in kulansap nu sin Jeova ke oaru lalos. Tok, elos pulesru Messaia su Jeova el srusrngiye. A Jeova el pulesrelos a el orala akwuk in aola mutunfwal se inge ke sie u lun met su e fwa orala sie mutunfwal sasu. Ke ma inge, in yea 33 C.E. congregation lun met Kristian akmusrala lun Jeova oakiyuki. Ke kas saye, congregation se inge el sie mutunfwal sasu su oasr ye kolyuk lun Jeova. Poul el sramsramkin ma inge oana “Israel lun God.”—Galetia 6:16.
11, 12. Ma oana sie fuka ke orekma in liaung oasr inmasrlon met Israel a ke “Israel lun God”?
11 Oasr ma tia oana sie a ma oana sie inmasrlon mutunfwal Israel in pal meeta a ke “Israel lun God.” Tia oana ke met Israel in pal meeta, wangin togusra lun congregation lun met Kristian a wangin ma eneneyuk in kisekin kosro in akwanginyela ma koluk lun metu. Sie ma oana sie inmasrlon mutunfwal Israel a ke congregation lun met Kristian pa ke akwuk ke met matou su liaung u, ku met elder. (Exodus 19:3-8) Met Kristian elder inge elos tia leumi fwin u ku congregation. A, elos liaung congregation a moniyuk in kol ke orekma nukewa ke congregation. Elos akkalemye kulang a lungse nu sin met nukewa ke congregation, a akfulatyelos a akkalemye sunak nu selos.—2 Korint 1:24; 1 Piter 5:2, 3.
12 Ke kut sifwilpa nunku ke orekma lun God nu sin met Israel, met nukewa su wi ke “Israel lun God” a ke “sip ngie” su welulos elos akkeye oiya mwo lalos in sang kulo nu sin Jeova a ke inkanek lal in kol. (Jon 10:16) Ke sie me pupulyuk, oana ke ma sikyak tari akkalemye la met kol puspus lun Israel elos akkeye met nukewa su oasr ye kolyuk lalos ke elos oru ma mwo, a kufusla nunak lalos ke elos oru ma koluk. Ma paye inge sang kasru yok nu selos su liaung met Kristian la, fwinne elos tia leum oana togusra in pal meeta, elos enenu in akkalemye me srikasrak mwo ke lulalfongi.—Hibru 13:7.
Jeova el Kol Fuka ke Pal Inge
13. Ma yok sripe fuka sikyak in yea 1914?
13 Met Kristian ke pal inge akkalemye nu sin met nukewa la kolyuk lun met nu sin met nukewa el apkuran na in aksafyeyukla. In yea 1914, Jeova el oakiye Togusrai lal in kosrao ye kolyuk lun Togusra su el pakiye, Jisus Kraist. In pal sa, el sang ku nu sin Jisus in fwasrot “in kutangla, a el fwa kutangla.” (Fwakyuk 6:2) God el fwak nu sin Togusra sasu se inge: “Kom in Leum in masrlon met lokwalok lom.” (Sam 110:2) Sie me asor, mutunfwal puspus elos pulesru in akpusiselyelos nu ke kolyuk lun Jeova. Elos tafwela in fwak ke insielos la “wangin Jeova.”—Sam 14:1.
14, 15. (a) Togusrai lun God el kol kut fuka ke pal inge? A kusensiyuk fuka kut enenu in siyuk sesr sifwana? (b) Ke inkanek fuka mwoiyen kolyuk lun God liyeyuk kalem ke pal inge?
14 Oasr met lula sin “Israel lun God” su srakna oasr fwin fwalu, a oana met lili wiyel Jisus, elos kafweang in orekma oana “met tutafpo ke Kraist.” (2 Korint 5:20) Jisus el srusrngiyelos oana sie u lun met kulansap oaru a lalmetmet tu elos in karungin a ako me mongo su kalmekin nu ke me lutlut mwomwo nu sin met akmusrala a nu ke u lulap lun met Kristian, su piselos oasr ke million puspus ke pal inge a oasr fwinsrak lalos in moul ma patpat fwin fwalu. (Mattu 24:45-47; Fwakyuk 7:9-15) Me insemwomwo lun Jeova nu ke akwuk inge el arlana kalem ke sripen oasr kapkapek yok ke etauk mwomwo su engunkin sin met nukewa su wi ke alu paye ke pal inge.
15 Kais sie sesr enenu in siyuk ma inge: ‘Ya nga akilen na paye ke kunokon su nga enenu in akpayeye ke congregation? Ya nga sang kasru nu ke inkanek lun Jeova in kol? Ya nga arlana insemwomwo in sie sin met puspus su oasr ye kolyuk lun Togusrai lun Jeova? Ya nga lungse na paye in kafweang in fwak nu sin met puspus ke Togusrai lun God ke ku luk kewa?’ Oana sie u, kut lungse na paye in akpusiselye kut ke akwuk nukewa su Governing Body elos orala a in akesrui nu sin met elder nukewa ke congregation. Ke inkanek nukewa inge, kut akkalemye la kut eis a akos kolyuk lun God. (Ridi Hibru 13:17.) Akosten lasr nu ke kolyuk lun God el oru kut in oasr inse sefwanna fwin fwalu nufon a kain in oiya se inge el wangin ma oana ke fwal se inge su wangin insese lalos sie sin sie. Ma inge orala pa misla a sumwosmwos a sang mwolana nu sin Jeova, a akkalemye la kolyuk lal pa ma mwo emeet.
Kolyuk lun God Eis Kutangla
16. Sulela fuka kais sie met enenu in oru?
16 Pal se in aksumwosye kas in lain nukewa su orek in imae Eden fwa apkuranyang. Ke ma inge, pa inge pa pal fwal metu elos in orala sulela lalos. Kais sie met elos enenu in oru sulela lalos sifwana fwin elos fwa akos kolyuk lun God ku elos lungse na in fungfung ke kolyuk lun met. Oasr kunokon mwomwo lasr in kasru met fwokpap nukewa in oru sulela mwo a sumwos. Tia pat, ke pal in Armagedun, kolyuk lun God fwa aola kolyuk nukewa lun met su oasr ye koko lal Setan. (Daniel 2:44; Fwakyuk 16:16) Kolyuk lun met fwa aksafyeyukla, a Togusrai lun God fwa kol fwin fwalu nufon. Ke inkanek yok, inkanek lun Jeova in kol fwa akfulatyeyuk.—Ridi Fwakyuk 21:3-5.
17. Ma paye fuka ku in kasru met fwokpap nukewa in oru sulela mwomwo lalos ke akwuk lun kolyuk?
17 Nu selos nukewa su soenna oru sulela lalos in kulansap nu sin Jeova elos enenu in pre a nunku ke me insemwomwo puspus su kolyuk lun God fwa sang nu sin metu. Kolyuk lun metu tia ku in aksumwosye ma upa ke akmas, wekunang orekma koluk lun metu in aksangengye met puspus. Kolyuk lun God fwa eisla ku akwanginyela ma koluk nukewa liki fwalu. (Sam 37:1, 2, 9) Kolyuk lun met el kol nu ke meun puspus su oasr pal nukewa. Tusruktu kolyuk lun God fwa “aksafyela meun nu ke saflaiyen fwalu.” (Sam 46:9) Aok, kolyuk lun God e fwa folokonma misla inmasrlon metu a kosro nukewa! (Isaia 11:6-9) Moul sekasrup a sral ke mongo sikyak ke pal nukewa ye kolyuk lun metu, tusruktu kolyuk lun God e fwa akwanginyela ma inge. (Isaia 65:21) Aok oasr pa guferment lun met su oasr akwuk mwomwo, ne ouinge elos tia ku in akwanginyela mas, a mise. Tusruktu, ye kolyuk lun God, met matou a met mas elos fwa insemwomwo in sifwilpa pulakin mano fokoko oana ke kuiyen met fwusr. (Job 33:25; Isaia 35:5, 6) Paye la, fwalu nufon fwa ekla nu ke sie paredais su oasr pa sifwil moulyuk nu sin met mise.—Luk 23:43; Orekma 24:15.
18. Kut ku in akkalemye fuka la kut lulalfongi la kolyuk lun God pa mwo emeet?
18 Aok, kolyuk lun God e fwa akwanginyela ma koluk nukewa su Setan el orala ke pal se el akkolukye papa a nine kiyesr se meet in forla liki God su oralosla. Aok, Setan el orala kain in ma koluk puspus ke lusen yea 6,000, tusruktu ke inkanek lun Kraist, God el fwa akwanginyela ma koluk nukewa ke lusen 1,000 yea! Sie me akpayeye mwomwo pa inge la kolyuk lun God el mwo liki kolyuk lal Setan! Oana Met Lo nu sin God lasr, kut aksol oana Met Kol lasr. Ke ma inge, lela kut in akkalemye len nukewa, ke kais sie ao, ke moul lasr la kut met kulansap paye lun Jeova, kut met su lungse in muta ye kolyuk lun Togusrai lal, a kut konkun a insemwomwokin yok in oana sie Met Lo lal. A lela kut in orekmakin pal mwomwo nukewa lasr in fwakak nu sin met nukewa su fwa long la inkanek lun Jeova in kol pa mwo emeet.
[Petsac ke sra 29]
Jeova el kol pal nukewa
[Petsac ke sra 31]
Akosten lasr nu ke kolyuk lun God oru in oasr inse sefwanna lasr fwin fwalu nufon
[Petsac ke sra 32]
Ke Kolyuk lun God, Mea Kut Lotela Ka ke Kut Ridi . . .
• Hibru 13:17?