Luti Tulik Nutum

Jeremaia El Tia Fuleak

YA OASR pal kom munasla a pulakin in lungse in fuleak ku tui?—a Oasr met puspus pula pa. Met fwusr Jeremaia el pula pa ouinge. Tusruktu, el tia lela ke ma met puspus elos fwak ku oru in oral in fuleak. Lela kut in sramsramkin la fuka Jeremaia el sie met su arlana saok nu sin God, fwinne el pulakin pa in fuleak ku tui.

Meet liki Jeremaia el isusla, Jeova God el sulella in ekla sie met palu in akkalemye kas in sensen nu sin met la elos tia akinsemwomwoye God. Ya kom etu la mea Jeremaia el fwak nu sin Jeova tokin yea puspus somla?— “Nga tia etu fuka in kaskas, tu nga tulik.”

Ke inkanek fuka Jeova el topkol Jeremaia?— Ke sie inkanek kulang tusruktu el pulaik, ke el fwak: “Nikmet fwak, ‘Nga tulik.’ Tu nu sin su Nga supe kom nu se, kom fwa som; a ma su Nga fwa sapkin nu sum, kom fwa fwak. Nikmet sangeng selos.” Efu in tia sangeng? “Nga wi kom in molikomla,” Jeova el fwak.—Jeremaia 1:4-8.

Tusruktu, oana akkalemyeyuk tari la, Jeremaia tok el munasla. Ma inge ke sripen aksruksrukyeyuk el ke kulansap lal nu sin God. ‘Met nukewa isrunyu len nufon a aksruksrukyeyu,’ el fwak. Ke ma inge el sulela in fuleak ku tui. “Nga fwa tia fwakulak [Jeova], ku sifwil kaskas in el,” el fwak. Tusruktu ya el fuleak ku tui na paye?

‘Ke insiuk, kas lun Jeova el oana sie e furur kaliye in srik, a nga totola in muteng,’ Jeremaia el fwak. (Jeremaia 20:7-9) Fwinne kutupal Jeremaia el sangeng, tusruktu lungse lal nu sin Jeova fwa tia lela elan fuleak ku tui. Lela kut in liye la fuka Jeremaia el karunginyuk ke sripen el tia fuleak ku tui.

Jeova el fwak nu sel Jeremaia in akkalemye kas in sensen nu sin met la Jerusalem fwa kunausla fwin elos tia ekulla inkanek koluk puspus lalos. Ke pal se Jeremaia el akkalemye kas in sensen inge, metu elos mulat a fwak: “Fwal nu sin met se inge in mise.” Tusruktu, Jeremaia el siyuk selos in “akos pusren Jeova.” El fwak pa: ‘Komwos fwa etu tu komwos fwin uniyuwi, komwos fwa uniye met se su wangin meta, tu Jeova el supeyume in kaskas nu sumwos.’ Ya kom etu la mea sikyuk tokin ma inge?—

Baibel el fwak: “Na met fwisrak a met e nukewa elos fwak nu sin met tol a nu sin met palu: ‘Tia fwal nu sin met se inge in mise, tu el kaskas nu sesr in en Jeova God lasr.’” Ke ma inge ke Jeremaia el tia lela sangeng in oral in fuleak ku tui, Jeova el karungunal. Lela kut in liye ke pal inge la mea sikyuk kel Uraija, siepa met palu lun Jeova, su tia akkalemye lulalfongi nu sin Jeova.

‘Uraija el palye lain Jerusalem ke kas sepana oana Jeremaia el oru,’ Baibel el fwak. Tusruktu ke Togusra Jihoiakim el mulat nu sel Uraija, ya kom etu mea Uraija el oru?— El sangeng, el tui in oru ma lungse lun God, a kaengla a som nu Ijipt. Ke ma inge togusra el supala met in sukol we a wisellu nu yurin togusra. Ke elos wisellu nu yurol Jihoiakim, ya kom etu la mea togusra koluk inge el oru?— El unilye Uraija ke kutlas!—Jeremaia 26:8-24.

Efu kom ku in fwak la Jeremaia el karunginyuk sin Jeova a Uraija el tia?— Aok, saap Jeremaia el sangeng, oana Uraija, tusruktu Jeremaia el tia fuleak in kulansap nu sin Jeova a kaengla. El tia tui. Me lutlut fuka kom ku in fwak kut ku in lotela ke me srikasrak lal Jeremaia?— Kutu pal saap upa nu sesr in oru ma God el fwak, tusruktu kut enenu in lulalfongi nu sel pal nukewa a aksol.

[Footnote]

Kusensiyuk:

○ Kain in orekma fuka God el sulela nu sel Jeremaia?

○ Efu ku Jeremaia el pulakin mu el lungse in fuleak ku tui?

○ Efu ku Jeremaia el karunginyuk, tusruktu Uraija el tia karunginyuk?

○ Mea kom lotela ke me srikasrak lal Jeremaia?